Kanan Tamneira...
- Details
- Written by Beneteta
Ko raba Iesu ngkai ko tuangira ae bon ngkoe otan aonnaba. Ngkana ti aki ongo nanon aei ao ti na kanga n ongo riki nanon ake ko na manga tuangira riki? Katauira Iesu ba tina kona n ongo nanon am taeka ni kabane.
Kabarai ara bure Iesu n arora nikona n kataetaeko n te aro ae e aki riai. Ba ti tabo ngke ti kakanikoko man kangai, bon ti tabo ana maan ma aia maan nake a kakatanga beroia! Ba eng Iesu ti rangi ni kawa ma arora aio ae ti te kan bairei taekaia aomata man ienikuri n anga ara reke ibukiia. Mmm ao bon tera ngkoa arora irarikim Iesu ba are eng ti aki ataia ba ko nako mai ia ao ko na nakea imwiina. Ti bon bia ataia ao man kona n iriko.
Ko kangai Iesu ba ngkana ti aki kinako ao ti bon aki naba kina n kina tamam. Iesu, ti bon kan kinai ngkami ao man kan nim ma ngkami n taai nako ma are bon taan bure ngaira Iesu taioaka kabarai ara bure ao kaitiakira inanon te karemo aio ba ti aonga n tauraoi ni manga uti raoi ma ngkoe n tain te Bakate ae imaira aio.
Ko na neboaki nimaeura Iesu. Maranatha!
- Details
- Written by Beneteta
Te moan wareboki e anaki mai iroun te Burabeti ae Ieremia ma taekan kan kamaruakina irouia kain Anatota. Ma n te evangkerio e taekinaki aron kauntekakin taekan Iesu. Ai kawara ba a un man taku Baritaio nakoia ake kanga a kan ira man ongongora ana taetae Iesu, ao ngkami kam kan irarang naba irouna? mmmmmmmmm tiaki Iesu are e anga maeuna ibukia koraki aikai? E aera ngkai a na taetae n arona aio?
Iai te karaki teuana ae e kangai atuna- E IKOAKI IBUKIU.
N tain te buaka n te moan buaka n te aonnaba ao e mananga te Nati n Uea mai Wales nakon te onaoraki i tinanikun te kawa ae Ronton. E na nako n noria tautia aika 36 maitia ake a katukaki n te onaoraki ibukin kamarurungakia. Ngke e nakoia ao e noria ba ti 30 mwaitia. E titiraki man kangai: 'tiaki 36 maitia koraki aikai?' E kaekaki ao e tuangaki ba ake 6 a bon mena n te o n aoraki are teuana ba a kakaiaki riki ikoakia ma e tua te Nati n Uea arei ba e na noria.E kairaki nakoia ao e manga bon kunea ba ti 5 ake a mena ikekei ao e manga bon taku naba: 'ao e nga are temanna?' E a manga tuangaki naba ba aio ai bon tekanano kawaki taraana e aikoa tau ibukina ba e na noria. Ma e imanono te Nati n Uea ao e tua ba e bon kan noria naba. E kairaki nakoina ao e baraakin tarai waena ake a bon rangi n ikoaki. Ngke e baraaki n tara waena ao e karuoa ubuna ao man kaboria ma waem te tautia aio ao e taku:' Ko ikoaki ibukiu'.
Itaia 53:5 e kangai "Ma e ewaraki ibukin ara bure, e oreaki i bukin ara kairua. Ti raoiakinaki n oreana; ti kamaiuaki ni ikoakina".
- Details
- Written by Taranieta
Ba e taku te koroboki: ‘E na ranga mai nanona te karanga n ran ae e maiu.” E taekina iai te Tamnei ae a na anganaki akana a kakoaua Iesu.” (Ioane 7:37-38).
Aio te kibu tariu ao maneu are e katika nanou n te bong aio, are bon kanoan te novena ma Tinara Nei Maria ae te ka-ituia ni bong.
I tabe n iangoa iai raangan te karanga n ran ae e maiu, man Atinibanin Iesu ae maiu n te Eukari ngkana i tekateka ni kamaroroa Iesu, aon taai ake e katabetabea iai nanou irouna ba au Uea ma Atuau Iesu. Ai kabaiara nanou n iangoakina ba n te tai anne ao ngaia e karaanga nako nanou ma tamneiu, te ran ni kamaiu man Atinibanna, e ngae ngkana i aki noria, ba I kona n namakina te nanokawaki n au kairua nakoina, te rau, ao n tabetai te tang ma te kimareirei ae akea bukina! Ngkana I katuua au iango ni iangoa te karanga ni kamaiu aio are e teimatoa n ranga nakoiu n tainako ae I tannakon Iesu, ao e korakora mamaan nanou n iangoia ba I bon aki riai ao I aki tau ba e na karaanga te kamaiu aio nakoiu Iesu. Aio bon te miterio are e taekinaki ba e ota iai Tinara Nei Maria ngke e ewaraki rarikin natina ao e tinako mai iai te rara ma te ran man Atinibanna. E baroira n tainako ao n aki toki.
