E raba te Uea n ana akoi nakon te mataki ae Baatimea. Bon te mataki ae e wetea Iesu man takarua nakoina ibukin buokana. Ai raoiroira man kakatekera aron ana onimaki teuaei ba ti noria n arona n tatakarua man kaotia ae e kainnanoa Iesu ai ngaia are e a wetea Iesu ibukin buokana. A ngae n katokia aomata ake i rarikina ma e aki kan muuti. E kanenea bwanaana man takarua riki ao nikaangai -" Natin Tawita nanoangaai". N tokina ao e kaeka Iesu man tua ba e na nakoina.
Ngke e tuangaki ae e na keiaki n teirake ao e na mananga man kawara Iesu ao e ienikuri n teirake man ana rabunana are bon ti ana bai ao e nakon Iesu.
E kaeka Iesu man titirakinna ba tera ae e tangiria mai irouna. Ko aki mimi n ana taeka Iesu aei? E aera ngkai e manga bon titiraki n arona aio Iesu? N te koaua ni koaua e bon ata kainnanon teuaei ba are irarikina bon Ngaia te Atua ae e atai bwaai ni kabane. Bon iai nanon Iesu n tangirira ba ti na bon taekin kainnanora nakoina ake ti bon kainnanoi raoi ba e na nanoangaira n aron itiakin nanora ni bubuti. Ngke e taekina kainnanona te mataki man tua ae e kan nooraaba ao e aki tabwara Iesu. E a bon anganna naba ngkekei boon ana bubuti.
Ti kukurei n noora aron kairan ara tataro iroun te mataki ae Baatimea ba e kaota nakoira aron butiakin Iesu ma te onimaki ae e matoa ao e nene. Ngke e tuangnga Iesu ae e na nako ba e kamaeua ana onimaki ao e teirake man kitanii ana bai ao e iriira Iesu iaon kawaina rinanon Ierutarem. Ti noora aron ana onimaki Baatimea ba e kukurei n ira Iesu iaon kawaina rinanon Ierutarem are ti bon ataia naba ba ni manangan Iesu aio ao bon iai tokina ba te Kawario, te tabo are e mate iai ibukin kamaeura.
Ti bia bane naba ngaira ni kona n takarua nakon Iesu man butiia karaoiroan matakiira ba ti kona n aki mataki raoi n aron teuaei ma matakiira aika ti mena inanona bon matakiira n noori raoiroia raora ke kaawaia ma ngaia are ti a butia Iesu ba e na buokira iai. E bia anganiira te kona ni manga matairiki nakon te raoiroi ba ti aonga ni kona naba n iria iaon kawaina rinanon Ierutarem man kaea nangin te Kawario.