Te moan Kanimabong koraki bon te bong ni karinea Atiniban Iesu ma ana berita ake e anganira rinananon St Mangarita Maria (Margaret Mary). Aio naba te bong ae ana toa Santa Ingrid mai Sweden ae ngaia are e katea te moan utu n Tina ae te Dominicans iaon Sweden ao taekana ba e mate n otabaniniaki n te ota ae mimitong ao a maiti kakai ake a reke ni butiana ana ibuobuoki imuin matena.
Nanon te ara ae Ingrid iaon abana ae Sweden bon aikai: te moan benebene n nati aine, bakitoutou ao nanona teuana bon te tawaana n uteute ae e tamaroa.
N te wareboki n te Tutia n te bong aio man I-Korote (Colossians) 1: 9-14 ao e kaota iai aron ara Uea ae Iesu ae te moan benebene iaon bai nako. E kabarabaraki iai ba Inanon Iesu ao a bane n karikaki bai aika a noraki ao aika aki noraki. Te bai ae rangi ni kakawaki riki are e kabarabaraaki ikai bon aron te onikaki are e riki nakoia aomata ao bai nako, rinanon raraan Iesu n te aro are ti kona iai n tei imatan te Atua n akea barekara ao n riki ba moan benebenen nanon te Atua.
Man tebokakira iroun Iesu n rarana ae moan te Tabu ao ti kororaoi n te tamaroa imatan te Atua. Nanora ma rabatara a riki ba te tawana imatan te Atua ae koro tamaroana are E kona n kimareirei inanona Atuara n reitaki ma ngaira iai ni koaua inanon ara tai n tataro ke n reitaki ma te Atua n te tai teuana ma teuana inanon maiura.
Tao ti boraoi n iango ba akea bukin maiura ma karikara nako aon te aba ba ti kekeiakinan maiuakinan te maiu ae e tabu ao akea riki. Ti bane n weteaki nakon kimareirein te Atua i karawa n tokin maiura, are nanona ba ti bane n riai n riki n tabu ao n kekeiaki nako iai ba n tokin kawaira ao ti na riki ba taian Santa ao Santo ake bon moan benebenen te Atua i karawa n aiaron St Ingrid.
Ti na bubutia ara Uea ae Iesu ba e na tebokiira n tainako n rarana ae moan te tabu man Atinibanna ae moan te Tabu, ao n raonira ngkana ti kaniia ma n tei imatan Tamara te Atua n ara tai n tataro ibukira ma ai moarara ibukia tarira ao manera ake ti uouotia nako matana n ara tataro ibukiia. Ti na bubutia naba Iesu n te tai aio, ana karatia ba E na anganira namakinan ao ataakina ni koaua ba ti bon itiaki ao n riki ba moan benebenen nanon te Atua iaon te aba ngkana ti tei imatana n ara tai n tataro, man tebokakira n raran Atinibanna ae moan te Tabu ngkai ao n tainako.