Kanan Tamneira...
- Details
- Written by Uriam Timiti
N te Tangira are bon te Atua, ao ti a kauringaki iai n te bong aio inanon ana taeka te maniwinibubua are kangai;"Te Uea I aki tau ba Ko na rin n umau ma ti taetae ao e a kamaiuaki naba au toro"ba ngaira ake ti tatakuruaea ana taeka te Atua, ake ti karaoi makuri n oin korakorara, tama ao mitinare ao tarira ao manera, ba ti na riai kekeiaki ni karekea te nanorinao ao te nimamanei inanon baai ni kabane, n aki kariki baai aikai ba ti neboaki iai ke ni karekea te kukurei ni kamoamoa inanora man taian taeka ni kamoamoa n raoiroin ara makuri. Ba ti aki makuri i bon bukira ma ti makuri ni kaota raoiroin te Atua are inanora ba E aonga n neboaki ao ni kamoamoaki. E kangai ana taeka te Uea" Kam na aki kimareirei... ngkana kam kona ni kabaeia ao ni kakionakoia riaboro" (Ruka 10:12) ... ma kakoaua ba bon akea bai ae kam kona ni karaoia i bon iroumi n ti ngkami. Ma ti na riai ni kimareirei n taian kataaki aika ti anganaki ike ti a kona iai ni kaitikaki n tamneira ao rabatara inanon ara borau n te aonaba aio nakon te maiu ae akea tokina.
Tariu ao maneu, ti na riai n taratara raoi ba ti na aki mane n ana kaririaki te riaboro n ukera kamoamoakira ao kabaiara inanon bai aika ti karaoi. Ba e kakawaki riki ba ti na barua n tameira te tiaki ao te katabuaki nakon baruan te kamoamoaki. Ba ngkana ti karaoi baai ti ibukin kamoamoara ao e taku Iesu ba "A tia n reke kanuangara ngkai" (Mt 6:2) ao bon akea te kanuanga ae ti na kataningaia ibukin te maiu ae na roko. Ma ngkana ti karaoi baai ni kabane ni kamaemaea iai ana kairi te riko ma te rabata n te tauti, te kairiribai ao te kaibabaru ao nanona ngkanne ba ti karimoa ao ni kairaki iroun te Tmanei ae Raoiroi ao ti riki raoi iai ba bannan ni koaua te Atua nakoia tarira ma manera ni kabane ao kawaira nakon te kamaiuaki are kan anganira te Atua iroun natina ae Iesu.
- Details
- Written by Taranieta
Tera manen ana karea te Uea ake e anganira ngkana ti aki kamanenai ?
Te moan tabo ae tina kamanenai iai ana karea te Uea bon inanon moa mwengara. E moa ana buaka teuare e buakaka man te mwenga n urua te nano n tataro ao te reitaki. E tataninga Iesu n tainako inanon mwengara.. Karaoan ara tataro n utu ni katoa bong, bon neboakina ao karineana ba Atuara ae e maeka ibuakora. Bon ana tai Iesu ni katokai iaora ana karaoiroi ma n anganira Tamneira ae e Raoiroi n ara utu, ao ni kabooua te maiu inanora ao inanoia kain ara utu ao inanon mwengara. Ngkana ti aki tataro n utu ao tina bon katibanakoi ana karaoiroi ao e na rinnako teuare e buakaka n urua mwengara.
Ibukin aei ao ti riai n riki ni koaua ba Ana Tabonibai te Uea inanon ara utu.
E tuangira te burabeti are Itaia, “E reireiai arou te Uea ba I aonga n rabakau ni kaungai nanoia akana a mamara. E kakautai ni katoa ingabong ba N na ongora ana taeka n reirei. E katekea taningau te Uea ae Iawe ao I aki rawa ke n tannako.
