Kanan Tamneira...
- Details
- Written by Uriam Timiti
Aio te toa teuana ae kanga e kamino nano man riaon ara kantaninga ma wanawanara ba te miterio. Tera reireiara ae ti kona ni karekei man te toa aio? I bon irou ao tibangau teutana ae kakawaki bon ataakina ba ngaira bon ana karikibai te Atua are moan te maka man kakananto ao ni mimitong ao I taku ba e bon riai iroura ba ti na aki kona ni kabarabara te Atua ngkai boni Ngaia ae E karikira. Ti ataia naba ba a boni kabanetai waaki ni kan rabakau ni kataia ni kabarabara aron te Atua n aron ae ti noria irouia taan rabakau n te tiaenti (scientists).
Tibangau te kauoua bon miakinan te kororaoi inanon te Atua ae te Teniman n te Temanna are ti a nora iai te aro ni katiteuanaki ae kororaoi. Bon aio miterion te tangira ao te reitaki ni koaua imarenan te Tama, te Nati ao te Tamnei ae Raoiroi are ti wateaki nako iai ba ti na mauiakinna inanon ara utu, ara botaki ao ai abara are ti bungiaki iaona. Bon aio naba te kaeka nakon te kanganga ae ti noria n te aonaba aio are bon te bobobuaka ao te maenako.Bon aio naba te maiu are ti weteaki nako iai ba ti aonga ni kakoaua makan te Atua are maeka inanora ao ngaira Inanona. Ti na katotoonga Nei Maria are ngaia te moan aomata ni kona ni katonga te miterio aio imuin ana nanorinano ao ana ongotaeka iroun te Atua inanon te onimaki ao te kakaonimaki. Ti bia aki toki ni karaoa nanon te Atua inanon maiura ao ke karaoiroira n tai nako te Atua ae moan te maka ae te Tama, te Nati ao te Tamnei ae Raoiroi.
- Details
- Written by Beneteta
" E Kaoti Iesu nakoia ana Reirei."
Aio atun te Evangkerio n te bong aio are e koreaki iroun Mataio 28: 16-20.
Boton ara onimaki bon te onimakina Atuara ae te Teniman n Temanna!
Kam na mauri n te Toa ae kakawaki aio tariu ao maneu. Ngke e tairiki ao I kainababu man tataroakina au katauraoi ibukin kan kananoan riki au atatai iaon taekan te Atua te Teniman n temanna. E aki reke au iango ma I kukurei n au ururing rikaki nakon te Santo are Aukitino ma karakinan arona ngke e nakonako imatan win taari ao e nora te teei are e kataia ni kaika taari nakon ana marua are e aki rangi ni bubura! Tao bon aio nanon te Atua nakon kaekan ara kan ota n arona nako ao riki n arona n makuri ngaia ae Temanna ao teniman inanona! Ara bai te onimaki ao te bubuti ana tangira are ti na manga kona n tibaia nakoia raora.
Aikai au titiraki ake I buokai n au katauraoi nakon te bong aio iai:
!. N am tai n iangoa te Atua baikara baai aika a roko n am iango?
2. N te evangkerio ao e tuangia ana reirei Iesu ba a nanako ni kabuta taekana , taekina te rongorongo ae e raoiroi nakoia aomata nako. Tera ae ko na atongnga nakoia ataei n taekan te Teniman n Temanna?
3. Baikara bai aika ko a tia n noria n am reitaki ma te Atua te Tama? te Atua te Nati ao te Atua te Tamnei ae Raoiroi?
Ke e raoni ngkami ana tangira te Atua te Teniman temanna.
- Details
- Written by Uriam Timiti
Ti anganaki baai bai nikabane iroun te Atua ibukin neboana ao kamoamoakina. Ti a anganaki te Tamnei ae Raoiroi ibukin karokoan te kamaiuaki irouia tarira ma manera ni kabane. Ti na bane ni kamaiuaki ti ngkana ti ngkana ti kariki ua. Ti riai ni kataua te Tamnei ae Raoiroi ba E na kariki ua inanora. Ti kauringaki iroun Betero n te bong aei ba ti na riai ni karaoa te makuri n akoi nakoia raora n akea te ngurengure. Ngkai ti a tia ni kaonrakeaki n te Tamnei ae Raoiroi ao ti riai n tauraoi ni buokia raora ao n riki touati aika kakaonimaki ni kauka kawain ana karatia te Atua nakoioa tarira ma manera.
