Kanan Tamneira...
- Details
- Written by Beneteta
Ti kauringaki aron kakannaton aran te Atua n tain te OTetamenti. A tabuaki aomata n atonga arana ba aia koaua iai a na bon mate. Ngke e titiraki Moote nakon te Atua ba tera ae e na atongnga nakoia natin Iteraera ngkana a kuba n titirakinna ba antai aran Atuana ao E kaeka te Atua man kangai-Ngai bon Teuare IAI, bon anne arau ngkai ao n aki totoki. Ti na aki manrerea aran te Atua ba bon ngaia Teuare moan te tabu arana ma ti na karinea n aki toki ba anne bon teuana mai ibuakon Ana Tua ake tebuina. Ko na karinea aran te Atua.
N ana wewete Iesu are e weteira ni kabane ba ti na nakoina riki ngaira ake ti rawawata. E kangai "Bane mai nakoiu, ngkami aika kam kua man rawawata iani uotami, ao N na motiki rawami. E reitianako man taku- Katokaa au amo iaomi ao reireiningkami irou, ba I nimamannei ma n nanorinano, ao a na reke raun nanomi.
Kanga iai aki karauan te nano n aron ana wewete Iesu aio... e taku namai ba N na motikirawami ma uota amou, ke katokaa au amo iaomi. Kanga e roko ae I kan kangai tao e bon kan kamwaneira Iesu?
Ma e rau nanou ba ngaia e aki katikuira n uota te amo aio i bon iroura. E tuangira ba ti na reirei irouna ao a na reke raun nanora.
I norai ma Iesu n amoa te ran n aron au tai n uraki ran n au kaawa are e tarika ranna ao a bane n nako ni karekei aia ran kaain te kawa n te maniba i tinanikun te kaawa. I noria n uota tinebun te baketi ba e katikia nakoina man kaniia ma ngaia ba e aonga n uota tinebuna.
Ko raba Iesu ba bon te Tia reirei ngkoe ae ko nimamannei man nanorinano e ngae ngkana I katikuko ma rawawatan te uota. Raonai n taainako iroun Tamneim ba I aonga ni kona n uota amom ma te ukinnano ao te onimaki ba ko raonai n aki toki.
- Details
- Written by Beneteta
Kam na mauri tariu ao maneu n ana tangira te Uea! Te bong aio bon ana toa Santo Benetito ai ngaia are aio karakinan te Santo aio teutana are I a tia n kakaea ibukin au tibatiba n te tai aio.
Santo Benetito bon kain Itare n te makoro ae arana Cursia. E maeu inanon te ririki 480. A kaubai ana karo ao e kanakoaki nakon te reirei ibukin karaoiroan ana ataibwai. N tikuna n te reirei ao e bwara nanona ni kan reirei n aron taraan aroia raona n reirei ai ngaia are e a nako n kaokoroa man maeka n ti ngaia inanon te nagananga teuana.
Maanna n tiku n te nanganaga tao bon nakon tenua te ririki. E tataro man tiku n ti ngaia n rikirake inanon kinaakin te Atua. Inanon te kainabwaabu ae maanna aio ao e riki bwa te aomata ae e tabu ao a bati karakinana aika e taekinaki iai arona n reitaki ma te Uea. E kaonaki n te korakora ma te karatia ae e bati ao n karakinana ao iai te tai ae a roko ataeinimwaane ake a butiia bwa e na iria man riki bwa aia mataniwi n aia tabo n Tama. Aei ibukina bwa e a bon tia nimate aia tia kairiiri. E tuangiia bwa e aki kona n iria bwa e na bon aki nako raoi aron ana kairiiri ma are a taneiai ni kairaki iai ma a bon bubuti riki ao e a iriia man kitana ana nangananga. Rimwi riki ao a noria bwa a aki kukurei n aron ana kairiiri ao a boraraoa aron kabuaana. A kaboitina nimana te wain ma ngke e nang mooi ao e karaoiroa te wain arei ao akea bwa e a rebwe tau te mwangko arei man uruaki. A kabwara aia bure ma e tuangia Santo Benetito ae tiaki ngaia ae e kan nakoia bwa bon ngaia aika a roko n kairia. E kitania man bati riki karakinan maeuna ae moan te tabu.
