Kanan Tamneira...
- Details
- Written by Beneteta
Iesu, ai raoiroira am kaeka ngke a kabuakakaki am reirei nakoim ibukin nanoia ni kan amamarake!
Ko aki ienikuri ni kauringia Baritaio ba a riai n kaini wiia. Ngke arona ba ngaira ngkoe te Uea ao ti ataia ni koaua ba ti na bon ira buakon te winanti aio man kabuakakaia riki raora nakon ae a na ribaaki. Ma ngkoe Iesu ko rabakau n taetae raoi ibukia raom man kauringia taan winanti ba tiaki are a karaoia ae e raoiroi.Ko reireinira arora nakoia raora ae ti riai n uotia rake ba ngaia ae moan baan riki te raoiroi.
Kakauringira Iesu ae e raoiroi ibukira ba ti na kukurei ibukin titikum irarikira. Ti riai n karabaraba n taai nako ba ko mena irarikira ao ko kan titiku irarikira n taai nako. A bia kakakatonga nanora ngkana ko maeka iroura. Reireinira n noriko irouia raora ba ti aonga ni kona ni kukurei n taai nako ba ti onimaki ba ko maeka irarikira ri nanoia raora nako. Iesu, reireinira taekan te aki mamatam ba ti aonga ni kona ni karaoia raoi ma nanora ni koaua ibukin kan kaniakira riki ma ngkoe.
Iesu, a bia kukurei nanora n ataia ba ko maeu ni koaua iroura, i nanora ao irouia naba raora nako iaonteaba. Katauira ba ti na kukurei n taainako ni maekam ibuakora.
Karaoiroira te Uea ao reireinira riki taekan te aki mamatam. Amen.
- Details
- Written by Beneteta
"Tai maku, ba man te tai aei, ao konam bon aomata"aei bon ana taeka Iesu nakon Timon ngke e tabe ni kubatera konan ana karaun imwin karaoan nanon tuangana iroun Iesu. Ba e kangai Iesu nakoina -kabaka ami karaun ni inriowati nakon ane e iabuti riki. E bon kan kaotia Timon ae a tia ni kataia ni karekei konaia mai imwaina ma akea ae e reke. Bon te tia onimaki Timon ba e ngae ngke a tia n kataia ni karekei konaia ao e na bon ongotaeka iroun Iesu are ngaia ana Tia Reirei.
Moan te kubanako ngke e kabaka ana karaun ao e a bon koro naba rawatan konaia! A kunei aekan ika aika a bati ni konaia ao a kaonrakei boti aika uowa n ua ae a kuri n inako. N tarakin te kokona ao a ure matan Timon Betero man kina ba bon te Uea Iesu teuare a tia ni weteia ba aia Tia Reirei.E katorobubua imatan Iesu Timon Betero man taku: " Te Uea, kararoako ma ngai, ba te tia bure ngai"
Ma e aki kariaia Iesu ba e na tiku ba te Tia Bure Timon Betero ao e karaua nanona man tuangnga ba e na aki maku, ba man te tai arei ao e na akawaia aomata.
Ko raba Iesu n am kabeabea ao am muioko nakoia am reirei ake aman ake bon taan akawa n te moan tai. Ko onikia man karikia ba taan akawaia aomata nakoim. Kariaia Iesu ba ti na riki naba ngaira ba taan akawa ibukim. Oniki nanora nakon nanom ba ti aonga ni kona ni maneia aomata nako man bobotia inanon am Ekaretia are a na riki iai n ti tenanaina man uaia n neneboiko inanon maeuia n aki toki, Amen.
- Details
- Written by Beneteta
I taku ba ngkai ti a ongora ana taeka te Tamnei ae e Buakaka ke te Riaboro ibukin Iesu ae Atuara ao e na riai n rangi n kukurei man kakatia nanora ba ti a ataia raoi ba bonakea arona irarikin Atuara ae ti onimakinna. Ti kukurei n ongo ae e kina Iesu ae te I Natareta ao e kaotia ae e maka Iesu ngke e titiraki man taku: "Ko nakomai ba ko na kamaunaira? I ataiko ba Teuare e Tabu ngkoe ae ana aomata te Atua".
A na bon riai n rangin mwengabuaka uake a katabei nanoia ma te Riaboro ao man aki katoma tabon ana taeka ao man karekerekeia naba ma ngaia. A riai n rangi n raraoma naba ngkai a ongo aio. Ba ngkana aron te Riaboro aio i matan Iesu ao a na tera ae a na kan katabea nanoia iai irouna? Enga mwengaraoia iai irouna?
Ti bane n ataia ae kaitaran te Atua bon te bure ao te bure bon ana bai te Riaboro. E na rangi ni kukurei te Riaboro ngkana e ataia ae a rawata ara bure ba e ataia iai ae ngaira bon raoraona. E maeka te Riaboro inanon te bure. E tatangiria aomata aika a maeka naba inanon te bure. Bon raoraona aomata aikai.