Ti na katituaraoa Iesu man neboneboia n ana baintangira nakoira ae te Tamnei ae e Raoiroi, are ieieka nanora ba te karanga ni kamaiu. Ti na kakatituaraoa riki Iesu ngkai e kataua ba e na kaanira ni koaua n te Eukari ae moan te Tabu ba e na teimatoa n anganira koburaken te maiu man Atinibanna. Ti katituaraoiko te Uea.
- Details
- Written by Beneteta
I kan reitai ma ngkami tariu ao maneu n tiba aron ana tangira te Uea ibukin buokara n te bong aio man ana taeka. Ba e kauringira ae e ngae ngke iai aika a tangiria ni karaoa te mani buaka ibukin tukan karaoan te raoiroi ma E na bon raonira te Uea man katan aron makuri aikai ibukina ba E tangira te raoiroi n taai nako. Ko raba te Uea!
N au tai n ongora te wareboki n tain te Tutia are I iria ma raou man ana taibora te NSC ao I uringa te karaki teuana inanon ongoraau n te wareboki. Te karaki aio I ataia ba e bon tangirai te Uea ba N na tibaia ma ngkami.
Iai te tia makuri ae e kaea te tei n te rain ibukin karekean kanana te raiti are e nang bane man titoa. Inanon teiteina ao e nora naba temanna ae e kina ao man ataia ae e na roko naba ni kaea te tei n te rain ibukin karekean kanana. Inanon teiteia ao e takarua te Tia Tara te Kaako man tua ba ai bon ti uabui riki te bwauna ae e na anganako te titoa. Ngke e taraia teuarei ao e ataia ae ngaia bon te katengaun ma ruaman ao e ababaki te rain imwiina. E tanrikaaki man wetea teuare e kina ao e anganna ana tabo ba e ataia ae a bati natina.
E aki ti bua ana tabo teuaei ma e bua naba angan reken kanana. Ma ti ataia ba aio aron Iesu ae E aki toki n anai ara tabo man tei ibukira ba ti aonga nikamaeuaki ao Ngaia e kana uakakan arora are e onea mwira iai.
Ko rangi ni bati n raba Iesu ao kabarai ara bure ba bon taan bure ngaira.
- Details
- Written by Taranieta
Namakinan kananokawakin te kakeaaki ao te tinanikuaki, te aki tabeakinaki ao te aki mutiakinaki. Aikai taian namakin tabeua ake e mena inanona Iesu imain matena n te tai arei. E karawawataki nanona riki ngke e nang butimwaea aron te maraki ma te kananoanga ibukin uotakin ara bure iaona, ngaia ae akea ana bure, te b;ai ae ti aki tatauraoi ni butim'aeia ngaira. Aio te tai are ti a manga roko naba i nanon ana namakin Iesu aikai, ni wiki aikai ngkai e a uakan ana tai ni mate Iesu.
E ngae n anne ao e aki rotaki ana tangira Iesu nakoira ba e tangiria ba tina kamaiuaki. N te wareboki n te tai aio ao ti kona n nora aron te namakin aio ngke e a nako Kaberenaum Iesu ao ni kaotia are e bon aki butimwaeaki te burabeti n ana tabo. E kamaiua te tei are e nang mate i Kaberenaum ao e tuanga taman te teei are e roko nakoina ni butia kamaiuan natina, ba e na nako n oki nakon natina ba e a marurung. E kakoaua te karo arei ao e okira natina are e kakoaua raoi ba e maiu n te aoa ke te tai are e taetae iai Iesu nakoina.
E a tia ni manga uti Iesu ao e maeka irarikira ni koaua n te Eukari. Ti na kawara Iesu ni uoua te wiki aika imaira imwain matena, ni karaka kamaroroana ni kabebetea nanona. Tai kaakea ao n aki tabeakinna. Tai karawawata nanona ni katikua n tinanikuia n ti ngaia n te Eukari ae moan te tabu irarikim. Ti na katotonga te karo are e kamaiuaki natina, ao ti na kakawara Iesu ae irarikira. Ti na kakoaua ao ti na onimakina ana taeka ake e na tuangira n ara tai ni maroro ma ngaia, ao ti na katonga kimarerein ana kamaiu ma ana kamarurung ao n nebonebo Iesu n tainako.