N te bong aio ao ti kauringa ana toa Blessed Mother Teresa mai Calcutta i India. E taku ana baebaeti teuana Mother Teresa ae katekenano; “Ngai bon te I- Albania n te rara ma kain India n rabatau, ao ngai bon te Tina n te aro ni Katorika. Ma n arou ni kaeka ana wewete te Atua nakoiu ao ngai bon kain te aonaba aio. N nanou ma tamneiu ao ngai bon ana bai ni kabane Iesu.”
E teimatoa ana tangira te Atua ibukin te aonaba n taai nako ao E kanakoira, ngai ma ngkoe ba ti na riki ba Ana Tangira ma Ana Nanoanga nakoia aika a kainnano mani kananoanga. Ti bia tauraoi ni kaeka te wewete ao te muioko aio ao ni katotonga Mother Teresa n te bai are e babane nanona iai are bon katokan takan Iesu ibukin te tangira ao tamneia aomata ni kabane ake a bua man raroanako.
I taku ngai ba e rangi ni kaeineti te iango aio ma kanoan taian wareboki n te bong aio are bon kakawakin buokaia tarira ma manera ba a na kamaiuaki. E taku Bauro n ana reta nakoia I Karatia ba e anga marakina ni kabane ibukin kakoroan marakin Iesu ibukia aomata ni kabane ba a aonga ni kamaiuaki. E kaotia naba Iesu n te ewangkerio ba e karaoaki te Tabati ibukin kamaeuan te aomata, ai ngaia are E kamaiua te tenaakibaina n te Tabati.
Ti riai n nora takan te Uea ibukin ara tangira rinanoia aomata aika a kananoanga, aika a aoraki, ao a rawawata. Ti na butia te Atua ba ti na aki bakataei taian tai aika ti anganaki ba ti na kona iai ni kaitibo ma Iesu ma ni kabebetea takana inanoia aekakin aomata aikai. Ba n aron ana taeka ni kakabaia Iesu ao e kamatata raoi kawain te kamaiuaki are bon karaoan te makuri n tangira nakoia aomata, riki ake a taka mani kananoanga man aki tabeakinaki.
E na banin raoi kamaiuara tiaki ti ngkana ti tatataro ma ngkana ti karaoa te makuri n tangira. Ti bia katotonga Mother Teresa ni mauira ni riki ba ngaira bon kain te aonaba ae ti teuana ao ti na tauraoi n anga maiura ibukin te Uea n ara makuri n tangira nakoia aomata nako. Ti na uringa naba are ara makuri n tangira aio e na aki ti kaeineti ma tarira ao manera i aonteaba ma ibukia naba tarira ma manera ake a mena n te Burikatorio ake a kainnanoa ara tataro ibukin kabarakiia ao kaitiakaia ba a aonga n roko i Karawa.