Imwain ae I maroroakina taekan te mangauti ao I bon kan tiba moa tibau man te moan wareboki ae e anaaki mai iroun Tobita, makorona 3. Moan te tikiraoi aia tataro Tobita ao Taara ba ngaia aika ti anganaki ba ti na wareka aron maeuia are e kaotaki aroia ngke a taonaki n te rawawataia ma aroia ngke a tannakon te Atua man bubuti buokaia. E rangi n riinga te nano aron aia tataro uakai ba a kaota aron kabanean nanoia nakon te Atua ike a maango n tang, a tabeki baia nako Karawa man wetea Atuaia ae te Atua n tangira man nanoanga ao baeti nanoia ribuakon rawawataia ao n tokina E bon ongo te Atua man kaeka aia tataro.
Ti kauringaki ikai ba n tain rawawatara ao ti bia aki iangoa bakaburean maeura ba bon tiaki ara bai maeuira bon ana bai te Atua. Ti riai naba n uringa ae rabatara aio bon ana temboro te Atua ike e maeka iai iroun Tamneina. A kauringiira naba Tobita ma Taara ba n tain rawawatara ao ti bia uringa te Atua man tabeki baira ao ni kawaerakei nanora man wetea ana nanoanga ao ana tangira te Uea ba e na buokira man kairira nakon tangira ae e kororaoi. Ti na kawakina maeura man kabongana n neboa te Atua n taai nako ni karokoa ae e weteira ba ti na manga raonna ni maeka ma Ngaia ni nnera are e a tia nikatauraoia ibukira.
Tatukaio bon koraki ake a aki kakoaua te manga uti ao ngke a titirakina Iesu ibukin te aine are e buuniia taari ake itiman n ana tai ni maeu ao a taku: "N tain te mangauti, ngkana a uti maate, ao antai ae e na buuna te aine arei mai ibuakoia taari ake itiman ngkai e a tia ni mare ma ngaiia ni maeuna imwain matena?"
E kauringiira Iesu ae iai te manga uti ao iai te maeu ae e na roko ike ai nang akea te iein iai ba ti na maeu ba kanga anera i Karawa...ai kamaeura aio ke? Ti bia bane n ingainga ni kan kaea te maeu ae aekan aio ba ti aonga n nora aron mimitongin ma kamaeun te maeu irarikin ara Tia Kamaeu.
Kam na bane n tekeraoi ni mwanangami ni kaea te mangauti ao te maeu are akea tokina. Amen.