Kanan Tamneira...

N te bong aio ao ti kauringa ana toa St Anthony ni Padua ae te Tama ao Taokitan te Ekaretia. Karakinan te Santo aio ba boni ngaia naba temanna kain ana utu ni mitinare St Francis are kain Assisi. N aiaron St Francis e rangi ni kinaaki St Anthony n arona n nimamanei, n nanorinano ao n ongotaeka ao ni maiu n aki kaubai. N ana tai ni kabarabara ao bon te kamimi ba e kona ni katikii ao n ringii nanoia aomata ba a na manga okira te Atua. E taekinaki naba ba ngkana e taetae ao a bane n ongora naba irouna ikan te karanga.
Tariu ao maneu I taku ba te karea ae kamimi ae iroun St Anthony aio bon kaotan makan tauraoin nanon te Santo aio ni kaakea i bon irouna ba e aonga n riki n ti teuana ma Iesu inanon te Tamnei ae Raoiroi. Bon aio te rongorongo ae kakawaki nakoira n taai nako ba ti na kataia n riki n ti teuana ma te Tama ao te Nati inanon te Tamnei ae Raoiroi.
E maeka Iesu ibuakora inanon te Eukari n tabo aika bati ma ti kakoaua ba ti temanna Iesu. Ngkai ngaira ni kabane ti kammarakeaki man te burawa ni kamaiu ae ti teuana, tiaki e bon riai naba ba a na bane ni katiteuanaaki arora n Tangira?Ti kauringaki n te ewangkerio n te bong aio aron kakawakin maeuakinan te Tangira nakoia tarira ma manera n ara itangitangiri ao ara tauraoi n ikakabarabure. Bon aio ngkanne weteara ae kakawaki inanon te Eukari ao katongan Iesu inanon te komunio ba ti riai ni kairaki n riki ba te rabata ae ti teuana inanon Kristo. E riai n reke ara Tangira nakon te Atua ba kawaira n tangiriia ao ni katiteuanaki ma tarira ao manera ni kabane ao e na riki te aonaba aio ba te botanaoamata ao te kaawa ae ti teuana.