Kanan Tamneira...
- Details
- Written by Beneteta
E raba te Uea n kaokakin riki te rongorongo aio ba au kantaninga ba e a bon rin raoi man matoa inanora ao man riki ba ara marewen ara onimaki nikoaua ae Iesu bon te bwerena ni kamaeu. Ngkana ti butimaia n te Komunio ao e bia riki ara Amen ba te bai ae e na nako raoi mai inanora ba ti kakoaua ao ti onimakinna ba ti nang kana man onga Iesu, bon ngaia n rabatana are e onea mwina te bane.
I rangi ni kakaitau n ana Kabarabara te Tama Ruatamaki n te Tutia n te ingabong aio iroura i Bairiki ba e bon rang n anganira taeka aika a bon matata raoi ibukin kakoauan ao onimakinan Iesu, ae bon karara nikoaua are e anganira ba kawaira ni karekea te maeu ae e aki totoki.
E rangi n tikiraoi aia kaeka ana aomata Iotua n te moan wareboki n te tutia ba ngke e tuangia ae a na rineia ba antai ae a na toro irouna imarenan Iawe ao atua ake tabeman. A kaeka ni kangai "ti tabun matea temanna irairikin Iawe...". Ngaira n te tai aio ti bia kona ni kangai " ngaira naba ti tabun matea temanna irarikin Iesu..." I mataiakina naba ana kaeka Betero nakon Iesu are e anga ngke a bane nako te koraki ni kitana Iesu imwin are e tuangia ae bon ngaia te bwerena nikamaeu man tuangia te koraki ba a na kana rabatana man nima rarana ba aonga ni kamaeuaki. A bane nikitana Iesu te koraki ba a aikoa kona moan ana taeka aikai. Ma a tiku ana reirei n ti ngaia ao e titirakinia Iesu - Ao ngkami kam tia tiku? Bon Betero are e kaeka- 'ao ti na nakon antai te Uea?'
Iesu n am buoka ao n am karatia ao ti na bon kona naba n reita Santo Betero n ana kaeka anne. Ba eng Iesu ti na nakon antai ae e na kona n anganira te kamaeuaki? Bon ngkoe Iesu te amarake ni kamaeu. Ti bia maten nanoa katongam n te Komunio man katauraoira raoi ni katoa te tai are ti ataia ba ti na kaitibo iai ma ngkoe. Anganira te kona n taubang teuana te aoa imwain ara komunio. Katauira ba ti na ingainga ni kan kaitibo aki ma ngkoe n te Komunio ba ti aonga ni butimaiko raoi.
Katauira Iesu ba ti na kabongana raoi te Tutia ae ekatoa bong n aki manrerea kaeana. Ti bia taka n taai nako ni katoa bong ibukin te kan kaitibo ma ngkoe ba ti aonga n reitia am aomata ake a tia ni kakukureiko n aia taeka ibukin te maeu n aki Tutia. E a tia nikangai Santo Padre Pio,ni maeu aio ao I aki kainnanoa taai ma I kainnanoa te Tutia. Iesu katauira ba ti na kona naba ngaira n atonga anne ma nanora ni koaua. Amen.
- Details
- Written by Beneteta
Bon te Atua ae e tuangira ae E na karikira ba ana botanaomata ao ngaia E na riki ba Atuara. Te tutuaraoi aio e bon nako man ana tangira ibukira ni kabane. Te tangira ae akea kabotauana. E aki ti tabe ma tabeman ba E bon tabe ma ngaira ni kabane. E tuangira iroun te Burabeti ae Etekiera ba ti riai ni maeuna te maeu ae e boou. E korakora nanona ni kan karikira ba ana aomata aika a raoiroi. E kan kamarakeira n tainako.
E kaotia nakoira n te evangkerio ba e ngae ngke e weweteira n taain nako man kaoira nakon ana baka n amarake ao ngaira a bon bati aron kawaira. Ti rawa n kan iria man ongotaeka irouna. Ti aki toki n tautau oin nanora. Ti tabeakin ara katabetabe iaon te aba aio ao ti mataiakin ana baintangira te Uea ake ti a tia n taku ba bon ara bai aika a reke man oin korakorara.
E teimatoa ana tangira ibukira ao e weteira n taai nako. Ti karaba n ana wewete ao ti butia ma te nanorinano ba E bia rineira naba.
Ti a bubuti ana tataro Santa Rotia mai Lima ba e bia tataro ibukira ba ti aonga ni kona n teimatoa n tangira ao man barua te amarake are e na anganira ba e aonga n reke te maeu are moan baan te kakukurei iroura. Santa Rotia tataro ibukira ba ti aonga ni kona n ni kakauongo raoi nakon weteara iroun te Atua ao ni kona n kaeka ma te uki n nano ba ti aonga ni kona ni karaoa ae nanona inanon maeura ao n te aro aio ti na kariaia kanara man ana amarake ni mare. Ti a butia te Atua n aran natina ae te rikitemanna ae Iesu Kristo, Amen.
