Kanan Tamneira...
- Details
- Written by Beneteta
E a uti Iesu man te mate, Alleluia alleluia!
Tibau ma ngkami tariu ao maneu, bon te kimareirei ao te kakoaua ma te onimaki ba e a bon uti ni koaua Iesu.
Ti a tia ni katauraoi ibukin te uti aio n rinanon te 40 ni bong n tataro ao te aki mamatam ba ti aonga n nanorinano raoi man kakoaua ba bon taan bure ngaira are ti kainnanoa kabaran ara bure. E riai n irianaki aio ma te nanoanga nakoia raora ake aki rangi ni bati aia bai- boong aikai, ti aranna ba bongin te Karemo.
N ara tai ni Karemo ao ti kekeiaki iai n kaitarai kariri ake a na tuka ara kekeiaki e aonga n ae a na bara nanora ni keiaki ni kata are ti kona ba ti aonga ni kona ni mate ma Iesu n te Kanimabong Tabu- bon te bong are e tine iai man mate iaon te Kaibangaki. E mate Iesu ba ti aonga naba ni kon ni manga uti ma ngaia n te bong aio are bon te bong ni Bakate. E a uti ni koaua Iesu iai man te mate, alleluia n te bong aio!
N te tai aio ao e a kautira iai Iesu ba ti aonga ni katonga te berita are ti na maeu ma ngaia iai n te maeu ae e boou; ikai iaon te aba ao i Karawa.
Ti bia manga bane n uti ma Ngaia ao n tauraoi ni manga karekea te bitaki ae raoiroi ni maeura ba ti aonga ni kona ni katonga te maeu riki are ti na noria n te maeu are e na roko.
- Details
- Written by Beneteta
Moan te ananau te wareboki n te bong aio ao I bubutia Iesu ba e na buokai ni kauringai kanoana aika a riki ba au tibatiba n te tairiki aio.
Te moan makoro are e teke nanou iai bon aron teuare Birato ni maroro ma Iesu. Iai te makoro are e tuanga Birato Iesu bukin rokona iaon te aba ba e roko ba e na kaotiota te koaua. Ngke e ongo Birato ao ekangai nakon Iesu " Tera te koaua?" E aera ngke e titiraki aio Birato? E nako nanou iai ba I ataia ae te tia moti ngaia ao e kakaraoi babaire ibukin bairean taekai aomata ake a urua te Tua. Ma ngkana e titiraki Birato ba tera te koaua ao I taku ba ko na bon mimi naba man kangai; ha, ngkana e aki ata anne ao ai tera ngkanne arona ngkana e na bairei taekaia aomata ake a kateaki n te boowi? I ataia ae iai nanon Birato n kan kainaomata Iesu ba are bon akea te kairua ae e noria iroun Iesu ma e korakora aia kamangao aomata ao a tatakarua man tua ba e na tauraki iaon te kaibangaki. Au kantaninga ba e kunea te koaua imwin ana itaramata ma Iesu n te tai aio.
Te kauoua bon ringakin nanou n rongorongon Betero. E korakora buakanakin ana iango ma nanon Betero nikan kaota raoi aron ana tangira nakon Iesu. Iai te tai are e roko irouna are e a kan tiritiri ibukin kaotan ana tangira nakon Iesu ao n tokina e a kababua taningan Makuti! Iai naba te tai are e a korakora riki te maaku irouna n iangoan arona ngkai e rangi n irekreke ma Iesu ao e rotaki iai ao e bua tangiran Iesu ibukin te maaku aio ao e kakea Iesu tenua te tai. Ma e ngae ngke ti ti tuangaki ae e riki aio ibukin mwengan Kaiaba, te berebitero ae e rietata. ti ataia ba e nako ni maango n tang Betero imwiin tangin te moa. Te tang n nanomaraki aio bon ngaia are e karika Betero ba te Santo ae moan te kakannato.
Ai kananokawakira aroia Tautia nakon Iesu, a kataerea, a bawareia, a bainingareia, a bauna atuna n te kateketeke, a raerua ana kunikai, a kamooia n te beneka, a orea ubuna man urua aron taraana, a tauria n te Kaibangaki ao ngke a noria ba e a bon mate ao a manga ewara buroona n te kabang. Ai korakorara aia kairiribai man aki nora aron nanon teuare e tauraki irarikina ma raona ao ngaia are e butia Iesu ba e na uringa ngkana e roko n abanueana. E kukurei Iesu n ana bubuti ao e tuanga ba bon raona ngaia n abanueana.
E rangi n ringa naba nanou aron Tinan Iesu, Nei Maria, ngke e tei iaan ana Kaibangaki natina ni karokoa ae e moti ikena.
Tariu ao maneu raonai n anenea ...E tei n tang Tinan Iesu...
- Details
- Written by Beneteta
N te evangkerio ao a kaotaki aron kaitiboia Betero ao Anterea, Iakoba ao Ioane, Mataio ma Nataniera ao Tooma. Ma e aera I taku ba akea rongorongon kaitibona ma Iuta? Irarikin anne bon iai taekana ae ngaia bon temanna mai ibuakoia ana reirei Iesu ake tengaun ma uoman. Ngkana a taekinaki ana reirei Iesu n te Baibara ao e bae n ae e na mena aran Iuta n te kabane.
