Kanan Tamneira...
- Details
- Written by Beneteta
Kam na mauri n ana tangira te Uea, tariu ao maneu!
N te bong aio ao tibangau ae I kaitibo ma ngaia bon iangoan te bong aei ae 25 n Maati.
Ngkoa ngkoa ao iai te teei naine temanna ae e maeka i tabon te kawa nako iaang. Aran te teei n aine aio bon Nei Maria Ioakim. E maeka ma ana karo aika araia Ioakim ao Nei Anna. Bon ti ngaia te teei n aine aio irouia ana karo ao akea ba n te bong teuana e a tataro nakon te Atua n ana ru Nei Maria. Bon te kuba irouna ngke e a ongo naba te bana ae moan te tangiraoi ae e kangai, "KO na mauri Maria ae ko on n te karatia!"
Tariu aomaneu, n te bong aio ao bon kanuringaan te bong are e kabutaki iai ana man te Atua nakon Nei Maria ao are e kangai naba iai Nei Maria; I KARIAIA!
Man ana kariaia aio ao e riki n aomata natin te Atua inanon biritona. Ai tikiraoira ao ai rabara te kariaia aio.
Ko a tia n iangoia ba tera ae ko na karaoia ngkai ngke arona ba e aki kariaia Nei Maria te kabutiman aio? Ana tera aron te aonnaba ngke arona ba e aki kangai 'eng' Tinara Nei Maria?
Ngai ma ngkoe ti a uaia ni karabwa moa Tinara ae Nei Maria ibukin aio ao man anene... Maria Tinan te Taeka raoi...Ko bati n raba Tinara Nei Maria.
- Details
- Written by Beneteta
Ba ai bon ravatara aika a mate ni katoa bong ao e aera ngkai ti aki tabe iai? Ma mateni Iesu ti kauringa arona ni katoa ririki. Ba e aera, tera raoi bukina?
Ti bon riai n ota raoi ibukin ae ti riai ni kauringa maten Iesu ba aio bukina. Ti na uringnga ba ni bon etina bon ngaira ae ti riai ni mate ao ngaira naba aika ti riai nikatuaeaki ibukin baai nako ake ti karaoi. Iesu bon ngaia natin te Atua e anga ngaia ba e na mate ibukin ara kairua ma arora aika a aki eti imatan te Atua. Boni ngaia ae e kamaeuira man kaairua akanne.
E aera ngkai e kukurei nanon Iesu irouia ake a keiaki ni karekea te manga kaiokaki ma ngaia ao man okirikaki nakoina ma Tamana? Ba ibukina ae bon nanon Iesu ba ti na kamaeuaki ao e kukurei n anga Ngaia ibukira. Aio bon te tangira ae e koro arona ma tamaroana. Te tangira ni koaua ae e kaotia nakoira Iesu ae e kataua ae e na mate ibukira.
Ti a ataia nikoaua ba oin ana iango te Atua ibukira ba ti na kamaeuaki man te makuri ae e aki raoiroi. E rawa te Atua ba ti na mate man konaaki n ana makuri teuare e buakaka are bon aiana. E rawa nanon te Atua n noria ba a na mate ana kariki bai ba bon ngaira ni kabane ana kariki bai. Tamneira ma rabatara ma ae e tabeakinna riki te Atua bon Tamneira are bon ana bai.
E aki kona ni kataua ba e na bua Tamneira n ana mamanai teuare e buakaka. Nanoangaira te Uea ao kamaeuira.
Ti a boti nanora man butia te Uea ana tangira ba e aonga n kona naba ni kamaeuira man kaokira nakoina ba ti na maeu ma ngaia n aki totoki n te maeu are e na roko.
- Details
- Written by Beneteta
Ngkana arona ba kam kaitibo ma raoraomi ao a kairi naba ngkami ba kam na nako ni mooi manging n te b'a ao kai are kam ataia ba kam karaoa ami karemo man iangoa teimatoam n iriira nanon te Atua. Tera ae ko na karaoia nakon te kakao aei? Ao ngkana tao ko na keiaki ni kaintoako ao are a bon kairiko naba ai tera ae ko nang bon karaoia? Tao ko na bon kan karautaeka ma n am iango e na aki tatao am iango n nanoangaia raoraom ao man tangiria ba a na bon tiku naba ba raraom n aki totoki?
Teniman ataeinimane ake a kataki aia onimaki ao a tuangaki ba a na taromauria te atua riki temanna ao ngkana a rawa ao a na tewenakoaki nako nanon te ai ae uramwaaka.. A rawa ateinimane aikai ba a ataia ae a na bon kamaeuaki ba a tia ni bubutia te Atua te Tama. E maeu man matoa aia onimaki. A bon ongotaeka naba nakon ana taeka te Atua ao a kawakinna man aki manikangareia ao uaan aia kekeiaki aio ao a bon bane ni kamaeuaki. A ravata riki ake akamaeuaki man ongotaekaia iroun te Atua.
