Kanan Tamneira...
- Details
- Written by Beneteta
Ni buan Iuta mai ibuakoia ana Apotoro Iesu ao e bon riai n oneaki mwina. E tabeaianga nanou man aki toki n titiraki ba e aera e rineaki Iuta ba e na karaoa are e karaoia? Iai ana aanga n rawa ni karaoa are e a tia ni karaoia? N tabetai ao e kamangaoaki au onimaki ao I titiraki man taku; e aera te Atua e bon nora aio ao e aki katokia? ao I karaba te Uea ba e kauringai kakawakin te inaomata are e anganira ao are e bon aki kona n anaia mai iroura ao aingaia ae e rau nanou iai.
Bon iai inaomatan Iuta n aki kariaia ba e na kamanea Iesu n ai arora naba n tatabeman ae iai inaomatara ae e anganira te Atua ao e aki kona n anaia mai iroura.Ti ataia ae e ngae ngke e aki kona n ana te inaomata aio te Atua mai iroura ma ti ataia ni koaua ba engae ngke e nori aron tenaan kabuanibai ake a na reke man aki kabonganaan raoi inaomatara ao ti ataia ni koaua ba bon manga iai naba ana iango te Atua n manga kanakoraoa te aro are e a tia n aki rangi n nakoraoi arei. Ana iango te Atua a bon kaokoro ma ara iango.
Ma e ngae n anne ao ti ataia ae e bon riai naba ni karekeaki onean mwin Iuta. N te bong aio ao ti kauringa ana Toa Santo Matia are bon ngaia are e onea mwin Iuta imwiin te rinerine imarenana ma Baretaba. Ti kaogoaki ba e karaoaki te rinerine man kaoaki te Tamnei ae Raoiroi ba e na buoka aron te rinerine ao e kakoauaki ba bon Ngaia ae e a tia n karaoa rineakin Santo Matia.
E kauringira Iesu iroun Santo Ioane 15:16 ae tiaki ngaira ae ti rinea Iesu ba ti na iriiria ma bon Ngaia ae e rineira. E rootai te kimareirei n wareka ana taeka Iesu aio ao e tokabeti nanou ni kan kangai - ba Iesu ai kabaiara ngai n ataia ae boni ngkoe ae ko rineai. E kangai naba Iesu ikai - I muiokoi ngkami ba kam na nako ao kam na kariki ua ao kam na anganaki baai ni kabane ake kam butia Tamau n arau, Ngai ae Iesu.
Ongotaeka ao au tua nakoimi ba kam na itangitangiri... Ko raba Iesu!
- Details
- Written by Beneteta
Kam na mauri tariu ao maneu n ana tangira te Uea! Aikai teken nanou n tenaan wareboki n te Tutia n te bong aio:
N te moani wareboki are e anaaki man Aia Makuri Abotoro ni makorona ae 19 ao kibuna ae 1 nakon 8 ao e taekinaki aron ana makuri Bauro n te tabo ae Ebeto. Ni menan Bauro ikekei ao e kaitibo ma aomata n te tabo aei ao e taekana te Tamnei ae Raoiroi nakoia te koraki aio. E tuangia Bauro ae a anganaki te Tamnei ae Raoiroi ngke a butimaea te onimaki ma a kaeka man taku ba a tuai man ongo taekn te Tamnei ae Raoiroi!
Tao e na bon koaua naba ae ibukora n taai aikai a bon tuai naba man ata taekan te Tamnei ae Raoiroi ke a tuai naba man ota n aron kakawakin te Tamnei ae Raoiroi nakon maeuia. E ngae ngke a karaoiroia n aran te Tama ao te Nati ao te Tamnei ae Raoiroi ma a bon tuai n rangi n nano aia tangira nakon te Tamnei ae Raoiroi ba a aki katabei nanoia irouna ba a bon ti taku ba bon ti raon te Atua te Tama ma Iesu n atongaki man karineaki arana ma akea rekerekeia ma Ngaia.
