Kanan Tamneira...
- Details
- Written by Uriam Timiti
Tera arora ae ti na karaoia ba ti aonga ni karekea te maiu ae totoki? Eng ti tuangaki n te bong aio arora ae ti kona ni karaoi ba ti aonga ni karekea te kabaia ae aki totoki. N te moan wareboki ao ti kauringaki ba ti na riai n ira ao ni kawakin taian tua ba boni ngaia kaetan kawakira nakon ae raoiroi. Ao e taku te tia taramo ba a raraoi ana tua te Atua, a anga te kaboauaki ao a kairira nakon te wanawana ma te koaua. Ma e a manga reitia Iesu n te ewangkerio n taku ba ti kamaiuiaki tiaki n ti kawakinan te tua ma mani karaoan ae raoiroi nakoina. Ao ti na ni karaoa ae raoiroi nakon Iesu ngkai e aki maiu n rabata irarikira? E katereterea raoi Iesu ba makuri n tangira ao n nanoanga ake ti karaoi nakon ae te kabanea ni mangori ao ti bon karaoia nakon Iesu. Eng, ti bon riai ngkanne n noria kananoanga ma aomata aika baki man ikoaki man kabureaki ao aika mangori ba ngaia a bon rabatana Iesu ibuakora. Ti riai ni karaba te Uea n te tai ae ko n anganira ba ti na kaitibo iai te kainnano ao te kananoanga ba ngaia a karekea nakoira ara tai ni kaitibo ma Iesu i aonteaba ao a karekea naba ara tai ni kaboa muin ana tangira te Atua nakoira ae moan te bati ao e kororaoi n taai nako.
Ao aikai ngkanne makuri aika raoiroi nakon Iesu aika na karekea te kamauiaki nakoira: kawarakia ao kabarakia akana a kabureaki ao ni kabaeaki, kamarakeaia akana a baki, karabakia akana akea kunikaia, kabiraia akana ikoaki man aoraki, ao ai te tauraoi n ibuobuoki nakoia akana a kainnano man rawawata. Ti kauringaki naba ikai ba ngkana ti kitana te maiu n rabata aio ao a na motikaki taekan tamneira tiaki ni maitin ara tataro ma mani karaoan ke aki karaoan taini makuri n tangira ao n nanoanga nakon Iesu rinanoia tarira ao manera aika kainnano.
- Details
- Written by Uriam Timiti
Te rongorongo ae kakawaki ni moan Tabatin te karemo aio ba bon aio te tai ae angaraoi, aio te tai ae kororaroi ibukin te kamaiuaki, ba e a kaan Uean te Atua, Ti na bane n rairi nanora man nanomaraki ao ti na onimakina te Rongorongo ae Raoiroi. Ti bane ni kauringaki ba ti riai ni manga kabouaki inanon ara berita ni babetito are ti na mate iai n ara bure ma Iesu ao ti na manga uti naba ma Iesu inanon te mimitong. Ba ngkana ti mate ma ara bure ao nanona ngkanne ba ti kataui rabatara ba a na kaitikaki man barekan te bure ba ti aonga ni kakarekea te kamauiaki ae kororaoi n riki ba naati ngaira ni koaua iroun te Tama. Te mate ma ara bure bon te tauraoi ni kakeaira i bon iroura ao ni uouota ara kaibangaki n irira Iesu.
Inanon tain te karemo aio ao ti a manga kauringaki ba ti na oki rikaki ma nanora ni kabane nakon Iesu ao ti na nakonako ma Ngaia inanon abui te bong inanon te rereua. A na roko taian kataki ma ti na bon aki maku man raraoma ba bon raora Iesu. Ti na onimakina te Rongorongo ae Raoiroi are bon taekan ana Tangira te Atua ae moan te kororaoi ibukira are kan kaoka nakoira te aro n natinaki ba ti aonga ni kamaiuaki iroun Natina ae Iesu are na mate ioan te kaibangaki ibukira. Aio bon ana berita n akoi te Atua ma Ngaira ba E tauaninne iroura ao E aki tangiria ba ti na bainaki iroun teuare buakaka ao ti na mate. E kawakina ana berita n akoi te Atua ma ngaira n tai nako ao E na bon aki kona ni kitanira. Na ngaia are ti na kauki nanora nakon ana wewete te Atua nakoira ba ti na rairi nanora man nanomaraki ao ti na okira tamara ae te Atua ni butia ba E na nanoangaira ao ni kabarai ara bure.
- Details
- Written by Uriam Timiti
Ai ara katenua ni bong aio ni karemo ao ti karaba te Uea n kakawakin. Tariu ma maneu I butingkami n te bong aio ba ti a reitaki n aana ra tataro aio, "Nanoangai te Atua inanon kororaoin tamaroam; Inanon am atataiaomata ae akea tiana, kamaunai au kairua ni kabane; Katiakai raoi man barekan au bure ao karaneaneai i matam."
Eng bon nanon te Atua inanon tain te kartemo aio ba ti na karaoi makuri aika a na karekea nakoira te kamaiuaki ni koaua. Ti kauringaki n taian wareboki n te bong aio ba e kanga aron ara karemo ae botau ma nanon te Atua? E taku Itaia ba inanon ara tai ni karemo ao ti riai n aki karaoi baika bon oin nanora ke ni kamakuria aomata ibukin karekean baai aika ti kainnanoi. Aro ni karemo aikai a na bon karekea te untaba ma te kauntaeka ao te kairiribai. Ma ti kauringaki ba aio arora ni karemo ae botau ma nanon te Uea:- kabaran te aomata man taian makuri n iowawa ao ni babakanikawai; kabebeteaia aomata man karawawataaki ao tabeaianga; anganakin te amarake nakon ane baki; anganakia ake akea mwengaia te tabo ni katantan ao kunikainakia akana akea aia kunikai ao te aki tannako mairouia ake a kainnanoa ara ibuobuoki. Ngkana ko karemo n aron aio ao e na riki otam ba otintaai ibuakoia aomata; ao a na bane ni mao ikoakin nanom; ao a na akea te motiki taeka nakoim ao e na riki mimitongin te Atua ba te tia kawakiniko. Bon aio ngkanne arora aika ti na karoai ba ti aonga ni kaitikaki ao ni kamauiaki inanon tain te karemo aio.
