Kanan Tamneira...
- Details
- Written by Taranieta
Uoman mannikiba aika tao 4 te inti abwakia ake a katika matau ngke ingabong. I bon tabe n tarataraa teuana kain rarikin mwengau ae te peach, ma ueena ake a manga teberake ao n raure, aika a rangi n maiti man tamaroa ba are ai tain te maiu ae boou imuin te maitoro, ngke a roko naba n toka n te m'aanga i matau.
E ngae ngke a rangi ni uarereke, ma aron kibakibaia, a bon rangi ni kibakibam’aka n te aro are a kona ni waekoa n roko ao ni bua mai imatau. E tara n ae e kakairiri temanna mai ibuakoia ba e ririmuiaki iroun are temanna. E a bon tiba teberake taai mai mainiku ngke I noria ao otan tai e a bakatekei aon taian uee aikai, taian aroka aika a ririeta ao aika a rinano ao bon te uteute. A uaia ni kibakiba mannikiba aikai n tikurii uee ake a ure, e ngae ngke e karekare te ang teutana, ma a bon aki bwerengaki. Imuin tabeua te tai, ao a kibanako n aroia are a rangi ni butimwaka ni kibakiba. I ririmuia n tarataraia ao I noria ba a airiri n rimarenan taian kai aika ririeta ao aika a rinano ao imarenan taian m’anga, ma baanikai, ao a manga kiba nako eta n te aro ae I aki noria.
I titirakina te Uea ba tera ana rongorongo nakoiu iai ao e anganai namakinan te rongorongo ae kangai; "te nano ae akea baebaena ao e mangori". I norai iai ba aiaroia mannikiba aikai, n ririmuin kawain Tinau Nei Maria, inanon te mangori, n uota ana kamaiu te Uea, nakon tabo aika e kona n roko te aba iai, ao aika e aki kona, n aron taian marena - mai marenan taberan kaai aika a ririeta, nako marenan uteute iaontano.
N te bong aio ao ana Toa Aran Nei Maria te Paretenia ae Moan te Tabu. N te wareboki ao ti kauringaki iai ana kaotitaeka ana anera te Atua ao ana riki n aomata natin te Atua. E butimaea te rongorongo Tinara Maria ma te nanorinano ao te nano ae akea baebaena. Ti kona ni miakinii uaan ana nanorinano ma kabaneakina nakon te Atua, ba e rotira ao man kamaiuia natina ni kabane n akea tutukana. Ti a butiko Tinara Nei Maria, kataua ba tina iririko, n toua kawaim ae mangori, ni karekea iroura te nano ae akea baebaena ba tina kona ni kariaia n tainako, banaan natim nakoira. . Ko raba Tinara Nei Maria te Paretenia ae moan te Tabu. E na neboaki te Atua n aki toki..
- Details
- Written by Taranieta
E rineia ana abotoro Iesu.Tera te aroaro ae e boto ana rinerine iaona ibukin te nakoa n abotoro?. Ti kaongoaki ba e tataro Iesu nakon te Atua ae Tamara, ni kangainaa, ao ngke e oki ao e a rineia ana 12 abotoro mai ibuakoia ana reirei. E a airi Iesu ma ana Abotoro n ruaki man te maunga are a tataro iai, nakon te tabo ae aoraoi, nakoia te botanaomata aika a uanao, man taian kaawa aika a maiti. A bane aomata ni kan ringa Iesu ba e nako mai irouna te maaka are e kamaiuia ni kabane. E rineia ake a raonna n tataro ni kangaina ke tao naake a ti kan ongongora nakoina ma aki konamaki n tataro?
N te tai aio ao n tainako, ao n tabo nako, ao Iesu e karaoa ana rinerine ba e kainnanoia tani buokia, aika a na raonna n aiaroia ana abotoro.
Raora n tainako Iesu n ara tai n tataro, i taubukin ara maunga n tataro. N aroia ana abotoro, ao e nori nanora ba tina kona n teimatoa inanon te onimaki ma te kakaonimaki ke tiaki. Ti na kona n kaawakin ana Tua ma ana Tua rabwatana ae te Ekaretia inanon te aki barannano ke tiaki. Ti na kona n rairannano ni koaua ao n teimatoa n te onimako ao te kakaonimaki n aron Santo Betero ke tiaki E kona n rineira ba E na onimakinira n ana makuri ni kamaiu ke e aki.Ti na tuoi nanora ma ara iango imatan Iesu. Tera ae tangiria Iesu mai iroura ba e aonga n rineira n ana waki ni kamaiu?