E bati kaririakina n tikuna n ana nangananga arei ao man kakoauaaki bwa e bati ana tai naba n kaitarai ana makuri te riaboro n ana tai n tiku n ti ngaia.
Ti taneiai n karekei mwaera aika iai iai tamnein Santo Benetito ba ti kakoaua bwa ngkana ti mwaeni mwae aikai ake a kinaaki n araia aika tenaan 'Benetito' ao ti na bonkatanaki iai mai iroun te riaboro ma ana mwakuri nako.
Ti a anga ara tataro ao ara Tutia n te bong man butiia Santo Benetito ibukin katanakira mai iroun te riaboro ao man butia Santo Benetito bwa e na bon kakorakoraira man kataniira man ana makuri nako.
- Details
- Written by Taranieta
E aki tangiria te Atua ba tina bua ni maiura aio. Ti nora aron nanona ae e korakora ni kateimatoa reken te kamaiuaki nakoira ao e karaoi ana berita. E karaoia ma Aberaam, taman te onimaki are bon tamara naba n te onimaki ao e anganira te aonnaba ba abara ae tina maiuraoi man kukurei iai. E uringa ana berita n aki toki ba te taeka ibukin roro nako are ana berita ma Aberaam ao ana motintaeka nakoni Itaaka. (Taramo 105:9)
E aki bibitaki te Atua ao e aki bibitaki ana tangira nakoira ma ngaira tiaki teimatoa n nanora ma arora nakoina ao ti tionako man te berita n natinaki aio ao ti aki toki n namakina iai te aki rau, te mwebuaka ao te kainnano n arora n tiotionako.
E a manga anganira te berita ae e boou te Atua are e na kamaiua aomata nako n rooro nako, rinanon natina ae Iesu, are e tuangira n tainako n tain te Tutia “Kam na bane ni moi iai, ba bon rarau aei, ae raran te Berita ae e kawaawanakoaki ibukia aika a maiti ibukini kabarani bure.” Mataio 26:28).
E irariki te kawai nako karawa, ma e karabaaba ibukira ara Uea ao Atuara ae Iesu ni kororaoin ana tangira, ngke e taakin baina iaon te kaibangaki ba ti aonga ni bane ni kamaiuaki iaon te aba man rangan te ran ni kamaiu man Atinibanna.
Ti a tararake ian ana kaibangaki Iesu ngkai, man katurua taran kororaoin ana tangira te Atua ibukira ma uaana aika a aki katoki nano tamaroaia aika a baroira. Aikai baika aki kona n anganira burabeti ni kewe, ma bon ti Iesu.
Iai am Berita ma te Atua? Kawakinna.
- Details
- Written by Beneteta
Kam na mauri tariu ao maneu n ana tangira te Uea!
I karautaeka n tiba manga rokou n 'Kanan Tamneira' , a bon bati angabuaka riki n rekreken kaukan te internet. Kam rabwa n teimatoan kawaran ara makoro aio ao aei ngkanne au tibatiba ibukin te bong aei.
E ringaki nanou n aron ana tangira Itaaka nakon buuna ae Reebeka. Ieinna ma Reebeka bon te bwai ae e baaireaki iaan ana bubuti tamana are Aberaam nakon ana koraki temanna. Ngke e a tuangaki Itaaka ae e a reke buuna ae nei Reebeka ao e kukurei man kaota te ongotaeka ao man tangira buuna ma nanona ni koaua. Bon Itaaka naba are e tua te Atua nakon Aberaam ba riroun Itaaka ao ena bon reitinako ana kariki man maiti kurikuri. E taakina nakoira aron te ongotaeka Aberaam ao are e reitia natina ae Itaaka. Bon moan te kakawaki ba ti na kabanea maeura aio inanon te ongotaeka nakon te Atua.