E tauaninne te Riaboro iroun te aomata ao e rangi n rawa ngkana e na toka te aomata nakoina ngaia are akea oin ana iango ibukia aomata ba e na anaia man taua taekaia iaan te bure ba aonga n raroa nako mai Iesu ao a kan ma ngaia. Ngakana a kan man nim aomata ma Iesu ao e bon rangi n nanokawaki iai te Riaboro.
Nim ma Iesu ao ko na kabirinakoa te Riaboro mai iroum.
Iai ana taeka n reirei te Tama Ioteba Kanono n tain te Tutia ngkai e tairiki. E tuangira ba ti na aki katabei nanora ma te riaboro ma ti na kabirinakoa mai iroura n arana ae te 'maoto n tira' ba e kakammaira ao e rarawa n aranaki ni baika a kammaira ngaia are tai anganna ana tai aranna n arana anne ao wetea Iesu ae I Natareta ae ti bane n onimakinna ba E na maeka iroumi naki toki. E na bon kakawakini ngkami inanon te rau ao te tangira ma te kukurei. Amen.
- Details
- Written by Beneteta
"Bon Natin te Atua ngkoe!"
Ti na toma aia takarua aomata ake a katokaki aorakia n aekaia nako n ana evangkerio Ruka. Eng, bon natin te Atua Iesu ao bon te Atua naba ngaia. Ngke e katokai baina iaoia aoraki ao a toki aorakia ao a kamaeuaki ake tabeman. Iai naba taimonio ake a otinako maiirouiaaoraki ake tabeman.A bon bati ake a kamaeuaki.
Iesu, ko raba ngke ko katoki aorakia man kamaeuia aoraki ake a nakoim akekei. Ma Iesu ko rotaki n te kua n am tai ni katoki aoraki ke ko aki? A bon maiti koraki ake a kan kamaeuaki ma ko ninikoria imaia Iesu tiaki arora n tabetai ae ti kai rotaki n te kua ngkana e roko weteara ibukin te katoki aoraki.Angin te tai Iesu ti karautaeka ngkana e roko weteara ibukin kawaraia aoraki. Abiu nanora ba a memere ara onimaki man tatao ara iango are ti taku ba a na ngaira ake ti na katoki aoraki. Iesu bon ngkoe te Tia Katoki aoraki.
Anganira Iesu nanom n nanoanga ao n tangiriaomata ba a aonga n taobaraki nanora aika a kai kua aikai. Katauira Iesu ba ti na uouota am tangira nakoia raora ao man buokia n te tangira anne ba a na kona n kamamrurungaki ao ni kamaeuaki iai. Ngkana a marurung Iesu ao katauia baa na riki ba tan neboiko ni maeuia. Kakorakoraira Iesu teimatoa n onimakiniko ae bon ngkoe te Tia Katoki aoraki ao ngaira tan makuri ibukim.
Iesu kariaia ba ti na kaotiotiko ni maeura ae bon ngkoe Natin te Atua. Buokira n am Karatia ba ti na tangiriko ni koaua ba ti aonga n uouota te tangira anne inanon maeura n tbo nako ake ti kawari ao man tibaia nakoia raora ni kabane ake ti kaitibo ma ngaia.
Ti onimakiniko ao ti kakoauako Iesu ba bon Natin te Atua Ngkoe.
- Details
- Written by Beneteta
N te Tutia n te Tabati aio ao e karaki te Tama ni karakina te monk temanna ae e buoka te aine ba e na nakon iteran te karanga teuana. N ana buoka te monk aio ao e a karebenakoa ana titiraki raona ni monk temanna are e kangai: e aera ko kakukua te aine arei? ko aki ataia ae ti tabuaki n kaboi kunnra ma aine?
Iai tikiraoin ana karaki te Tama ma te boto n iango ae 'Aia Katei Bakatibu'. N aia monks aikai ao e koaua ae tuaia man kawai ba a na aki kaboi kunia ma aine. Ma ai tera aron ae a na kaota ana tangira te Uea iai nakoia aine ngkana a tatabuaki naba ni kaboi kunia ma aine? E rangi n tikiraoi naba ana kaeka teuare e titirakinaki arei ba e taku:
Ko aki nora aron kawan te aine are e a kan baba arei n iangoa rokona n te itera arei? Eti tabe am iango n kan iangoa man taekina aron kan kaboan kuniu ma neierei nakon iangoan karaoan te raoiroi ibukin buokan ma kamaeuakin te aine arei. Tera ae kakawaki te katei are mangkoa ke te tangira are e karaoaki man buokaki ao ni kamaeuaki iai raora?
Ti a bubuti te Uea ae maka ba e bia anganira te kona ni karaoi makuri mai inanora ba e na noraki iai ana tangira ae e ababaki. Ke e kauringira te Tamnei ae Raoiroi n taainako ae ti riai n kaitiaka nanora n taai nako ba e aonga n tinako te roairoi mai iai are e na noraki iai ababakin ana tangira te Atua ae maeu iroura n aki toki. Amen.