Kanan Tamneira...
- Details
- Written by Beneteta
A kataereaki Abotoro ibukin Iesu, ai raoiroira aroia Abotoro ni kan kariaia marakiia ibukin aia Tia Kamaeu! Ngke a kataereaki ao a tuangaki naba ba a na aki manga oki n tataekina aran Iesu nakoia te koraki. Ma ti tabo ngke a kaunrakeaki ao a takarua riki man kaei mwengaia aomata ao n temboro ni kaotiota taekan Iesu ma ana makuri aika a kamimi.
Ti bon bane ni kakaitau ibukin aron Iesu nikatea ara ekareita ba ngkai bon ngaia ae e kateia e bon akikona n urua te aomata. Ti onimaki ba e na bon teimatoa inanon roro nako ao n aki kona ni mauna. Ti bon kakoaua naba ba e reitinako aia makuri Abotoro irouia Taama n taai aikai ai ngaia are ti na bon bubuti ma te tataro ae e mangori ba a bia kakateimatoaki inanon te maeu ae tabu, te maeu ae e korakora, ao te maeu ae e rinanon aron maeun Iesu ngke e mena iaon te aba n ai arora.
Ti bia bane naba ngaira ana aomata Iesu n kona nikatotonga aron aia makuri Abotoro are a reitanako aron tataekinakin Iesu n taabo nako ake ti mena iai.
Ti na bon bubutia naba Iesu ba e na uringira mani kaonoira n ana amarake are e a tia ni kamarakeia te maiti n aomata are nimangaun ngke e maeu ma ana reirei.
N te tai are e kamarakeia iai ao a bon koro maitin tekoraki n aron ae e taekinaki 50 te nga ake a ririmwin Iesu man kan tataraia, ongora irouna ao ai moara riki te kan karekei kanaia mai irouna. Ti tuangaki ba e kamaita te bwerena ao te ika Iesu ao a bane n rauaki man tiku naba nikirana. Ti kauringaki ba e karaoi makuri aika a kamimi Iesu ibukina ba e tangirira. E bon tangiria aomata ake a koro mwaitia ao e aki kan kaokiia ni bora ni baki. Ti kona naba n nora aron kabonganaan mwakana ibukin te tangira tiaki ibukin te kan taraaki are n tabetai e reke iroura riki ngkana ti karaoi kakai man akoakira irouna.
Ngkana iai te tangira iroura ao ti ataia ba ti na bon kona naba ni kamarakeia te koraki aika a baki, kunikainiia ake akea oneaia ao n kabwaibwaiia ake akea aia bwai.
Ti na butia te Uea ae e on n te tangira ma te nanoanga ba e bia akoira n anganira taribin ana tangira ibukia raora ba ti aonga ni kona ni buokia man kainnanoia ake a mena inanona. Ti ataia ba ngkana ti aki kona ao ti bia ururingnga ae ti rangi ni kona n tataro naba ibukia.
- Details
- Written by Beneteta
Te maeu n ikoikotaki are e taekinaki n te moan wareboki bon ngaia teuana te kawai ni maeu ma tarira ao manera. Moan Kiritian ake a maeu n aron aio a kaota nakoira aron te tibatiba ae e a anaki n te tangira. Ba a kabooi nako aia bai ao a tiba manena ma raoia ake a bane ni bobotaki iaan aia kairiri ana abotoro Iesu. Ti bia naba ngaira kona ni maeuakina te itangitangiri n aron aei ba ti aonga ni kona n noria raora ake a uarereke riki aia anga ni kareke mane ke ake e kanganga irouia karekean aia makuri. Ti bia rabakau naba ngaira ake iai ara atatai ni karekean te mane are ngaia ngkai aan te maeu iaon abara n taai aikai. Ba e koaua ae ngkana e karako am mane ke ngkana bon akea ao ko a kainnano ke ko a maeu ni kaawa. Ara rabakau n buokia tarira ma manera ba a na rabakau n kabongana kaubain abaia ao ara nano n tangira ni kan tiba are e reke iroura bon te kekeiaki nakon te maeu n ikoikotaki are bon ngaia nanon te Uea. Ke e anganira te kona n uringia kainnano n rakan akoakira mai iroun te Atua.
Ngkana ti karaoa aio ao ti na bon kairaki iaon te kawai ae e eti are e na kaineti nakon te tabo are ti riai ni bane n uaiakinna ae Karawa. N te evangkerio ao e kangai Iesu nakon Nikotemo; "Kam riai ni manga bungiak kaua" n te Tamnei ae e Raoiroi. E taekinaki ikai kakawakin te maeu ni Kiritian Iesu are ti na riai ni babetitoaki ao ni karikaki ba natin te Atua te Tama ngaira ao n riki ba tarina ao manena. N te aro aio ao ti na kona iai ni kakoaua ba bon Iesu ae e na kairi kawaira nako Karawa. Ba n te babetito ao ti riki iai ni koaua ba natin te Atua ao ti anganaki iai te kona ni maeu ni katotonga maeun te Atua ai ngaia are e kangai naba iai te taeka, kam riai ni maeuna te raoiroi n aron Tamami ae e raoiroi.
Ti a boti banara ni bubutia Iesu ba e na anganira te onimaki ni koaua ba bon ti Ngaia ae e na kairira nako Karawa.
