Kanan Tamneira...
- Details
- Written by Beneteta
Mauri tariu ao maneu n ana tangira te Uea!
Ti kaitaua te Uea n ana babaire aika a raba mai iroura n tabetai ngkai E a manga kataua naba te kaaitibo inanon te reitaki aio.
Aron Iesu n karinanoa ao man teboki waeia ana reirei bon teuana te reirei are e rotaki iai nanoia aomata. Ba are eng antai te boss ae e kona n kariaia ba e na teboki waeia ana tia makuri? E aki rangi n nonoraki aio ma ae ti nonoria ba te boss te tia anai taabo aika a mena i moa, te boss bon te tia iriira te party ma botaki ni kakao tabeua.
Iesu e tuangira ba e aki kakannato riki te tabonibai nakon ana toka ao e aki kakanato riki teuare e kanakoaki nakon teuare te tia kanakoa.
E ngae ngke e kauringira aikai ma bon nanona naba ba e na kaonoira n arona n nanorinanona man aki tangira te mataiibukin te kan karimoaki ke te kan kinaki i moa n te botaki. A bati riki aron maeuakinan te nanorinano ma ngaia are ti bia keiaki n maeura aio ba ti na riki ni koaua ba taan iriira Iesu man ongotaeka iroun tamneina.
Ke e raonira man tataro ibukira Tinara Nei Maria riki inanon te namakaina ae Meei.
Ana raoi ao ana tangira te Uea ae Atuara iaomi ma ami utu ni kabane.
- Details
- Written by Beneteta
Kam na mauri tariu ao maneu n te Pakate aio! Ke e neboaki te Uea n ana tai ni kamaeuira n matena ao manga utina man te mate.
N te bong aio ao e taekina te manga bungiaki Iesu nakon Nikotemo are e aki rangin oota iai teuae Nikotemo. Tao N na bon aki naba ota iai ngai ngke arona ba e taekinna naba nakoiu Iesu.
Ngkana ko kan nora te Atua ao ko riai ni manga bungiaki. Ti a ota iai ba ngaia tiaki te manga bungiaki mai iroun tinara ma bon te manga bungiaki n te ran ao te Tamnei. Ti ataia ba ngkana ti babetitoaki ao ti kaitiakaki n te ran ao man anganaki te Tamnei ae Raoiroi are e kamatoa iai natinakira iroun te Atua are bon ngaia te Tamnei. Ti a karinaki inanon maeun te Atua ae te maeu ma Tamneina ike e raonira man kairiri maeura inanon tangiran ao maakakin te Atua.
Ti a karikaki ba natin te Atua ni koaua ngaira iai.
E kaotia Iesu ae bon ngaia te koburake n ran are e tatauraoi ni butimwaira man kamooira ngkana ti nakoina ma te taka. E tangiria ba ti na tan nakoina ngkana ti kan nora Tamana. E kaotia nakoira ae e na bon kaitiakiira ngkana ti nakoina ba ti aonga n kona n roko iroun naba Tamana. Iesu bon te koburake n ran ngaia ae e onrake n te maeu ao te kakukurei.
E bia riki te Pakate aio ba ara tai n kabooui takan nanora ni kan kamaeuaki iroun Iesu. Ti bia reitaanako kan kinaakina ao kan ka kawarana n te Eukari are bon ana tabo are e kateia imwain matena nakoira ba kaungaan nanora ni kan kinaa ao nikan ataia raoi ba e maeu nikoaua ibuakora.
Ti a karika naba te tai aio ba ara tai nimanga kabureira nakon Iesu are ngaia te kawai , te oota ao te koaua ba bon ngaia ae e na karokoira iroun Tamana are i Karawa.
- Details
- Written by Beneteta
Rikin Ioane te Tia Babetito bon te bai n tangira ae e kakawaki nakoia ana karo aika Takaria ma Eritabeta kioina ba a bon kara taanga aikai. Ngke e tuangaki tamana are Takaria ao e taonna te maku ma te nanououa. Ibukin aio ao e katuaeaki man kabaeaki nevena iroun ana anera te Atua. E bon reireinira ikai Takaria ba ti na waaki ma te onimaki n taai nako ao man tauraoi n taai nako n butimaea ana rongorongo te Atua ma te uki n nano ao te kariaia ma te nanorinano.
A bon bati ana makuri te Atua aika ti na bon tounako iai ao man nanokokoraki naba iai. A raba ana babaire n taainako ma ti bon bane n ataia ba n taai nako a bon bane n kakukurei te ongotaeka nako iai. Ai ngaia ae ti riai n tauraoi n taainako n kauki nanora nakon bwanaan Atuara.
E karikaki Ioane ibukin nakoana ae e na rimoan te Tia Kamaeu man katauraoia aomata nako. E kakannato nakoan Ioane aio ao e karaoa tabena ma muiokoana Ioane n te aro ae moan te raoiroi. Ti ongo ba n tokin te rongorongo ibukin maeun Ioane te Tia Babetito ao e bon tiringaki n maritire. E koreaki roroana ao e uotaki nakon natin buun te Uea Erote ba te bai n tangira nakoina.
Ao ngaira n maeura ae ti anganaki iroun te Atua, tera te muioko are ti anganaki? Ti a tia n kakaea ao man ukeria mai iroun Atuara? Ngakana ti a tia ao ti a tia n karaoia raoi ke ti tuai? Tera arora ngaira ake ti tuai n kakaea nanon te Atua n maeura aio? E aera ti a aki karekea ara tai ae bon ti ngaira ma ngaia iai ao n titirakinna ba tera bukin karikara irouna? Ti kakoaua ba n tatabemaniira nako ao bon iai bukin karikara iroun te Atua.
