Kanan Tamneira...
- Details
- Written by Uriam Timiti
Iai teuana rabakaura n I Kiribati ae kakawaki ae bon te rabakau ni borau ke n ata kanoan te bong. I taku bon iai ibuakora aika a kona n ataia ba e na baka te karau ke na riringa. Ao te bai e anganira te kona ni katautau ibukin kanoan te bong bon te kona ni wareki ke ni kabarai nanon taian kanikina aika ti noori.
N te Tabati aio ao ti kauringaki ba ti a tabe n roko n tokin ana ririki te Ekaretia ke tokin te tai. Ti nang moanna n nori taian kanikina aika a na kaotia ba e a roko tokin te tai.Tao e bon e raoiroi iroura ngkanne ba ti na kaekaira ba “ti a tauraoi ngkana arona ba E a roko te tai are kauaokin Iesu?” “Ti a tauraoi ngkana arona ba e a roko ara tai ni weteaki?
Ngkai e nang roko tokin te ririki ao ngkana arona ba ti noori kanikina aika e taekin Iesu nakoira n te bong aio ao te bai ae kakakwaki ba ti na riai n aki tabeaianga ma ti na onimakina te Atua ni kororaoin ana tangira ma ana tararua nakoira ni kabane. Ma ti ataia ba ti na bane ni maneaki ao ni kawakinaki iroun te Atua ngkana ti teimatoa ni karaoa Nanona ao n irira ana tua. Ngkana e a roko te tai ae ti na bainikirinaki iai ao ngkanne ti na bon onimakina makan te Atua ao n riki ba taan kakoaua ao taan kaota te banna ni kakairi nakoia aomata ba aonga ni kamaiuaki.
Ngkana arona ngkanne ba iai te wanawana iroura ao ti bon riai n noori taian kanikina aika ti noori aika kaota tokin te tai ao ti riai naba ni waekoa ni karekea te rairannano n okira te Uea ba ti aonga ni kamaiuaki.Tariu ao maneu ti a bane ni kauki nanora nakon te rongorongo aio ao ti a bane n okira te Atua are bon ti Ngaia ae na anganira te kamaiuaki ae aki totoki.
- Details
- Written by Uriam Timiti
Ti reita maroroakinan tibangara ae anganiira te Atua man ana Taeka ae Tabu man te Boki ae te Wanawana. N te bong aio ao ti kauringaki kanoan te wanawana are bon kakoauana ba bon te Atua ae kariki baai ni kabane ao bon Ngaia ae tabeakinira n taai nako ao e babairei kanoan te bong teuana ma teuana ibukira ba t ina bane ni kamaiuaki. Tariu ao maneu bon aio te koaua ao te onimaki ae kaota reken ao maekan te wanawana ni koaua iroura. Bon aio te koaua ae na anganira te kantaninga nakon te kamaiuaki. Ba ngkana ti kakoaua ba e tararuaira te Atua ae Tamara n taai nako, ao ngkanne e na bon anganira te kantaninga are ti na bon aki tabeianaga iai ma ti na onimaki ba inanon kainnanora nako ao e bon tauraoi te Atua n ongo ara bubuti ao ni buokira.
Arora n reitaki ma te Atua bon inanon te maiu n tataro ae E kauringiira Iesu iai n te bong aio ba ba ti na aki toki n tataro ao man aki kua n tataro n onimaki ba e na bon kaekai ara tataro Tamara. E kaota kakawakin te tataro St Teretia n Iesu te Tei ngke e taku ba te tataro kanga ai aron te Uea n Aine are e ataia n taai nako ba e tauraoi n ongo irouna te Uea ke te King.