Ana taeka nakoira Iesu, rinanon ana Euangkerio Santo Mareko, e kangai, “Ane e kabua maiuna ibukiu ao ibukin te Rongorongo ae e Raoiroi ao e na kawakinna.” E taku rinanon Santo Iakobo, “ Ngkana e taku temanna ba iai ana onimaki ao tera manena ngkana e aki kaotia n taiani makuri . E na kona ni kamaiuaki te aeka n onimaki anne?” E tuangira te burabeti are Itaia riki ba ana tabonibai te Uea e ataia ba e tangiria te Uea ba e ongo, ao e ongora n ana tataro, ba e baraki te Uea ni kakauongo ngkana e weteia. Ana tabonibai te Uea e aki muti ao e teimatoa n aron te atibu ba e ataia ba akea ae e kona n ekianako ba te Uea e na kamunanankoia aiana n aiaron te mane ni kunnikai ae e kanaki n te koa.
Ti na butia Iesu ba e na katabuira ba ana tabonibai ni koaua.Iesu, ti a butiko, katabuira ao kakorakoraira iroun Tamnein ae e Raoiroi ba tina riki ba am tabonibai ni koaua. Tia butiko riki, karaoiroi mwenga ma utu ni kabane. Ko rabwa te Uea.
- Details
- Written by Taranieta
N tai akekei ao I taratara ma I aki noraba, ma e anganai te noraaba ana tangira Iesu.
E roko ana Tangira Iesu imuin reken te raoi inanou ngke I rinnako ni mwengan te Raoi are Atinibanin Tinau Nei Maria, ngke I toua kawain ana Rotario. Ao I kunea Uean te Raoi ae Iesu inanon mwengana n tainako. Ngkana I aki maeka inanon mwengana ao I aki rau. Ngkana I maeka inanon mwengana ao e rikirake te kabaia, te rau ma te raoi irou.
Ma e aki toki nanon Iesu ba e tangiria ba e na Uea inanou n anganai katoongan kimareirein mimitongina iaon te aba ao e maeka ibuakora n te Eukari ae moan te Tabu. N rokona inanou ao e anganai are bon Ngaia ao e onikai kororaoina, ao I namakinna are bon Ngaia, ba te Tangira inanou, ao e a noraaba nanou.
I norai ba e kimareirei nanou n ana Tangira Iesu, ae akea ae e kona n anaia mai irou ao e kateimatoai. Ma I kona ngkai nnora rawawatan nanon Iesu n au bure nakoina, n tainako ae I kairua iai, ao reken te namakin are I aki atataia mai imaina, ae te rawawata ni koaua, ba I bure, nakon au Tangira. I taratara nako ao I a tiba nora raou ae bua n ana kantiab’ai are I aki noria ngkoa ba I raonna iai, I a tiba nora tariu ae kainnano ma te ataei ae baki man rawawata, ake I aki tabeakinia ngkoa ba I aki nora aroia anne, ao e a rawawata nanou ma n tataro ibukia. I nora buan au kairiribai ao e rawawata nanou ao I tataro ibukina….ao a riinga nanou, are e koburake ma te kakaii, ni bubuti ma te onnon ibukia nakon te Atua ba e na kabaroa ana tangira naba iaoia, ao ni buokia, n aia kainnano n rabataia, ao riki n tamneia..
I a noria raoi ngkai, ba man te ingabong ni karokoa te tairiki, ao I nori au makuri aika a rangi ni maiti iroun te Uea, irouia aomata ni kabane ake E kataua Iesu ba N na roko irarikia man n noriia, n te bong teuana ma teuana. Ma e anganai kanuangau Iesu, namakinan kimareirein ana tangira ni kamaiu nakoia tariu, n aron are e anganai naba. Kanuangau riki ae e anganai bon noran tamaroan ana karikibai, are e anganai iai n tainako, namakinana inanou ao n otabaniniai. N na neboiko te Atua ae Tama ao te Nati ao te Tamnei ae e Raoiroi n aki toki. Ko rabwa te Atua Alleluia Alleluia.
