Kanan Tamneira...
- Details
- Written by Uriam Timiti
E kaota aron kakawakin n ana berita n akoi ma ngaira te Atua ni kabotaua ma kanga aron te berita imarenan te mane ao te aine inanon te takaramentu ni mare. Tariu ao maneu, tera aron otam n ana berita n akoi te Atua ma ana botanaomata? Tao ti bane n nora aron te berita ma te Atua ba e aki kona n uruaki ni karokoa tokin aonaba ke ngkana ti mate?
Ti riai ni karaba te Atua n aron ana berita n akoi ma ana botanaomata ae Iteraera mairoun Aberam, Itaaka ao Iakoba are bon nakoira naba n tatabenira. Ba e anganira te onimaki ao te kantaninga ba E tangirira n tai nako te Atua ao bon akea te tai ae kona iai ni manuokin taekara. Ti ria ni manga tuoi iteran maiura are ti a tia iai ni berita ma te Atua inanon ara mare ke nakoara. Ti riai n nora aroia Iteraera ngke a tannako mairoun te Atua ba a riki n tiotionako ao n tautoronaki irouia ianena. A riki ba taian kananoanga.
Ngkai ti ataia n taai nako ba e kawakina ana berita te Atua nakoira ao e bon riai naba iroura ba ti na kawakini ara berita ma te Atua n teimatoa n riki ba ana botanaoamata ae rineia ao ni borau inanon maiura aio inanon ana kakawakin ma ana Tangira. Bon baera naba ae kakawaki iroun te Uea ba ti na buokia raora ake a tannanko mairoun te Uea ni kaokiia nakon ana nanai te Atua are taan baibai ma Iesu i Karawa.
- Details
- Written by Uriam Timiti
Te bong ae te Katenibong 15 Aokati bon te Toa ae kakawaki iroun te Ekaretia ba Uotakiraken Nei Maria nako Karawa. I taku ba bon aio te tai ae kakawaki ibukira ni kabane ba e kaota nakoira iai te Atua, te kantaninga ibukira ni kabane ngkana ti katotonga Nei Maria ni kakaonimaki, n nanonrinano, n nimamannei ao n aongotaeka nakon te Atua. Inanon Nei Maria ao ti anganaki te kantaninga ba iai te tia ao te kanuanga ae ti riai n uaiakinna ao ti na kona n roko naba iai. Irarikin anne ao Nei Maria ae bon raora n aomata ao tinara, e na bon tauraoi ni buokira ao n tei ibukira n taai nako ngkana ti muiokoi arora ni kabane irouna.
E koreaki irouia Taman te Ekaretia ba iai 7 kakabaian Nei Maria are I taku ba e reitaki ma ana nebonebo Nei Maria ni katituaraoi ae kangai; "E kimareriei Nanou iroun te Atua ae au Tia Kamaiu". Ao aikai kakabaian Nei Maria:
1. Inanon ana onimaki ana nanorinano ao ana ongotakea ni kaeka ana Rongorongo te Atua ao e a riki n iriko inanona natin te Atua ae moan te mimitong.
2. Ba Nei Maria are bon te itoi (ana karikibai te Atua) e a bungia Taai (te Tia Karikibai are bon te Atua) n akea bitakin arona ni baretenia
3. Kaotin te Itoi are kairiia Uean Mainiku ba a na kaota kinaakin natina ae Iesu ba bon aia Uea uea ao aia King king.
4. Mangautin Iesu man te ruanimate are kaota tokanikain Iesu iaon te buakaka ma te bure ao te mate.
5. Noran natina ae Iesu ni waerake nako Karawa are e a kakoaua iai bon natina are riki mairouna, bon Ngaia te Tia Kariki baai nako.
6. Butimaean te Tamnei ae Raoiroi ni Bentekota are Ngaia te Tia Kairira nakon te Koaua ao te Tia Kaitiakii tamneira man te bure
7. Uotakiraken Nei Maria n rabatana ao tamneina nako Karawa n aiaron nanon Natina ae Iesu ba e na baunueanaki ao e na riki ba aia Uea Anera ma kaini Karawa ni kabane.
Ti na butia tinara Nei Maria ba e na buokira ni kona katongong naba taian kakabaia aikai inanon maiura i aon te aba ao irarikina i Karawa, Amen
- Details
- Written by Uriam Timiti
Antai ae inaomata ni koaua n te aonaba aio? Ao antai ae riai ni karaoa te makuri ni kabomui ba e aonga ni kainaomataaki? Tariu ma maneu aikai bon titiraki aika kakawaki ibukira n te bong aio aika a reke man te ewangkerio. Ti kakoaua ae Iesu are Ngaia are bon akea ana bure, E a tia ni kaitiakiira n Rarana ae moan te Tabu ba ti aonga n aki manga tautoronaki n te bure ma ti na karekea Irouna te maiu n inaomata ae koro raoi. Ngkana arona ba ti teimatoa ni maiu nakon are kantaningaia te Atua ao ti na teimatoa n riki ba ana botanaomata te Atua aika ti rineaki Irouna ao ti na bon aki kainnanoa te makuri ni kabomui ba ti a tia ni kainaomataki iroun Iesu. Ma bon ti tan bure are ake a bon tiku i tinakiun ana nanai Iesu aika a kabaeaki ba a na riai ni karaoi makuri ni kabomui ba aonga ni kainaomataaki.
