Kanan Tamneira...
- Details
- Written by Beneteta
Tibangau ae a reke man wareboki n te bong aio are a anaaki mai irouia I Roma ao mai iroun Santo Ruka bon te taeka ae te tangira. N te moan wareboki ao ti kauringaki iai ba ti na tangira te Atua ao ti na tangiria raora nako. Ti tuangaki ba ti na tagira ma nanora ni koaua ao man aki kekewe. E kaotaki nakoira ana aron ana tangira Nei Maria nakon te Atua ngke e kariaia ana rongorongo nakoina n rineia ba e na riki ba tinan Natina ae Iesu. E reireinira tinara Nei Maria aron te kaeka n tangira nakon te Atua ngke e kangai nakon ana rongorongo are e uotia Santo Kabiriera- "Ana toro te Uea ngai; ke e karaoaki nakoiu n ai aron am taeka.'
E reireinira naba arora n tangira nakoia raora tinara Nei Maria ngke e ienikuri nakon tarina are Nei Eritabeta ba e ongo ae e a bikoukou neiei ao ai bon ana kaonoua n namakaina are e a tokaria. E tiku irarikin ai tarina aio Nei Maria ni karokoa ae e a tia ni bung nei Eritabeta. Ti riai n uringa ba n te tai naba aio ao e a bon bikoukou naba Nei Maria. Nora aron ana tangira ma ana nanoanga Tinara ae Nei Maria ngke e aki ongea kainnanona naba ngaia n aron rawawatana ma rikin natina ni birotona. Ti bon bane n oota ngaira aine ake ti a tia n uouotiia natira inanon biritora. I taku naba ba ti bon uringi aron moan namakaina n bikoukou are iai n taai tabetai ae ti aki kan makuri ke ti aikoa kan amarake ba a aki rin karara.
N am iango, e aki namakini baai aikaiNei Maria? Te kan matu n te ingabong man rawa n nako man te kie bon ngaia naba uotan te bikoukou ke te kan mamatu n taai nako. Ti kakoaua ba e bon rangi ni bati taben Nei Maria ngke e raona Eritabeta ma ibukin nanona n tangira ao e anganaki te korakora ma te karatia iroun te Atua ba e na kona aon makuri aikai.
E aki ti angan Nei Maria te karatia te Atua ma e angan naba ai tarina are Eritabeta ai ngaia are ngke e kamauraki iroun Nei Maria ao e taku ba e kakatei natina i biritona man onrake n te kimareirei ao e kangai - " ekanga naba n reke irou ba e na kawarai tinan au Uea? E angan Eritabeta te Atua te kona n kina ae Nei Maria bon tinan Natin te Atua.
E kangai ngkanne Nei Maria ba boon ana karaoiroi ma ana taeka Eritabeta aika a raraoi, E neboa te Uea tamneiu, ao e kimareirei nanou iroun te Atua ae au Tia Kamaiu...
Ko raba Tinara Nei Maria ba man am Eng ao ti a kamaiuaki.
Ibukin naba aio ao e anga ana anene n karabaraba Tinara Nei Maria
- Details
- Written by Beneteta
E raba te Uea n ana akoi nakon te mataki ae Baatimea. Bon te mataki ae e wetea Iesu man takarua nakoina ibukin buokana. Ai raoiroira man kakatekera aron ana onimaki teuaei ba ti noria n arona n tatakarua man kaotia ae e kainnanoa Iesu ai ngaia are e a wetea Iesu ibukin buokana. A ngae n katokia aomata ake i rarikina ma e aki kan muuti. E kanenea bwanaana man takarua riki ao nikaangai -" Natin Tawita nanoangaai". N tokina ao e kaeka Iesu man tua ba e na nakoina.
Ngke e tuangaki ae e na keiaki n teirake ao e na mananga man kawara Iesu ao e ienikuri n teirake man ana rabunana are bon ti ana bai ao e nakon Iesu.
E kaeka Iesu man titirakinna ba tera ae e tangiria mai irouna. Ko aki mimi n ana taeka Iesu aei? E aera ngkai e manga bon titiraki n arona aio Iesu? N te koaua ni koaua e bon ata kainnanon teuaei ba are irarikina bon Ngaia te Atua ae e atai bwaai ni kabane. Bon iai nanon Iesu n tangirira ba ti na bon taekin kainnanora nakoina ake ti bon kainnanoi raoi ba e na nanoangaira n aron itiakin nanora ni bubuti. Ngke e taekina kainnanona te mataki man tua ae e kan nooraaba ao e aki tabwara Iesu. E a bon anganna naba ngkekei boon ana bubuti.
