Kanan Tamneira...
- Details
- Written by Uriam Timiti
N ana Ewangkerio Mataio are ti tabe ni warekia inanon te wiki aio ao ti bon tuangaki iai arora aika ti na kairaki iai inanon maiura aio nakon te kamaiuaki. A anganaki Tua ake tebuina natin Iteraera ngke a otinako mai Aikubita ao iaoni mangaia ae ababaki nakon te aba are ranga iai te 'miriki ao te karewerewe', ba kairan maiua ao buokaia ba aonga n roko n tokin kawaia.
N te bong aio ao ti a manga kauringaki ba inanon ara borau n te maiu aio ao ti na bon kaitibo ma kanganga aika a bati aika a na totokoira ba ti na aki roko n tokin kawaira are te kabaia ma te kimareirei ae akea tokina irairikin te Atua. Ma e ngae ngke ti borau inanon ara umanrianna ae rabatara aika mamara ao a mamate, ao ti a bon tia ni karekea te karatia inanon maten ao mangautin Iesu are ti a kona iai n tokanikai iaon taian maamara ao te bure. Bon ana kantaninga te Atua ba a na aki toki rabatara aikai ni mate ma Iesu iaon te kaibangaki ao ni mangauti ma Ngaia nakon te maiu ni mimitong irarikin te Tama.
N te bong are ngkoananoa ao ti tuangaki ian te Tua ba ti na aki tiri aomata. Ma Iesu e a manga tuangira ba ti na aki taetae-raia ke ni kabuakakaia tarira ma manera ba makuri aikai bon titebo ma te tiri aomata. N te bong aio ao ti a manga tuangaki te Tua are ti na aki wenenibure ao E manga reitia Iesu n tuangiira ba ngkana ti taraia aomata ma te nano ni kaibabaru ao ti a bon tia ni bure ni wenenibure. Bon te reirei ae kakawaki naba nakoira, riki ngaira aine ba ti na aki karekei ara kunikai ba kaotan rabatara n te aro ti na reke ba baai ni kabakabaka ao kairakiia tabeman nakon te bure. A na bon rawatawata riki reken kaira ngaira ake ti kairia aomata nakon te bure.
- Details
- Written by Uriam Timiti
N te bong aio ao ti kauringa ana toa St Anthony ni Padua ae te Tama ao Taokitan te Ekaretia. Karakinan te Santo aio ba boni ngaia naba temanna kain ana utu ni mitinare St Francis are kain Assisi. N aiaron St Francis e rangi ni kinaaki St Anthony n arona n nimamanei, n nanorinano ao n ongotaeka ao ni maiu n aki kaubai. N ana tai ni kabarabara ao bon te kamimi ba e kona ni katikii ao n ringii nanoia aomata ba a na manga okira te Atua. E taekinaki naba ba ngkana e taetae ao a bane n ongora naba irouna ikan te karanga.
Tariu ao maneu I taku ba te karea ae kamimi ae iroun St Anthony aio bon kaotan makan tauraoin nanon te Santo aio ni kaakea i bon irouna ba e aonga n riki n ti teuana ma Iesu inanon te Tamnei ae Raoiroi. Bon aio te rongorongo ae kakawaki nakoira n taai nako ba ti na kataia n riki n ti teuana ma te Tama ao te Nati inanon te Tamnei ae Raoiroi.
E maeka Iesu ibuakora inanon te Eukari n tabo aika bati ma ti kakoaua ba ti temanna Iesu. Ngkai ngaira ni kabane ti kammarakeaki man te burawa ni kamaiu ae ti teuana, tiaki e bon riai naba ba a na bane ni katiteuanaaki arora n Tangira?Ti kauringaki n te ewangkerio n te bong aio aron kakawakin maeuakinan te Tangira nakoia tarira ma manera n ara itangitangiri ao ara tauraoi n ikakabarabure. Bon aio ngkanne weteara ae kakawaki inanon te Eukari ao katongan Iesu inanon te komunio ba ti riai ni kairaki n riki ba te rabata ae ti teuana inanon Kristo. E riai n reke ara Tangira nakon te Atua ba kawaira n tangiriia ao ni katiteuanaki ma tarira ao manera ni kabane ao e na riki te aonaba aio ba te botanaoamata ao te kaawa ae ti teuana.
