Ti bia bane ni kekeiaki n ara onimaki n aron Bauro ngke e kabureaki ao e bon reitanako naba ana kaotioti nakoia ake a reke ongoraaia irouna. Bon te Tamnei ae Raoiroi ae e kaonrakeira ngkana ti kauki nanora nakon ana buoka. Bon akea ara kona ngkana ti aki kaoa te Tamnei ae Raoiroi ba e na makuri inanora.
N te evangkerio ao e taekinaki aron moan karikan Betero ba ara moan Pope. I bon rangi n titiraki i nanou ba kanga tera ana iango Betero ngke e a tuangaki ba e nang riki ba te tia tararuaia ana tiibu Iesu? Tao e maku? ti aki raoi ataia ma eng e na bon bae n onrake n te kimareirei. Ai bon maeura! Te muioko ke te nakoa are e reke irouna bon te bai ae e karekea man tikuna ni kina Iesu inanon ae tenua te ririki. E waekoa riki rekena nakon karekean te beeba man te reirei ae e rietata. E bon rangi ni waekoa riki nakon te ririki ni karekean te nakoa n Tama!
E bon tangirira te Atua ba ti na ninikoria n butimwaai ana makuri. Ti bon uringa aki ninikorian Betero ni kan ririmwiin te Uea man toua kawaina. Iai te tai are e a ti ewenako naba Betero man te booti ao man nakonako i taari teutana te tai. Iai naba te tai ngke e aki ninikoria Betero ni kaotia ae e kina iesu. Ngkana ti ninikoria ibukin te Atua ao e na bon kukurei n anganira te Tamnei ae Raoiroi are bon ngaia te Tia kakorakora.
Ti a bane ni kaingaingai nanora man bubutia Tinara Nei Maria ba e na raonira n karaoan ara novena ni katauraoi ibukin rokon te Tamnei ae e raoiroi n te Taabati.