Kanan Tamneira...
- Details
- Written by Beneteta
Mauri tariu ao maneu n ana tangira te Uea n te ka nimaua n Tabati n te Bakate aio.
Ti kaitaua te Ebikobo n marurungina ni kakawara ara kaawa ae Bairiki man karaoa ara Tutia. Ana kaotioti n te bong aio e bon rinanon te naan wareboki ake a tia ni kateaki ba wareboki n te Tutia n te tai aio. Te moan wareboki e bon anaaki man aia Makuri Abotoro.
E taekinaki aron aia makuri ni mitinare Bauro ao Barenaba ngke a ririaki mani kaei taabo ake a bati n aron Derbe, Lystra, Iconium ao Antiokia ma taabo riki tabeua. N aia tai n ririaki ao a bon maiti ake a rairi nanoia ao n riki ba taan onimaki. A maiti aia koraki ai ngaia are a rineia berebitero ake a na tabeakina te Ekaretia ao a mwiokoia inanon bain te Uea.
Ti bia katotongia Bauro ma Barenaba n marurung man korakora n kan uouota taekan te evangkerio nakoia moa kain ara utu, kain ara kurubu ara makoro ao ai ara baeriti. N te aro aei ao ti toma iai te makuri are e bon tangiria te Uea ba e na reitinako makuriana ba e na ataaki man kinaaki Atuara are ngaia ae e tabeakiniia ana botanaomata are e a tia ni bane ni karikiia.
N te kauoua n wareboki ao e taekinna te Tia Korea te boki ae te Kaotioti ba ni miina ao e miia Ierutarem ae e boou are e ruo mai Karawa. Man te bwanaa are e oti ao e kangai: "E maeka te Atua ibuakoia ana botanaomata. A na riki ba ana botanaomata aomata nako ao Ngaia e na riki ba Atuaia. Ngke e taekinaki aio ao tao bon ibukina naba ba n taai akekei ao e bati bainikiranaia Kristian. E kamatoa te Tia karokoa te rongorongo ba e tabeakiniia ana botanaomata te Atua. Ti ataia ba e bon taetae naba ibukira ngaira aika n taai aikai ake ti onimakina te Atua ba bon ngaia Atuara.
Ti kaitaua Iesu n te evangkerio mai iroun Ioane ba e taekina nakoira taekan te Tua ae e Boou. E tuangira ba ti na baina te itangitangira ngkai ngaira Kristian. E bia meu te tangira are bon ana tangira te Uea inanora ba ti aonga n uouotia mani maeuakinna ao are ti na riki raoi iai ba ana reirei Iesu n ikoaua ao Kristian ni koaua.
- Details
- Written by Beneteta
N te moan wareboki naba n te bong aio ao e kaotaki taekan te taetae n burabeti are e a kakoroaki nanona n te bong are e a manga uti iai Iesu. Ba e koreaki ae e kangai n te kauoua n Taramo: "Natiu ngkoe, I karikiko n te bong aei".
Te kawai nakon te Atua te Tama bon Iesu ae te Atua te Nati. Ti kakoaua ae Iesu bon ngaia natin te Atua. Ngke e mate Iesu ao e manga kautia te Atua ae Tamana ao e kaoti nakoia ana reirei ake a tia n iriiria mai Kariraia nako Ierutarem. A riki uakai ba taan kakoaua manga utina ao a ririaki n reirei taekan te Rongorongo aio are bon ngaia ae ti kamaeuaki man ara bure iai.
Kanoan ara onimaki ba ti kakoaua ae e a tia ni kakoroi nanon taetae n burabeti Iesu n ana reirei, maeuna, marakina, matena ao manga utina.Ai akea riki mwakan te mate iaon Iesu.