- Details
- Written by Uriam Timiti
I karaba te Uea n ana babaire nakoira ba ti na kona n namakina ana Tangira ae moan te bati taai nako ao n nori arora n aki kororaoi ni kaeka ana Tangira n te bong teuana ma teuana. Ti bane ni kakawaki imatan te Uea ba boni Ngaia ae karikira ibukin ana kantaninga ae kakakwaki. Innaon tain te mamara ao ti riai n tauraoi n reitaki ma tarira ao manera ni butia aia buoka ma aia tataro.
Tariu ao maneu, e boni koaua ae bon iai ana babaire te Uea ae moan te kakannato ibukira n tatabemanira ao ti na bon namakina te kukurei n taai nako ngkana ti ataia ba ti kakaraoa ae Nanona. Te bai ae kakawaki riki bon manga karekean te rairannano ni koaua ba ti aonga ni manga nim ma Ngaia ao ni maiu. Ba are maiura iaon te aba bon te tai ae uarereke ao ti aki kona n ataia ba e na toki ningai. Ngkana ti kani kaota te wanawana raoi inanon maiura ao ti na bon rinea are te kabanea n tamaroa ibukira ae bon te maiu ma Iesu. Irarikin anne ao bon iai naba tibangara ae kawawaki ibukia natira ma kainabara ao ara utu ba bon kairakia ao anganakia maiun te Uea are inanora. Bon aio naba te bai ae na baireaki iai motikan taekara ngkai boni ngaiia ake ti muiokoaki ba ti na kawakiniia, kanga ai aroia tibu.
Ti na tauraoi n taai ake ti namakina iai te mamara ni manga kauki nanora nakon te Uea are E karebwerebwe n taai nako ni mataroan nanora. Ti na baina te nano ae nimamannei ao nanorinano ni butimaea ana tangira ma ana kamaiu Iesu. Ti na tauraoi n teirake ao n oki nakon Tamara ao ni Karekea kawaran te takarementu ni Benetenia ba ti aonga ni kaitibo ma Iesu n te Eukari ao n te komunio.
- Details
- Written by Uriam Timiti
Bon iai ana kauring Tamara te Bobe inanon ana Taeka te Uea n te Kauabong ba ti riai ni karimoai baai aika uoua ngkana ti kan riki ba taan tataekina te Rongorongo ae Raoiroi nakoia aomata, n aron ae kantaningaia te Atua. Baika uoua aikai bon te aki kaubai ke te maiu ni kainnano ao te maiu ni kan neneboa te Atua.
Inanon maiura ni kainnano ao ti kakoaua iai ba bon akea te bai ae ti kona n anga i bon iroura ma bon ti te Atua are Ngaia are anganganira baai ni kabane n akea boona ao aio ti riai naba ni manga anganako nakoia tarira ma manera n akea naba boona. Are nanona naba ba bon te Atua ae na katauraoi ao n anganira baai ni kabane aika ti kainnanoi. N aron are taekinna St Bauro ao e taku ba arora n tataekina Abanuean te Atua n akea te koora ke te tirewa, bon ngaia ae ti na kona iai n taekina te Rongorongo ae Raoiroi n te aro ae na rangi ni mataata nakoia aomata. Ti riai n namakinna n tai nako ba inanon kabutan te Rongorongo ae Raoiroi ao ti na ataia ae ti anga ana karatia te Atua nakoia tarira ma manera. Ti riai n aki kakaea kamoamoakira inanon kabutan te Rongorongo ae Raoiroi, ke n taku ba bon ngaira taan wanawana iaon ana taeka te Uea. Kabutan te Rongorongo ae Raoiroi e riai ni waaki man te nano ni karabaraba ao ni kamoamoa nakon te Uea ibukin ana kamimi aika moan te bati inanon maiura. Are nanona ba man ara kakaitau aio ibukin ana baintangira te Atua nakoira ao boni ngaia ae na kammakuriira ba ti na manga anga te baintangira aio nakoia tarira ma manera n akea naba boona.
