Mauri tariu ao maneu n ana tangira te Uea!
Ai karoko nanora aron ana onimaki teuae Taniera! Ti kakoaua ba e a tia n kakaonimaki Taniera n kakawakin ana Tua te Atua inanon maeuna ai ngaia are ngke e a roko te tai are e nang katuaeaki ibukin karinean ma kawakinan ana Tua Atuana ao ti kakoaua ba e a bon buokaki man iraki taangana iroun Atuana are e rangi n ongotaeka nakoina.
E anganira te reirei Taniera ikai ba ngkana ti ongotaeka man maaka uruakakin ana Tua te Atua ao e kukurei iai te Atua. Ti noria ba ngkai e a reke n te kanganga Taniera man katukaki irarikin te raian ae ti bane n ataia ba moan te kaakang ao eng e bon kainaki wiin te raian ao e katukaki irarikin Taniera ba kanga bon ti raona ke bon ti te tia kamaroro.
Ma ngaia are ti na bon riai n angan te Atua neboana, karineana, tangirana ao karaoiroana n taai nako. N ara nebonebo aio ao ti bon kaota iai tangirana.
Ti riai n tauraoi n neboia inanon ana karikibai nako; n te raoi, te buaka, te oota, te roo, te baki te nuai, te rabakau, te aki oota te aoraki te marurung, te kukurei te nanokawaki ao ai bon inanon bwaai ake ti rinanoi inanon maeura n te bong teuana ma teuana.
E riai n riki maeura aio ba te maeu n nenebonebo, te maeu n kakaitau, te maeu n kakarabaraba ao man kakamoamoa ana tangira Atuara ibukira. Ti karikaki ba ti na riki ba taan neboa mimitongin ma raoiroin Atuara.
Tina neboia n aki toki n maeura alleluia alleluia...