Ma n te evangkerio ao e kangai Iesu nakoia ana reirei: "Ke a tai rawawata nanomi: kam kakoaua te Atua (ae Tamana ao Tamara naba) ao kam na kakoauaai naba. E kauringira Iesu ikai ba e na nako nakon Tamana ngke e a tia n uti man te mate ao e na waerake nako Karawa ba e na nako n katauraoa mwengara irarikin Tamana. Ngkana e oki ao e na bon oki ba e na anaira nakon te mwenga aio. E katerea nakoira ba ti bon ata te kawai nako Karawa ma bon Toma are e kaeka man taku: "Te Uea kai ti aki ata te tabo ae ko mena iai ao ti na kanga n ata kawaina?" Ao e kaeka Iesu man taku: Boni ngai te kawai, te koaua ao te maiu. Akea ae e nakon te Tama n aki rirou".
Ti na karaba te Uea ae Iesu ngkai e a tia ni mate ibukira ao ti na butiia ba e na kateimatoaira n iriiria ngkai bon Ngaia te kawai nakon te Tama.
- Details
- Written by Beneteta
Kanoan Kanan Tamneira are e roko iroura ni katoa bong bon taeka n kauring nakoira ibukin tuoan maeura ba tera ae ti riai ni karaoia, tera ae ti riai n taraia ni maeura ba ti aonga n aki rang maninga nako ao n tabe ma baai aika a na uotira nako mai iroun ara Uea ae Iesu. N tabetai ngkana ti a karaoa aei ao kanga ti a manga uotaki rikaaki n aron mamaarara ma ara aki konabai ni kaea are nanon te Atua.
Ti wareka n te moan wareboki n te bong aio aroia burabeti ma taan reirei ni kakauongo nakon banaan te Tamnei ae Raoiroi n aia tai n tataro ao n aki mamatam. Ti tuangaki ba ngke a kakauongo ao a tuangaki ba a na kaokoroia Tauro are Bauro ma Barenaba ba a na nako n makuri n te tabo teuana. A karaoa are a tuangaki iroun te Tamanei ae Raoiroi ao a noria ba a buoka karikirakean maitiia kain te Ekaretia.
Ti bia naba ngaira manga karekea ara tai n ongora nakon te Tamnei ae Raoiroi ba ti aonga ni manga kona n ongora raoi ba tera ae e tangiria ba ti na karaoia ni maeura. N ningai te kabanea n tai ae ko ongora iai nakon te Tamnei ae Raoiro?
Ma ti bon karaba naba te Uea n ana taeka nakoira man te evangkerio are e tuangira ba ngkana ti kakoaua ao ti bon kakoaua naba iai te Atua te Tama are bon ngaia ae e kanakomaia nakoira ba e na uoti ana taeka nakoira ba ti na kamaeuaki iai. E tuangira naba ba ane e noria ao e bon nora naba te Tama iai ba ngaia ma te Tama a ikotaki n te nano ae ti teuana.
E manga bon kauringira riki ae ngkana ti ongo ana taeka man aki ira nanona ao ti na bon tekebuaka ba e na motiki taekara Tamana n tain te motikitaeka man katuaeira iai. E roko Iesu ba e na kamaeuira. Ti riai n ongo raoi nanon aio ba ti aonga ni kona n oota raoi iai ao ni kona naba n ataia ba Iesu bon Ngaia ara Uea ao ara Tia Kamaiu.
Ti na karaba Iesu ao man neboia n ana bai n tangira nakoira ae te onimaki are ti kakoaua iai ba Iesu bon natin te Atua are e roko iaon te aba ibukin kaotan ana tangira Tamana nakoira ba ti aonga ni bane ni kamaeuaki.
