Kanan Tamneira...
- Details
- Written by Taranieta
Ngkana ti kan irira Iesu ao e tuangira te wareboki ngkoanana bwa iai uoua te b’ai ae ti riai ni karaoia. Teuana, ba tina kakeaira boni ngaira moa. Te kauoua bon tabekan ara kaibangaki ni katoa bong, ao tia tiba kona n irira Iesu.
“Ba ane e kan kawakina maiuna ao e na kabuaa, ma ane e kabua maiuna ibukiu ao e na boni kawakinna” (Ruka 9:24).
Maiura n tataro bon arora ni kaakeaira ni koaua. Kakeaakira bon arora n ataia ba bon te aakea ngaira ao te Atua e tautaeka ni maiura, ao e mwaka. Reitakira ma Iesu ni katoa bong inanon te maiu n tataro bon ngaia are e karekea ara kona n tabeki ara kaibangaki ao n iriria, ba ti maeka inanon ana Karatia te Atua are e kabaroa nakoira inanon ara iraorao anne ma Ngaia ni katoa bong ao ti kona iai, uotakin ara kaibangaki. Te maiu n tataro naba e anganira ba tina tituaraoi n ara makuri ke uaan ara makuri, ao n ara tataro ma uaan ara tataro ake ti anga ibukia ake a kona ni buokaki iai.
Ngkana ti kawakin maiura n kaakea te maiu n tataro ao tina kabuaa maiura ao maiuia ara botanaomata. Ngkana ti kabuaa maiura ibukin Iesu ao ti bon kakeaira n arora n taromauria Aturara ao man katorobubua ma n nanorinano ni katoa bong nakon Iesu,, ao e na kawakina maiura.
A maiti ara unnaine ma ara uinimane aika ti kakoaua ba a kaakeaia ni katoa bong inanon te maiu n tataro. Te kamimi ba aki mamaninga ao a teimatoa inanon ana Karatia te Atua, man kakabaiaki ma aia utu!. N te bong aio ao e tuangira Santo Ruka ba e a bungiaki Santo Ioane te Tia Babetito. Ti bia bungia riki ke ni kaboua ao ni kakorakora riki te maiu n tataro iroura ma ara utu ao ara community, ao ni katotonga maiun Santo Ioane te Tia Babetito, ae te maiu n tataro ke te nim ni koaua ma Atuana ni katoa bong, ni karokoa matena..
- Details
- Written by Beneteta
"...Ao ngkami kam taku ba antai ngai?" aei bon ana titiraki Iesu nakoia ana reirei. Ngke a kaeka ao a kaoti aia kaeka tabeman are a taku: "A taku tabeman ba ngkoe Ioane te Tia Babetito ao tabemana a taku ba tao Eria, te burabeti. Ma e anga ana kaeka Betero ae moan te raoiroi. E kangai: "Bon ana Metia te Atua ngkoe". Ma e aera ngke e tua Iesu nakon Betero ba e na aki taekinna nakoia aomata? E rawa n ataaki ae bon ngaia ana Metia te Atua? ke e aera?
N te tai aio naba ao e bon taekina naba matena Iesu nakoia ana reirei. E taku ba e riai Natin te Aomata ba e na bati ni maraki, ao e na kakeaki irouia unimane ma mataniwia berebitero ma taani koroboki. E kaotia naba ae e na manga uti imwiin te katenuua ni bong. A bon bane n ongora ao tao tera aia iango ngke e kaongoraeia aio? A na tera naba ngkami ami iango iai? E na rawawata nanomi n ongo ae e na taonaki n te rawawata ma te kananoanga ao e na bati ni maraki?
A na tera ami kaeka nakon Iesu ngke arona ba ko mena ibuakoia reirei aikai? Ai kawara Iesu n arona n baebaeti man ata te bai ae e na reke nakoina ma e bon akea te bai ae e kona ni karaoia n totokoia. E aki kona n totokoi baai ake a kaman baireaki ibukina ba ti ataia ae ngkana e totokoi ao ti na bon aki kamaeuaki. Ai bon rabara ma aron ana tangira ibukira ngaira ni kabaneia.