- Details
- Written by Beneteta
E a manga kauringira naba Iesu ae e kanganga te rin n te Abanuea i Karawa ngkana a bati kaubaiu. E taku ba e bebete riki iroun te kamero ba e na rin ni bangabangan te neiran nakon te aomata ae e kaubai ba e na rin i Karawa. Ao eng Iesu ao ai antai ae e na kamaeuaki ngkanne ba are arora n te maeu aei bon ti te kan kaikoikoi ara kaubai man karikirakei aron tamaroan tarakira irouia raora ba iai ara bai aika a raka nakoia raora.
I iangoa aron te maeu iaon Tarawa ma maitin te ka ae e a bon moanna n taona maina. A bati aika a kaoi aia ka man kan reke oin baoia nakon te makuri ke ni bon mamananga iaon Tarawa. A bon kan bane n toa auti iaon Bairiki n toa ma te video ba aio ae a noria te koraki ba e na riai n iai n te mwenga. Ataei n te reirei a kan bane n toa n te mobile ma laptops. Baikara riki baai aika ti na kan tangiria ba a na reke iroura ba ti aonga ni kona n norira ba a bati ara bai n te aonaba aio?
E tuangira Iesu ba a na bon aki karinira i Karawa. Ti ira mwengabuakaia ana reirei man titiraki naba ba ai tera arora ni karekea te maeu ae akea tokina? Eng e raba Iesu, ba e kauringira n taekan tangiran te aki kaubai, te nanorinano, te aki kamoamoa, te tangiria raora man kan tibai ara bai ma ngaia ao a bati riki. Ae moan te riingaki nanou iai bon ana taeka ni kauring ae e kangai akea ami kona ba ngkami aomata ma te Atua e konai baai ni kabane. Eng Iesu ti na bon onimakiniko man kakauringa anne n maeura aio ae bon akea arora ngkana akea ngkoe iroura. Katauira Iesu n am karatia ba ti na kona n te taina n rin man maeka ma ngkoe i Karawa ike ti na neboiko iai ma kaina n aki totoki, Amen.
- Details
- Written by Beneteta
Bon ngaira taan makuri n te nne n Aroka ae e taekinna Santo Mareko n ana evangkerio. E kammakurira te Uea n oin ana babaire ao e kaboi naba muin ara makuri n oin nanona. Ai kamimira aron ana babaire aika n tabetai ao a kangurei nanora. N aron ae e taekinna Santo Mataio ba e bon weteira n taai aika a kakaokoro. Ti ataia ba tabeman e a maan weteaia, iai naba tabeman a bon tuai maan. Ma e aera te Uea e kaboira ti te arona, ti te mamaitina ao akea te kaokoro e ngae ngke a kaokoro ara tai n makuri ibukina?
Ti riai ni kaitaua te Uea ba e katereterea ikai ba bon ngaia ae e tauataekan te tai tiaki ngaira. Ti riai naba ni kaitaua ba e tuangira ba bon ngaia te tia tautaeka ae akea ae e kona n waea ana baire. Ti ataia ba a aki bubure ana baire ba ti bon ataia ae ti kukurei iai n taai nako. Iai naba taai ake ti kona n titiraki ba e aki rau nanora n ana baire ma ti a tia n ataia naba ba E waekoa n kaotaira ao ni karau nanora.
E kauringira te Uea ba bon ngaia ae E na tabeakinia ana aomata ibukina ba bon taan kairiri ngaira aika a buakaka. E anganira te muiokoaki irouia raora ma ti babanga ao tiaki tau n aranaki ba ana tia kawakin tiibu aika a raraoi ngaira.
Ti nakoim Atuara ao ti kabarai ara bure n arora aika a aki raraoiroi. Bon taan bure ngaira ao ko na kabarai ara bure ba ti butiko. Raonira n tararuaia am tiibu raoi. Reireinira arora ba ti aonga ni kona ni bobotia ao man kaokia ake a maenako ba ti aonga n te taina ni bane ni botaki irarikim n neboiko ma Natim ao te Tamnei ae Raoiroi inanon te maeu ae akea tokina, Amen.
- Details
- Written by Uriam Timiti
Karekean te maiu ae aki totoki e moa man te kona n ata te wanawana ni koaua are bon ataakin te Atua are Ngaia are e kainaomataira man te roo ao e katauraoi baai ni kabane ibukira aika ti na maiu man rau ao ni kawakinaki raoi iai. A na bon akea tabera n te amarake ao te mooi ba a na bane ni katauraoaki ibukira.
I nanon Iesu are roko nako aonteba ba E na kaota ao n rabatana kororaoin ana tangira te Atua ibukira, ao e kakoroaki raoi aron te kamaiuaki are E kan anganira te Atua. Ba ti a anganaki te amarake ao te mooi ni koaua are bon Rabatan ma Raran Iesu. I nanon Iesu ao ti a kamarakeaki n te amarake ae mai Karawa ao ti a kona ni katonga iai te maiu n Atua are katiteuanaira ma te Tama ba e aonga n reke iroura te maiu ae aki totoki. N te aro aio ao e kakoroaki iai nanon ana taeka Iesu are kangai, "Ane e kana Irikou e nima Rarau ao e na maiu n aki totoki.
Tariu ao maneu ti na ukera te wanawana ni koaua ae ngaia ae na kairira nakon te maiu. Te wanawana aio bon te onimaki ba E tangirira te Atua ao E kan anganira kororaoin baai ni kabane iroun ao inanon Natina ae Iesu ao Tamneina ae Raoiroi.