Kanan Tamneira...

N ana Ewangkerio Mataio are ti tabe ni warekia inanon te wiki aio ao ti bon tuangaki iai arora aika ti na kairaki iai inanon maiura aio nakon te kamaiuaki. A anganaki Tua ake tebuina natin Iteraera ngke a otinako mai Aikubita ao iaoni mangaia ae ababaki nakon te aba are ranga iai te 'miriki ao te karewerewe', ba kairan maiua ao buokaia ba aonga n roko n tokin kawaia.
N te bong aio ao ti a manga kauringaki ba inanon ara borau n te maiu aio ao ti na bon kaitibo ma kanganga aika a bati aika a na totokoira ba ti na aki roko n tokin kawaira are te kabaia ma te kimareirei ae akea tokina irairikin te Atua. Ma e ngae ngke ti borau inanon ara umanrianna ae rabatara aika mamara ao a mamate, ao ti a bon tia ni karekea te karatia inanon maten ao mangautin Iesu are ti a kona iai n tokanikai iaon taian maamara ao te bure. Bon ana kantaninga te Atua ba a na aki toki rabatara aikai ni mate ma Iesu iaon te kaibangaki ao ni mangauti ma Ngaia nakon te maiu ni mimitong irarikin te Tama.
N te bong are ngkoananoa ao ti tuangaki ian te Tua ba ti na aki tiri aomata. Ma Iesu e a manga tuangira ba ti na aki taetae-raia ke ni kabuakakaia tarira ma manera ba makuri aikai bon titebo ma te tiri aomata. N te bong aio ao ti a manga tuangaki te Tua are ti na aki wenenibure ao E manga reitia Iesu n tuangiira ba ngkana ti taraia aomata ma te nano ni kaibabaru ao ti a bon tia ni bure ni wenenibure. Bon te reirei ae kakawaki naba nakoira, riki ngaira aine ba ti na aki karekei ara kunikai ba kaotan rabatara n te aro ti na reke ba baai ni kabakabaka ao kairakiia tabeman nakon te bure. A na bon rawatawata riki reken kaira ngaira ake ti kairia aomata nakon te bure.