N te tairiki teuana ao e waki te katoki aoraki imatan te Eukari i Bikenibeu ao I noria ba te aoraki bon iai irouna tamnei aika a buakaka. E roko te mwengabuaka, te maroa ao te maku irou ba I a tiba ira te waki ni katoki aoraki ao I a bon tiba nora te aekaki n aoraki arei. Ai kamira ba ngke e roko te ang ni maku arei ao I wetea Iesu. I uringa ana tangira Iesu are e kabaroa nakon buroou n au tai ni moan komunio ao I a manga namakinna naba n te tai arei ngke I weteia. Bon n te tai naba arei ao I namakina te ang ae kamimi. E a bon roko naba te raoi ao te korakora ae e kamimi ngke I a manga mena inanon namakinan te tangira arei ao I a ira buakon te nebonebo ma te nano are e koburake n ana Tangira Iesu. N tokin te katoki aoraki ao e bane n namakinaki te raoi ao te rau ao ngai naba I namakina te koburake n nano n ana Tangira Iesu ae korakora ao te kimareirei. E kamaiuaki te aoraki ao ngaira ni kabane, ti bon manga bane ni katonga naba te kamaiuaki, te rau, te kimareirei ao te kakatituaraoi ma te aoraki.
Ni katoa bong ao iai n tainako ana makuri te Atua, ae moa man ae e uarereke, are e tangiria ba ti na karaoia n ara kabanea n tamaroa, man ana ibuobuoki te Tamnei ae e Raoiroi. E anganira arora ni karaoa raoi ara makuri Santo Bauro n te wareboki n te bong aio. E taku ba e rangi ni kakawaki ba ti na uringnga ba ti na maiu inanon Iesu n tainako . E taku ba ngkai e a maeka inanora Iesu, ao ti na riai ni waka inanona, ao ti na rikirake ao n matoatoa n ara onimaki inanona. Te Euangkerio e kaota aron Iesu n rineia ana abotoro ake 12 mai ibuakoia ana reirei ao e iriia ma ni waki ma ngaia n katoki aoraki, kanako taimonio ao ni kamaiu. I taku ba nake e rineia Iesu, e a kaman kinaia ba bon taan bure riki ma tao a babaina te rairannano ni koaua (n aki warekaki Iuta Itikariota)! E teretere iai ba tokanikaira iaon ara makuri bon ti Iesu ae ara Tangira are e maiu inanora ao ngaira inanona. Ngkana tiaki maiu n aron aio ao tina bon konaki ao n aki kona ni karaoi raoi muiokoara iroun Iesu.
E noria Santo Bauro ba ti na bon boo ma taian kanganga ma ti na bon aki mainging. E tuangira ba ti na aki kariaia temanna ba e na kabonganaira n ana iango aika a kewe ma ni buakaka, aika bain te aonnaba aio ao tiaki mai iroun Iesu.
Tao tera arora ni kakawakinira man taian kamane aikanne? Aikai tabeua iango ake a rio man te katoki aoraki arei aika ana kona ni buokiira:
Ti bane n ata te taeka are e kangai ba te Atua bon te Tangira. Ngkana ti teuana ngaira ma Iesu ao ti kona n namakina n tainako, te mwengabuaka , n tabo ake ti mena iai ,ao akea te tangira iai. Ngkana ti kararoaira ma Iesu ao e na memere te namakin anne ao ti na bon kai reke n taian kamane aika e taekin Santo Bauro.
Ngkana ti roko inanon te botaki, te makuri ke iango aika a kewe, a bure ao a buakaka ao akea te tangira ma te raoi iai ae ti kona n namakinna, ti na bon ti namakina te mwengabuaka mairoun teuare e buakaka. Ngkana akea namakinan ao norakin te tangira ao te raoi i mataia ao aia makuri raora, ao ti ataia ba tiaki mai iroun Iesu.
Ma ngkana ti karokoa ana kamaiu Iesu ibuakon kanganga aikanne ao ti na bon namakina te rau te raoi ao kimareirein ana Tangira Iesu inanoia ao inanora naba.
Ti a butia te Atua ba e na kateimatoaira inanon ana karatia. Ti a butia ba e na kaboui nanora n ara rairannano ni koaua ao e na kaonrakeira n ana Tangira n tainako. Ti a butia Iesu ba e na rineira ba raona ma ana abotoro ake 12 ake e rineia n te wareboki n te bong aio. Ti na kataua ba ti na iriria inanon m'akan ana tangira, n ana makuri ni kamaiu ao ni katoa bong inanon maiura. E bia riki kabouan nanora aikai, ao tao baikara riki, ba ara baintangira nakon Tinara Nei Maria n ana bong ni bung n te Kabong n te wiki aio. Ao ti a bon kakatituaraoa man neboneboa te Atua n ana tangira ibukira ngaira natina ni kabane. Ko raba te Atua.