Kanan Tamneira...
- Details
- Written by Taranieta
Iesu moan bai n tainako ao ngai I a tiba kona n riki.
Raou, ngaiia moa n tainako, ao ngai imuina, ao ngkanne I a tiba kona n kuneai.
Inanon Iesu ao I kona n riki.
I riki ba te oi n aomata, ao I rikirake n tabu, ngkana I rikirake n riki n aiarona nako, ni katotongnga.
Mai irouia raou ao I a tiba kona n kuneai, ngkana I a kinai inanou, taian karea ma uan ana karea nako te Atua, ake e anganai , n aron te tangira, te atataiaomata, te ibuobuoki, te makuri korakora, te nanorinano, te tataonannano, te kekeiaki, te aki barannano, …ao te tokanikai inanon ana kimareirei te Atua, ba tibangau mai irouna.
Aio Ngai te Uea, Ko raba te Uea.
- Details
- Written by Taranieta
Te Karea n Raoi, n aron are e kakareanna King Toromon inanon ana Temboro te Atua n tai akekei, bon ngaia aron kamimitongakin nanon Ana Temboro Iawe.
Te Karea n Raoi ibukira bon Iesu, are ti kainnanoia ba e na kateimatoa aron mimitongin ma tabun Ana Temboro are bon ngaira, n rabatara ao tamneira.
Ti katoa bong, ni kainnanoa te Karea n Raoi ae Iesu, ngkai ti aki kona n tei i matan te Atua, ibukin arora aika aki riai i matana , ake a bon totokoa naba reken ana karatia, ni baro iaora.
Ibukin tangirakira ni koaua ao te Atua ae Tamara, e kariaia ba e na katoa bong n katikira, ba tina rki n ti teuana i Nanona, rinanon ana Karea n Raoi ae Iesu, are e anganira ni katoa bong n te takaramentu ae te Eukari ae moan te Tabu.
Ti na nakon Iesu ma te nano rinano ao ni kakatituaraoia n tainako, ngkai e kataua ba e na riki ba te Karea n Raoi ibukira, ao are ti a kona inanon, n rikirake ni katabui maiura nakoina, ao ni manga riki ni koaua ba taan tib’a ana raoi te Atua, nakoia aomata nako.
- Details
- Written by Taranieta
Ti na tataro ao ti riai ni makuri naba, ba e aonga ni kabonganaira ni koaua Iesu. Ngkana e kabonganaira Iesu ao ti kamatoa katiteuanaakira ma ngaia n tainako ibukina ba e reitiira te Tamnei ae Raoiroi, are e kaonira, e kamakurira ao e karikira n ti teuana ni koaua ma Atuara.
Ngkana ti wetea te Tamnei ae e Raoiroi ma akea nanora aika a mangori ma n nanorinano, ao tina rabuna otan te Tamnei ae e Raoiroi. Te mama ao te aki muti bon rabunan ao totokoan makurin te Tamnei ae e Raoiroi iroura ao bon te kamoamoa naba.
Ngkana akea iroura te Tamnei ae e Raoiroi ao ti riki n aiaron te taoro ae ai akea taarina, ba bon rabata ngaira aika akea bonganara ma kangkangin ara taetae ma ara makuri. E na ti kona ni kabonganaira ni koaua Iesu ao n riki n ti teuana nanora ao ara iango ma ngaia, ngkana iai iroura te Tamnei ae e Raoiroi.
Ti a butia te Tamnei ae Raoiroi, n te bong aio ao ni katoa bong, ba e na kaonira ao ni katauraoira ni katoa utira n te ingabong, ao imain ara makuri ni kabane, ni katokai ara bau ae e unekenekeaki n ana karea aika te tangira ma te wanawana, ao nangoan waera ae te nanorinano, ao e na kabongana rabatara ao tamneira, ni kamakurii inanora, ana karea nako.
Ti butiko Iesu, anganira te Tia Ibuobuoki, te Tamnei ae Raoiroi, ba ti na riki n ti teuana ni koaua ma Ngkoe ao n tatakaruaea n tainako, neboneboam ma karaoiroam, te Atua ae te Teniman n Temanna, ni maiura ngkai ao n aki toki.
- Details
- Written by Taranieta
Ti te Atua ae Raoiroi.
Ti aki kona atongira ba ti raoiroi ba bon ti te Atua ae e Raoiroi.
Arora nako aika a raoiroi bon mai iroun te Atua. Arora nako aika a buaka, ti bon riai n uringnga n tainako ba bon tiaki mai iroun te Atua.
Tiaki kona n atongaki ba natin te Atua ngaira ngkana tiaki kakaraoa ae e raoiroi, nakoia tarira ao manera ni kabane, ao bon nakoira naba.
Ti na butia Uean te Raoiroi ba e na katabui ao ni kaitiaki nanora n tainako ao ni karaoiroira. Ko raba te Atua
- Details
- Written by Taranieta
E tangimaka banaan Tamara ae te Atua, ae te Teniman n Temanna, n te bong aio, man ana Taeka ae Tabu, n taian wareboki, ni kaota korakoran nanona, are e tangirira n riki n ti teuana ma Ngaia n tainako inanon maiura ao te maiu ae e aki toki. Aio nanona iaon bai ni kabane.
Bon aio bukina are e kariaia ana Tangira are e rab’ata ao ti noria iroun natina ae ana rikitemanna ae Iesu, ba e na rinanon te korakai ni maraki ao te mate, ba kaotan rawawatan nanona n ara bure, ao bon kaotan korakoran ana Tangira ba tina kaitiakaki ao ni kamaiuaki ao n aki raure ma Ngaia.
Ti na keiaki ma n aki toki n ukeuke iaoni bai ni kabane, ni kakaea angara aika ana karekea iroura te kororaoi ao te maiu ae e tabu, n ara tai ni maiu , ba ti aonga ni kona ni kaekaa raoi banaan Iesu n tangirira mai iaon te kaibangaki, ni maiura aio, ao n te maiu ae e aki toki.
Iai ara koona n ara auti, ara aobiti, ara ruu, ara kaa, ke n tabo ake ti mena iai n te tai teuana ma teuana, ae ti a tia ni katabua ba nnen umara n tataro? Ti na katei umara n tataro, aika kanga uma n rianna, aika tina kona n tarataraa te aonnaba mai inanona, ao aika tina wakin ara makuri mai iai. Umara aikai ake bon raora inanona Iesu n tainako, ba tina karekea te katiteuanaki ma Iesu ni bai ni kabane n te maiu aio, ao ni karekea te maiu ae e aki toki; umara ae e na katanira ao n anganira te tokanikai man buakan te aonnaba ni kabane.
Ti karab’a Atinibanin Tinara Nei Maria, ae rabunan Iesu, ba e kataua ba e na riki ba umara n riana ni koaua. ...Tia butiko Tinara Nei Maria, katanira ian niniram n tainako ao n tabo nako.
Tariu ao maneu, tina reitira n tainako, ma Tinara, n ana Rotario ae Tabu, riki n ana namakaina aio, ba e na buokira ni katei umara ma ngaia n tataro, iaon te aba, ao umara n neboneboa te Atua ma ngaia n te maiu ae e aki toki.
Ko na mauri Maria,……