Kanan Tamneira...
- Details
- Written by Beneteta
E taku Taekan Rabakau ba e a kaman karikaki te Wanawana imwain karikan baai, e a kaman riki te Wanawana imwain karikan karawa ma aonnaba. E kan kinaaki te Atua inanon te wanawana. Ngaia are ti kaungaki ba bon te Atua ae E katikira nakoina ba ti na ataia. E anganira te wanawana ngkana ti bubutia ba ti aonga ni kona ni kina ao man kakaea kinaakina inanon te wanawana aio.
E taku naba Santo Ioane ba a bati riki ana taeka Iesu ae e kan tuangira ma ae ti na aki kona moana ngkana e tuangira a na aki bane inanon booki ma baai n rawerawe. E tuangira Iesu ae e na kanakoa te Tamnei ae Raoiroi ba e na karaua ni baairei ana taeka te Atua nakoira. Bon te wanawana te Tamnei ae Raoiroi.
Ti na aki maaku n kata te ninianako taekan teAtua ba ti aonga ni kona ni kina raoi ao man kona n reitaki raoi ma ngaia. Ngkai ana Toa te Teniman n Temanna te bong aio ao ti bia bane n ataia ae akea tian rongorongona. Ti bia bane ni kan ata taekan te Teniman Temanna n ai aron Santo Aukitino are e kabanea ana tai n ukeukera nako taekana. Ti ataia ae iai tian marawa ba e tuangira te Anera are e kaekaki iroun te Santo aio ba e aera ngke e a kan kabanea n itiia ranin marawa nakon te marua are moan te uarereke. Ti bon uringa naba ana kaeka te Anera are e tuanga Santo Aukitino ba eng iai tian marawa ao tao e bon kona n bane inanon te marua arei ngkana arona ba e bon teimatoa n kaikiiki te Anera ma tian te Atua are Teniman n Temanna bon akea ngaia are ti na bon uringa aio ma ti na bon aki naba kabarai nanora ba iai naba te taeka teuana ae e kangai: Ngkana ko karikirakea kinakin Taekan te Atua ao ko na bon rangi ni kabatia naba karaoiroakim.
Ti a tataro man butia te Atua ae Teniman nTemanna ba ti bia bane n matennanoa kan ataakin ao kinaakina inanora.
- Details
- Written by Beneteta
"Kariaia ataei ba a na nakomainakoiu, ao tai tukiia, ba Uean te Atua bon aia bai akana ai aroia".
Ai kabaiara ataei ngkai a akoaki iroun Iesu. Ko mataai ke ko aki ngkoe ae te ikawai? Tao ko na bon bae ni kangai ti bia riki ba ataei ao n aki ikaikawai!
Tera raoi ae e mataai iai Iesu n aroia ataei ao tera ae e kukurei n akoia iai? E kangai Iesu a na kaaina Karawa nake ti tebo nanoia ma nanoia ataei aikai. Ao tera aron nanoia ataei ae ti na riai n katotongnga ba ti aonga ni baina te abanuea ae Karawa? Mmm kai iai ataei aika a rangi ni kamoamoa nanoia n taai tabetai, iai aika a nanorieta naba man rawa n kaetaki ao a katuua te tang man toki tangiia ti ngkana e iraki nanoia, iai naba aika a moan taai n mamataai man kakarabai baai ke n rangi ni bubuabeka naba... kanga ti kona naba ni kangai a aki rangi n kaokoro ma ikawai.
Ma tao ae ti kona n noria ba iai kaokoroia a babanga ni karabai aroia ke nanoia. Ngaira ikawai ti rabakau n 'fake' ma aron ara namakin ke arora. E tangirira te Atua ba ti nanakoina ma nanora ao arora are n te tai aei ae ngaia ae a karaoia ataei n taai nako.
Ngaira ikawai ti kona n karabai ara kairiribai man rabunna ni matara aika a raoiroi ao e nako te aomata ao ti kaoti buakakan matara ma ataei ngkana a riba temanna ngkai ao a bon kaotia naba. Ngkana a manga rangi n kukurei iroun temanna ao a manga bon kaotia naba n aroia n kukurei ao n aki kairiribai.