E bon riai ngkanne iroura ngaira kain te charismatic ba ti na ururinga te reirei aio inanon kabutan te Rongorongo ae Raoiroi ba ti riai ni karaoia inanon te maiu n aki kaubai ao ni kainnnano ao te nano ni kaan neneboa te Atua ibukin ana baintangira aika moan te bati nakoira. Kabutan te Rongorongo ae Raoiroi bon anganikiia tarira ma manera te karatia n kona n riki naba ba natin te Atua ao ni karekea te maiu ae Onrake n te Maiu.
- Details
- Written by Beneteta
Kanga iai te mamanikangare buaka iroun ana anera te Atua are Rabaere! . E tuangia Tobita ma natina are Tobia: " I kanakoaki ba N na kataii ngkami..." ao imwina e manga tuangiia ba e kanakoaki naba ba e na kamarurunga Tobita ma buun natina are Tera. Ao e tia ao e a tuangiia ae ngaia bon Rabaere ana anera te Atua bon ngaia temanna mai i buakoia anera aika itiman aika a aki toki n tei n tauraoi i matan te Uea ae e mimitong. Aei e taekinaki n te moan wareboki n te bong aio.
E kanakoaki Rabaere iroun te Atua ba kaekaan aia tataro are e nako man nanoia. Kam bon bae n tia n bubutia te Atua kainnanomi ao man tataninga boona ke?...tabeman a bon tia ni kaboaki aia tataro ao tabeman a tuai. A bon bae naba n tia n rau nanomi ba kam oota ae ngaia baai ni kabane a bon bane n nako mai iroun te Atua ma ngkoe are ko tuai n oota iai; ana tera am iango ngkana ko a tuangaki ae bon te Atua ae E baairei akannemoa ibukim n te tai aio!?
E tuangira Santo Mareko n ana evangkerio n te bong rongorongon Iesu are e bua mai irouia ana karo: Nei Maria ao Ioteba. Ti kaongoaki n te rongorongo ba a kua ni kakaea natiia Maria ao Ioteba inanon tenibong. E a bua Iesu! Ma ngkana ti bon karaua n iangoia ao eng e bon koaua ba e bua Iesu?
Mmm... ngaia a taku naba ba e kuneaki n ana auti Tamana. Ngkana e mena te nati n ana auti tamana man karaoi baai aika a bane nanona iai ao e na kanga ni bua?Ti a ongora riki... N iangoan baai ake ko a aki koaua iai, baai ake ko raraoma iai ke ni maaku iai kataia tarai ao noori ni matan te Atua ae Tamara are ngaia ae e katauraoi baai nako ibukira. Ngaia ae e taua taekan maeura n te bong teuana ma teuana.
Baai aika ti aki koaua iai ao E bon koaua iai te Atua; baai aika ti raraoma iai ao E bon aki raoraoma iai; baai ake ti maaku iai ao E bon ninikoria iai te Atua ae Tamara ngaia are ti na aki raraoma nibaai nako ke aomata nako ake ti taku ba a na bua mai iroura bon te Atua ae E atai muiokoia.
Ti bia bane n onimakinna man kakoaua ni koaua ba Ngaia ae E na kaokira nakoina ba ti na maeka man kukurei irarikina n taai nako.
Ara tataro nakon Iesu are e maeka n ara temboro aika nanora ao ara bubuti nakoina ba e bia ikoikotaki ni kabane inanon Atinibanna ae moan te Tabu n akea ae e na bua, Amen!