Tariu ao maneu ti kakoaua ba ti ara tai n reitaki ma te Atua inanon te kainnano ao n angin te tai ti bairea aron te Atua ni kaeka ara tataro n taku ba E aki kaekaira. Ao n angin te tai ao ti un nakon te Atua ngkana ti taku e aki kaekai ara tataro. N arora n tataro ao ti riai n taai nako n riki ba ai aroia ataei aika uarereke ake ti onimakinia ara karo ba a na kaekai ara bubuti n taai nako. Ti riai n ataia ba akea kawain te tataro ae na ti riai n iria ba e aonga ni kaekaki iai ara tataro. E taku St Teretia ba te bai ae kaakawaki ngkana ti tataro bon te kona n taekin kainnanora ma ara bubuti n te aro moan te matataa man uarereke ao te onimaki ba a na bon bane ni kaekaki ara bubuti iroun Tamara ae te Atua ibukina ba aio Anuan te Atua ae bon te Tangira Ngaia. Ai ngaia ti riai n tataro n taai nako ao n aki kua ngkai e bon tararuaira te Atua ao E na bon kaekaira n taai nako ao ti na aki tabeianga n te bai teuana ke teuana.
- Details
- Written by Uriam Timiti
Enga Abanuean te Atua ao e na roko ningai? Ti tuangaki n te ewangkerio n te bong aio ba ti na aki kona n ata te tai e na roko iai Abanuean te Atua ibuakora inanon te kororaoi. Aio bong kaua okin Iesu inanon te maka ma te korakora are na motikitaekaia aomata nakon te maiu inanon te kabaia ao te minmitonmg ae akea tokina ke nakon te mate ao te kabuakakaki ae akea tokina.
Tariu ao maneu n tabetai ao ti kona rangi n tabeaianga ibukin aki ataakin te tai are na manga roko iai Iesu ao inanon te tabeainga aio ao ti kona ni kataua iai te riaboro ba e na makuri ni kamaneira.. Ti bon ataia ni koaua ba iai uoua ana tabo ni takakaro ao ni kamane te riaboro- ba ngkoananoa ke te tai ae tia n nako ao ai te ingabong ke te tai ae na roko. Ti na tataro ni bubuti nakon te Atua ba e na kawakinira man ana mamanai nako te riaboro ao e na katauraoira ni koaua n rinnako inanon Abanuean te Atua ae ngkai naba ao ni katonga kororaoin te kimareirei ao te kabaia ae akea tokina.
Tera ngkanne te rongorongo ae kakawaki ibukira man ana Taeka te Uea n te bong aio? I taku ba e kakawaki ba ti na baina te wanawana ao ti maiu inanon te tai ae ngkai naba ae bon ana tai Iesu ti na kakoaua ba e a tia n roko ibuakora Abanuean te Atua ao e maeka ibuakora, mairoun Nei Maria are ngaia are e riki n iriko Iesu inanona imuin ana kaeka are “bon ana toro te Uea ngai, e na karaoaki nakoiu n aiaron am Taeka”
Tera ngkanne te wanawana? Bon maakan ao maamakurin Anuan te Atua inanora inanon te Tamnei ae Raoiroi. Bon aio are E berita nakoira iai Iesu imuin matena ao mangautina ba E na kaokia nakoira ba e kakoroi bukin baai ni kabane are roko ibukina i aonteaba. Tariu ao maneu e moanaki mai aonteaba katongan Karawa ke Abanuean te Atua. Ao e na reke aio ngkana e inaomata ni koaua inanora te Tamnei ae Raoiroi ae Ngaia are na katiteuanaira n taai nako ma Atua te Tama ao te Atua te Nati. Ti na bubutia tinara Nei Maria ba e na reireinira ao ni buokira ba e na kabouaki n taai nako inanora mamakuirn te Tamnei ae Raoiroi ao ba ti na kakaonimaki ni kabonganai ana karea te Tamnei ae Raoiroi ibukin karokoan ana kamaiu ma ana nanoanga te Atua nakoia aomata nako.