- Details
- Written by Taranieta
N te bong aio ao ti reitaki ma tarira ao manera nako, ake ti a tia ni kabureia nakon Atinibanni Iesu n ara Novena ni Bau n nanoanga inanon ruaiawa bong aika a nako, ni katonga koburaken ana tangira Iesu are e a b’aro iaora man te bong aio, ae Toan ana Nanoanga te Atua ae moan te tabu, man m’aka ao ni mimitong.
Tia kaoka rongongon kaotin Iesu nakoia ana reirei ba tina katurua iangoan ana wewete Iesu nakoira ba tina kakoaua m n aki kakewekewe ba e maeka ibuakora.
N tairikin te bong are moanibongin te wiki are mangauti iai ao e kaoti naba Iesu nakoia ana reirei ake a kainiia n te ru ao e angania ana raoi. Akea Tooma n te tai are e kaoti iai Iesu ao ngke a kaongoa ao e aki kakoaua ba e taku ba e na ti kakoaua ti ngkana e karini baina ni b’angab’angan ikoakin Iesu.
Waniua te bong imuina ao a manga botaki reirei ao raoia Toma ao e a manga kaoti Iesu are e manga angania naba ana raoi ao imuina e a tuanga Tooma, “Arora mai baim ao karinna irarikiu. Tai manga kakewekwe ma kakoaua.” Ao e kangai Tooma, “Au Uea ma Atua.” Ao e kangai Iesu nakoina, “Ko kakoaua ngkai ko norai. A kab’aia akana a kakoaua ao aki norai.”
Tia arori baira nakon Iesu are e mena ni koaua n te Eukari ae moan te tabu, ao ni butimaeia nako nanora ma te kakoaua, e ngae ngke tiaki noria. Akea tian m’akan te Atua ngkai e kataua ba tina riingnga man taua rab’atana ae moan te tabu, n te Eukari ae moan te Tabu. Tia kawaria ma te ingainga ni katonga kimareirein ana kamaiu nakoira ni bane n te bong aio ao tina neboneboa te Atua iroura n tainako.
- Details
- Written by Beneteta
"Ana toro te Uea ngai ke e karaoaki nakoiu n arona am taeka" ao man ana kaeka Maria aio ao e a riki natina are e aranna ba Iesu. E riki ba ara Uea ao ara Tia Kamaeu ba bon natin te Atua ngaia ae e karikaki mai iroun te baretenia ae Maria ao ti onimakinna.
E rineaki Maria iroun te Atua te Tama mai ibuakoia aine ao Maria e kariaia. Ana kaeka n ongotaeka bon ngaia ae e kamaeua aon te aba iai. E ata aron te ongotaeka Maria e na bon reireinira naba arona ngkana ti bubutia.E rinanon te nako n nano n aron te iango are e nang riki ba te tina e ngae ngke e tuai botaki ma te mane. E titiraki ma te karaurau nakon te Anera ao e karauaki nanona ao e ongo man kariaia.
E maeka ma Santo Ioteba ma te tabeaianga ba e na kanga naba n karaua nanon teuaei? E ataia ba e na bon bae n ribaia Santo Ioteba ao e bon eti, e kan birinako man katuka Maria Santo Ioteba.
E rinanon te rawawata Maria n aron maeun te bikoukou. Tao iai kanana aika e kan kani, tao iai aki koauan nanona ao ekan titiraki man kakaea raun nanona. Tao e maakuia ana karo ao e tabeaianga ba e nang kanga n tuangiia. Eng tao e bon tabeaianga naba n aron aia taetae aomata ibukina.
E nanoanga Santo Ioteba ao tera ana iango ... e bon bae n tabeaianga ba e na kanga ana taeka n tuanga Santo Ioteba ae e bikoukou iroun te Anera? e bon bae n rangi n rawawata ibukin iangoan ana taeka aika a tau.
Ngke a manga nako Betereem ao e a oia bungina. A kakaea aia tabo are a namena iai ao e aki rereke ba a on taabo. E a roroko marakina ao tera ana iango ibukin Santo Ioteba are e aki ienikuri ni karekea aia ru n tiku imwain bungina...mmm aikavara ao a tau ana betaake? iai tobun ma bautan natina?
Ai batira rawawatan te kariaia aei nakon ana kabutiman te Atua!
Ko rabwa Maria n am kariaia ba ti a bane ni kamaeuaki. Ko bon raonira ngkoananoa n butimwaea ana nanoanga natim. Ko na mauri Maria, ae ko on n te karatia!
- Details
- Written by Taranieta
Karaoan te eti imatan te Atua bon karaoan nanon kanakoakira iroun Iesu ba tina katanoataa te Rongorongo ae Raoiroi. N tabetai ao e rangi ni kanganga ba e korakora kaitarakin ara makuri ke kamamaeakira mai irouia raora tabeman. Ma ti ataia ba ngkana ti karaoiroira imataia aomata ke ni kan kakukurei nanoia aomata, ao tiaki karaoa iai te eti imatan te Atua ba ti ongo irouia aomata ke ti ongo nakon nanora ma kan karaoiroara.
Ti na butia te Atua ana karatia ba tina korakora n teimatoa n ongotaeka Irouna ao ni kabutanakoa te Rongorongo ae e Raoiroi ao tina aki ongo irouia aomata ma ti iroun te Atua