Kanan Tamneira...
- Details
- Written by Beneteta
Kam na mauri tariu ao maneu n ana tangira te Uea n te wiiki ae e boou aio!
I karautaeka ngkai e aki rin kanoan ngkoananoa ma I bon karaoia ao ngke I a orea are N na karinna ao e otinako ae e kangai ko aki kona n karaoa aio ko riai n rin moa? I taku ba I a bon tia n rin ma ngaia tao I tuai ma aio aron te makuri iaon te kombiuta iai kawaina ao arona ae ngkana ko ongotaeka nako iai ao e na ira nanon te bai are ko tangiria ba e na karaoia. Ai aron naba nanon te Atua ba ngkana ko ongotaeka nakon banaana ao E na bon ira nanom naba man anganiko te kukurei.
Ti na ongotaeka nakoina ba ti aonga n riki ba kaain naba ana nanai ngaira. E bon raoiroi te Uea man aki kakaonoti ana tangira. E tangirira ni kabane e ngae ngke bon tiaki Iutaia ngaira ke e ngae ngke akea arora ba ti aki reirei ke ti onrake n te rabakau, ke a bati ara bwai ke akea arora ba raarikin ngaira. Ti karaba ana tangira ba e kaotia n ana makuri Betero are e uota te kamaeuaki nakon Korenerio ma ana utu. Teuaei bon tiaki te Iutaia ao a nokuia te koraki aio ngke e kawaraki iroun Betero. Ma bon nanon te Atua ba e na karaababa ana kamaeu nakoia ana botan aomata ao e aki ti kamaeuia Iutaia.
Ti karaba naba te Atua n ana bai n tangira nakoira ae te Tamnei ae Raoiroi are e angan naba Korenerio n te tai are e kawaraki iai iroun Betero ba ngke akea te Tamnei ae Raoiroi n ruonna ao e na bon aki uki nanona man butimaea ana kamaeu te Atua rinanon Betero.
E bon kauringira naba Iesu n te evangkerio ae bon Ngaia te Tia Kawakin tiibu ae e bati n raoiroi. E kauringira ba ti na aki riki ba taan ira ma taan kamarua ma ti na riki ba kain ana nanai are ti na kona n bane ni botaki iai iaan ana tararua ao ana kairiiri. N te aro aio ao ti na kona n rin imwiina n te mataroa ma tiaki man te winto ke n kibara te o.
Ti a butia te Uea ae Iesu ba e na katakarua bwanaana n taningara ba ti aonga n ongo ao man tauraoi n ririmwina ba ti aonga n kona n rin nako n te maeu ae akea tokina.
- Details
- Written by Beneteta
N te moan wareboki n te bong aio ao e taekinaki aron Betero ni kamaeua te mauku ao ni kateirakea te mate are neiere Tabita.
Ni maakan Iesu are e angan Betero ao n ana buoka te Atua te Tama ma ana tangira te Tamnei ae Raoiroi ao e makuri Betero ma te onimaki ao e karaoi kakai aika a kamimi. Eng, ba n rokona n te kaawa are Ritia ao e bo ma te mauku are arana Aneati ao e kanakonakoa n aran Iesu. A maiti ake a nora aio ao a rairi nanoia man kakoaua te Atua. Ma ngke a ongo taekan Betero aomata ake a mena riki n te kaawa teuana ae arana Taabwa (Jaffa) ao a ienikuri nakoina man butia ba e na iria n nakon te aine ae Tabita. E raoiroi maeun te aine aio ao akea ba e aoraki ao e a mate. Ngke a kawaekoa Betero reirei ao e roko man noria ba e a mate Tabita ma e taetae man taku : " Tabita teirake!" ao e kaurea matana ao e teirake Tabita ao a bane n onimakina te Uea aomata ake a nora aio.
