Kanan Tamneira...
- Details
- Written by Beneteta
E tataraira te Uea ae te Atua mai ieta ao e nora aonteba ao e kangai, ah uoua karinan aomata akekei ba iai aika a kamaeuaki ao iai aika a aki. Ti bon ataia ba e bon bae n wiwingare man kaonaki n te kukurei n matakuakinia nake a kamaeuaki. E noria ma ai anga karea aika a boiarara, aia tataro man nebonebo aika a tangiraoi, aia bobotaki man bukamaru, aia anene ni kukurei ma aia alleluia ao e rotaki nanona n te kimareirei ma bon iai naba uakee e taraia ma te nanoanga ao te rawawata.
Aikai naake a bon aki kamaeuaki. E rawawata nanon te Atua irouia ma e ngae n anne ao e bon ingainga naba nanona man tabeaianga ba a na bon riai ni kamaeuaki koraki aikai, ma ai kangangara! Eng tariu ao maneu, e bon bae n iangoa aron kamaeuakiia te Atua ao tao e na bon kangai naba - tera ngke a bane koraki aika a kamaeuaki aikai n boti nanoia ao man iangoa katikan temanna imwiin temanna nakoiu ba a aonga ni bane n roko irou au tiibu n akea ae e bua.
Bon Iesu te Tia Kawakin Tiibu ae e raoiroi. E taekinaki n te evangkerio ba antai mai irouia taan kawakin tiibu ae ngkana e bua aia tiibu ao a kitanna man aki kubaria? E karaki te Tia Koroboki n te evangkerio ae Santo Ruka ao e taekina aron te Tia Kawakin Tiibu ae e kawakiniia tebubua tiibu ao ngke e bua temanna ao e nako ni kakaea n uaa rekena. Ngke e oki ao e aonnangaia ao man weteia raraona ba a na kanabuaka man kukurei ba e a reke ana tiibu are e bua.
Iesu are te Tia Kawakin Tiibu ae e raoiroi bon Ngaia te tangira ao te nanoanga.
Ti kauringaki ba ngkana ti karaoi kaairua ao e aki ribaira te Uea. E bon rangi n kukurei irouia nakee a karaoa te kairua ma a aki naba tabara ni kabarai aia bure ao man nanomaraki n aia bure ao a okira te Uea. Ma bon iai riki kukureina ae moan te bati ngkana e taraia Tiibu ake a kamaeuaki man kawakinaki raoi ba akea aia kanganga ao e katukuia i bon irouia ba e na riai moa n nako ni kakaeia ake a bua ba e roko ba e na kamaeuiia ake a bua tiaki ake a kawakinaki raoi man mwengaraoi.
Ti a tataro ba e bia karikira Iesu ba ana tiibu aika a ongotaeka ao a itangitangiri i marenaia ba ti aonga ni kona ni buokia raora ao man kairia nakon tangiran te Atua n taai nako. Amen
- Details
- Written by Beneteta
E taku te karaki ae n te moan Wareboki ba e taniaki neiere Taara iroun te anti ae Asmodeus ao bon te anti aio are e kakamateia buun neiei ake itiman ake a bane ni mate n tairikin aia mare. Bon neiei naba are e kan iein ma ngaia Tobita are e tuanga te anera Rabaere ba e na tuanga taman neiei are Raguel nanona. E kariaia taman neie Taara ao e tua ba te iein aio e bon tia ni baireaki taekana mai Karawa ao e karaoiroia taan mare. E anga naba ana karaoiroi tinan Taara ao e tuanga natina ba e na ninikoria man butia te Atua ba E bia anganaki te kukurei n onea mwin te rawawata are e a tia n taonna ibukin arona ae te bumate.
Moan te kamataai riki ngke a tia ni mare taanga aikai ao n tairikin aia mare ao e teirake Tobita man kauta Taara ba a na tataro man karaoiroa te Atua ao ni butia ba e na kainaomataia man te kabuanibai nako. A kaai n tataro ao n tokin aia tataro ao a atonga Amen uoua te tai ao a baka ni matu.
Ti kauringaki ikai n aroia taanga aikai ba taanga ake a tatataro ma aia utu ao a na bon kateimatoaki. A tia n taonaki n te rawawata Tobita ma Taara inanon maeuia ma a teimatoa n nakon te Uea ma te bubuti n taai nako ba a na nanoangaaki ao e ongo te Atua aia bubuti ao e akoiia.
