Kanan Tamneira...
- Details
- Written by Taranieta
Te rairannano, te kabwarabure ao te raoi, bon tein maiura n tainako ngkana ti tangiria n teimatoa n irira Iesu. Akean te rairannano, e na katikuira n te bure ao te mwengabuaka ao akea ara karikiuaa.
Ti kainnanoa te kabouaki ma te korakora n tainako ai ngaia are ti riai ni b’aina tiroakin nanora ba e na tautaeka iai ana Tangira te Atua. Itiakin nanora ngaia arora ni kamaeka te Atua ni koaua iroura ao kawain rikirakera ni maiu ma te Atua, te maiu ae e tabu ao bon kawain naba karokoara nakon tamaroan nakoara are e karikira te Atua ibukina.
- Details
- Written by Taranieta
Im'ain ae ti makuri ibukin Iesu ao e riai n reke moa ana "Raoi".
N te bong aio ao e weteira Iesu nakon te rairannano ao te kab’arabure ba e na reke mai iai “Te Raoi” are bon mairouna. Te raoi aio are e na reke ngkana ti kakoaua raoi ba e a tia ni maraki ma ni mate te Metia ao e mangauti mai buakoia mate n ana kateniua ni bong ao ngkai e maiu ni koaua irarikira te Atua ae te Tangira. Ngkai e mena irarikira ni koaua te Atua, ao ti kona n namakina ana tangira ae b’abakoira ngkana ti kainababu ao ni kariaia ba e na kaotia nakoira. Ti na namakina ana raoi.
E tangiria Iesu ba e na kaotiotaki n arana, te rairannano ma te kab’arabure nakoia botanaomata nako ni moa mai Ierutarem ( ke man mwengara, ara kawa ke abara), ao e taku, “Boni ngkami tani kakoauai baikanne.”
Ai m’aitira ao ai korakorara nanon Iesu n tangiria ba tina ota ao ni kakoaua. Ai arona nakoia ana abotoro ake a nanououa, are e kaoti nakoia imuin mangautina, ao e teimatoa n kaotia nakoira n aanga aika a maiti, n ana makuri te Tamnei ae Raoiroi, ba e tangiria ba tina kina raoi ao n iriria. Ngkana ti iriria ao e aki katioira mai buki ma e babakoira n ana tangira man rab’atira mai akura, n kabaroa ana tangira nako nanora, e kaeta kawaira, e akoira ao e wirikirikia i taningara, kauringakira koron tangirara irouna ao ti namakina ana raoi ao ti makuri ma ngaia.
- Details
- Written by Taranieta
“Rabo’nni”, e takarua Maria te Imaketara, ma te kimareirei ngke e ongo wetean arana iroun Iesu, ao e a kina Iesu are e tei imatana, ba e aki kina ngkoa, ba e tabe n rawawata ngke akea kaain te ruanimate.
E weteira Iesu nakon te rairannano ni koaua n te bong aio. Ti na katikui tabetaben nanora aika a kabonoi taningara, ao a kamabubua ara iango ma ara taratara.
“Rairi nanomi ao kam na bane ni babetitoaki n aran Iesu Kristo bwa aonga ni kab’araki ami bure ao ao kam na anganaki te karea ae te Tamnei ae e Raoi, ba e karaoaki te motintaeka ibukimi ao ibukia natimi ao ibukia aomata ni kabaneia aika a raroa naba, ba aomata nako, aika e na weteia te Uea ae Atuara”. (Makuri 2: 38-39).
Ti a iangoa kakawakin kamaiuara iroun Iesu ae ana rikitemanna te Atua are e anga ba te karea ni kabomuin ara bure. E rinanon te maraki Iesu ngkai e tokaria ara bure, e mate ao e mangauti n tokanikai, ba akea m'akan te mate iaona ao tia kamaiuaki. E bon tangirira n te tangira ae kororaoi te Atua, ma ti teimatoa ni kaairua imatana. E aki konaa moan taraakira te Atua ngkai ti kabuakakai arora n tainako n ara bure, ma ti a kona ni kawara te Atua ae Tamara ao man taromauria ao n reitaki ma Ngaia, n te irarao ao te tangira ni koaua, tii rinanon te karea ni kabomuin ara bure ae Iesu. E taraira te Atua rinanon te karea ni kabomuin ara bure ao e a bon aki nori ara bure, ma e norira rinanon itiakin ma kororaoin te karea ni kabomuin ara bure ae natina ae Iesu are bon rabwatan ana Tangira, are e rabunira ao man karaoiroira imatana. Ti a kabaia ngkai ti kamaiuaki iroun te Atua te Tama, rinanon ara Uea ae Iesu, ao ti bon riai ni kakatituaraoi, n neboneboia ao man karaoiroia n aki toki. Ti a kab'aia n aron kamaiuakira iroun te Atua, n te aro aei, iroun Natina are e kareanna, ti ibukin kororaoin ana tangira ibukira.
