Kanan Tamneira...
- Details
- Written by Beneteta
Uoman mai buakoia tabonibai aikai ake a ongo ana taeka aia Uea ae e kangai; Au tabonibai aika kam raoiroi, ngkai kam a tia ni muiokoaki ni baai aika a uarereke ao N na muiokoi ni baika a bati. Ma ana taeka nakon te tabonibai are temanna are e ti anganaki tebubua te mane E kangai: Te tabonibai ngke ae ko buakaka ma n taningaroti ke e anaki te maiti are te bubua mai iroum ao ngkoe ko na tewenakoaki ibuakon te ro ike ko na tang iai mani kangengei wiim.
E riki aio ibukin taningarotina ni karikirakea ana mane ana mataniwi are e anganna imwain nakona. Ma uake uoman a bon rangi niango raoi ao a kaoka maitin te mane ma bakaona ake a kataboroa iai maitin te mwane are a anganaki. E bon rangi ni kamoamoa te Uea irouia ao e karekea kanuangaia man karakan tibaia.
Ai bon aron naba aio tekan rin n te abanuea i Karawa!
Ba ti bane n anganaki ana bai ntangira te Uea ni maeura. Iai te tarena are e anganira te Atua ba a na makoron maeura.E tangirira te Atua ba ti na kabonganai ao man karikirakeai ba e aonga ngakana e roko ara tai ni weteaki ao ti na tia n kamwaita te tarena are ti anganki.
Ti na bubutia te Uea ana buoka ibukin karikirakean ana bai n tangira ake ti bane n toa iai. Nimaeura aio ao ti a bubutia ba e na katauira n ana karatia ba ti aonga ni kona n kabonganai raoi ao man karakai inanon tibakin te bai n tangira aio ma tarira ao manera ake bon ngaia aika ti riai n tangiria irarikin tangiran Atuara ae maka man mimitong ao man akoi. Amen
- Details
- Written by Beneteta
E kauringira Mataio n ana evangkerio ae ngaira bon otan te aonnaba. E tuangira ba ti na kamarurungira n tantani ibukin te kakaonimaki. E tangirira ba ti na taratara raoi man aki karekeira n te kanganga. E anganira n ana taeka nikauring ba ti na aki mamanaki n ara iango ae e bon kiriaria te tai n weteaki ba ae ti bon rangi n ataei naba! Ti na tai mamanaki n ara iango ae e rang n tau ara tai ni katauraoi ba ti a kania riki ae ti nang roko n te onobui ao ti a tiba iangoa ara katauraoi imwain rokon weteara. Akea ae e ata ana tai ni weteaki. Akea ae e ata ana tai n oki Natin te Atua. Ti riai n tauraoi n taai nako.
Ngkana ti tantani ni koaua ao n taraia raoi ba ti karikirakea ara onimaki iroun te Uea ba ngaia raora n taai nako ao man neboia n aki totoki ni maeura ao ti na bon rangi n kona n karaoa ae nanona ni maeura n taai nako. E aki ti kukurei iai ma e norira iai ba ngaira bon otan te aonnaba ike ti buokia iai raora n nora kawaia inanon reimauruan aia waki ni kan irira aia Uea ao man karaoa ae nanona naba n tai nako ao n aki totoki.
N na neboa aram te Uea n aki totoki! Amen.
- Details
- Written by Beneteta
E reitakinanko kabuakakakia Taan Koroboki ma Baritaio n te bong aio ba reitan are ngkoananoa. E bukinia Iesu ba taan kewea te aba ba are a tuangia aomata ba a na karaoi aia anga nano n bai bubura ao ngaia a anga uarereken aia bai. A aki ti karaoa aio ma a kan taraaki ni karaoan te raoiroi ma baai ake a karaoi bon baai aika a koro buakakaia. A ti tangira ae a na noraki ba angkoa a karaoa te raoiroi ma nanoia bon te boka ae koro arona. E matoa ana taeka Iesu nakoia tai kairiiri n aroia aomata aika a mataki ba bon akea ae kam na kona ni kairia nakon te tekeraoi ma te raoiroi. Kam na bon kairia nakon te kabuanibai ma te nanokawaki.
Taan kairiiri ae e tangiria te Uea bon aomata aika a baina te eti, te nanoanga, ao te kakaonimaki. E anga ana taeka te Uea ae e matoa nakoia Taan Koroboki ma Burabeti ba ngkana a kairiiri ao a na taraia aomata ake a kairia ba a na kakabaiaki ao n tekeraoi imwin kairaia irouia. A na noria ba a baina te nanoanga ba ngkana a aki karaoa are a tangiria aia aomata ao a na keiaki n aki ienikuri n un ma a na keiaki n baina te nanoanga man taraia taan kairaki ba kanga ataei aika a nanoro man aki ota ao a na baina te taonannano ao ni keiaki ni manga kaotaia riki n te aro ae a na kona n manga karaoa are e kantaningaaki mai irouia.
