Kanan Tamneira...

Details

Written by Beneteta

Created: 22 November 2013

Kam na mauri tariu ao maneu n ana tangira te Uea! ao kam na mauri riki n te bong aio are bon ana toa Santa Titiria. A taku ba bon te Santa ibukin te kuaea n te umantabu, taan anene ma taan otooto a tataro nakoina ibukin raoiron banaaia ma karekean aia mwanewe aika a raraoi. Iai te taina inanon maeun neiei ngke e na kaienaki ma te bekan ao e ongo te anene ae moan baan te tamaroa are angkoa te anene n te kuaea i Karawa. A taku naba ba nanon arana ae Cecilia bon mataki ai ngaia are mataki tabeman a aki toki n reitaki ma ngaia ibukin buokaia.

N kanoan te evangkerio n te bong aio ao e taekinaki rokon Iesu inanon te Temboro ike e kakioia nako taan bobai man un nakoia ngke a karaoa umana ba te uma ibukin kaboakinakon baai are ti bon ataia ba a na bon iai naba bobai ake a aki rangin eti kawaia. E kauringia taan bobai aikai Iesu man tuangia ae a riai n aki karika umana ba bangaia taan ira.

N taekinan aio iroun Iesu ao I taku ngai ba e bon kauringira naba ibukin umana are bon nanora. N te tai aio ti a taraira man norira ba ngaira naba bon ana temboro Iesu. E kauringira Iesu ba ti na tirobaea aron nanora ba e uara ma ana kantaninga. Bon nanon iesu ba e na itiaki nanora n taai nako ma n raraoi ba e raoiroi naba iai ara reitaki ma Ngaia.

Ti a reitaki man butia Iesu ba e bia karikira ba ana temboro n koaua aika a raoiroi man itiaki ao man tauraoi ni kamoa iai nakoia raora ba Iesu bon raora n taai nako. E bia raoni ngkami inanon tokin te wiiki aio ao man kawakinira inanon itiakin ana tangira.

Details

Written by Beneteta

Created: 19 November 2013

Bon iai uringakin te Taramo are ngkoananoa ngkai I iangoa au tibatiba n te tai aio. I uringa ae e aneneaki ngke e warekia te aine temanna i Bikenibeu. Taekana kanga e kuri ni kangai - Nanoangai ao karikai ba te Tia Kawakini am Tua.

Ngkai I wareka rongorongon Takaio are e tamarakea te kai ae te Tikumorea ao e roko irou iangoakin nakoan teuaei are bon te Tia rikoi bakabai. Rongorongoia uaakai ao ti aki toki n ongoongo ae taan aonikai, taan karekei kaubaia mai irouia aomata. N au tai n iangoa aron teuaei n aia taratara raona n taai akekei ao eng ai aki boora ma oangina au kairiribai aio. Ma eng aio arora ti kai kairiribai, ngkana ti ongora taekan temanna ao a kea ba e a rio naba ara kairiribai.

Ma eng, ngkai I a manga uringa te Taramo are ngkoananoa ao I ataia ba e tangirai te Uea ba N na tiba naba aron kakawakin ana Tua te Atua. Ti bia bubuti n taai nako nanoangakira iroun te Uea ma katauakira ba ti na riki ba taan kawakini ana Tua n maeura aio. N kauringakira aio ao ti riai naba n uringa ae bon taan tia riko bakabai naba ngaira n arora n maeu.

N te makuri ao ti rikorikoi aron karekean rakan kaboara man kabomwi tabeua ake n tabetai ti bubuti nakon ara tia kammakuri ba e na kaboaki mwin ara makuri n 'overtime' ke ara kabanemane iaon bwaan te ka ke kabakaan kantokara n te bus ba akea te bao ae e buti. N tabetai ti karakai ara kabomi ba aonga n reke riki ara tianti. Bon ngaira taan kawakina Ana Tua te Atua n taai nako. Ti riai n maeuakina te ongotaeka nako iai man bubuti buokara ba ti na kona naba n tamarakei aroka aika a ririeta ba ti aonga n nora riki iai Iesu ao man reke ara tai n kaoa nakon mwengara ba ti na tibatiba ma ngaia aron kawakinan ana Tua inanon maeura.

E bia riki te bong aio ba kauringakira kakawakin irirakin nanon te Uea ao te ongotaeka riki nakon ana Tua.

Details

Written by Beneteta

Created: 21 November 2013

Kabara au bure tariu ao maneu ba e aikoa tia au tibatiba ngkoananoa. I bon rangi ni kan maroroakina rongorongon te aine are itiman natina n ana boki Makabe ma e a uarereke au tai I a nako naba ni kaea te Tutia i Bikenibeu n te umantabu.

