Kanan Tamneira...
- Details
- Written by Uriam Timiti
Tera aia moan bure ara karo are e tia n uota te mate nakon te aomata? Ti tuangaki inanon te wareboki n te bong aio aia bure ara moan karo are Atam ma Nei Ewa are ngaia are koreia ke e kationakoia ma ana Tangira te Atua. E taku te karaki ba aongkoa e roko te riaboro are rabatanna iroun te naeta ao e tuanga Nei Ewa ba e na kana uan te kai ba aonga ni katotonga te Atua. Ngkana ti karaua raoi n iangoia ba tera raoi oin aia bure Atam ma Nei Ewa ao e na matata ba tiaki kanakin uan te kai ma bon aia kantaninga iaan kanakin uan te kai are bon te kan riki n Atua. Bon aio ngkanne oin aia bure ara moan karo ba te bure ni kamoamoa ni kan riki n Atua ao te aki ongotaeka. Te kamoamoa ao te aki ongotaeka bon te bure n rawa n riki ba ana karikibai te Atua (creatures) ma te kan riki ni katotonga te Tia Kariki bai (Creator) are te Atua. Te bure ae te kamoamoa bon teuana ibuakon te bure ae tiritiri ke ni kamamate.
N te ewangkerio ao ti ongora aron kamaeuan te aomata ae bono taninga ao kabi n taetae are butiaki Iesu ba e na kamaeua. Ti kakoaua n te karaki ba te bai ae kamaeua te aoamata aio bon te uki n nano ao kakoauan Iesu ba te Atua ae kona ni kamaiura man kainnanora nako. Te bai ae karekea te kamaiuaki nakoira bon te nanorinano ni butimaea ae ngaira bon taan karikaki iroun te Atua ao bon ti te Atua ae kona n anganira baai ake aki banin inanon maiura ngkai bon aomata ngaira. Eng te bai ae na anganira te kamaiuaki bon ataakina ba ti kainnanoa te Atua n taai nako ni mauira ao te uki n nano ni butia te Atua ba e na anganira kanara ae ti a tau iai n te bong aei.
- Details
- Written by Uriam Timiti
Ai kamimira aron ana Tangira te Atua ibukira ba boni Ngaia ae katauraoa te kamaiuaki ibukira. Eng te bai ae moan te katekenano n aron kororaoin ana Tangira te Uea ibukira bon tauraoina ni kitana arona n Atua, arona ni mimitong man ni kakannato n te aro ba ti aonga ni kona ni karekea mairouna te kamaiuaki. E tauraoi te Atua n riki n aomata ke n ana te aro ni maiu ae mangori ao te rabata ae bubure ba E aonga Ngaia ae te Atua ni karokoa te kamaiuaki iroura. Ti nora aron te karaki n te ewangkerio n te bong aio aron te aine are te I-Tientaire n onimakina kamaiuakin natina te aine iroun Iesu, e ngae ngke bon tiaki ngaia te tia karekea te kamaiuaki ngkai tiaki ngaia te Iutaia. Ma e kanga n reke angan te aine aio ni kaitibo ma Iesu? Eng, e reke kaitibona ma Iesu ngke e karaba ni kawara te kawa ae Taire (Tyre) ba e na motirawa iai. Ngke arona ba e aki nako Taire Iesu ao e na aki kona ni kaitibo ma te aine aio. Te kauoua n rongorongo ikai ae kakawaki bon aron ana onimaki te tina aio ni bubuti te kamaiuaki ibukin natina te aine. N ana taeka te tina aio nakon Iesu n taku ba tamrurun amarake ake a baka i aontano a bon aki bakataeaki ba a bane ni kanaki, e a bon kaota onimakinan ana kamaiu te Atua ae tauraoi n anga nakoia ake a kan kamaiuaki ao a onimaki.
Eng, ti bia bane ni katotonga te tina aio, n riki ba taan bubuti ana kamaiu te Atua nakoia ake ti muiokoaki irouia. Ti na onimaki n taai nako ba inanon kororaoin ana Tangira te Atua ao bon Ngaia ae katauraoa te kamaiuaki nakoira iroun Natina ae Iesu are kataua ba E na riki n aomata n ai arora ba ti aonga ni kona ni karekea te kamaiuaki mairouna.
- Details
- Written by Uriam Timiti
Te Uea ko raba ngkai ko anganira te bong aio ba ti na manga kona n nora miterion am Tangira ibukira.
Akea ba ti a manga reita ongorara n te bong aio ni katabaninan ana karikibai te Atua. N te bong aio ao E a katabanina nakoira te Atua oin ana kantaninga iaon karikan te aomata. E taku te Atua, “Ti na karika te aomata ba bannara ao katotongara.”Tariu ao maneu e bon kamimi te kibu aio ba e kabonganaki iai “Ti” ao tiaki “I” ibukin te Atua ao aio are bon kamatoaki ni kabonganan naba te taeka ae “bannara” are kaineti ma aomata ae raka iaon temanna. Te kibu aio e katabanina aron kabarabaran te Atua are ti “temanna” ma teniman te Beretone Inanona. Aio ngkanne te kibu are kamatoa ana reirei te Ekaretia iaon te “Teniman –n-Temanna” ke te Blessed Trinity. Te kauoua ngkanne n rongorongon bon kamatatan ana kantaninga te Atua iaon karikan te aomata – ba e kakannato te aomata ibukina ngkai bon bannan ao katotongan te Atua. Bon ana kantaninga te Atua ba e na teimatoa te aomata n riki ba ‘bannan ao katotongan” te Atua iaon te aba ao n aki totoki i Karawa. Ti na butia te Atua ana karatia ao ana buoka ba ti na kona ni kawakina te kakannato ao te kororaoi are a tia ni karikira iai ba ti aonga n riki ba bannan ao katotongan te Atua nakoia tarira ma manera ni kabane. Ti na teimatoa n riki ba bannan te Atua ngkana ti teimatoa n riki ba taian kiraati ke tirotaam aika a itiaki; ao ngkana ti karaoa ae tamaraoa nakoia aomata. Nanona ngkanne ba teimatoan bannan te Atua iroura e na reke tiaki ti man aron tarara ma man karaoan naba te raoiroi ao te tamaroa are na rooti ao n ringi maiuia aomata ni kabane. Bon ti te bure ae na urua kinakin ao bannan te Atua. Aio ngkanne ana kantaninga te Atua ba ngkana ti teiamtoa n riki ba bannan ao katotongan te Atua inanon ara borau n te maiu aio ao ngkanne E na karikira n ti teuana te Atua ma Ngaia n aki totoki, Ngaia are Te Tama, Te Nati ao te Tamnei ae Raoiroi.