Aroia naba teuana ataei ae moan te tikiraoi ba a aki mwimwiina uniia. A ti un ngkai ao ngke e toki ngkekei ao a manga tangira naba ma ngaira ikawai ti mwimwiini bwaai. Ti katuka te un inanora man karekea tain manga katinakoana n te tai teuana ngkana ti amanga kaaitibo kaua ma are ti un ma ngaia.
Ai bia aron nanora ataei n taai nako ba ti aonga n aron ae e atongnga Iesu, ti aonga ni baina te aba n uea are i Karawa.
- Details
- Written by Beneteta
N te bong aio ao I kan tibai uoua boto n iango aika a reke irou inanon te naan wareboki; are te moan wareboki ao te evangkerio.
1. Ti na aki onimakina te m'ane ao kaub'aira: E bon taetae te Uea iroun Tiraka man kauringira ba ti na aki taku ba a bon tau arora n ara kekeiaki ba bon ngaira ae ti karekei baai ibukin maeura. E bon kangai ni koaua Tiraka - bon te Uea ae te Atua ae ngaia ae a nako mai irouna baai ni kabane. Akea ara kona ngkana arona ba e aki kariaia te Atua ba a na reke ara bai, ara makuri, ara utu, ara auti ao baai riki tabeua ake a kanakoraoa man kaukureia maeura. Ti na bon aki onimakina ara mane ae e reke ngkai ke kaubaira aika iai iroura ngkai. E kona te mane ao te kaubai n karekenakoira man mamanaira ba ti aonga n reke taati man aki tabeakina ara reitaki ma te Atua ae Atuara.
2. N te evangkerio ao e kauringira Santo Mareko ba ti na keiaki ni kaitara te kaririaki ba ngkana e kairira baira nakon te bure ao e tuangira ae e raoiroi ba ti na koreia man karenako ba e raoiroi riki te nako Karawa ma toaraan baira nakon ae a na toa raoi ao a na kabuetataaki n te ai ni moone. Ma bon aio ae e tangiria te Atua mai iroura ke tera raoi ae e nanonna Santo Mareko? I taku ba ngke arona aio ao aomata nako ake a roko i Karawa a na bon bane n toara ni kabane!
Ti ataia ni koaua ba e bon tangirira te Atua ba ti na teimatoa ni kekeiaki ao man rairinanora n taai nako man keiaki n aki tiku n te bure n taai nako. E rangi ni bati ana tangira te Uea ibukira ngaia are ngkana ti iraraang n te bai ae e bure ao ti na bon kekeiaki ni waekoa n butia te Uea ba e na anganira ana karatia ae e bati ba ti na kaiokaki ma ngaia n te tai ae e waekoa ti aonga n manga tauraoi naba n rin inanon ana tangira man tauraoi imwain weteara irouna ao are ti na tauraoi ni koaua n rin inanon te abanuea are bon abana.
- Details
- Written by Beneteta
Inanon te bong ae e raoiroi aio ao ti ongoraeakina ana Taeka te Uea mai iroun Tiraka ao mai iroun Santo Mareko n ana evangkerio.
Tiraka e katereterea aron te rao ni koaua. E tuangira ba ti aonga n rabakau n rineia raoraora ni koaua ba iai rao aika a bon kekewe n kan iraorao ma ngaira ao iai aika a bon iraorao ma te nano ae e koaua. E tuangira Tiraka ba ti na tarai aroia man kamantaia raoi raoraora ba iai aika a na kaota anuan te rao ni koaua man aroia aika a raraoi ao man tamaroa. E kangai Tiraka ba ngkana ti kona n nora anuan temanna ma temanna ao ni kina ba antai ae e iraorao ma maakan te Atua inanona ao bon ngaia ae ti na bon koaua raoi irouna ba bon te rao ni koaua. Ma ake a ti raoraonira ngkai ibukina ba a nora ae a na kakabaia mai iai ao rimwi ngkana a kuba n noria ba ko reke n te kanganga ao a aikoa naba kubariko aikai raoi ngkanne ake bon tiaki rao ni koaua. Ti bia bane n kona n tataroakina buokara ni kinaia raoraora ba ti aonga n aki reke n te kanganga inukan ara iraorao ao a ti biritanira naba.
