Kanan Tamneira...
- Details
- Written by Beneteta
Natin Tawita, ti bon rangi n kukurei n ataia ao n araniko ba te Metia ngkoe. N tabetai ao a mino ara iango n iangoam. Boni ngkoe raora n aomata, ko bungiaki n arora, ko maeu n arora ma iaon anne boni ngkoe naba Atuara. A mi nanora iai n tabetai ma iai te kamoamoa ba ti ataia ni koaua ba bon natin te Atua ngkoe are ko riki n ana makuri te Tamnei ae Raoiroi man bungiaki iroun Nei Maria te Baretenia. Bon ngkoe Atuara, te Metia ao Te Tia Kamaeu.
Kaotai ara onimaki ara Metia ao katauira ba ti na onimakiniko ni koaua ngkoe ma Tamam ao te Tamnei ae Raoiroi, Amen.
- Details
- Written by Beneteta
Bon ana taeka Iesu ae e tuangira ba e kakawaki ba ti na tangira te Uea ae Atuara ma nanora ni koaua, tamneira ni koaua ao tamneira ni koaua. Ibukina ba bon Iesu ae e taekinna ba e kakawaki iaon tua nako ao ti bon riai ni karaoia.
E tuangira naba ba e kakawaki ba ti na tangiria raora n ai aron tangirara i bon iroura. E ngae ngke e aki bebete karaoana ti bon riai ni keiaki ni karaoia. Ti ataia ba akea ara kona ma ti ngkana e anganira te kona bon ngaia ae Atuara ae mwiokon konabai irouna.
Ti riai ni kataia ni kateia naake a kona ni maeuakina tangiran te Atua n taai nako, Santo ma Santa boni ngaia ara kakatoto aika moan baan te raoiroi. A tia ni katei tamnei n aron tangiran Atuara ni maeuia ao a bia riki ba ara banna n taai nako. Ti bia bane ni kangai ba ngkai a kona n tangira te Atua ma raoia n te aro ae moan te tabu ngaira naba ti kona ni karaoia.
Ti a bubuti n te tataro ba e bia nanoangaira Atuara ao man katauira ba ti na kona n tangiria n te tangira ae e aki tiatianaki ao n tangiria naba raora n te aro ae ti na kona ni kaburea maeura ibukiia ba aio te aeka n tangira ae e a tia ni kaotia nakoira bon ngaia ae Iesu ae natin te Atua ni matena ibukin kamaeuara ba aio te kabanea n tikiraoi n tangira ae akea burebureana.
Ana tataro Santo Padre Pio ngkana e nora te aomata ae e baba ke e rangi n aoraki ao e aki toki n anga ana tataro ae e kangai 'te Uea katauai ba N na onea mwina'. E bia riki ba ara katoto aio ni maeura aio. Katauira te Uea ba ti na tangira n arom, Amen.
- Details
- Written by Beneteta
E korakora nanon te Atua ni kan kamaeuira. E anganiira ara tai man aki toki ni kakatikira nakoina ma bon ngaira ae ti aki kan katikaki ti kan taonna nako ni bon oin korakorara. E bati nanon te Atua n taotaona nanona man kan kamaeuira. E tangirira te Uea ba bon te Atua n tangira ngaira.
E kukurei ni kaotaira ibukin ae ti riai n ira nanon kaetieti n te maeu aei iaon te aba. Bon iai naba riaina ba ti na ira nanon te tautaeka man te aba are ti bane n uaiakinna, bon aban Atuara are e a tia ni katauraoa n nera iai. E rawawata nanona ngkana ti aki kona n nora baera ae kakawaki nakon te kaetieti man ana tautaeka.
A nanoro nanora ba a memere ara atatai nakon tangiran te maeu n te aba ae akea manena aio. Ti riai n bubuti buokara ba ti na kona ni kina te eti ao te bure, te reirei n kewe ao te reirei ae e eti. Ti na katea Iesu ae te Tia Kamaeu ba kairara nakon te eti ao te koaua. Ti riai n bubuti kaotan nanora ibukin atakin te koaua mai ieta ao ni kina naba te kewe are e na kirira nako man ana koaua te Atua.
