Ti teimatoa n ongo ana kaunganano Santo Bauro inanon te wiki aio nakoia I-Korote ao nakoira naba. N te bong aio ao e a manga kauringira naba arora are ti teimatoa n tabu ao n akea kaburera ao n akea kamamaeara imatan te Atua ngkana e uotira Iesu nako matan te Atua, ngkai ti a tia n onikaki irouna ao inanona n te babetito ao n matena. E koaua ana taeka Santo Bauro are ti bure man buakaka ngkoa ma ti a tia, ao ti teimatoa n onikaki iroun Iesu ae natin te Atua ngaira ni bane. E taku Santo Bauro ba ti riai n teimatoa n aki m'ainging ao n aki kararoaira man ara koaua iroun Iesu n ara onimaki aika a nene ba n te aro anne ao ti na bon teimatoa iai inanon te itiaki ao te tamaroa anne.
A bon kakaokoro arora n weteaki iroun ara Uea ae Iesu, n aro aika a kakaokoro ao ni kabotauaki naba ma aron wetean Santo Bauro. N weteara ao ti a tia n namakina iai aron ana tangira Iesu ae kamimi. Tao e a tia ni weteira inanon kamaiuara man te aoraki, te betinako i taari, te kuri ni kabuanib'ai n ara tai ni bung, tokanikaira iaon te manibuakaki, tokanikaira n kab'akara n te ororea buura ke te manging ke te maiu n tabunea ao a bon maiti riki. Tao tia tia naba n weteaki rinanon ana kamimi ma ana karea aika e a tia n anganira. Ti noria iai ba e aki kona n tianaki aron makan ana Tangira ara Uea e Iesu ngke e mate ao ti tebokaki n rarana ma ana tangira ao e ninianako man kamaunai kab'akara aika a katannakoira mai iroun te Atua. E a bon tia ni katikiira nakon buroona ke Atinibanna ba ti na namakina ana Tangira ao ti namakina te kamaiuaki te rau, te raoi, te korakora, te wanawana, te onikaki, ...ao a e reitinako kanoan te koburakenran ni kamaiu.
N te tai aio ao ti a bon uaia ni miiakina kamimiin ana tangira te Atua ba e kataua ba e na maeka ibuakora natina Iesu ae ara Uea ao Atuara, n te Eukari ae moan te Tabu, ba ti na kona n arori baira ma nanora ao tamneira, n riki ni koaua ba ti teuana ngaira ma ngaia n tain te komunio - ba kawaira n teimatoa n raneanea imatan te Auta inanon maiura.
Ti a tei moa ao n karaua ni miiakina ngkanne arora n te tai anne n tei n raneanea imatan te Atua n tainako n ara tai n komunio.
Ti a bubutia te Atua ba im'ain ara komunio n tainako ao e na kamaiua inanora, ururingakin ana m'akuri n tangira nakoira ngke e kamaiuira iai n ara kakanga nako aika a rangi ni bati ao inanon naba ana baintangira ake a tia n reke iroura. Ti a butia naba ba e na kaonrakeira n ana Tangira ba ti na kona n tangiria ni koaua ma n kakatituaraoia n tainako. Ti a butia ana karatia ae te teimatoa n aki m'ainging n ara koaua ao ara onimaki irouna.