Ngkana ngkoe temanna ae ko tuai man kan karababa am atatai ao am kikina ke am reitaki ma te Tamnei ae Raoiroi ao I reitai ma ngkoe ngkai ba ti a moanna n te tai aio. E ngae ngkana ti te tataro ae e uarereke n arona aio:
Ti a tataro: Tamnein Atuara ae e maeu, taiaoka ruo nakoira n te tai aio ao kaotiko nakoira man kamatataira n arom nako. Reireinai baai aika I riai n atai n aron ana taeka Iesu are e kangai N na nako ao e na roko te Tamnei ae Raoiroi ba E na reireini ngkami baai nako ake kam riai n atai. kariaia ba a na reke irou am karea ba I aonga ni kona ni karaoi baai nako ake e tangirai te Atua te Tama ba N na karaoi ba I aonga ni kona n namakina te mwengaraoi n tain te nanokawaki; te korakora n tain te mamaara; te kantaninga n tain te bara n nano; te onimaki n tain te maaku; te tangira inanon tain te un ma te marakinnano ao te kairiribai. Ti a butiko aikai n aran Iesu ae Ara Uea ao Ara Tia Kamaeu, Amen.
N bon arona ao ti bon ataia ba bon taan buaka ngaira inanon reimauruan maeura aio. Ti bon bane naba n ataia ae e a tia ni kauringira Iesu ae e ngae n anne ti bon bane n mena n te rau inanona. E a tia n taku, tai kabarai nanomi: 'I a tia ni kataea ana kai aon te aba'.
- Details
- Written by Beneteta
N aia makuri Apotoro ao e taekinaki aron Bauro ma Tira i Biribi n aia tai ni karinaki n te matawariki. Kakan ongoran karakia n te tabo aio are bon taekan kabaeaia inanon te matawariki ma aron aia tataro n neboa te Atua ao akea ba e a roko te ang ae korakora are e a kauki mataroan nako aia ru nake a kainaki ba buure. Bauro ma Tira a bon bae waeia man kamatoaki ba a ribaaki birinakoia. Ma eng e makuri te Atua man raonia ana aomata ao inanon te ang ma rurun aonteaba ao a bane n reke angan ae a na kona ni birinako iai buure.
E rangi n rootaki n te rawawata te Tia Kawakinia Buure ao e motikia ba e na bakabureia...tera nanom ngkai ko ongo ae e kan bakabureia teuaei? E bon tekeraoi ba are e a ti takarua naba Bauro man tuangnga ae a aki birinako ba a bane ni botaki ai ngaia are e a kawaria teuaei ma nanona are e a tangiria n onimakina Atuaia Bauro ma Tira. E babetitoaki ma kain ana utu ao ti ataia ba e taonaki n te kukurei teuaei ma ana utu.
Ngkanne n te evangkerio ao e manga bon kauringira riki Iesu ibukin taekan waerakena nako Karawa ao kakawakin te tai aio. Ti na kauringa te tai aei ae Waerakena nako Karawa n te Tabati ae imwaira aio. Te bai are ti na noria man mataiakinna n tain te kauring aio ba bon ana motintaeka Iesu nakoia ana reirei are e tuangia ba e riai n nakon Tamana ba e aonga n kaoka rikaaki te Tia Buobuoki are te Tamnei ae Raoiroi.
E kangai Iesu, ngkana I aki nako ao e na aki roko iroumi te Tia Buobuoki... Ngkana e roko ao e na kaota aia kairua kain aonteaba n taekan te bure, n taekan te eti, ao n taekan te motikitaeka.
N ara tataro are ti a bane n reitaki iai ao ti a bubutia Iesu ba e na anganira te tauraoi raoi imwain rokon te Tamnei ae Raoiroi ike ti na kaonrakeaki iai n taekan te kawai, te koaua ao te eti ba ti aonga ni kakoaua Iesu ba ngaia ara Tia Kamaeu ao Atuara. Amen.