Ngkanne n te evangkerio ao ti ongora taekan te maiu ae e aki toki. E bon ataia Iesu ae a aki ota aomata n ana taeka are e tuangia ba bon te amarake rabatana ao bon te mooi raraana. Ai ngaia are e titirakiniia ana abotoro imwin ae e noria ba a moanna n nanako te koraki imwin nguren nanoia man rawa n ongo taekan te amarake ma te mooi are e taekinna Iesu nakoia ao e taku: ao ngkami kam na nako naba nikitanai? E rangi n raoiroi ana kaeka Betero ngke ekaota ae a rangi n ota n ana taeka Iesu are e taekinna ba bon te Tamnei ae Raoiroi ae e anga te maiu ai ngaia are e taku: Ao ti na nakon antai te Uea? Ti bon ataia ba a mena iroum taeka aika kawain te maiu ae e aki toki.
E rangi n teke naba nanou n ana taeka Iesu are e kaotaira riki ba akea ae e kona n nakoina ngkana e aki buokia te Atua te Tama.
Ti na boti nanora n neboa te Atua n ana tangira ae e aki toki ni weweteira n oin arara ba ti na maeu ma Ngaia ao Natina ma te Tamnei ae Raoiroi. E rabwa te Uea alleluia!
- Details
- Written by Beneteta
E raoiroi te wareboki n te bong aio. A bon bati kain te Tutia i Bairiki n te tairiki aei ba tao e nakon te mwaiti ae bon ra bubua. Iai te ataei ae te aine ae e babetitoaki ae arana Anna. Ti karabwa te Uea n ana tangira nakon tinana ngkai e kaira natina nakon te kamaeuaki.
Ma eng n te wareboki ao ti tuangaki aron Biribo n kauka nanona nakon te Tamnei ae Raoiroi are e bon buokia n ana waaki nako. E buokia ba e na kaota nanon te ITiobia are e a raira nanona man babetitoaki.
E kukurei nanou n ongo ana kaotioti te Tama Maukai ngke e kangai - ti bia bane n katotonga Biribo n kauki nanora nakon te Tamnei ae Raoiroi ba ti aonga ni kona ni kabongana raoi ana rabakau ma wanawanana ngkana ti kauki nanora nakoina. E kauringira te Tama ba iai tibangara ni kabane ibukin buokan temanna ma temanna. Ti bia bane naba n aki tatauani nne n aron te kamaeuaki are ti na kona n tibaia nakoia raora n te maeu n rabata ao te maeu naba n tamnei. Bon iai kamaeun te maeu n itangitangiri ma tarira ao manera are ti na kona ni kaunga iai te maeu n tangira i bon imarenara.
N te evangkerio ao e katuruaki riki taekan Iesu ae bon Ngaia te Bwerena ni Kamaeu. E kauringira Iesu ae e airi ma Tamana n ana makuri nako ao ike e nako iai e mena naba Tamana ma ngaia. E kangai Iesu akea ae e a tia n nora Tamana ba bon ti ngaia ao ngaia e akaman iai imwain baai ni kabane. A bia oota nanora n aei ao man onimakina Iesu ni koaua ba bon ngaia Atuara are iai ngkoa ao ngkai ao n ae e na roko.
Ti a kariaia ba e na kairi maeura n taai nako Iesu ba ti aonga n kina raoi ba bon ngaia te bwerena ni kamaeu.
- Details
- Written by Beneteta
Bon moan te kamimi aron kainanoakia aomata iroun te Uea! E bati ongorara aron weteaia aomata aika a aki raoiroi aroia ba a na makuri ibukin te Atua. I taetae ba bon ngai temanna ae I aki raoiroi ma I ataia ba iai weteau iroun te Uea ba N na makuri ibukina. Ma n te bong aio n te moan wareboki ao ti ongoraeakina rongorongon wetean teuare Tauro are Bauro ngkai iroun Iesu.
E bon ririaki Tauro ibukin rikoaia Kiritian ma bainikirinaia ngke e a weteia naba Iesu man titirakinna ni kangai: "Tauro, Tauro e aera ko bainikirinai?" E taekinaki ba Tauro n te tai anne e baka man ana aoti ba e aki kona moan te raneanea are e taraia ba e nako mai iai te bwana ni wewete arei. N tokina ao e aki kona n taratara Tauro ba e a mataki.