Ngke e tuangiia taan koroboki Iesu taekan kakannaton tua ake uoua ake 1) tangiran te Atua ma nanom ni koaua, tamneim ni koaua ao korakoram ni kabane ao 2) are bon tangiraia raom n aron ae ko bon tangiriko ao e taku te tia koroboki ba irakin ao karaoan nanon tuua aikai a bon materaoi riki nakon karaoan karea ni kabuokaki ke aeka n angakarea riki tabeua. Kabonganaan te tangira are ti bon ataia ba e anganira Tamnein te Atua are e mamaeka inanora n tabetai ao e manga bon rangi ni kanganga uotana nakoia aomata. N tabetai ao a rinorino nanora ba ti baireia ba antai ae a riai n ono n te tangira anne ao antai ae a na aki.
Ma e ngae n anne ti bia keiaki ao n ururingnga ba 'Ngaira, ti tangira, ba e tangirira moa te Atua" 1 Ioane 4:19. N akean ana buoka ma ana tangira ao bon akea arora, ma ngkana ti uringa tangirara irouna ao ti na bon kona...
Ana tangira te Uea iaomi tariu ao maneu!
- Details
- Written by Beneteta
E tikiraoi ana taeka te Uea n te moan wareboki n te bong aio ba e kaongoraira karakinan teuare Tobita ngke e taonaki n te mataki. Kanga iai naba kangarena ngkai e a bekaraki matana n te man ni kiba! N ara ware ngaira ao tein ae e riai n reke te tekeraoi irouna ba are ti kangai ngkana e bekariko te man ni kiba ao e na bon reke iroum te tekeraoi n te aro teuana ke teuana. Ai ngaia aei bukin kanga kangaren te bai ae e riki nakon Tobita.
Ma ni bon arona e bon kananoanga ma tekena teuae Tobita. E rotaki n te mataki imwin te aro aio ao e tiku m arona aio inanon 2 te ririki. E bon rangi n tekeraoi Tobita iroun teuare Akai ba e tabeankinna inanon te tai aio. Tibangara man te wareboki aio ba ti riai n tauraoi ni buokia raora ake a rootaki n te aorki n aron aio. N ara utu aika a kakaokoro ao bon iai ibuakora aika a rotaki n te aoraki n aron nako aio ai ngaia are ti na bon karabakauira n nora aron aia kanganga man kauki nanora nakoia man tangiria ao n tauraoi ni buokia n taainako.
Bon iai riki tibau ae I noria n aia kamatoa taanga aika Tobita ma buuna ae Anna. E kamatoa n ana reke Tobita ae te man te koti e bon kimoaki man rawa n ongora nakon ana kabarabara buuna ae bon te man ae e anganaki ba kanuangan ana makuri irouia nake e itiu aia kunnikai. N norakin Tobita ao bo te mane ae e tua matoa ma ngke arona ba e kan kaota te nanorinano ao e kona n karaua banaana man taetae raoi aoman kaeka raoi buuna ba e aonga n oota raoi ae ngaia e bon eti ana taeka ae te koti arei bon te bai n tangira nakoina. Ao tao neie Anna e kona n taetae raoi riki man aki kaboa te taetae ni kamaraki ma ana taeka naba n maraki n nano! E na rangi nr aoiroi riki ngke e kabonganai taeka aika a na kabebetea te nano. Irarikina e koreaki n Taeka n Rabakauae e kangai : " E taona te un te taeka ae e bebete; e kaurarakea te un te taeka ae e kamaraki". (Taeka n Rabakau 15:1)
Ai bon kamira nanoia aomata n ana tai Iesu ao ni bon taai naba aikai! E aera ngkai e a bon aki totoki nanora ni kan rabakau riki nakoin Iesu? N taai akekei ao a kan kamanea Iesu Baritaio ma ana aomata Erote ao a titirakinna ni kangai: '...E riai ke e aki te angabai nakon te Embera n Roma?" E kauringira Iesu ae ti bon riai n iri nanon tua nakon taabo nako ake ti mena ke maeka iai ba anne raoi etina ao n te tai naba anne ti riai naba n ira nanon ana tua te Atua. Ma ngaia are e kangai Iesu iai-Angan Kaitara ana bai ao angan te Atua ana bai ".
Ke E raonira te Tamnei ae Raoiroi ba ti na kona n ata ae e eti nakon maeura ngkai iaon te aba ao nakon maeura ae e na roko i Karawa ikekei.