- Details
- Written by Beneteta
E tikiraoi ana makuri Aboro are e buoka taetaekinakin te evangkerio man tuangiia aomata n ana tabo are Ebeto. E bon reitaanako ana makuri Bauro ao man kukurei n kaotia nakoia aomata ba Iesu bon te Kristo.
Bon te Atua ae e rineira nakon nakoara aika a kakaokoro. Ngke e rinea Bauro ma Barenaba ba a na uouota taekana ao e rinea naba Aboro ba e na reita nako te makuri anne. N te tai aio ao iai naba ae e a tia n rineia te Atua nakon nakoa aika a kakaokoro.
Ao ngkoe tariu ao maneu ko a tia n iangoia ae bon tiaki ngkoe ae ko rinea nakoam ba bon te Atua? Eng bon te Atua ae e anganira nakoara man taribin rabakauna. Ti bia bane ni kona ni kakaitau ibukin nakoara aika e anganira te Uea ma te nano ae e raoiroi ao riki n kakarabaraba ba ti ataia ae e tangiriira iai. Boona iroura ba ti bia kona n reita kakatanoataan rongorongona ae e raoiroi.
E kangai Santo Ioane n te evangkerio 'Bubuti n arau nakon Tamau ao e na angani ngkami'. E kauringira Iesu iroun Santo Ioane ba ngkana ti bubuti n arana ao ti bon kaota naba iai te nanorinano.
Ti a reitira man bubutia te Atua te Tama n aran Iesu kainnanoia raora moa n te tai aio ao imwiina bon kainanora ba ti aonga ni kona n anganaki boon ara bubuti iroun te Atua te Tama.
- Details
- Written by Uriam Timiti
E bungiaki te Atua te Nati ba e na uota ana Tangira te Tama are ti na kamaiuaki iai man ara bure ao ni karikaki iai ba naati iroun te Tama. E kakoroaki bukin te kamaiuaki aio ngke E mate Iesu iaon te kaibangaki are kabaroa mai iai Iesu Rarana ae moan teTabu ba ti aonga ni kaitiakaki man ara bure ao n riki ba taian karikibai aika boureirei. Ma ti ataia ba imain waeraken Iesu ao E tuangira ba E na kaoka nakoira te Tia ibuobuoki ae te Tamnei ae Raoiroi. Ti tuangaki n te bong aio ba ngkana ti tangira te nati ao ti na kawakin ana taeka ao a na roko te Atua te Nati ao te Tama ni maeka i roura. Ti kakoaua naba ba inanon te reitaki inanon te tangira ae kororaoi imarenan te Tama a te Nati bon te Tamnei ae Raoiroi.
Kororaoin maiun te Atua inanora bon maekan te Teniman n te Temanna. Tariu ao maneu ti na kauki nanora nakon te karea ni Bakate aio nakoira are te kona ni karekea te maiu n Atua inanora are bon mamaekan te Atua te Tama, te Atua te Nati ao te Atua te Tamnei ae Raoiroi. E na reke aio ngkana ti maeka n taai nako inanon ana tangira te Atua ao ngkana ti teimatoa ni kawakin ana tua te Atua inanon te ongotaeka. E tuangira Iesu ba e raoiroi ngkana E kitanira nakon te Tama ba e aonga ni kaoka te Tia Ibuobuoki ae Te Tamnei ae Raoiroi. Ao inanon te Tamnei ae Raoiroi aio ao ti na kona ni karaoi makuri ake e karaoi ngkoa Iesu i aonteaba ao ni karaoi naba makuri aika kakanato riki. Eng bon aio ngkanne te karea ni Bakate ae kan anganira te Atua are ti ataia ba a reke nakoira man bungiakin ao maten Iesu iaon te Kaibangaki. Are nanona ba ti na ti kona ni karekea te maiu ae Onraken te Maiu ngkana ti tauraoi n irira Iesu ao n tabeka ara kaibangaki. Inanon mangautin Iesu ao ti kona iai ni karina te ikeike ae bou are bon maiun te Tamnei ae Raoiroi.