Kanan Tamneira...
- Details
- Written by Beneteta
Kam na bane ni mauri tariu ao maneu n ana tangira te Uea! Eng, bon au kantaninga ba kam bon bane n kaonrakeaki n ana baintangira Tamnei ae Raoiroi n te Taabati ae e nako are bon ana toa iai- tain te Pentekota.
N te bong aio ao ti a manga kaai naba ni kakaitau ibukin ana tangira te Uea ae ana Taeka. Ti rangi n tekeraoi ba iai iroura n te Baibara ao riki n te Tutia are a warekaki nakoira ni katoa bong.
N te tai aio ao ti a kataia n uringi ao man iangoi baai aika a kakarawawataai nanora n te bong aio. Tera ae e riki antai ae e a tia n kaebuko, te Uea ke te aomata? N te wareboki n te bong aio ao ti tuangaki "Iai ae e a tia ni kantaninga iroun te Atua ao e aki reke ana bubuti?" ke Iai ae e a tia n kawakin ana tua ao e aki tabeakinaki? ke Iai ae e a tia ni wetea arana? ao eaki kaekaaki?
Tiraka 2:10 e kaota aron te nati ae bon rangin n raoiroi nakon tamana man karinea tamana n aki toki ao tamana e bon rangi n onrake n te kukurei ao te kamoamoa e tangira natina n aki toki. Aei bon bannani Iesu nakon Tamana are e a kamoamoaki iai Tamana n arona aika moan baan te raraoi man mangori.
Ti bia riki ba kanga koora ake a kataaki n te ai ke aomata ake a kataaki ni kabuebuen te maraki. Ba ikai inanon te ai aio are e norira iai te Atua ma ngaia are ti a bane ni katuka irouna ara kantaninga ma ara ingainga n kan botaki iai ma Ngaia ae te Atua te Tama, te Atua te Nati ao te Atua te Tamnei ae Raoiroi.
- Details
- Written by Beneteta
N te Kaonobong aio ao n tenaan wareboki ao ti ongora rongorongoia m'ane aika teniman ba teuare Bauro, Betero ao Ioane. Bauro are bon ana Abotoro Iesu ao Betero ao Ioane ake a na reirei Iesu.
NI kakaean nakoan Bauro ba tera ngaia imwain ae e raira nanona ao I noria ba ngaia te tia karaoi uma n rianna. E karaoa aio imwain ao bon imwin naba ae e riki ba te Kristian ngaia. Ma imwina teutana ao e kabanea maeuna man riki ba te tia taetaekina te evangkerio nakoia aomata. Betero ao Ioane bon taan Tia Akawa ngaiia imwain ae a riki ba ana reirei Iesu ti bon ongo naba ba iai taai ake e manga bon okira nakoana Betero are te akawa gnke e mena Iesu iaon te aba ma ngaiia. Ma imwiin te tai are e a kanakoia ana reirei Iesu ibukin te muioko are e anganiia ao a nako man riki ba Taan Kabuta taekan te evangkerio itiua te bong ni katoa wiiki are a karaoia man matennanoa karaoana tiaki ibukina ba e na reke booia mai iai.
N aia makuri aei ao a tibai baai ake a botaki ni karaoi, a taekina man tiba aron aia makuri ma maeuia ma Iesu, a kaai ni katoki aoraki n aran Iesu, a kaai ni koroboki man tibai nako aia waaki ibukin taekinan te evangkerio ma kabutaana nako. A maeu ni bobotaki ao a noora aron tamaroan ma kakukurein te makuri ibukin te Uea. A tataro ni botaki ao a uataboi aron kukureia n aia kekeiaki ibukin irakin nanon te Atua ae Iesu.
Ngkoe naba tariu ao maneu are ko wareka au tibatiba aio bon iai naba tibangam mai iroun te Uea are e a tia ni kataua ibukim ba e bubura ke e uarereke ke e kanga arona, ko onoti iai ao akea ae e kona n anaia mai iroum.
Ma e ngae n anne ti a okiria m'ane aika teniman aikai ao ti a taraia ba tera ae e kaurarakea nanoia imwiin kanakoaia iroun Iesu? Tao eng ti kona ni kangai ni weteakira iroun te Uea ao a bane ni kakaokoro tibangara. Weteara aikai ba ti na riki ba antai bon te wewete ae e onoti nakoira ao akea riki.
E tikiraoi ana taeka Iesu nakoia IKorinto 2: 1-5 ae e kangai: I roko i buakomi ngai, ba N na taekin ana taeka te Atua aika a raba, ao I aki baka n rabakau ma ni wanawana... I aki kan ata te bai teuana, ba ti Iesu Kristo ao matena iaon te Kaibangaki...au taeka bon taeka ni kakoaua ni makan te Tamnei. E aonga n aki tei ami onimaki iaon te wanawana n aomata, ma e na tei iaonimakan te Atua.
Kam na tekeraoi n ami tai n butimaea te Tamnei ae Raoiroi n te Pentekota ae nakon te ingabong ae te Tabati.
- Details
- Written by Beneteta
Ti riai ni karabwa Santo Bauro ibukin nanomwaakana n taetaekina te evangkerio. N te moan wareboki ao e taekinaki aron makurin te Tamnei ae Raoiroi irouna ngke e tei imataia taan motikitaeka ake Tatukaio ma Baritaio ao man karekea te bobuaka imarenaia. Man ana taeka Santo Bauro are e kaotia iai ba bon ngaia naba te Baritaio ao e amotikaki taekana ibukina ba e kakoaua te manga uti n aroia Baritaio ni kabane. Tatukaio bon nake a aki kakoaua te mangauti man te mate ao akea anera ao tamnei ma Baritaio a kakoauai ni kabane. N tokina ao a teirake Baritaio man taekina ae a akea kairuan Santo Bauro ae a noria Tautia ba a riai n totokoa te kiriwe ae e na reke ao a kaoka Santo Bauro nakon te nono ike e a matu iai ao man roko irouna te Uea man tuanga ba e na teimatoa te ninikoria irouna ao man reitanako ana makuri i Roma imwin Iutaia.