Te eti, te nanoanga ao te kakaonimaki a bane n anaki n te tangira are bon ana tangira te Uea ngkana ti kariaia ba E na kairira. Ara anganano nakon te Uea ma te onimaki ba ti aki kona ni kairiiri ngkana akea Ngaia irarikira. Bon te Atua ae e kona n anganira te tokanikai iaon ara waaki nako. E bia korakora man nano ara onimaki n onimaki ao ni kantaninga irouna ibukin baai ni kabane inanon maeura ba te kairiri ke te kairaki, te kaetieti ke te kaetaki a bon bane n nako baai aikai mai irouna bon te tia kairiri Ngaia ni koaua. Bon te tia kaetieti Ngaia ni koaua. Ba E kaetieti ao e kairiiri ma te tangira ao aei are ngaia bon kawain te kona ni kaitiaka moa nanon te mangko imwain ae ti na kona ni kaitiaka naba tinanikuna.
Ke E raoningkami te Atua te Tama, te Atua te Nati ao te Atua te Tamnei ae Raoiroi inanon ami tai ni kairiiri n taai nako. Amen.
- Details
- Written by Beneteta
E kauringira Santo Bauro n ana reta nakoia ITetaronike ba ti riai n makuri ibukin karara. Iai naba tuan ane e taningaroti man rawa n makuri ba e na aki riai n amarake.
Te baki ao te kan amarake bon teuana mai ibuakon ana kainano te aomata. Ngkana e aki amarake ao e na bon baki ao ngkana e reiti nako te aki amarake aio ao ti ataia ba e na bon mate.Te amarake ae e taekinaki aio bon te amarake are e ti katoka bakin te rabata. Bon iai riki te amarake teuana are ngaia ae ti riai ni makuri ibukina ba e na reke iroura.
Ni bong aika a nako ao e a tia naba ni kauringira Iesu ae ngaia bon ngaia te amarake ni kamaeu. Ngkana ti kana irikona ma rarana ao ti na bon kamaeuaki n te maeu ae e aki totoki. Ti bon bane ni kan maeu n aki totoki.
Ti a butia Santo Ioane te Tia Babetito ba e na tataro ibukira ni kabane ba ti bia aki taningaroti n ukera te amarake ni kamaeu are ti na anganaki iai te maeu n aki totoki. Amen.
- Details
- Written by Beneteta
Kam na mauri tariu ao maneu n ana tangira te Uea n te bong aio!
Ti kauringaki n boakia Taani Koroboki ma Baritaio iroun Iesu n ana evangkerio Mataio n te bong aio. E taetae Iesu iaon aki karaoan raoi nanon muiokoaia naakai. A tia n anganaki te nakoa ae taan kairia aomata ma a aki karaoa raoi tibaia aio. A tia n kairiiri n aia taetae ma a aki makuria aron aia taetaenikawai. E kangai Iesu, tai katotongia nakai n aroia ae ti te bobokewe. A rawa n rin i Karawa ao a tukia aomata aika a bati ba ana aki rin iai, a kuribaia aine ake a mate buia, a karekeia raoia aika a kairia nakon te bure, ao a mataaiakin koora aika akea maneia. Bon taan kairiiri aika a mamana te aba. E taetae naba Iesu ba a na bon bati man korakora rekenkaia.
Ti a butia Santa Monika n te tai aio ngkai bon ana toa te bong aei ba e bia tataro ibukira ni kabane ao riki ibukia taan kairiiri ba a bia bane ni kona ni kairiri raoi ma te koaua ao te tangira. Santa Monika bon ngaia tinan Santo Augustine. E bati ana tataro Santa Monika ibukin natina ngke e tuai n raira nanona, ngke e riki naba ba te tia kairiri ae e aki kabongana raoi onimakinana ma e rairaki nanona man ana tataro tinana ao e bitaki man riki ba te tia kairiri ae moan baan te raoiroi. Tataro ibukira Santa Monika ba ti a butiko. Ti uringia naba tiina iaon te aonnaba ko bia tataro naba ibukiia ba a na karikaki ba taan kairiri raoi ni koaua inanon mwengaia ao n aia kaawa ma abaia aika a kakaokoro.
Tinara Nei Maria ae bon tinaia tiina ao aomata ni kabane ni kaan babanen am namakaina ae Aokati ao ti bubuti riki ma te nanorinano ko bia bon teimatoa n tataro ibukira ao ma ngaira ibukin nakoraoin maeuia aomata ni kabane iaon te aonnaba ba e aonga n riki te aonnaba ae bon ana karikibai te Atua te Tama, te Atua te Nati ao te Atua te Tamnei ae Raoiroi ba te tabo ae e rau ao ae e bura iai neboakiia ni katoa boong nako. Amen.