Ke e anganira rabakauna Iesu ba ti aonga ni kona ni kina te kaokoro imarenan te eti mai Karawa, man ana tautaeka Atuara ae e maka man mimitong ao te eti mai aonteaba ba ti aonga ni bubuti buokara ba ti aonga ni karokoa ueana ni maeura ikai iaonte aba ba ti aonga ni kona ni manga kona n nora mimitongina i Karawa n rokora iai.
Raonira te Uea iroun Tamneim ae Raoiroi.
- Details
- Written by Beneteta
Ana rongorongo Santo Mareko n te bong aio ao e taekinaki iai taekan te manga uti irouia taari ake itiman ma buuia are ti temanna. N aron te karaki ao a bon bane n mate taari aikai imwin ae a buuna neiei ngaia akekei, temanna imwin temanna.E mate naba neierei.
N taai naba akekei ao iai aomata ake a aranaki ba Tatukaio ake a taku ba akea te mangauti. Ibukin aia koaua aio ao a tabeka aia titiraki nakon Iesu ibukin aron te aine aio n tain te mangauti ao a titirakina Iesu ba a na antai ngkanne are e na buuna neiei n tain te manga uti?
E kaekaia Iesu man tuangia ae tiaki ngaia Atuaia mate ma bon ngaia Atuaia ake a maeiu.
Ma n te moan wareboki ao e kamatata Santo Bauro n ana kauoua n reta nakon Timoeteo ba ti na riai ni maeuakina te kakaonimaki.
Ko raba Iesu n am bai n tangira ae te kakaonimaki. Reireinira arora ni kakaonimaki nakon Tamam, nakon te Tamnei ae Raoiroi ao ai bon nakoim ngkoe ae te Atua te nati ba ti aonga n kona naba n tiba ana tangira Atiniban natim ae ko tatangira nakoia tarira ma manera nako iaon te aba. Amen
- Details
- Written by Beneteta
N ongorara n te evangkerio ao tao ti na bon kangai, ai ribuakara taan ribana aikai. E aera ngkai a na kan ioawawa nakoia tabonibai ake a roko ba a na ana tiban te tia ababa.
I uringa aron te tai are ngke I uarereke ao a roroko taan tango karaun n tangoa ana karaun tinau ao ni katoa tai ae a maan n nako ma te karaun ao e bae n taetae tamau man kangai: nako ana tiban te karaun mai irouia ba ti a tannaira iai. N tabetai iai ao n tabetai akea tiban te karaun ao I ataia ae e aki toki n un tamau ngkana e riki aio.
Ai arona naba ma te tia ababa aio, e na bon bae n un man aki kukurei irouia taan riiti n abana aikai. E bati ana anga ni kan karekea tibana mai irouia tan Ribana aikai ba e aki toki n karekea onean mwin ana tabonibai are e nako man aki oki ke are e oki ma akea kanoan baina. N tokina ao e a bon kanakoa natina man taku ba n te tai aio a nang bon bae n karinea natina ao n anganna tibana. Ma ai kamira! a bon kamatea man kaota aia kairiribai ba a tangiria n onea mwina n baibai ai ngaia are a kamatea ao a karenakoa.
E kauringira Santo Mareko ba; E riki ba atibun te maninganinga te atibu are e kaakaki irouia taan kateitei.
Iesu bon taekam aio! ngaia are ti a tara maeura n te tai aio man tuoi baai aika a tukira mai iroum Iesu, baai ake a tuka aron kakoauan am tangira ibukira. Ko roko ba ko na riki ba te tia kaotiota man kakoaua ana tangira Tamam nakoira ma ti aki kan kubariko.
Iesu buokira ba ti na kona n noria ni maeura baai ake a na tukira n riki ba taan kakoaua ibukin raoiroin am makuri ma am tangira nakoira. Anganira te korakora ba ti na bon riki raoi ni koaua ba taan kakoaua ibukim. Tai katauira ba ti na kona ni karenakoko i tinanikun te o n kurebe.
Ko raba Iesu.