- Details
- Written by Uriam Timiti
Te karautaeka ba ibukin tabeu aika bati ngkoananoa ao e a bon aki tauraoin kanoan kanan tamneira. Engae n anne, I a tia ni karina bain ngkoananoa n te bong aio n ikotaki ma are na bon riai n rin n te bong aio.
Tariu ao maneu n tai ae nako ao ti maroroakina aron ana kantaninga te Atua ibukin te aomata ngke E karikia ba e na kakannato mani kororaoi ngkai e a tia ni karoaki ba bannan ao katotongan te Atua. N te bong aio ao ti a manga reita aron ongorara ni karikan te aomata are aongkoa e buabuaki raoi n te aro are na kororaoi tamaroana ao iana e karina te maiu inanona te Atua n uka te ang inanon bairin te aomata are a tia ni buabuaki. Tariu ao maneu te ang aio e kaota te maiu n Atua are karinna iroura te Atua ba ti aonga n riki raoi ba bannana ao katotongana.
Reitan ana kantaninga te Atua are ti a tuangaki n te bong aio ba ti na kawakina itiakin te nano are e tia n anganira te Atua ba e aonga n reke iroura te maiu ae aki totoki. Ao ti na kanga ni kawakina itiakin nanora? Eng bon ana kantaninga te Atua ba a na riki n itiaki nanora ngkana a raoiroi ao n tamaroa baai ake a otinako mai nanora. Ba e aki kabuakaka te aomata te bai are e rinnako nako inanona ma bon te bai ae otinako ma inanon te aomata. E bon riai ba ti na kateimatoa itiakin nanora mani kakaraoan ae raoiroi ao man ukin nanora n tai nako ni butia Iesu ba e na tebokira n rarana ae moan te tabu ba aonga ni manga itiaki nanora. N aiaron ae ti kainnanoa te tebotebo ni katoa bong ao ti boni kainnanoa naba te rairannano n taai nako ao man onimakina tauraoin ana Nanoanga te Atua ibukira ni kabarai ara bure ao ni kaitiakii nanora.
- Details
- Written by Uriam Timiti
Mauri n ana Tangira te Uea inanon te ririki ae bou, 2015. I reitai ma ngkami ni karaba te Uea ni kororaoin ana Tangira nakoira inanon ara kekeiaki n ara utu, ara botaki ni charismatic ao ai ara Ekaretia ae bubura i Kiribati, ke n taabo ake ti maeka iai i tinanikun Kiribati. Inanon rokon Kautoa i Biti n te ririki ae nako ao bon iai au bubuti nakoina ba ti nang manga waakina karaoan kanoan te website mai Biti. I aan ana kariaia Kautoa ao I a reitai nkanne ma ngkami tariu ma maneu ni butia te Atua ae moan te maaka man atataiaomata ba E na anganira ana karatia ni kona ni manga reita katanoatan te rongorongo ae Raoiroi inanon te website ao ni kona ni karaoa te muioko aio ma te kakaonimaki ao te botumaka. Au bubuti riki nakon te Atua ba E na anganira tamneina ae Tamnien te Koaua ba ti na kona ni buokiia tarira ma manera inanon kanoan ara website are “Kanan Tamneira”. Ti butiko Nei Maria ba ko na tataro ibukira ao kairira n taai inanon kawain natim ae Iesu.
Inanon taian wareboki n te bong aio ao e teke nanou n taekan karikan aonaba iroun te Atua are a kabarabaraki ba a bane n tamaraoa mani kororaoi. Kororaoin man tamaroan ana karikibai te Atua a bon kaota anuan te Atua ae kororaoi ngkai a mananga mairouna baai ni kabane, Ngaia are te Areba ao te Omeka. Te bai riki teuana ae katekenano bon aron Nanon te Atua ba e kariki baai ni kabane ibukin te aomata are bon ngai ma ngkoe ba ti na kabonganai n aron are Nanon te Atua. Te katenua n rongorongo n te karikibai ae moan te kakawaki bon ana kataninga te Atua ibukira ni kabane ba a na riki ana kariki bai ni kabane ba kanara ao nimara ao kairara nakon kororaoin te kabaia are E a tia ni katauraoia ibukira i Karawa. E bon riai ngkane ba ti na n uringa n taai nako ba ana karikibaima ana kamaiu te Atua a riai ni kairira nakon karekean te kabaia ae akea tokina i Karawa. Tariu ma maneu ti kona n nori ana kantaninga te Atua aikai n ana tataro te Berebitero ni makoron te Tutia ae te angakarea are kangai,”Blessed are you Lord, God of all CREATION, through your GOODNESS, we have this bread to offer…. it will become our spiritual food.”