- Details
- Written by Beneteta
Imwain ae I maroroakina taekan te mangauti ao I bon kan tiba moa tibau man te moan wareboki ae e anaaki mai iroun Tobita, makorona 3. Moan te tikiraoi aia tataro Tobita ao Taara ba ngaia aika ti anganaki ba ti na wareka aron maeuia are e kaotaki aroia ngke a taonaki n te rawawataia ma aroia ngke a tannakon te Atua man bubuti buokaia. E rangi n riinga te nano aron aia tataro uakai ba a kaota aron kabanean nanoia nakon te Atua ike a maango n tang, a tabeki baia nako Karawa man wetea Atuaia ae te Atua n tangira man nanoanga ao baeti nanoia ribuakon rawawataia ao n tokina E bon ongo te Atua man kaeka aia tataro.
Ti kauringaki ikai ba n tain rawawatara ao ti bia aki iangoa bakaburean maeura ba bon tiaki ara bai maeuira bon ana bai te Atua. Ti riai naba n uringa ae rabatara aio bon ana temboro te Atua ike e maeka iai iroun Tamneina. A kauringiira naba Tobita ma Taara ba n tain rawawatara ao ti bia uringa te Atua man tabeki baira ao ni kawaerakei nanora man wetea ana nanoanga ao ana tangira te Uea ba e na buokira man kairira nakon tangira ae e kororaoi. Ti na kawakina maeura man kabongana n neboa te Atua n taai nako ni karokoa ae e weteira ba ti na manga raonna ni maeka ma Ngaia ni nnera are e a tia nikatauraoia ibukira.
Tatukaio bon koraki ake a aki kakoaua te manga uti ao ngke a titirakina Iesu ibukin te aine are e buuniia taari ake itiman n ana tai ni maeu ao a taku: "N tain te mangauti, ngkana a uti maate, ao antai ae e na buuna te aine arei mai ibuakoia taari ake itiman ngkai e a tia ni mare ma ngaiia ni maeuna imwain matena?"
E kauringiira Iesu ae iai te manga uti ao iai te maeu ae e na roko ike ai nang akea te iein iai ba ti na maeu ba kanga anera i Karawa...ai kamaeura aio ke? Ti bia bane n ingainga ni kan kaea te maeu ae aekan aio ba ti aonga n nora aron mimitongin ma kamaeun te maeu irarikin ara Tia Kamaeu.
Kam na bane n tekeraoi ni mwanangami ni kaea te mangauti ao te maeu are akea tokina. Amen.
- Details
- Written by Beneteta
E mataai nanou n rongorongon Tiraka, are man uarerekena ao e a kamanmatennanoa te wanawana. Ti kauringaki ba ngkana ko bubutia te Atua ao e na bon anganiko. Te wanawana bon ana baintangira te Atua ae akea boona. Ti bia bane n matennanoia naba inanon maeura man karekea ba kakanoan ara bubuti nakon te Uea.
E kaota aron wanawanana Iesu n te evangkerio mai iroun Santo Mareko. N rokoia mataniwia Berebitero, Taan Koroboki ao unimwane n te aro n te temboro ao a titirakina Iesu ba e nako mai ia m'kana ni karaoi kakai. Bon bukin raoi aia titiraki ba a bon kan kamanea Iesu man karekea bukinana ma kabuakakana. Ma kioina ngkai bon te Atua Iesu ao e bon atai nanoia. N tokina ao e a kabongana wanawanana Iesu ni manga katea ana titiraki nakoia man taku- "tuangai antai are e muiokoa Ioane ba e na babetito?"
A tii bakanibaba naba ni kauntaeka imarenaia ni kangai: "Ngkana ti ba te Atua, ao ane e na manga titirakinira ba e aera ti ngke ti aki kakoaua Ioane. Ti aki kona naba n taku ba te aomata." A taekina aio ibukina ba a makuia aomata kioina ngke a abane n taku ba te burabeti Ioane." N tokin aia kauntaeka ao a motikia ba a na kaeka n anua n tikuareei man taku- "tiaki ataia!"
E aki reke kaekaan aia titiraki mai iroun naba Iesu ba are e a aki naba kaekaia kioina ngke a taku ba a aki ata boon ana titiraki. Ngkanne ao are a aikoa naba kona n kamwanea Iesu!
Iai kakongoraan te aomata ae iai te wanawana irouna ba e rabakau n rawerawenako ni kakaai ana karabakau aika a na bo baaia iai taan kaitara!
Iesu, reireinira ni matennanoa te wanawana ao nikabongana raoi n tangiriko ao n tangiriia raora.