Kanan Tamneira...
- Details
- Written by Uriam Timiti
Tariu ao maneu ti karaba te Uea n tibangara ae E kakatauraoia ibukira ni katoa bong. N te bong aio ao I kan tiba ma ngkami kakawakin te rongorongo ae ti riai n nori mamarara iroura ao mani kauki nanora n nakon Tamara ae te Atua ni butia kabaran ara bure.
Tariu ao maneu ngkana ti kona n nori ara kairua ao mamarara ao nanona ba ti tauraoi n nora ao ni butimaea makan ana nanoanga ma ana kamaiu te Atua are kaotia nakoira Natina ae Iesu ma iaon ana kaibangaki are maraki ao ni mate iai ibukin ara bure. N tabetai ao ti rangi ni waekoa n noori aia kairua tabeman ao ti tauraoi naba ni motiki taekaia. Ma ngkana ti aki kona n tuoi maiura i bon iroura ao bon akea te rikirake ae kona n reke iroura ni maiura ni kiritian.
Ti na tataro ibukin te karea ae moan te kakannato ae te nanorinano ni kona ni kaotia ba iai mamarara ao ti na butia tarira ma manera ake ti a tia n urui nanoia ba a na karabarai ara bure.
N reita nako ana kamaiu te Uea ni maiura ao ti riai n tai nako ni kaota ana tangira te Uea nakoia raora, riki nakoia ara kairiribai ao te koraki ake aki kona ni kaboi muin ara makuri n tangira.
- Details
- Written by Taranieta
Raraoin ara taeka, ara makuri, ara iango, anuara ao bon ara tataro, a bane ni unika koran te raoiroai ma te tamaroa inanoia tarira ao manera nako ao riki bon inanon ara utu. Ana bwebwerake n rikirake ao n rababanako tamaroaia ao ni manga karikiua riki, ao e na reitinako te maiu ae e raoiroi..
Katotongan te Utu ae Tabu inanon maiun ara utu, bon arora n uniki taian kora inanoia natira ma tibura ao kain ara utu nako ao nakoia tarira ma manera nako, e ngae ngke tao te kora ae te kabanea ni uarereke n aiaron koran te matitati, n ana kaikonaki Iesu, n te wareboki n te bong aio.
Ti na uniki koran te raoiroi ni moa man rinanoan ara bure imatan te Atua n tainako. Ba e aki kona n ongo ara tataro te Atua ngkana ti namakinna ba bon tan bure ngaira moa. Ti ti kona n ataia ba tani bure ngaira, ngkana ti ukera moa nanora ma ara bure nako imatan te Atua, ma tiaki aia bure tarira ma manera.
Itiakin nanora imatan te Atua bon angara ni uniki koran te raoiroi inanora moa, imaina unikana inanoia kain ara utu ao tarira ma manera nako.
I butiko Iesu, kataua ba Nna nori au bure, n tainako imatam, ma tiaki aia bure aomata. I a butiko kabarai au bure imatam, ao anganai koraan te raoiroi ba N na kamrarai n uniki n tainako. I a butiko te Uea.
- Details
- Written by Taranieta
E taku Santo Bauro nakoia I-Ebeto n te wareboki n te bong aei,”Kam bia ata ana tangira Kristo , ae e aki kororaoi atakina,ao kam na kaonrakeaki iroun te Atua n arona ae e banin raoi”.
Atiniban Iesu ae ko moan te tabu, N ana Toa Atinibanim ae moan te Tabu n te bong aio, I neboa Am Tangira, Am raoiroi, kororaoin Am tangira ma am Nanoanga ibukiu. I neboneboiko Ngkoe ae Ana Tangira te Atua nakoira. I a butiko, kabaroa am karatia man Am Tangira, ao katabuai ba am bai, ba N na kekeiaki ni kabebetea nanom n au makuri ni kabane. Ia butiko Iesu. Tinau Nei Maria, ae ti teuana nanom ma Natim, raoraonai ao tataro ibukiu
Te anganano
Iesu maeka inanou, Am temboro nanou, ko aki reke ngke i ukeriko, I tinanikun nanou, Ma ko a reke ngke I ukeriko.I kabin nanou.
I ukeriko n te kainababu, N te maiu ae e tabu, Ao I a kaan ma ngkoe Atuau, Ma nanou e tuai tabu, Ko a reke irou, Au Uea, Atuau
I kabin nanou
Ko katabuai Iesu. Ngkoe I nanou ao ngai I Nanom.N na beku ibukim, N na kekeiaki Iesu, Ni kabebetea Nanom,Ae e Tangirai, ae moan te Tabu,
- Details
- Written by Taranieta
Ngkoananoa bon ana bong te Ekaretia ni karinea Atinibanin Tinara Nei Maria, ae Imakurata.
Ti reitaki ni karab’arab’a Tinara Nei Maria n aron ana tangira ae korakora ibukira ba tina bane n aki bua ma tina bane n roko irarikina ma Natina. Ti na bon karab’a riki ibukin taian buoka ake e a tia ni karekei ibukira mai iroun Natina, man ara novena nakoina, man wetean ana buoka, ao man wetean arana ae Maria, ae moan te m’aka man karineaki iaon araia aine nako.
Ti na butia Tinara Nei Maria ba e na anganira namakinan nanona n tangirira aio ni koaua. Ti na butia naba ba e na karikirakea inanora te nano ae e tamaroa n aiaron tamaroan nanona ae Imakurata
E reita nanon Tinana Iesu n te wareboki ao e reireinira arora ibukin te aroaro teuana are e karekea te nano ae e aki tamaroa.
Erangi n babainaki n tai aikai kamatauningan te Atua ae te taetae n tuea n aki akaka. E tuangira Iesu, ba tina aki tuea n aran te Atua ke karawa ke tera riki ba bai ni kabane, a bon karikaki mairoun te Atua. E kangai Iesu “E na kangai ami taeka, “Eng’ ke ‘Tiaki’ ba te taeka ae e raka riki nakon anne ao boni mairoun teuare e buakaka.”
Kairakia kain ara utu n te maiu n tataro, aroaro ma taetae ao n te nano ae e tamaroa man itiaki man eti imatan te Atua, bon katotongan nanon Tinara Nei Maria.
Ti butiko Atinibanin Nei Maria ae Imakurata, anganira namakinan nanom ae itiaki man tangirira. Raonira ao buokira ni kairia ara utu inanon te maiu n tataro ao te maiu ae e raoiroi ni katotongan Te Utu ae Tabu, Tia butiko Tinara.
- Details
- Written by Taranieta
N te wareboki n te bong aei ao te burabeti are Eria, e anganira te katoto, ibukin arora n ukera te Atua, ba e bobaraki n tataro iaon te maunga ae Karamera, ma moana imarenan bubuan waena.
N toua muin Eria ao iaon te maunga ae Karamera ao e bwebwerake te utu ae te Carmelites.
Maiuia bon te katotonga Tinara Nei Maria, te Paretenia are Ana tabonibai te Atua, are maiuna bon te kainababu n toui manekan Natina,
E ririmuin manekan Natina ao e bubuoka Natina, ibukin kamaiuan te aonnaba, n te tataro ao te maiu ae e kabureaki nakon te Atua ibukin kamaiuakin te botanaomata.
Ti butiko Tinara Nei Maria, buokira ni kainababu, ni kunea te Atua inanora, ao n toui manekan Iesu, ma ngkoe, ni katoa bongin m’anangara aei.