E bon anganira ara anga ni kaboa te tangira aio ngke e kangai- Ngkana iai ae e kan rimuiu, ao ke e kaakeaa boni ngaia, ke e tabeka ana kaibangaki ni katoa bong, ao ke e irirai.
Ko raba Iesu n anganakira ara tai ni katituaraoi ibukin kamaeuara, anganira te kona n teimatoa inanon karaoan ae nanom ao ni iriiriko ni katoa bong. Katauira ba ti na kona ni uota ara kaibangaki ni katoa bong.
- Details
- Written by Beneteta
Are e atuna te karaki n te bong aio bon Maria Matarena ma arona ni okira Iesu ao man bubuti kabaraan ana bure. Bon taan bure ngaira te Uea ao ko raba ngkai ko kaota aron butimaean te tia bure iroum. E ninikoria Maria Matarena ao e aki tabe ma aia karabakau aomata riki ngke a bon ata arona ma maeuna. E oti n ana taeka Timon ngke e kangai ba ngke arona ba bon te burabeti teuaei ao e na bon ataia ba antai te aine ae e kawaria aio. E tuai ataia TImon ae bon te Atua Iesu?,
Ma aio arora ngaira aomata, ti tauraoi n taraia raora ba aekara ngkana a keiaki ni karaoa te eti ao riki gkana a kataia n maeuakina te raoiroi. I ataia, ti aki toki n tauraoi n taraia taan nako ni komunio ba antai? Ni matakura n te rain ao a warewarenako ara iango ao e roroko n tabetai ae e kangai te titraki- aeee!, e a komunio teuarei ao I a tia n ongo ae e ... ke ti a manga rairaki nakon are i rarikira ao n taetae n kangai aree, e a komunio tebaerei? tao e a tia ni mate buuna ni mare ke n tabetai ti a aki taetae ma ti a ti kakui naba bairira ao man kotea te tia komunio n bairira arei nakon raora are i rarikira!
Ti kamoamoa Maria Matarena ba e koro aron ana rairannano ao ekaboaki muina n te kukurei ba e kabaraaki ana bure ao e butimaeaki iroun iesu.
E aki rawa te Uea ngkana ti rairi nanora man nanona raoi ara raira n nano. Ai bobuakara ana boiarara neiei ao man kabanea ni kabaroa iaon waen Iesu. E bon tuangira ikai ba n tain te raira n nano ao ti na bon motikia mai inanora ba tera are e rangi n tauai man kararoaai mai iroun au Uea bon ngaia are N na bubuti katokana.
E na bon aki rawa te Uea n buokira man mamarara ao E na bon rangi ni kukurei ngkana ti nanona raoi naba ara motinnano nakoina riki ngkana ti bubuti kabaraan ara bure ao ti ataia ni koaua ba ti riai n katoka karaoan te bure are ti bubuti kabaraana. E matoatoa ma e aki n ana karatia te Atua ma ara tangira nakon Atuara are e na kaotia ara onimaki.
Ti a butia te Uea ae moan te atatai aomata ba e bia kabarai ara bure ni kabane ao man buokira ba ti na manga aki okiri ba ti aonga ni kona ni koaua raoi n ara motinano ni kan tangiria iaon bwaai nikabane. Ti a reitira ma Santa Maria Matarena ba e na tataro ibukira man anganira te nano n koaua ni kan kabarai ara bure nakon Atuara ma nanora ni koaua ti aonga n aki manga okiri ara bure ake ti karaoi man karawawata iai nanon te Atua. Tataro ibukira Santa Maria Matarena.