- Details
- Written by Uriam Timiti
N te moan wareboki ao ti anganaki reitan buokara iaon aro ni karemo aika botau ma nanon te Atua. Ba ngkana ti kakea te aro ni ikarawawata imarenara ao ngkana ti katoka te aro n ibukibuki ao te taetae ae aki tamaroa; ao ngkana ti anga te amarake nakon ane baki ao ni karaui nanoia akana a kammarakaki ao ngkanne ti na riki ba ota aika a na otanako n urua te rotongitong ao e na riki te nubono ba kanga aiaron otan taai n te tawanou. Ao ngkanne a na kabouaki korakorara ao ti na riki ba aiaron te onaroka ae ranganako mai iai te koburake n ran ni kamaiu n taai nako. Ao tin a riki naba ba taan tia karokoa te kabouaki nakon te mwenga ae uruaki ao te botanaoamata maenako. N te ewangkerio ao ti a nora kakateken te tia riko angabai ae arana Levi are noraki iroun Iesu ao e weteaki ba e na iriria. Ngke e ongo banan Iesu Levi ao e a teirake man kitan baai ni kabane ao e ira Iesu. E tangiria Iesu ba ti na kaeka banana ni wewete inanon te inaomata ba e na oti te nano ni kukurei ae koaua ni kan kitani baai ni kabane ao n irira Iesu. Inanon weteara aika kakaokoro ao e tangirira te Uea ba ti na bane n anga ara kaeka ae “Eng” ao ti na irira Iesu ma te nano n tituaraoi ao n nano korakora. Aio bon te wewete are ti na tauraoi ni kaota kaekana inanon maiuakinan te maiu ae tabu. N te aro aio ao ti na riki ba taan kakoaua ao ni kaota te tangira are rabatanaki iroun Iesu. Bon aio naba kainnanon te Ekaretia ba aomata aika kona ni kaota rabatan te Rongorongo ae Raoiori n te aro ae koaua. Ba E kannanoia te Ekaretia aomata aika kona ni maiuna te maiu ae tabu ke taian Santo ma Santa ba taan kakoaua ana tangira te Atua nakoia aomata.
- Details
- Written by Uriam Timiti
Ai ara kaouaoa ni bong ngkai inanon ara karemo! Tariu ao maneu, I kan titirakiniko moa ba tera bukina ngkai ti riai ni karemo? I taku ba e bon reke kaekan te titiraki aio man te moan wareboki n te bong aio are bon ana kauring Moote nakoia te nati n Iteraera ba a na rinea te bai ae a taku ba e kakawaki ao te kabanea n tamaroa ibukia: te Maiu ma te Kakabaia ke te Mate ao te Kananoanga? E taku Mote ba ngkana ti maiuakina te Tua ao ni irira nanon te Atua ao e na bon reke iroura te maiu ma te kakabaia ma ngkana ti tannako mairouna ao ti na mate. Tera ae kakawaki riiki ibukim? Ko kataua ba e na bua mairoum te Maiu ao te Kakabaia ao ko na mate? E raoiroi ba ko na kabua te maiu ae aki totoki ti ibukin kaukurein te maiu ao te aonaba aio ae kai bua mani mamauna?
Ti karaba te Atua n ana Tangira nakoira inanon tain te karemo aio ba ti na manga kona n ongo banana ni wewete nakoira ae kangai, “Nakomai okirai ma nanomi ni kabane”. Ba ti maiu ngkana ti mena irarikin te Atua. Te karemo bon ara tai ni mananga mai Iesu nakon te maiu ae a tia ni katauraoia ibukira ni kabane. N te bong aio ao ti tuangaki aron kawaira ae ti na toua inanon tain te karemo ba ti na “Kaakeaira i bon iroura, Ti na uota ara Kaibangaki, ao Ti na Irira Iesu.
Ao ti na kanga ni kakeaira i bon iroura? Aio boni ngaia are ti kauringaki iai ngkoananoa n tain te mannang ba bon'taano ngaira ao ti na bon manga okira te tano'. Ti bon riai ngkanne ni iangoia ba ti na aki tautaekanaki n ana kakairi te rabata ae mamate ma ti na riai ni kairiaki iroun Tamnein te Atua ae mamaeka inanora. Ti bon riai n aki maaku n tabeka ara kaibangaki ba bon akea riki te kawai ae ti kona ni kamaiuaki iai irarikin te Kaibangaki. Ba inanon te kaibangkai ao ti kawakinaki ao ti katanaki iai ao ti karekei taian karaoiroi mai Karawa. Inanon te kaibangaki ao ti anganaki te kantaninga ibukin te maiu ae akea tokina ao kamaiuan tamniera. Ba ngkana ti mate ma Iesu ao ti na bon maiu naba ma Ngaia. Ngkana raora Iesu inanon te maraki ao a na bon raora inanon te mimitong. Te bai riki teuana ae kakawaki inanon te karemo aio ba bon akea te kaibangaki ae kona n anganira te Uea ae riaon ara kona ao irarikina ao bon ao ti na riai n rau nanora n ana motintaeka Iesu are kangai;”Ao noria N na memena irarikimi ni karokoa tokin aonaba.”