Mauri n ana Tangira te Uea,
N te bong aio ao ti kauringa te Toa ae Aran Nei Maria ae moan te Tabu. Ai kamimira aron kakannaton te Aine ae moan te mangori ibuakoia aine nako. E boni koaua ae ti na bon anganaki naba te aro ni kakannato ngkana ti kabanei maiura aio ibukin karaoan Nanon te Uea. Karaoan Nanon te Uea bon karokoan Ueana ibuakora are nanona ba bon uruan makan te riaboro inanon maeura. Ti na namakina n taai nako te korakora ni buakana teuare buakaka ngkana ti katotonga Nei Maria n arona ni kabane n nanorinano, nimamannei, n ongotaeka ao n onimaki.
N te bong naba aio ao ti a manga kauringaki naba aron ana onimaki te mataniwi ni bubua are e tuanga Iesu ba e aki tau ba E na rin (Iesu) n umana ma ke ti taetae naba ao e na kamaiuaki ana toro are e aoraki. E boni koaua ba angin te tai ao ti kona n nanououa ngkana ti taetae n Aran te Uea ba a na kamaiuaki tarira ma manera. Ti na onimakinna n taai are E maka ana Taeka te Atua, ao E makuri te Uea inanon te Taeka are ti taekinna ngkana ti kakoaua te Uea ba E maiu inanora ao ti namakina te maiu ni katiteuanaki ma te Uea. Ti na butia Nei Maria ba e na tataro ibukira ba a na karikirakeaki ara onimaki ao riki ba ti na katotonga aron tinara n nanorinano, n nimamannei ao n ongotaeka mani kakaonimaki.
Irarikin aikai ao e bon tuangira naba arora Nei Maria n taai aikai ba ti na kabatia riki te tataro, te benetenia ao te aki mamatam. Ti bia manga kauringaki ana rongorongo Nei Maria ae moan te kakawaki aikai n te tai aio ao ti bia karakai ao ni kabatia riki ara motinnano aika a raka ibukin kabaran bure aika a rangi ni bati n te aonaba ao ibukin naba te rairannano nako te Uea imain ae e rangi ni waeremwe.