Kanan Tamneira...
- Details
- Written by Uriam Timiti
Inanon tain te Bakate aio ao ti ataia ba E tiku Iesu i aonteaba inanon abui te bong imain waerakena nako Karawa nakon Tamana. Ti ataia ba Iesu are E tia n riki n aomata n aiarora ma n akea te bure irouna ngke buangiaki iroun Nei Maria; E a tia mate iaon te kaibangaki ba E anai rawawatan ara bure ao ni kaitiakiira n rarana ae moan te Tabu; boni Ngaia are kaota ao ni kauka nakoira mataroan Karawa are boni mwengara raoi ni koaua. N uan matena ao mangautina ao E anganiira Iesu te maiu n natinaki iroun Tamana ao te kona ni maeka ma Ngaia i Karawa. Te maiu n natinaki aio bon te baintangira are akea bona ibukira ni kabane are karikira ba ti te arona ngaira ni kabane i roun te Tama. Ma karekean kororaoin te maiu aio are iroun te Tamnei ae Raoiroi bon te bai ae ti anganaki iai te inaomata ni butimaia. Ti bon ataia raoi ba butimaean Tamnein te Atua bon kawaira nakon te Maiu ae aki totoki ao butimaean te tamnein te riaboro bon kawain te kabuakakaaki ao te mate ae akea tokina.
Iesu bon ti Ngaia te kawai nakon te Tama. N te bong are ngkoananoa ao E tuangira baai ni kabane ba e aonga ni kororaoi kimareireina inanora. E bon anganira naba Iesu arora ae ti kona iai ni teimatoa ni maiu inanon te kimareirei ikai i aoteaba ba bon te maiu n taai nako inanon ana Tangira ngkana ti kakawakin ana tua ao n ongotaeka Irouna.
Inanon ara kekeiaki ni maiu inanon ana Tangira te Atua ao ti kainnanoa te tia ibuobuoki are bon te Tamnei ae Raoiroi. Ma E na ti kona ni mamakuri te Tamnie ae Raoiroi inanora ngkana ti kauki nanora ni butimaea ao ni kautaua ba E na inaomata ni kairi maiura. Ti na kabanei korakorara ni katotonga maiun Iesu i aonteaba ao ti na butia te Tamnei ae Raoiroi ba e na buokira. Ti na muiokoi naba arora ni kabane iroun Nei Maria ae bon ngaia te tia taui baira inanon kawain natina ae Iesu ao te tia Tei ibukira n ara tai ni motikaki taekara ngkana ti kitana te maiu aio.
- Details
- Written by Uriam Timiti
N ana tibatiba Mother Teretia iaon te kibu aio ao e taku ba "E kukurei nanon te Atua iroun te tia anganga ae kimareirei nanona". Te anga ae moan te tikiraoi iroura ibukin kaotan ara karabaraba nakon te Atua ao nakoia aomata bon te tauraoi ni butimaai baai ni kabane ma te kukurei. Ba te nano ae kimareirei n taai nako bon kaotan te nano ae e urarake n ana Tangira te Atua. Bon korakorara n tai nako te kimareirei. Bon aio te bai are noraki ao ni koburake mairoun Iesu are e katikiia aomata aika moan te maiti nakoina.
Tai kataua ba kam na tabeaianga ni bai aika bati ake a na a anganiko te nanokawaki ao te bara n nano, n te aro are ko na kabua iai kimareirein te Mangauti ni Bakate. Ti riai n ataia ba te kimareirei tiaki te bai ae ti reke man karaoan te makuri ibukin te Atua; n tabetai ao ti namakinna ba e kanganga reken te kimareirei iroura. Ti bon riai ngkanne ni butia te Tamnei ae Raoiroi ba e na karikirakea inanora te kimareirei inanon baai ni kabane. Te kimareirei aio e na bon teimatoa ao ni kororaoi inanora ngkana ti maiu n taai nako inanon ana Tangira te Atua. Ao ti na maiu inanon ana Tangira te Aua ngkana ti taui ma ni kawakin ana tua te Atua ao n riki n ti teuana n taai nako ma te Tama. Bon aio ngkanne te bai ae E tuangira Iesu n te bong ba e aonga ni kororaoi ao ni banin kimareireina inanora- te teimatoa ni maeka n taai nako inanon ana Tangira ao te kawakin ana tua.
- Details
- Written by Uriam Timiti
Inanon ara tai ni kakatauraoi i main ruon te Tamnei ae Raoiroi ao E reireinira Iesu ba tera te bai ae ti na kakantaningaia. Eng teuana te karea ae kakawaki ae uotan ke uan te Tamanei ae Raoiroi bon te Raoi. E kamatata nakoira Iesu ba bon oin te raoi ae ti kona ni karekea bon ti mai roun te Atua. Ti na bon aki kiriwe man tabeiainga ma ti na onimakina te Raoi are ti na kaonraekeaki iai iroun Tamneina ae Raoiroi. Ao tera raoi te Raoi aio? Eng te raoi aio bon te kona ni katiteuanaki ma te Tama n taai nako n aiaron Iesu ae katiteuanaki n taai nako ma Tamana. E reita aio St Padre Pio n taku ba Tamnein te Atua bon tamnein te Rau inanora, e ngae ngke ti ataia ba ti aki kokororaoi ao ti a tia n raroanako ao n aki kakukureia te Atua n ara makuri aika aki raraoi. Ma e aki toki n anganira te Atua te mweraoi ao te kimareirei inanon ataakin ana nanoanga ae akea tiana ma tokina i bukira n taai nako. Ma tamnein te riaboro e na bon anganira te kiriwe ma te aki rau ao e na angira te un i bon iroura n ara kabaka aika ti nori i nanon maiura. E na rikirake ana raoi te Atua ngkana ti kona ni kammakuria nakoia tarira ma manera. Bon ana karatia te Atua ae na anganira te kona n tokanikai iaon ana makuri teuare buakaka ao man angira te kimareirei inanon ana Raoi te Tamnei ae Raoi ae mamaeka i nanora. Bon ana kantaninga ngkanne te Atua e na reke iroura kororaoin te maiu inanon te Raoi ae uotia nako aonteaba inanon Natina ae Iesu are mate ao e mangauti ba e na anganira te Raoiakinaki ma Tamana ao ni karikiira ba taan baibai ma Ngaia n te Abanuea are i Karawa.