Santo Mareko n te evangkerio ao e kauringira n taekan te raure imarenaia taanga ake a tia ni kabaeaki n te takaramentu n mare. A nakoina Baritaio ao a kan kamanea ao a titirakinna ba e katauaki ke e aki te mane n uma n raure ma buuna ke e aki? E kaekai Iesu ao e tuangiia ba are e botiia te Atua ao ke a na aki karaureaki. Te takaramentu n mare bon ana bai n tangira te Atua nakoia ana aomata ake e karikia man baireia ba a na iein inanon ana tangira ae moan te kakawaki. Te tangira aio e na bon rio mai inanoia taanga ake a na bon motikia naba i marenaia ba a na iein man katabua aia tangira inanon te Takaramentu aio. E na bon iai te kanganga ngkana e aki iraki nanoia taanga ma a iraki nanoia aia karo ke aia koraki. E bia anganira n taai nako te Uea ae Atuara te kona n nora kakawakin te tangira imarenaia taan iein ba e na boutokaaki raoi ba e aonga n riki te mare imarenaia taanga ba te bai ae e tabu ni koaua ao a aonga taanga n aia tai n butimaea te Takaramentu n mare ni kona n nora aron tabun ao kakawakin butimaeana ma nanoia ae e moti raoi ao e aki kewekewe are ngaia ae e reke iai te bu raure ni waekoa.
Ti na tataro ibukia taanga ake a reke n te kanganga n aron aio ba e bia nanoangaia te Uea ao man kabarai aia bure. Ti na tataro naba ibukiia taanga ake a kakatauraoia ibukin butimaean te Takaramentu ni mare ba a bia anganaki te kona n kina raoi aia tangira imwain butimaean kabaeakia imatan te Atua.
- Details
- Written by Beneteta
Ko wanawana ngkana ko aki kaitara ana waaki te Uea. E taekinaki te wanawana ba bon aekan te aine ae e kaikawaia raoi natina man tararuaia raoi. E taekinanki naba te wanawana ba bon ana bai n tangira te Atua ae moan te kakawaki. Bon te wanawana ae e kairiko nakon te mwengaraoi, te kabaia, te maeuraoi ao te kukurei ae akea tokina. E bon rangi n raoiroi ba ti na bubutia te Tamnei ae Raoiroi ba e na kateimatoa inanora tangiran ao babaruan te wanawana ba ti aonga ni kona ni kina raoi teuare bon ngaia te Wanawana.
Ba n te evangkerio ao ti kauringaki ba ti na aki kaitara ana waaki ara Uea ba ti aonga ni kona n riki raoi ba bon raona ni koaua ngaira. E kauringira Iesu n te karaki n te evangkerio aron te tia onimaki temanna are e kanako taimonio n arana. A riba te tia onimaki aio ana reirei Iesu ao ngaia are a tuangnga ba e na katoka mwaneweakin aran Iesu n ana tai n kanakoa te taimonio mai iroun te ataei ni mane arei.
N tokina ao a bon karoko iroun Iesu man tuangnga ana bure te tia onimaki aio ao ana bure are e kanako taimonio n aran Iesu ao bon tiaki ana reirei Iesu ngaia. Ai ngaia are e a katereterea Iesu man taku nakoia ana reirei- tai tuka te tia onimaki aio... e riai n kona n atongaki ba bon raora ngkana e aki kaitaraira. Ai tikiraoira ma ana taeka Iesu aio ao I bon norira iai tariu ao maneu ba aio naba ana taeka ae e na bon atongnga naba nakoira ngkana ti aki kaitarai ana makuri nako ke ni kaitara bon ngaia.
Ara makuri ba te onimaki n taai nako ba bon te Uea ae e na kabooi mwin tangirana nako. Ti bia bane n raoraona Iesu n taai nako ao man kukurei ni butimwaea wanawanana are ti na bon aki toki ni bubutia n taai nako.