Ma eng, ti a okira teutana te aine aio man mii akina ninikoriana n tei imatan ana tautia te uea are Antiokuti ao man kaungai nanoia natina man iroun teuare te karimoa ni karokoa te bina. N tokin te karaki a bon bane n mate. N katoa tai ae e warekaki te karaki aio n te evangkerio ao e bon rangi n riringaki nanou iai ba I kuri n kan kabotauai ma neiei man taku - ti bon bane n kaungaaki ba ti na riki ba Santa ma Santo ao ai maeura neiei ba ni karaoan aei ao e a bon nako naba Karawa ma natina akekei man kaina te kaeng n Santo ma Santa. N tabetai ao I kan reitaki ma neiei man butiia ba e bia tataro ibukira ngaira riki kaaro ake ti katabeaki irouia natira ake e anganira te Uea ba ana baintangira. Tera te anga ae ti na kona iai n kariria natira nakon te kamaeuaki ao ngkana nanon te Uea ba a na bane n riki ba Santo ma Santa? Au tataro ma ngkami ibukia kaaro ba a bia anganaki te korakora, te marurung ao te tangira are a na kona n manga tangiria natiia ni koaua iai ao man tiba te tangira anne man karikirakea tangiran ao makakin te Uea iai inanoia natiia ni kabane.

E bia naba reke te reitaki aio imarenara ngaira kaaro ba kakorakoraan te taanga teuana ma teuana ibukin tabeia n karikirakean aia Onimaki natiia ma kabebetean rawawatan Iesu are ngaia are e tang ibukin Ierutarem n te tai arei. N taai tabetai ao e bia reke ara tai n tiriboaea aron maeura man taraia ba baikara bwaai aika ti na katanga iai Iesu. Aaro ra ma anua ra ake a na kananokawakia iai ba ngkana ti kona n nori aikai ao ti na bon kona naba n taobarai man taraia ba a na aki kaoti n maeura. Ti a butia iesu n ana karatia ba E bia anganira te kona n kan kakakukureia n taainako.

Ti a tataro ibukin temanna ma temanna ba ti na anganaki te kona n tei matoa n ara onimaki nakon Atuara ma n aki nanotiotio ao ngkana e roko te tai are ti na kataaki iai ao ti na bon kona n teimatoa man ninikoria n kataua te mate ibukin ara onimaki n Katorika. E bia katana ara onimaki te Uea ae Iesu inanon Atinibanna man akoira ba ti aonga n te taina n maeka ma Ngaia irarikia ana aomata ake a tia n ninikoria ibukin arana.

Iesu, ko raba ibukin ranin matam ibukira...

Details

Written by Beneteta

Created: 18 November 2013

Ko raba te Uea ae Iesu ae bon ngkoe uean maeura ngke ko kamaeua te mataki are e taekinaki n te evangkerio. E takarua ni kangai te mataki: 'Iesu nanoangaai' ao ko ongo. Iesu, ko anganira te kukurei ao te kantaninga ae ngkana ti takarua naba ngaira nakoim man butiko kamaeuara ao ko na bon ongo naba.

Tao e mataki teuae ko kamaeua aio Iesu nte aki nooraaba ma ngaira Iesu ake ti mataki riki n baai tabeua ti bon butiko naba buokara n matakiira aikai ae ko bon atai. Ba ti tuangaki ae iai riki te mataki teuana irarikin are te aki kona n noori baai ni matara aika ko anganira aikai. Eng, ti bon mataki n te onimaki Iesu. A bati kabakara n nori arom n Atua aika moan baan te kamimi. Ti aki kona n noori tamaroam ma tikiraoim n tabetai ke n angiin te tai ba a tukaki ara taratara ni mamaran ara onimaki.

Iesu ti bon kan noriko n arom n mimitong ba ti uringa iai karakinan rongorongom ngke ko onikaki iaon temaunga ao are a miiakina iai aron mimitongim am reirei man rawa n ruorikaki. A tuangko ba a nang katei ami auti ni ktaeniman ba a na tiku irarikimi n tatarai ngkami man miakina mimitongim. Ngaira Iesu ti kan noriko naba ao man nora naba Tamam are i Karawa. Ko tuangira ba ngkana ti kan nora Tamam ao ti na nakoim moa ba ko na kairira. Ti ataia Iesu ba ko bon aki kona n man buakaira man kairira nakon te kabuanibai. Irakim Iesu bon te kamaeuaki ai ngaia are katauira ba ti na weteiko man muiokoiko n maeura.

Aikai ngaira Iesu nakomai riin inanora man iririra ao ai moara riki kairira nakon Tamam ba ti aonga n noria. Eng Iesu; "Nningai te Uea, N na katonga iai kororaoin te kukurei?"

Kairira Iesu ba ti kawa n baka n tekinono... ko raba Iesu Alleluia!