- Details
- Written by Uriam Timiti
I kan tiba teken nanou n ana taeka te Uea n te bong aio iaon taekan te kainikurebe ao te o ni kurebe. Tao a bon matata iroura ba tera baika a nanonaki n ana kaikonaki Iesu aio. Iesu bon ngaia te kainikurebe ao te o ni kurebe bon ana Ekaretia ao maangana ake a riki man te kainikurebe bon ngaira kain te Ekaretia. Are nanona ba maeun ao rikiraken te Ekaretia e bon boto iaon te nim n taai nako ma Iesu are bon Ngaia te kaini kurebe.
Ma I taku ngaia ba iai naba iterana te kaikonaki aio teuana ae ti kona ni kauaea. Ba ngaira n tatabemanira bon kanga te onaroka ao tamneira ke mauen te Atua inanora bon kanga te kai ni kurebe are ti na karaua n ribanaia ba e aonga ni maiu raoi ao ni kariki ua aika bati. Ti na taraia ba e na aki taonaki nako arokara aio n taian uteute ao man urubekeaki ni wakan taian kai ake irarikina. E na riai naba ni kakaitiakaki mani koro mangaeaki ba e na aki buakoako ma e na kariki ua aika bati. E na riai naba n oaki ba e aonga n tan mairouia taan nakonako ao riki bon mairouia taiani man aika kaakang man urubain.
Ti kona ni kabotaua mauira aio i aonteba ba kanga te makuri n ribana aorakan te toka are na manga roko n noria n te taiana ba e kariki ua ke aki. Tariu ao maneu kanga tera am inago ngkana e a roko te tai anne are ti nang kaoti iai ara kekeiaki ao a nang noraki iai ara kariki ua? Ti ataia ba tera ae na karaoia Iesu n te tai anne. E na korei man routii ni kabane aroka ake aki kariki ua ao man tewenakoi inanon te ai ae aki mamate.
Ti na butia te Atua ba e na anganira te karatia ma te korakora ba ti na kariki ua inanon maiura ao man kakukureia nanon te Atua n ara kekekai ba ti aonga n ongo ana wewete te Tama nakoira ae kangai, "Nakomai ngkoe te toro ae ko kakaonimaki man ongotakea ba ko na maeka ma Ngai inanon te kimareirei ae akea tokina."
- Details
- Written by Beneteta
Ngkana ti kawakina ana tua Iesu man taui mwia ao man kawakini ao ti bon kaotia iai ba ti tangira Iesu.
A bati aia kakamakuri Bauro ma Barenaba ba a kaota aron tangiran Iesu man karaoa ae nanona ni maeuia. Nanon Iesu are ti tuangaki n aron maeun Bauro ma Barenaba bon tataekinakin ana taeka ma kabutan te evangkerio. N aia makuri aio ao a kaota iai ana tangira te Uea ae Iesu nakoia aomata ake a mena n taabo ake a kawari. Ibukin aia makuri aio ao a bon kaota iai onimakinan Iesu ao e raonia Iesu inanon aia makuri. Ba e kangai ana taeka; 'N na aki katikui ngkami n ti ngkami'.
Ibukina ba e aki katuka Bauro ma Barenaba n ti ngaiia ao a kona n kanakonakoa te mauku man ti ana taetae Bauro are e kangai- Teirake ao nakonako! Iesu e bon mena iroura n taai nako. A bubua uringan ae raora te Uea n taai nako ao ti kunea n taai tabetai ae e a bon bua Iesu mai iroura ao ti noria ba ti reke n te kangnaga.
E aki rawa Iesu iroura ngke e nako n mate iaon te kaibangaki. E anga maeuna ibukin kamaeuara ao ti ataia ba ngke e nako ni waerake nako Karawa e tuangira ba e na bon riai n nako n rimoara. N nakona aio ao e na bon nako n katauraoa mwengara i aban Tamana. E tuangira ba e na manga oki n anaira ba ti na riki ba kain ana maeka.
N nakon Iesu aio ae e na nako Karawa ao ti ataia ba e taku nakoira ba e na nako ao e na kanakomaia te Tamnei ae Raoiroi ba e na riki ba te Tia Buokira.
Ti bia bane ni katauraoi nanora man butimaea rokon te Tamnei ae Raoiroi n tain te Pentekota ae imwaira. Ngkai ti kariaria ao ti butia Iesu ba bon ngaia buokira ni kakorakoraira ba ti na aki reke n te kanganga ibukina ba ti aki kavakin ana tua. E bia kaiririira inanon ana tangira ba ti aonga n riki ba taan onimaki ni koaua ao taan iriria iaan ana kairiiri te Tia ibuobuoki ae te Tamnei ae Raoiroi, Amen.