- Details
- Written by Beneteta
Ana taeka ni kauring Santo Mataio n te makoro 6:19-23 are e tuangira ao man kauringira iai ba ti na aki kaikoi kaubaira ibukin te maeu iaon te aba aio ma ti bon bia kaikoi kaubwaira nakon te maeu are i Karawa. E taku ba bukina ba akea manenan kaubaira iaon te aba. Kaubai iaon te aba aio bon kaubai aika akea manenaia ba a kai bua. A kai mka man rara ao man are a na bon tiku ba akea manenaia ngkanne. Kaubain te maeu aio bon baai aika a na kai kimoaki mai iroura irouia raora. Ma ti na riai ni kaikoi kaubaira ake ti na kona n uoti nako Karawa. Uotara nako iai bon arora ni kona ni karaoa te raoiroi. Teimatoara ni keiakina karaoan te kabanea n raoiroi n taai nako inanon maeura bon ngaia ae e na karokoira irarikin ara Uea i Karawa. Boni ngaia naba ae e na kaikoi kaubwaira imwain kitanikin te maeu aio, kaubwaira ake ti bon kainanoi ibukin te roko n ara kouru are kaikoan ara kaubwai ibukin te maeu ma ngaia n taai nako.
E kangai naba Santo Mataio ba 'ike e mena iai kaubaira ao a bon mena naba iai nanora!
Ti kauringaki raoi naba iai ana taeka Iesu are e kangai - e na rangi n bebete riki rinin te te kamero inanon bangabangan te neiran nakon rinin te kaubai inanon te Aba n Uea are i Karawa!
Ma ngaia are taia kaubwain maeum n te maeu ae e na roko, tiaki ibukin te maeu ae akea manena aio.
E reitanako ana kaunganano ma ana reirei Santo Mareko man taku ba otan rabatara bon man matara. Ba te mata kanga bon te taura ibukin te rabata. Ngkana e raoiroi ana noraaba te mata ao e na bon raoiroi te ota man matam ao e na otanako nakon rabatam ni kabane.
Ti a butia Iesu ba e bia anganira te uki n nano nakon ana kauring Santo Mataio ao ti riai ni bane n ingoa karauan ara kaubwai ibukin te nako Karawa ma tiaki ibukin te tiku ni maeu iaon te aba.
- Details
- Written by Beneteta
E mataai nanou n te boton iango are e tuangira evangkerio n te Kaonobong ao ngaia are I a kan tibaia teutana ...ngkana ko kaenga nakon te Uea ke ko motika nanom ba ko na karaoa nanona ao e raoiroi ba ko na iria nako man kakoroa raoi nanona. Bon rabata ngaira aika ti mamaara ma moan te raoiroi ba ti na kekeiaki.
Iai ara tia ibuouboki ba ara Santo ma Santa aika a bati ake a tia n maeuakina kakoroan nanon te motinnano nakon te Uea ni maeuia. A tia n noora aron te maeu ma te Uea ao a tia ni kaotia nakoira ba e bon kona n reke ae ti na kakoroi bukin nako ara motinnano ma te Uea. Ngkai a kona ngaia aika bon aekara naba ao ti riainaba ngaira ni kona. A tia nikaotia nakoira ba ngaia e bon rangi n nanokawaki te Uea ngkana ti aki kakoroi nanon ara motinnano nakoina ke ara berita. A tuangira naba ba e bon rangi ni kukurei naba te Uea ngkana ti kakoroi nanoia n aroia ngaiia ae a tia ao a kakukureia nanon te Uea man maeka ma ngaia i abana i Karawa.
Iai riki naba ae e a tia n rangi n nano matoa ao man ongotaeka nakon ana motinnano nakon te Uea... ngke e kangai Eng ao e a bon taua naba man aki manga atubitaki. Bon tinara Nei Maria. Ana Eng tinara bon ngaia ae e karika aron te aonnaaba ae ngkai. Tera ae e na riki ngke arona ba e kangai Nei Maria nakon Santo Kabiriera- I rawa ke I tuai tauraoi?
Ti na tataro man bubutia Iesu ba e na anganira ana karatia ba ti aonga ni kona n kaenga ma nanora ni koaua nakon te Atua ae Tamana are ngaia ae e bairei aron maeura ni kabane. Ri nanon Tinana ae Nei Maria are bon tinara naba ao ti a bubuti naba ba e na tataro ibukira Tinara ba ti aonga ni kona n katotongnga man kona nikangai Eng nakon te Uea ma nanora ni koaua.