Ma e aera ngkai e aki kamaeuaki Iesu? bon ngaia natin te Atua bon iai te m'aaka irouna ni kona ni katoka te iova nakoina. Bon te Nati ngaia ae moan baan te ongotaeka ao e aera e aki kaniwaganna Tamana are i Karawa man katoka tiringana iaon te kaibangaki.
Eng, bon iai ana baire te Atua ibukin maeura aika a kakaokoro aikai. E aki kamaeua Iesu ba iai bukina; E na riki ba te karea n raoi are ti na kona n raoiakinaki iai ma Atuara ao man kaiokaki ba ti aonga ni kona ni maeu ma ngaia n te kukurei ae akea tokina.
Ti bia bane ni kona n ongo nanon te 'karea n raoi' aio.
- Details
- Written by Beneteta
A aki rangi nikukurei n ongo aio I Iutaia kioina ngke a taku ba e taniaki Iesu irouia taimonio. Ma e kaeka Iesu man tuangiia ae akea te taimonio irouna ma e ti ataia ae iai Ngaia imain Aberaam.
E tuangira naba Iesu ba ngkana ti kavakina ana taeka ao ti na bon aki mamate. Ma a bon aki ongo nanon karaki I Iutaia ake a taetae ma Iesu ba a bane n taku ba e tuangiia Iesu ba ngkana a kavakina ana taeka ao a na bon aki mamate. Te mate are a iangoia bon te mate n te rabata ma Iesu e taekina te mate are n te tamnei ba ti na aki mamate ma ti na maeu ma ngaia n aki toki. Aio ana moti n taeka nakoira.
Ana moti n taeka te Atua te Tama nakon Aberaam ba e na riki ba tamaia botanaomata ao e na maeka n te aba are Kanaan.
Ao ngaira iai ana motin taeka te Uea nakoira ae e onoti? Ko a tia n iangoia ba tera?
Iesu bon ngaia te maeu te ota ao te koaua. Bon aio ana taeka. Ngkana ti iriria ao e na bon reke iroura te maeu ae e aki totoki.
Ana Taeka te Uea a bon bane n kawakinaki n te Boki ae te Baibara. Ti na warekia ma te uki n nano ao te onimaki ba n te tai are ti kaukia iai ao ti na bon katurua ara onimaki ba baai ake ti wareki mai iai bon ana Taeka aika moan te kakawaki man tabu.
Ti na bubutia te Uea are bon iai n taai nako, ba iai Ngaia imaia aomata nako riki imain Aberaam, e bia buokira n anganira te kona n kawakina ana Taeka ao man maeuakina ana Taeka inanon maeura aio.
- Details
- Written by Beneteta
E ngae ngke e bon rangi ni korakora nanon te Uea are Tawita nikan katea ana Auti te Atua ma e bon okoro ma are e iangoia te Atua. E tua te Atua rinanon te Burabeti are Natan ba bon tiaki ngaia ae e na tabena aio ma bon natina are Toromon. Bon Toromon naba are e kaonrakeaki n wanawanan te Atua are bon akea ae e a tia ni katotonga aron wanawanana.
Ma ti tuangaki ba inanon te Auti ae e tabu aio are a aranna ba Ana Temboro te Atua ao e kuneaki iai Iesu irouia ana karo imwiin buana inanon tenibong mai irarikia. A kunea inanona n reireinia Baritaio ma Taan Koroboki.
Tariu ao maneu, kam a tia n iangoa aron te ririki teuana ma teuana? Kam a tia n karaua n iangoa aron kanoan boong ake ti bane n riki mai iai? Tera ami iango ngke arona ba tiaki aron matoan ana onimaki Aberaam are e mena irouna n tain maeuna? Kanga a na tera ae e na riki ngke arona ba tiaki te tia onimaki ngaia? ao nake imwina ake kanoana nako n aron; te Uea are Tawita, King Toromon, ma Ioteba ... ao bungiakin Iesu? Aikai aika kanoan ana iango te Atua ibukin aron kanoan te aonnaba aio... ao are ti a bane n riki iai. Man ana onimaki Aberaam ao aio ara aonnaba!
Ngaira n tatabemanira nako ti a riki man kakabaiaki ibukin aia onimaki ara bakatibu. Ngke arona ba akea aia onimaki ara bakatibu ao tiaki kamaeuaki ke tiaki roko n aron maeura aikai.
Kam a tia ni iangoa aron ana iango te Atua ibukimi? Bon iai ana iango ibukira ni kabane. Ngkai ti karikaki bon ana baire te Atua. Arora n onimakinna man kariaia ba ti na okiria ngkana ti karaoa te kaairua bon ana baire ibukin maeura are E kariaia ba ti na waaki ma te Tamnei ae Raoiroi are ngaia te Tia Kauringira arora aika a aki tau ba ti aonga n okira Te Atua n te benetenia ao ni manga kaiokaki ma ngaia ba ti aonga n tiku n te kukurei ma ngaia n aki toki. Ena neboaki te Atua ni maeura aikai.