Ti riai ni kakoaua inanora n taai nako ba ngkana ti karaoi makuri ibukia tarira ao manera ao bon te Atua inanon kakamakurin Tamneina inanora ae bon makuri iroura. Ane kabarabara ao ke taekinii ana Taeka te Atua; ao ane karaoi makuri n ibuobuoki ao ke karaoia inanon korakoran te Atua are E anganiira n te aro ba inanon baai ni kabane ao e na neboaki iai Iesu Kristo are bon ana bai te neboaki ao te tautaeka n aki toki. Tariu ao maneu imuin ruonakira ao kaonrakeara n te Tamnei ae Raoiroi inanon Bentekota ao e a bon roko ngkai ara tai ni kariki ua. Ti ria n aki katotonga te biiku are taekinaki n te bong are katekebuakaki iroun Iesu ba e na mate ibukina ba e aki kariki ua.
- Details
- Written by Uriam Timiti
Ti na karikirakeira inanon te onimaki ao ti na kakaonimaki nakon ana wewete Tamnei ae Raoiroi inanon maiura. Ti na teimatoa n taai nako ni kaota ana nanoanga te Uea nakoia tarira ma manera ao riki nakoia taan bure. Ba bon nanon te Uea n taai nako ba a na bane ni kamaiuaki aomata ni kabane ao a na akea ae na mate. Ti na aki waekoa ni motiki taekaia aika a mamara ma ti karokoa irouia ana nanoanga te Atua ao ni kaokia nakon te Uea. Ti na kauringia akana a maningako ni bain te maiu aei ba a na aki kaitikaki ni baai aika a aki mamauna ma a na nora n taai nako kakawakin karekean te kabaia ae akea tokina n te maiu ae na roko. Ngkai E a tataningaira te Uea n taai nako ao ti riai n aki kataua ba ti na bua ni bain aon te aba ma ti na mananga inanon ao nakon Iesu ba ti aonga ni kararoa te motikitaeka ae kakamaku ti na karekea te kaniwanga are E katauraoi te Atua are bon te maiu ma Ngaia n aki toki. Inanon kororaoin tamaroana ao ti bia aki toki n ongo banan te Atua nakoira n aron e taekinna Etekiera (33-11) are e kangai, "Bon akea kukureiu n nora te tia bure ba e na mate mani bua ma I kantaningaia ba e raira nanona ao mani maeka inanon au tangira ma au nanoanga." Tariu ma maneu ti na bane n nora ana nanoanga te Uea ibukira ao n rairi nanora. Ti na nora aron ana nanoanga te Uea are E kaotia ngkoa nakon te tia bure are tauraki ma Ngaia n te Kaibangaki are e kamaiuaki ibukina ba e raira nanoana ao e bubutia Iesu kamaiuana.
- Details
- Written by Uriam Timiti
Ai raba te Uea n ana kakawakin nakoira ngkai ti a roko n tokin ana namakaina Nei Maria aio. Te namakaina ae Meei kanga te tai ae rangi n tamaroa ba te tai are kanga e manga noraki te maiu ni kaoti iaon te aba ba e a toki te kamaitoro n te tabo are mena iai Iesu. Bon te tai are a moanna ni bwebwerake iai taian aroka ma ao a kaoti taia ue ake a bita aron taran ao tamaroan te aba.
Ti kauringa n te bong te toa are manangan Nei Maria ni kawara ai tinana are Eritabeta. Ti ataia n karaki ba e mananga Nei Maria ma te kawaekoa nakon Eritabeta ao aei are riki imuin ruonakin Nei Maria iroun te Tamanei ae Raoiroi inanon te Kaotitakea. N aiaron Nei Maria ao ngaira ni kabane ti bane ni weteaki ba ti na katotonga Tinara inanon kabanean bongin ana namakaina aio ba ti kawaria naba tarira ma manera ao n nikira irouia te Atua ae te Teniman n Temanna. Inanon korakoran te Tamnei ae Raoiroi ao ti na ingainga naba n aron Nei Maria ni karokoa ana tangira te Uea nakoia tarira ma manera.
Ti na bubuti ba ti na uota kimareirein te Uea nakoia tarira ba ti aonga ni uaia n reitira ma Nei Maria ni neboa te Atua n ana tataro are kangai," E neboa te Uea Tamneiu ao E kimarerei nanou iroun te Uea au Tia Kamaiu ibukin ana makuri aika a kamimi nakoira n taai nako.