Tariu ao maneu ai rabara nanon te Atua ba E a tia n anganira kororaoin baai ni kabane inanon Natina ae Iesu ao ngaia bon akea te bai ae na reke nakoira ngkana ti teimatoa ni maiu inanon ana Tangira Iesu. Ti na bon bane n roko n te tabo are E a tia ni katauraoia ibukira Iesu irarikin Tamana are i Karawa. Ti na tataro ni butia te Atua ba E na kawakinira inanon ana Nanai ao ti butia te Atua ibukia ake raroanako ma ana Tangira te Uea ba a na anganaki te rairannano ni koaua ba aonga n rin te Nanai ao man reke irouia te inaomata ni koaua inanon Iesu Kristo. Ao ngkanne ti na kona n nora kororaoin mimitongin te Atua ao ni karekea te kabaia ae akea tokina. Ti a reitaki naba ni butia Nei Maria buokara n ara tataro are kangai, "Santa Maria ae Tinan te Atua, Ko na tataro i bukira ngaira tani bure, ngkai ao n tain ni matera, Amen."
- Details
- Written by Uriam Timiti
Tariu ma maneu aio bon nanon te Atua are kaotaki nakoira n te bong aio are bon ana toa St Maximilian Kolbe. E reke nanou ba N na tiba ma ngkami karakinan te Santo aio ba I taku ba e rangi n rekereke ma te boto n iango aio.
E bungiaki St Maximilian Kolbe n 1894 ao e ba e kamatoaki ba teSanto iroun Bobe Ioane Bauro II n 1982. N ana karaki tinan te Santo aio are kaotia imuin ae riki ba te Santo natina ao e taku ba e a kaman kamimi aron Raimon ( arana ngkoa) ma ngke e uarereke. E uringanga tinana ba n te taina ao e bauranna ibukin ae airiri ma ataei aika aki ongotaeka ao e taku; "Ai tera ae nang riki iroum ngkai?" Imuin anne ao e a moanna ni kamimi naba aron Raimon ba kanga e aki bo ibuako. Imuin bauranakina iroun tinana ao e aki toki n tataro Raimon nakon Nei Maria ao e tang ni butia ba e na kaota nakoina te bai ae na riai ni karaoia. E kaoti Nei Maria nakoina n te taina ma taian bau n atu aika uoua inanon baina, teuana ae mainaina ao teuana ae uraura ao mani kabarabara ba te bau ae mainaina e tei ibukin te itiaki ao te bau ae uraura e tei bukin te maritire. E tara Nei Maria Raimon ao e kaeka; "N na anai ni kauoua" E taraia Nei Maria ma te kimareirei ao e kitanna.
Ngke e a katabuaki ba te Tama Raimon n 1918 ao e a katoka te ara ae bou irouna ae Maximilian. Bon iai te botaki ae kateia Maximilian ba kaotan karinean Nei Maria irouna ae arana bon 'Ana Tanga ni buaka te Imakurata' are a na buaka ba e na tokanikai te Imakurata n te aonaba ni kamaiu tamneia aomata ni bane rinanon ana Tangira Atiniban Iesu ae moan te Tabu.
N tain te kauoua ni buaka n te aonaba ao e tauaki Maximilian ba te taenikai ao ni kabureaki i Tiaman. N 31, Turai 1941 ao e mate ni maritire te Tama Maximilian ngke e anga maiuna ba e na tiringaki ibukin kainaomatan temanna raona ni kabureaki are kan noriia natina ma buna.
Tariu ao maneu ti na butia St Maximilian ba e na buokira ni katotonga maiuna n tauraoi ni butimaai mairoun Nei Maria taian bau are kan anganira ibukin kawakinan te itiaki ao te tauraoi ni n anga maiura ba aonga ni kamaiuaki tamneia tarira ma manera ni kabane. N te aro aio ao ti na bon riki ni koaua iai ba natin Nei Maria ae te Imakurata ao taani maeka ma ngaia n te kukurei ao te kabaia ae aki totoki. St Maximilian tataro ibukira, Amen.
- Details
- Written by Taranieta
Tokin kawaira ni kabane bon Iesu, are ti riai ni katokai matara iaona n tainako ngkai ti mananga.
E kakorakora ana kamatata Iesu n te bong aei ba Ngaia te berena ni kamaiu are e ruo mai I karawa ao e na reke iroura te maiu ae e aki toki ngkana ti kanna.
Te maiu n aon te aba ma raora ma ara makuri nako, ngaia ake a kona ni karika iroura, aki mannanoan Iesu ma ana taeka aikai ao buren ara taratara ao kawaira ni kararoaira ma Ngaia.
N tainako ao ti a uotirakei kanganga ma tabeaianga ni bane, nakon te Atua, ni katikui imatana rinanon natina ae Iesu, ao ni butia ba e na tabeakini.
Ibukia raora ake a karekei ara kanganga, n tainako ao tia butia te Atua ba e na buokia, ngkai a kekeiaki naba n ai arora, inanon aia mananga n te maiu aio. Ti a butiko te Uea. Ko raba te Atua, Alleluia Alleluia.