Ti kukurei n noora aron kairan ara tataro iroun te mataki ae Baatimea ba e kaota nakoira aron butiakin Iesu ma te onimaki ae e matoa ao e nene. Ngke e tuangnga Iesu ae e na nako ba e kamaeua ana onimaki ao e teirake man kitanii ana bai ao e iriira Iesu iaon kawaina rinanon Ierutarem. Ti noora aron ana onimaki Baatimea ba e kukurei n ira Iesu iaon kawaina rinanon Ierutarem are ti bon ataia naba ba ni manangan Iesu aio ao bon iai tokina ba te Kawario, te tabo are e mate iai ibukin kamaeura.
Ti bia bane naba ngaira ni kona n takarua nakon Iesu man butiia karaoiroan matakiira ba ti kona n aki mataki raoi n aron teuaei ma matakiira aika ti mena inanona bon matakiira n noori raoiroia raora ke kaawaia ma ngaia are ti a butia Iesu ba e na buokira iai. E bia anganiira te kona ni manga matairiki nakon te raoiroi ba ti aonga ni kona naba n iria iaon kawaina rinanon Ierutarem man kaea nangin te Kawario.
- Details
- Written by Beneteta
A bon bae n wiwingare naake a reke aia tai n ongora Wareboki n te Tutia n te bong aio!
E kauringira Tiraka ae E na anganira te Atua kanuangara 7 te tai ngkana ti karaoi baikai:
Kawakina ana tua te Atua ao e na rangi ni kukurei iai iroum. Okira te Uea ao butiia kabaraan am bure. Anganna am baintangira.
Tai tautia te Atua n an bai, anganna raraoin am bai nako, anganna ma kukurein nanom ba e rawa ngkana ko mamanaia.
Kareani baai nako aika e a tia n anganiko te Atua ba n karaoan aio ao ko kaotia iai ba ko kukurei n ana baintangira aikai nakoim. Karaba n baai ake e a tia n anganiko. Baai n aron aikai: maeum, te marurung ao te ikeike, am utu, mwengam, kanam ma nimam, am bai nako; am makuri, am konabai. E kamatao Tiraka ae E na bon kanuanganiko te Atua n am kaburebai aikai itiua te tai.
Ti karaba te Uea ba e a manga bon tuangira riki nanona aio iroun Santo Mareko n te evangkerio ngke e manga kangai- E na anganingkamite Atua kanuangami tebubua te tai.
E riki n atonga aio Iesu ngke e kaeka ana titiraki Betero are e kangai- Ti a tia ni kitani baai ni kabane ao man iriiriko. I taku ba a na bon ringaki Berebitero, Tiina ao Taari n ana taeka Iesu ae e kangai - "I tuangi ngkami ae e koaua, te aomata nako ae e kitana ana auti, ke tarina, ke manena, ke tinana, ke tamana, ke natina, ke abana, ibuku ao i bukin te Rongorongo ae Raoiroi ao ena bon anganaki, n te maiu aei, tebubua te tai maitin ana auti, tarina, manena, tinana, natina, abana, ao taiani bainikirinaki naba; ao e na anganaki naba te maiu ae e aki toki n te tai ae e na roko."
Ara tataro ao ara bubuti ba a na rawata riki aika a na ongo ana taeka Iesu aio ba a aonga n rawata riki ara ataeinimane ao ataein aine aika a kariaia te wewete nakon te nakoa ae e tabu ba aonga ni kona naba ni mabiao n te bai n tangira ae e na anganiia te Uea n 100 maitina.
Ao ngaira ake nikirana a bia bane naba n reke tibara n te nakoa ae e tabu aio ike ti na kona naba n butia te Atua ba e na katabui maeura aikai ao man anganira te kona n ana karatia n karaoi naba tibara n taetaekina taekan te Rongorongo ae Raoiroi ike ti nako ao man mena iai.
- Details
- Written by Beneteta
Iakoba ao Ioane bon taari ake natin Tebetaio ao bon ngaia naba ana reirei Iesu raoia nake tengaun. N te evangkerio mai iroun Santo Mareko ao e tuangira ikai te tia korea te evangkerio ba taari aikai a tabeka ai bubuti nakon Iesu ba a na kariaiakaki n tekateka n nuuka Iesu inanon mimitongina. A bon nanona ngkana e a tekateka Iesu n ana kaintoka n uea ao ngaia a na bon raonna temanna i angaataina ao temanna n angamaingina.