- Details
- Written by Taranieta
Umau ae I matu ao ni maeka iai bon mwengan te Atua, tiaki mwengau.
Tabo nako ake I tiku ke ni maeka iai ao e raonai iai Tinau Nei Maria, bon ngaia naba mwengan Uean te Raoi ae Iesu.
Ngkana e maeka inanon mwengara Tinara Nei Maria, ao ti kona n namakina maekan te Uea inanora ba e kairi ara iango ma ara makuri te Uea inanon mwengara ao a rangi n raraoi man karikiuaa .
Ara makuri ni katamaroaa mwengara ao ni ueueena rarikin Tinara Nei Maria inanon mwengara, bon kaotan ara karinerine ao ara katituaraoi nakon te Atua inanon mwengana, inanon mwengara, are bon Tinara Nei Maria.
E kakawaki uringakin aio n tainako ba tina kawakina raoi mwengara, ae e mangori ke e kaubai, ba e na ititiaki ma n barongaki raoi nanona n tainako, tiaki tit e taina n tebongina, ba ti na karinea iai Ara Uea ae te Atua ae te Teniman n Temanna.
Ti na kakauringia naba kain aan batara ke umara, kakawakin aio ao kakawakin naba karaoan aroaro aika a raraoi inanon mwengara ba tina karinea te Atua are e maeka ma n uea inanon mwengara.
Ma e aki kona n riki mwengau ba mwengan te Uea ngkana I aki kaoa te Atua nako aan umau. Ti na kaoa te Atua ae te Teniman n Temanna ba e na Uea inanora ao ni maeka inanon mwengara, ao ena onikira ao mwengara, nakon are nanona, ngkai e a uea iai. Tia butiko te Uea, nakomai ao karika umara ba umam ao tautaeka inanona.` Ko raba te Atua Alleluia Alleluia Allelluia.
- Details
- Written by Taranieta
Raou ni koaua bon au kariribai ma aika a ribai, ao raou aikai, aika N na tangiriia ao n aki botuakina kamaiuakiia ba N na katonga kimareirein te kamaiuaki ma ngaiia.
Ma e na urua te nano n iraorao anne, iangoan atongakiu irouia te botanaomata, ba I kamaaraato, I biu ke I kakan kiritian. Aikai bon iango mai iroun teuare e buakaka aika bon taian buaka aika a na katikiira rikaki ngkana ti a wakina te kekeiaki ni waakirake inanon te maiu ma te Uea. Tina bon aki wakirake, ba tina b’aka rikaki riki ao n tiku inanon te kairiribai ngkana ti katokanikaia iangoan atongakira ba ana aki b’aka ara bui, irouia aomata.
Ma e reireinira Iesu ba tina maiuakina te koaua.
Ngkana e kairira te koaua n tainako ao tina bon ataia raoi ba n te koaua, ao ngkana I kairiribai, ao I bon kaorakai ma ni kamamaara tamneiu ao I bure ni kammaraka ao ni karawawata Iesu. Bon te tia kewe ngai ao akea te koaua irou, ba I nakon Iesu n tuangnga ba I tangiria ao e tuai eti nanou ma au kairiribai. E riai n tokanikai te koaua inanou ao e na buokai Iesu.
Ngkana e ribai tariu, ao e mamara ao e kainnanoa buokana ao N na aki katukua ni mamaarana ma N na buokia. N na karokoa te tangira irouna ao e na buokai Iesu.
E tuangira Iesu n te wareboki n te bong aio ba tina aki barannano n buokia ara kairiribai ao aika ribaira, ao ti na karimoa nanoangaeakiia ngkai e nanoangaira n tainako Iesu. Ti na butia Tinara Nei Maria, ba e na kateimatoa inanora maiuakinan te koaua, inanon te nano ae itiaki , te tangira ma te nanoanga, ba tina tokanikai ma ara kairiribai ao aika a ribaira ni katongnga kimareirein te kamaiuaki iroun Iesu. Ti a butiko Tinara.