Ti a nakon te Atua ae Tamara, ma te nanoraoi ao te kukurei, ba e butim'aira n tainako, rinanon natina ae Iesu, e akoira ao n tangirira n te tangira ae kororaoi n aki nori ara bure. Ti a kainababu ma n kakauongo, nakon wetean arara, ma ni kaeka ni kangai, “Au Uea ma Atuau, ko rab'a ngkai ko kamaiuai iroun Natim ae Iesu; reireiai arou ao kabonganai ibukim”
- Details
- Written by Taranieta
E tangirira Iesu ba tina teirake ni makuri ibukina.
E titiraki ngkai Iesu nakoira, “Tera ae kam taetaenikawaia iaoni kawaimi?” (Ruka 27:17)
Anne ana taeka nakoia nake uoman iaon te kawai nako Emmaus ao ai bon nakoira n tatabemanira nako. E kabongana te taeka ae “taetaenikawaia” ma tiaki te taeka ae “taekinna” ba a aki kabutanakoa n taekina te rongorongo ae e raoiroi ma te ninikoria, ma a tataenikawaia ibon imarenaia ma te nanououa.
E boaia ana reirei aikai ao e kangai , “Ai nanobabara ngkami, ao ai iremwe ra ngkami ni kakoauai b’ai ni kabane ake a taekinaki irouia burabeti. Tiaki e na riai ni maraki te Metia ni baikanne ba e na roko ni mimitongina?” (Ruka 24:25-26).
E tangira Iesu ba tina m’akuri ao tina aki kabanetai n taetaenikawai. E nori nanora ma ara makuri n tainako Iesu n akea te b’ai ae e aki ataia ao e onimakinira n nakoara mai irouna ba e tauraoi ni buokira iai.
Santo Betero,( are raona Santo Ioane n te tai arei), e kairira n rongorongoia n te Euangkerio n te bong aio, n ara makuri, ngke e kangai nakon te m’auku, “Taraira.”... Akea au tirewa ke au koora, ma N na anganiko te bai ae iai irou: n aran Iesu ae te I-Natareta, teirake ao nakonako.” (Makuri 3: 4-6).
Tia teirake n aran Iesu ni kateirakeia raora nako n aran Iesu ae moan te tabu ao moan te m’aka man mimitong ao E na neboaki te Atua n aki toki.
- Details
- Written by Taranieta
“Ao akea ba e a tei naba Iesu i m’aia inanon te kawai, ao e taku nakoia, “Kam na mauri!”. A nakoina man tau waena ao ni bobaraki imatana. E taku Iesu nakoia tai maku, nako tuangia tariu ba a na nako Kariraia, ao ana norai iai.” (Mataio28:9-10)
Ti na kamaura Iesu are a roko ngkai ni kamaurira. “Ko na mauri Iesu”.
Ai kakukureira aron ana kamauri Iesu nakoira n te miniti aio,ngkai e kawarira, ara Uea ao Atuara are e mangauti.
Ngaira taan onimaki, ti kakoaua ba raora Iesu ni koaua ngkai, ao inanon maeura, ba “I kakoaua Iawe ba raou n tainako, I aki tibanako ba e mena irarikiu”. (Taramo 16:8).
Imuin ana kamauri Iesu nakon Maria te Imaketara ao Maria are temanna, ao e tuangia te bai ae ana karaoia, ba a na nako n tuangia tarina, te tabo ae ana noria iai.
Ti na kainab’abu ao ni kakauongo nakon Iesu ngkai, ba antai tarina ao manena aika e tangirira ba tina karokoa ana rongorongo ba a na nakoina n te Eukari ae moan te Tabu, ba ana noria iai.