Ai bon tikiraoira n neia ae a bubuti ibukina! Ngkana ti bon iangoia ao ngaira aekakira ara bubuti nakon Iesu? N angiin te tai ao ti bon kan karekei taabo aika ti na noraki iai ba a ririeta ke taabo ae ti na atongaki iai ba ti bakuaku ke taabo aika ti na noraki iai ba ti kakannato. Ti tangiri taabo ake ti na katereaki iai i moaia raora.
Ni maeura aio ao ti bane n tangiria ba ti na karawatai ara bwai, maitin am bwai ao ko bon atongaki iai ba ko mwengaraoi n te maeu aio. Ma iai ana kauring Iesu nakoira ae ti riai n aki katabei nanora ma kaubwain te maeiu aei. E tuangira ba ti na taia kaubwain te maeu ae e na roko. Eng e bon rangi ni kanganga ao maroaka ae e kangai iai Iesu - bon moan te kanganga iroun te kaubwai ba e na kona n rin n te aba n uea, ekangai naba, ba e bebete riki iroun te kamero ba e na rin ni bangabangan te neiran nakon ae e na bebete iroun te aomata ba e na kitana kaubaina.
Te kauring nakoira iroun Santo Mareko ba ti na aki ukora te kan tautaeka ke te kani kakannato n aekaia taari ake natin Tebetaio ma ti riai n riki ba aia tabonibai aomata ngaira n arora n tauraoi ni kani buokia ao ni beku ibukiia. Ba e raoiroi riki te angaanga nako nakon ti te bubutimaai baai.
- Details
- Written by Beneteta
N ta moan wareboki n te bong aio ao e bon kaungiia akana a mamara Tiraka man tuangiia ae e tabeakiniia te Atua. E kangai: E noori ara makuri ni kabane te Atua. Ti aki kona ni karabaira mai irouna. E kangai naba ba e kukurei te Atua iroun ane e titiuaraoi nakoia raona ao e na bon anganna kanuangan ana makuri. E kauringiira man tuangira ae ti na aki kaan taninga kaboan ara makuri n tituaraoi nakoia raora ma ti na ti anga ma nanora ni koaua ba bon Ngaia ae te Atua ae e na karaoi karekean boon ami makuri nako. E bon kamataata naba Tiraka ba e aki toki n tauraoi te Atua n butimaira man nanoangaira ngkana ti kawaria ibukin ara rairannano nakoina. Ngkana iai ara kaairua ao ti riai n oki nakon te Atua man butia ana nanoanga. E bon bati n tangira ao e akoi Atuara.
N te evangkerio ao e titiraki temanna te rorobuaka ba tera ae e riai ni karaoia ba e aonga n reke Karawa irouna. E bon ata te bai ae e riai ni karaoia ba ngke e tuangnga Iesu ae e riai ni kawakin ana tua te Atua ao e taku - Iesu ba kai I bon kakaraoi akanne. E rangi ni kukurei Iesu irouna ba e ataia ba bon te aomata ae e raoiroi. Ma ngaia are e manga tuangnga ae e na nako ni kabooi nako ana bai ao man anga manena nakoia kainnano. E kunea te rorobuaka aio ba bon moan te kanganga ae e na karaoa aio kioina ngke bon moan te bati ana bai ake e a tia ni karekei inanon maeuna.
Kai eng, ngaia moan te kanganga ba ko na kanakoi am bwai riki ake ko a tia n kaikoikoi man karekei n angkoa bon korakoram. Aio ana kanganga te rorobuaka aio. Kabonakoan ana bwai ake e a tia ni kaikoikoi. Ao ngaira tera ara kangnaga ngkana arona ba e anganiira ana kaeka Iesu ao man kaoira ba ti na iria? Ti nora ana kanganga te rorobuaka aio ao ngaira a na titebo ara kanganga ma ngaia ke bon iai riki aika a onoti nakoira?
Ti na uringnga ba baikara nako ara kanganga ibukin kan irirakin Iesu bon baai aika akea kangangana irouna ngaia ae Atuara, ba e kangai tao e kanganga iroura ma irun te Atua bon akea te kanganga! Ti a nakoina ba e na buokira iai.