Ti na bubuti nakon te Atua ae Tamara, n kanimra ma Tinara Nei Maria, ma ana kabang ae te Korona ae uaitera wina, ba e na anganira Tamneina ae Raoiroi, ba e na buokira n nori ao n tokanikai, iaon iteran maiura, aika na kab’akai ara bui man aki karekeira nakon te rinerine ni makuri n abotoro ma Iesu ni katoa bong.
Ti a butiko Iesu kataua ba e na reke rakan tibangara mairoum, ae katongan kimareirein am kamaiu, nakoia raora, aika ko na katauira ni katoa bong, ba tina buokiko ni kamaiuia.
Ko na neboaki ao man karaoiroaki n aki toki te Atua ae te Tama te Nati ao te Tamnei ae e Raoiroi..
- Details
- Written by Beneteta
Tibau ae I kan tibaia n te bong aio bon te karaki ae e kangai:
Temanna te mane ae e kawara te Tama ni butia karaoan te tutia ibukin ana kamea ae e a tiba mate. Te kamea aio e a bon tia n riki ba raraon te mane aio ni bongin maeuna aika e a tia n rangi ni maan. Ti bon riai n ota n aron nanokawakin te mane aio. Ma e kaeka te Tama man tua ba e aki kakaraoaki te tutia ibukia maan. E bon tuanga naba te mane aio ba iai te aro teuana ae e a tiba roko naba n ana tabo tabeua namakaina n nako ma e kai nako n ongora irouia kaina ngkana a kona ni buokia n ana bubuti! E rarawawata nanon te mane aio ao e teirake man kaitaua te Tama, ma, imwain nakona ao e tanrikaaki man taku nakon te Tama: Ao! ao tera am iango ibukin boon karaon aei n te aro anne? n ami iango e tau ae 50 te nga te taraa? E ienikuri ni kaeka te Tama man taku: Nao, ko aera ko aki kaman tuangai ae te katorika am kamea anne?!
Bon iai arora n tatannako n aron kabonganan taningara ma ara kakauongo ae n angin te tai ti bon kona naba ni biti aron rongorongo ke koaua ake ti a tia n ongo nakon are e botau ma ara kantaninga ao nanora.
Ti a butia te Uea baE na buokira ba ti na kabonganai raoi taningara ao newera ni kakauongo raoi nakon koaua ake ti a tia n reireinaki ba ti aonga n aki kai kaminominoaki man burebureaki ara koaua ake ti a tia n ongo n te moan tai. A bia newera kona n tou mwin koaua aikai ma te onimaki ae nene ba ti aonga n aki kai waekoa n mamanaaki n ara onimaki.
Ti a uringia tarira ao manera ake a tia ni kitana te aro ni Katorika ibukin te Taningabono ao te Baennewe are e a uotia ni kamaenakoia mai iroun aia tia Kamaeu. Iesu ae ko on n te tangira nanoangaia ao kaokia nakoim ma te onimaki ae e matoatoa n te tai aio ba a aonga ni manga reita neboakim inanon te koaua ao te tangira. Amen
- Details
- Written by Taranieta
- Details
- Written by Beneteta
Tinara Nei Maria mai iroun ara Uea ao ara Tia Kamaeu ae Iesu Kristo
Inanora n tatabemanira nako ao ti kan anene nakoim
N takarua man ngarengare ao n anene
A korakora nanora ni kan kaitauko
Raoraora ngkoe Tinara ti tangiriko
A kukurei nanora n kan katekeraoiko n am bong aio!
Namai Tinara Nei Maria nakomai ti na kukurei
E a roko am bong bon am bong ni bung
Inukan kukureira ko raonira Tinara
Mai ti na katekeraoa am bong aio
A kukurei nanora ti kamoamoa ibukim
Raoiroia raoiroi bon ngkoe Tinara
I weteiko n te bong aio bon am bong ni bung
Alleluia n te bong aei!