Ti karaba Tamara ae te Atua ba e aki kan katukuira ngaira kain te roro ae e boou ke kain te Nutetamenti ma e kanakoa natina ae Iesu ba e na reitanako kabutaan te aro n ongotaeka. e roko Iesu ba e na buokia taan bure tiaki ake a taku ba a kororaoi. E weteia ana reirei aika a aki kororaoi aroia ba teuare Santo Mataio are bon te tia Angabwai bon ngaia temanna are n aron aia taratara i Iutaia ao e bon aki raoiroi. E ana aia angabwai aomata ma te babakanikawai ma e bon aki tabe ma aei Iesu e bon weteia naba man tangiria ba e na riki ba temanna ana reirei.
Ti bia bane n ongo nanon aio man kauaea nakon maeura ba e bon weteira naba iesu ngaira nakon nakoara aika a kakaokoro. E tangirira ba ti na riki ba tarina ao manena ni koaua man katauira ba ti na kaaina ana Ekaretia ae e kateia. Aio te tibanaga ae moan te kakawaki ae ti riai n noria ba e rangi n tangirira iai Iesu. E tangiria ba ti na reita nako aron te ongotaeka are e kaotia nakoira n ongotaekana n ana babaire Tamana are e na riai ni mate ibukira. Ngaira ngkanne tera ara ongotaeka ae ti kona n karaoia ba ti aonga n reita nako te ongotaeka aio man karika maeura aio ba te maeu ibukin kakororaoan nanon ana babaire te Atua ibukira?
Ti a reitira n butia te Uea ae Tamara ma natina ae Iesu ba a na buokira man anganira te tangira naba te ongotaeka ni maeura aikai. Amen.
- Details
- Written by Taranieta
“ Riin n te mataroa ae e wariki; ba e warebwe ma ni mawaawa te kawai nako moone ao a mwaiti aika a toua. Ma ti tabeman aika a toua te kawai ae e wariki nakon te tabo ni kakabwaia ao te maiu ae e aki toki,” e tuangira Santo Mataio 7:13-14:
Te rongorongo aio e reita tibwangara ngkoananoa are te “maiu n tataro, bon arora ni kakeaira are e tuangira Iesu bwa ti na karaoia, ao man n tabeka ara kaibangaki ao n iriria iaon te kawai ae e irariki nako karawa.
Baai (hands) aika a teimatoa ni botaki n te maiu n tataro, ke ni makuria nanon te Uea, a karekea rinin te aomata n te mataroa ae e wariki, nakon baai aika a tatatangaki nako ni kumei kakukurein ao kaibabarun te maiu aei ke te maiu n aki muti.
Ngkana ti maiuakina te tataro ao ti booti baira ni bobaraki (rabwatara ke tamneira) ao ti kauarerekeira man kamangoriira. Ti riki ni uarereke bwa ti kamgoriira ni kakoaua makan ao mimitongin Atuara ae karikira, ao ti kai rin n te kawai ae e irariki. Inanon te kataaki ao ti bon teimatoa naba, inanon te maiu n tataro, n tein arora ni kaakeaira ao ni kauarerekeira mani kamangoriira imatan Atuara.
Ngkana a tangaki nako baira n aki tataro, ao tiaki kona n rin n te matoroa ae e irariki ba ti karib’aaki ni baira aika a uakaka, ao ni mangaongaon ara iango ma arora nako ao e tauraoi te kawai nako moone are e rababa ibukira.
E anganira te Atua te inaomata n ana tangira, ba e anga kawaira nakon abara are ti tangiria. Tiaki katotonga Rota ma tia katotonga Aberaam are e rinea te karereua.