Ti a karika te tai aio ae moa man te bong aio ae onoua riki te bong ao e a roko te Metia iai.
I ataia ae tabeu teuana ba N na tauraoi n butimaea Iesu te teei n te Kiritimati aio ao n tuanga Tinana ao Tinara naba ae Nei Maria ba e bia buokai n tararua raoi Natina inanon te ririki ae e boou aio.
Reitai mai ikanne n anenea, "Iesu te teei..."
- Details
- Written by Beneteta
Kam na mauri tariu ao maneu n ana tangira te Uea!
I tataninga te kanukanibong ibukin butimaean te ririki 2014 ao I ururing rikaaki man kataia n manga miiakini riki ana tanigra te Uea inanon te ririki 2013. E roko irou iangoan kanoan te Tutia ngkoananoa are e a taekina iai taekan te utu ae e tabu ara Tama ae karineak,i Fr Ioteba Kanono.
I titiraki man taku - tera raoi ae i ataia n te utu ae e tabu?
Aikai au kaeka tabeua are au kantaninga ba ko a reitai naba mai ikanne n tuoa am nonori iaoia:
- kaain te utu ae e tabu bon Iesu te teei, Nei Maria ao Santo Ioteba are e kainrouaki ma Nei Maria
- bon aomata n aekakira riki ngaira ake ti katei utu, ngaia are a ngae ngke ti taku ba a tabu bon aomata naba ngaiia n aekara
- a rinanon naba te kanganga n maeuia e ngae ngke ngaia kain te utu ae e tabu; ba kam uringa are a maeka naba n aia auti n aekara, iai naba aia bwaka mwane ibukin tikuia n aia auti, a bae naba ni kaboa aia iti, aia ran, aia gas. A bae naba n riko aia n arora ibukin kauran aia aai.
- ana kanganga Santo Ioteba n te taina - e bon iangoa kitanakin Nei Maria riki ngke e ongo are e a bikoukou.
- Nei Maria, e kariki i tinanikun te mare ao e rotia te maaku, te bainrang, te mama
- e tabeaianga Santo Ioteba ibukin maurin ana utu ao e birinako n te tabo teuana
- a kaai n rawawata Nei Maria ma Santo Ioteba ngke e bua Iesu te teei inanon tenua te bong
- irarikina bon taanga aika a aki kaubai
- n tokin te tai ao e kaburea maeuna Iesu ibukira ngaira ni kabane
Ma e ngae n anne ao ti ataia ba araia 'te utu ae e tabu'. Ngaira iai te anga ae ti na kona naba n riki ba utu aika a tabu?
N ara tataro ao ti a reitira man butia Iesu te teei imwain rokon te ririki ae e boou ba E bia katauira ba ti na katotonga aron maeun ana utu ba ti aonga naba ngaira ni katabua ara utu ao man kaonotia ba te utu ibukin tangiran te Atua ao tangiraia raora.
Kam na tekeraoi ao E bia katauingkami Iesu te teei ba kam na kona naba ni maeuakina maeun te utu ae e tabu inanon mwengami aika a kakaokoro.
Kam na bane n mauri inanon te ririki ae e boou ao E bia raoni ngkami ana tangira te utu ae etabu ao ana tangira naba te Atua te teniman n temanna.
- Details
- Written by Beneteta
Bon te Uea ae Atuau ae e kairiira nakon te kamaeuaki. Tabera ba ti na taraia raoi ba I iriiria man toua mwina. E kauringira Itaia n te moan wareboki ba bon te Atua ae e tangiria ba ti na kamaeuaki. E kangai ba ngkana ti taui man kawakin ao n ongotaeka nakon ana Tua ao ti na bon kamaeuaki. Ma ti na kanga raoi n ongotaeka? Tera ae e nanonaki n te ongotaeka nakon te ana Tua te Atua?
Iai taai tabetai aika ti manga ongo irouia raora te titiraki aei- ba ti na kanga raoi n ongotaeka nakon te Atua? Te ongotaeka nakoia ara karo e bebete ba are ti bon kaai ni maeka ma ngaiia ma te ongotaeka nakon te Atua kanga e kanganga. Eng, tao e bon kanganag ibukina ba akea rabatana irarikira.
Ma ara onimaki tariu ao maneu e reireinira ao man kauringiira ba te Atua raora n taainako. Ngkana ti na ongotaeka irouna ao ti riai n kananoa ara onimaki n kakoaua raoi ba iai te Atua iroura, irarikira ke i nanora n tatabemaniira nako. Ti uringa ana taeka Iesu are e kangai - 'tai maku ba I mena irarikimi n taai nako'.
Iai naba buokara n te reirei are reken te wanawana e moa man maakan te Atua. Ti na aki maku ba e mena irarikira n taai nako ma ngaia are ti na riai naba n maakua ni karaoan baai aika a aki raoiroi ba are e a matauninga iai.
Ti bia mwiokoa te Atua ae raora n taainako ba e na tabeakina ara roro aio man karika te roro aei ba te roro n ongotaeka nakoina, te roro n kakarinerine nakoina rinanon kawakinan ana tua ao te roro ae e kukurei n muiokoana ae tataekinakin te evangkerio ae e kakukurei.
Ko raba te Uea Alleluia!