- Details
- Written by Uriam Timiti
N te bong are ngkoananoa ao ti kabarabaraa te wanawana ba te kona ni maiuakina maakan ao kakamakurin Tamnein te Atua inanora ao ni katonga abanuean te Atua ibuakora. Ma n te bong aio ao I kan katika ara iango nakon ataakin ao kabaraban anuan te Atua. Inanon te wiki aio ao e a reke te kuna teuana ae I a tia n ongongo inanon 2003 ba iai ara video ngkoa iai ao e bua naba n aki manga reke. Atun ao manewen te kuna aio e kangai,“Grace. Grace, Gods Grace. Grace that will pardon and cleanse within. Grace Grace, Gods Grace, Grace that is greater than all our sins.” Ao e aneneaki n conference ae aranaki ba “Women in Faith”.
Ni manga ongorau n te kuna aio ao e a bon rotai te tang ba e kaota raoi nakoiu aron anuan te Atua nakoira n taai nako ae E kan anganira ana Karatia. E onrake n te nanoanga ao te atataiaomata te Atua ao bon akea ara bure ae kona ni bubura riki ke n raababa riki, ke n rietata riki nakon ana nanoanga te Atua. Inanon kororaoin ana tangira ma ana nanoanga aio ao bon nanon te Atua ibukira ba ti na kawakinaki n taai nako inanon ana Ake ni Kamaiu are bon Rabatana ae te Ekaretia. Tariu ao maneu ti bon weteaki ngkanne nakon te wanawana ba ti na kona n nora te Atua inanon ana karikibai ni kabane ao ba ti na aki kataua ba ti na kabuai maiuira ibukin mataiakinan bain te maiu aei. Reitan riki nanon te wanawana ba bon te tatauraoi n tai nako ba e na roko Natin te Aomata n te tai ae ti aki ataia ao e na bon aki reke ara tai n okiri baai aika a kakawaki. Ma ti na bon aki kona ni kabuanibai ngkana ti maiu n taai nako inanon ana Ake ni Kamaiu te Atua are bon ana Ekaretia.
- Details
- Written by Uriam Timiti
Tariu ma maneu kam na bane ni mauri n ana tangira te Atua ae boni Ngaia ae kakawakiniira n taai nako ao man anganganira te ikeike ba ti na maiu ni katoa bong. Ti a tia ni karaua raoi ni iangoia ba e kanga raoi arora ni kaekaeka ana tangira te Uea ni katoa bong ao inanon baai ni kabane? Eng e babairei baai ni kabane te Atua ba ti aonga ni maiu inanon te reitaki n tangira ma Ngaia ao ba e aonga n reke nakoira te maiu ae onraken te maiu iroun Tamneina ae Raoiroi. Te bai ae kananokawaki ba n angiin te tai ao ti bon karika te Atua ba kanga ai aekan te 'panadol' are ti kainannoia ti ngkana iai te aoraki ke te maraki iroura. N te aro aio ao ti bon kabongana te panadol ba e aonga n toki te aoraki ke te maraki ao ngakana e toki te aoraki ao ti a maninga naba taekan te panadol. E anganira te aoraki ke te kainnano te Atua ibukina ba e kan katikira riki nakoina ba ti na maiu ma Ngaia inanon te reitaki ae kororaoi.
Inanon te kamaiuaki ae ti anganaki mairoun te Uea, tao man te aoraki ke mamara, ti bia katotonga te rebera are temanna mai buakoia tengaun ake a kamiauaki, are ngke e noria ba e a lamaiuaki man aorakina are e okira Iesu ni karaba ibukin ana kamaiu ma ana nanoanga. Ti bia aki riki ngaira ba temanna ibuakoia ake ruaman ake e kakaiia Iesu mani kangai, "A ngaa ake ruaman?" Ba te kamaiuaki ni koaua tiaki ti man tokin aorakin rabatara ma bon man kabouan ao kateimatoan te maiu n reitaki ma Iesu inanon ana karatia aika ti kakarekei man taian takamentu aika a tabu.