Nakoan Iuta bon ngaia te Tia Mane ibukin maeun Iesu ma ana reirei. E taekinaki ba e a kaman matennanoa tabeakinan te mane. E bon taekinaki naba iroun Ioane 12:4-6 ba bon te tia kimoa naba te mane are e kakawakinna ibukin maeuia. Oin raoi ana iango ibukin kamanean Iesu ba e aonga n reke kaubaina man boona n karaoa aio are e atongaki ba e anganaki tenibwi te maibibi n tirewa.
Ma e aera ngkai ti a ti taekina aron ana iango Iuta ni kamane ao man bon mane naba ngaia ibukin tangiran ao mataiakinan te mane?
Iraman ibuakora aika ti kakabongana tarebonin te makuri ibukin ara taetae ma ara utu ke i bon ibukin ara katabetabe are akea rekerekena ma te makuri? Ke aaro riki tabeua aika ti karaoi ba e aonga n kabakaki boon karara n te tabo n amarake man te kambana ke kantokara n te bus? Ti bon kona naba n nora Iuta irouran arora ni mamataai n te mane.
Ti kauringaki iroun Timoteo ba tangiran te mane boni koburaken taiani buakaka ni kabane, ma ngaia are ti nora aron kananoangan Iuta ngke e korakora taonakin ana iango ibukin tangiran te mane ao e iangoa kamanean Iesu man kaburea nakoia taan tiringnga.
Ai kawara Iuta, ngaia are ti na tataro ba e na kounakoi iango aika a buakaka ibukin tangirant e mane mai iroura ao man ara iango Iesu ae Atuara ao e na onea mwina n te rabakau ao te kona n tabeakina te bai ae te mane ibukin neboakin ao kamoamoan ana tangira te Uea ibukira ni kabane.
- Details
- Written by Beneteta
Ti a Tataro n te bong ae te Kabong Tabu:
Iesu ko anganira te katoto ae e raoiroi
Te bong ae te Kabong Tabu bon te bong ae moan te kakawaki n ara onimaki
Ti butimaea ana tangira Iesu
are e anganira ibukin maeun rabatara ao moara riki maeun tamneira
ti anganaki ba kauringakira n tangiria raora
N ara tataro n te bong aei ao -
ti kataua Iesu ba e na teboki waera, e na tangirira n aki totoki ao e na uruaki man kabureaki ao ni kamateaki ibukira
Ko rabwa Iesu ba ko kaitiakira man ara bure ao ni kamaeuira ba ti na manga reitaki ma ngkoe ao Tamara ae te Atua.
Ti na tataro ba ti bia kakaonimaki nakon ana tua Iesu ae e tuangira- ba ti na tangiria raora n aron ae e a tia ngaia n tangirira
Ba ike e mena iai te nanoanga ma te tangira ao e bon mena naba iai te Atua.
Buokira Iesu iroun Tamneim ba ti na itangitangiri ao man noria raora aika a kainnano ao man tauraoi ni buokia ba ti aonga ni kona n ira nanom ao ni karekea te kukurei iroura ma ngkoe ngkai ao n aki toki, Amen.
Kabarai ara bure Iesu ao nanoangaira ba bon Taan bure ngaira.
- Details
- Written by Beneteta
Ai kavara Iesu iroun Betero are e a ti kakea naba man aki kinaa ao man taetaebuakaia ba ngaia bon te aomata ae akea rekerekena ma Iesu. E aera ngke e kataua aio Betero ao kai bon Iesu are e a tiba tia n teboki waena man karinea. Kai bon ngaia naba are e taku ba te Kristo ao natin te Atua Iesu. E aera ngke e a ti kanganne naba?
Ngkai I iangoia ao e kangai miin nanou ngaia ko bon kona naba n ae ko a ti rairaki naba man te rangi n raoiroi nakon te kabanea n buakaka! Ba ai buakakara aron Betero aio ngke te bae e bon ata Iesu man kina raoi ao akea ba e ati bua naba te kikina arei ma te tangira arei.
Ngke e nanokawakia ae e nang kamaneaki Iesu i bon iroun ana reirei ao bon Betero naba are e ienikuria Ioane ba e na titirakina Iesu man tuanga ba antai mai ibuakoia ae e na kamanea. Bon te reirei ae e raoiroi nakon Iesu.
E bon rangi ni kanganga naba maakakin te mate. N tabetai ibukina ba ko bon tuai n tauraoi ai ngaia are ko bon aki kan mate iai. Ai moara riki ngkana e a bon roko naba te tai are ko nang kaitara ma ngaia. E bon rootaki n te maaku Betero ao e rawa n mate.
Ma ngke e ongo tangin te moa ao e rotia te uringaaba ao e taonaki n te tang ma te nanokawaki ae e nako mai kabin nanona. Aio tangina are e noria Iesu man rootaki iai ao e kabaroa ana nanoanga iaon Betero ao man kabara ana bure. Man te tai arei ao e bitaki Betero man te aomata ae e buakaka ibukina ba e a tia n riba Iesu, ni maninga taekan Iesu ao man rawa iroun Iesu ao e bitaki nakon te kabanea n raoiroi n aomata man riki ba te teuare e katea ana Ekaretia Iesu iaona.
Kabarai ara bure Iesu ao nanoangaira ba bon taan bure ngaira.