N te evangkerio mai iroun Santo Ioane ao e bon taekina kakawakin te katiteuanaaki Iesu. E tataro nakon Tamana ba ti bia bane ni katiteuanaaki n ai arona ngaia ma Tamana ae a katiteuanaaki n taai nako.
Ti a reitira man ongo nanon ana tataro Iesu aio ao ti a bubuti naba ibukin katiteuanaakira inanon moa ara utu ike ti na nora iai te katiteuanaaki ma buura ao natira ba ti aonga ni kona nimanga uota te katiteuanaaki aio nakoia raora n ara kaawa, ara baeriti, ara abamakoro, ao n taabo nako ake ti nako iai.
E na neboaki te Atua te Tama, te Atua te Nati ao te Atua te Tamnei ae Raoiroi ngkai ao n aki toki, Amen.
- Details
- Written by Beneteta
Ti bia bane ni kekeiaki n ara onimaki n aron Bauro ngke e kabureaki ao e bon reitanako naba ana kaotioti nakoia ake a reke ongoraaia irouna. Bon te Tamnei ae Raoiroi ae e kaonrakeira ngkana ti kauki nanora nakon ana buoka. Bon akea ara kona ngkana ti aki kaoa te Tamnei ae Raoiroi ba e na makuri inanora.
N te evangkerio ao e taekinaki aron moan karikan Betero ba ara moan Pope. I bon rangi n titiraki i nanou ba kanga tera ana iango Betero ngke e a tuangaki ba e nang riki ba te tia tararuaia ana tiibu Iesu? Tao e maku? ti aki raoi ataia ma eng e na bon bae n onrake n te kimareirei. Ai bon maeura! Te muioko ke te nakoa are e reke irouna bon te bai ae e karekea man tikuna ni kina Iesu inanon ae tenua te ririki. E waekoa riki rekena nakon karekean te beeba man te reirei ae e rietata. E bon rangi ni waekoa riki nakon te ririki ni karekean te nakoa n Tama!
E bon tangirira te Atua ba ti na ninikoria n butimwaai ana makuri. Ti bon uringa aki ninikorian Betero ni kan ririmwiin te Uea man toua kawaina. Iai te tai are e a ti ewenako naba Betero man te booti ao man nakonako i taari teutana te tai. Iai naba te tai ngke e aki ninikoria Betero ni kaotia ae e kina iesu. Ngkana ti ninikoria ibukin te Atua ao e na bon kukurei n anganira te Tamnei ae Raoiroi are bon ngaia te Tia kakorakora.
Ti a bane ni kaingaingai nanora man bubutia Tinara Nei Maria ba e na raonira n karaoan ara novena ni katauraoi ibukin rokon te Tamnei ae e raoiroi n te Taabati.
- Details
- Written by Beneteta
N te moan wareboki ao e kauringira Bauro n aia Makuri Abotoro ba ti riai n kawakiniira mai irouia Kameanti. Bon ana taeka nakoia taan muiokoaki n te Ekaretia n te tabo are e mena iai ; aran te tabo aio Ebeto. Ma antai raoi ae e nanonna ba Kameanti?
Kameanti bon burabeti ni kewe ake a roko ma rongorongo aika a aki eti ba a kaitara te reirei are e taekinna Iesu. A kan urua ana reirei Iesu ba a aonga aomata ni bane n manga iriia. Ake a iriia bon ngaia naba Kameanti. Kameanti aikai ake a aki nano aia onimaki man kai iraraang irouia raoia tabeman ao n tokina a kariaia ae a na kitana aia koaua ao man iriia naba taan kewekewe aikai. N tabetai ao a manga bon riki ngaia ba taan katea manga aia koaua teuana man kaotioti ba ngaiia aika a riai ni kakoauaki ba e eti are irouia engae ngke a ataia ba bon taan kewea te aba.
Ni boong aikai ao ti nora te kan reitaki man ikoikotaki irouia aaro ni Kristian tabeua ba a aonga ni kona ni katiteuanaki inanon tangiran neboan te Atua ae e maka man mimitong. Inanon te katiteuanaaki aio ao a karekea iai te rau, te kukurei ao te onimaki ae e matoa riki mai iroun temanna ma temanna.
Iai naba ana taeka Santo Bauro ae e rota nanou ae e kangai : " E kakukurei riki te angaanga nakon te anganganaki". Ti bia riki ba taan angaanga ao taan makuri korakora ibukin maeura ba ti aonga n aki katabea iai temanna ma ti bon tabeakina aron maeura. N tabetai ao ti maninga ae ti a karawawataia tabeman ibukin ara bubuti. Ba n nanora n aomata ti kukurei riki ngkana ti bon ti tabe ma kainnanon rabatara.
Ti bia bane n nora aron kakawakin ana makuri te Tamnei ae Raoiroi n tatabeakinira ao n tangirira ba ti na maeuna te kukurei n taai nako inanon te onimaki ae e eti ao e boto iaon te koaua are ti ataia ba ti na bon bane ni manga katiteuanaaki iai n taai nako.