- Details
- Written by Beneteta
Kam na mauri tariu ao maneu n ana tangira te Uea! Bon ana toa Santo Mareko n te bong aio. Santo Mareko bon temanna mai ibuakoia naake aman ake a korea te Evangkerio. Bon ana koraki teuare Santo Barenaba are a na abotoro Iesu ao e iriirira Barenaba ma Bauro n uota taekan te rongorongo ae e raoiroi nakoia aomata n taabo ake a nako iai naakai ma e taekinaki ba e maenako ma Bauro ba iai aki nakoraoin aia waaki ma engae n anne e manga bon koroboki Bauro te taina man te karabuti ao e kaotia ba e a ioki ma Mareko. E taekinaki naba ba teuae Mareko bon ana reirei Santo Betero are te moan Pope ao e arana Mareko Betero ba natina. E korea ae e kangai Mareko n ana evangekrio: "Nako, kabutaaonaba, kaotiota te Rongorongo ae e Raoiroi nakoia aomata ni kabaneia" Mareko 16: 15.
Ti karaba te Uea ba n te moan wareboki n te bong aei ao ti kauringaki iai aron te kakawakin te nanorinano. Ti tuangaki ba ti na baina te nanorinano ba e tatangiria aomata aika a nanorinano te Atua ao e taku naba ba e na karietaia akana a karinanoia. E kauringira te wareboki ba ti na muiokoi baai nako ake a tabeaianga iai nanora iroun te Uea ba boni ngaia ae e na tabeakinira man kawakinira n taai nako. E tuangira ae ti na bon riai n kataniira irouna ba e ririaki n taai nako teuare e buakaka man tauraoi ni katikira ngkana ti aki tatauraoi. Ti bia muiokoi maeura inanon bain te Uea n taai nako ba ti aonga ni koaua raoi ba e tabeakinira n taainako.
Ti na tataro man butia Santo Mareko ba e bia tataro ibukira ba ti na riki naba ngaira ba taan uouota te Rongorongo ae Raoiroi ni maeura n ara utu, n ara kaawa, n ara makuri, n ara makoro ao n taabo nako ike ti nako iai.
- Details
- Written by Beneteta
A bon rangi n ingainga nanoia Iutaia ni kan ataia ba bon te metia Iesu ke tiaki. Ai ngaia are a iangoa aron te tai ma te aro are a na kaeka iai. Tao a bon kan titiraki ni koaua te koraki aio ke a aki? A kauringai n aron te un ni kiakiari ngke a katobibia Iesu iaan ana baranta Toromon. Ngke a bane n katobibia ao a tiba tabeki aia titraki man taku: "Ko na katoki nningai ingaingan nanora? Ngkana bon te Metia ngkoe, ao ani kaotia n te aro ae e matata".
E bon rangi n ebu Iesu ba are e a bati ana reirei ma ana makuri ae e a tia ni karaoi ma a bon aki naba kan kakoaua Iutaia. E tuangia ae makuri ake e a tia ni karaoi n aran Tamana bon ngaia kakoauaan ae ngaia bon te Metia. Boni ngaia naba kakoauan ae e nako mai iroun Tamana. N tokina ao e a kangai Iesu, bon tiaki au tiibu ngkami ba kam rawa n ongo au taeka.
E kateretera Iesu ae ana tiibu bon koraki n aomata ake a ongotaeka nakon ana taeka ao ake a kakoaua. Ngkana ti karaoi aikai ao e na bon anganira te maiu ae e aki toki ao ti na aki mamate. E kangai naba ba te maiu ae e anganira aio e bon anganaki mai iroun te Tama are bon Tamana ao Tamara naba ao bon akea ae e kona n anaia mai irouna.
E kauringira naba Iesu ba bon ti temanna ngaia ma te Tama.
Ti a bubutia Iesu ba e na reireinira n ongotaeka irouna ao ni kakoaua n taai nako ae bon ngaia ae e na kakawakinira n manangara iaon te aba aio ba ti aonga ni kona n riki ba ana tiibu ni koaua ngaira ao ni kona naba ni manga karinaki irouna ngaia ae te Tia KawakinTiibu ae raoiroi n te mataroa nakon te aba are e a tia ni katauraoia ibukira ni kabane.
Ko raba Iesu n am tangira ibukira ni kabane ao ti karia te tai are ti na manga bane ni kaitibo iai ma ngkami, ba ti Temanna Ngkoe ma Tamam.