Ma e taetae Iesu nakon teuare Anania man tuangnga ba e na nako ni katoka baina iaon matan Tauro ba e aonga ni manga oki ana taratara. Ti ataia ba e bai n rawa teuare Anania ti ibukina ba e ata aron Tauro are bon ti te bainikiriniia Kiritian man iova nakoia. Ma e bon rangi n ongotaeka Anania ao e kukurei ni karaoa tuangana iroun te Atua ao e nako ni katoka baina iaon Tauro ao e manga kona n noraaba Tauro.
Ti bia kona naba ngaira n ongotaeka nakon weteara iroun te Uea.
N ongotaekara ao ti na kona iai ni kina Iesu ae bon ngaia te amarake ao te mooi ni koaua are ti na kanna ao n nimma ba ti aonga ni anganaki te maeu ae e aki totoki. Ni boong aikai n te wareboki ao e kamatata Iesu ba bon Ngaia te bwerena ni kamaeu. E tuangira ba ti na tangira te amarake mai Karawa ba e aki mamauna ma te amarake are mai iaon te aba e bon kai mauna. E kakarariki ana rongorongo Santo Ioane ma ti bon miiakina naba aron rabakauna n koroboki ibukina ba ti ota n te bai ae e taekinna nakoira.
Ti bia bane n tangira Iesu man bubutimwaia n te komunio ao man ururingnga n te Eukari ba e tiku iai ibukira. Ko bati n raba Iesu n am bai n tangira ae bon ngkoe ibukin kanan tamneira.
- Details
- Written by Beneteta
N te moan wareboki ao bon itiman aomata aika a raoiroi maeuia, a wanawana ao man kaonaki n te Tamnei ae Raoiroi ake a rineaki ba a na tabeakina te Ministry n Amarake. E karaoaki aio ba a aonga ni kona n tiku Abotoro n tabeia are n aia Ministry ibukin kabutan ana Taeka te Atua. Ti noria ba ngke a kairaki nakoia Abotoro ao a tataro iaoia man katokai baia iaoia imwain ae a anganaki tabeia are tabeakinan tibatibaan amarake. Ti noria ikai ba a bon riai n karaoiroaki makuri n aekaia nako bon ana tangira te Atua te Tamnei ae Raoiroi ma ana Karea, ana bain tangira ao ana makuri aika a kakaokoro!
Ti noora aron ana kabarabara Tebano are bon ngaia temanna mai ibuakoia kain te Ministry n Amarake ae e bon rangi ni katekenano. Ai bon wi katekera ao ti ataia man kakoaua ba e maeu te Tamnei ae Raoiroi inanona ao bon te Tamnei ae Raoiroi ae e angan Tebano te kona n taetae n arona arei. E ngae ngke ngaia bon man te Ministry n Amarake! Akea te kanganga n aron aio ngkana ti bane ni kauki nanora nakon te Tamnei ae Raoiroi. Ti riai n bubuti te kaonrakeaki n te onimaki ma te kakoaua ao man kabureira n taai nako ba taan makuri ibukin te Atua n te aro are E na bon baireia.
Ngkana ti kauki nanora man kabureira nikoaua nakon te Atua ao n ukeria n taai nako ao e na bon anganira karauan nanora ni koaua. N te evangkerio ao a mananga rinanon te nama ana reirei Iesu ba a na kaea Kaberenaum. A riai n airi ma Iesu ma e tuai n roko ao a mananga ma te kantaninga ba a na kaitibo ma ngaia. Ngke a waaki ao E roko Iesu man kaitibo ma ngaiia ba a noria Iesu n nakonako iaon taari nakoia. A maaku man taku ba te anti ma e kaekaia Iesu ni kangai; 'Tai maku Bon Ngai".
I uringa ana taeka te Burabeti ae Ieremia 29:13 ae e kangai: " Kam na ukerai ao kam na kuneai ngkana kam ukerai ma nanomi ni koaua". E bia riki ana taeka Iesu aio ba kauringaara n taai nako; ngaira ake ti tuai man ukeria; ke ngaira ake ti a tia n ukeria ma te nanokokoraki; ao ai bon ngaira naba ake ti bon taku ba ti maeu ma Ngaia ngkai ba E aonga ni manga kangai naba nakoira n ara tai n ukeria, "Tai maku Boni Ngai".