Kanan Tamneira...
- Details
- Written by Uriam Timiti
Akea te bai ae ti kona n taku ba bon oin ara bai. A bon bane ni mananga baai nako mairoun te Atua. Iroun Iesu ao E kaokiokia n taai nako ba E kanakoaki mairoun te Tama ao akea te bai ae taekinna i bon irouna ma bon ana Taeka Tamana.
Te Tamnei ae Raoiroi ae ti butimaia ni Bentekota bon Temanna Ngaia inanon te Atua ae te Teniman n Temanna. Bon te aro n katiteuanaki aio ma te Tama ae na kairira nakon te kabaia ae akea tokina. Are nanona ba oin maiura bon ibukin te Atua n te aro ae ti maiu ao ti mate Ibukina.
Ana karea nako te Tamnei ae Raoiroi ae ti anganaki tiaki ti bon ibukira ma bon ibukin neboan te Atua inanoia tariu ma maneu. Ti riai ni kakaonimaki nakon taiana karea ake ti anganaki ibukia tarira m manera ba ti aonaga n neboa iai te Atua n ana tangira ao ana nanoanga ae moan te kororaoi ibukira ni kabane. Ti riai naba ni kammakura te nano n anganga aio nakoia tarira ma manera ake a kananoanga n taruraoi n anga ara bai nakoia ake a kainnano n te aro are ti na kona naba riki ni kananoanga n aiaroia. Ba te tangira ni koaua n aron ae taekinnna St Baraniko bon te kona n riki ba katotongan te bai are ti tangiria. Ai ngaia are ti riai n tauraoi n anga nakoia kainnnao ba bon aio te anga ae ti kona iai ni karekea te karaoiroaki ae moan te bati n te tai ao n te maiu ae na roko. Ba n aron ana taeka Iesu nakoira n te bong aio ao E kaotia ba aki kona ni mateabuaka ara makuri n tangira aika ti karaoi ao ti na karekea kaniwangara ae tebubua te tai okiokin are ti a tia n anga te tai aio ao riki n te maiu ae aki totoki irarikina rimui.
- Details
- Written by Uriam Timiti
Ruon te Tamnei ae Raoiroi bon kakororaoan bai ni kabane ake E a tia n anganira te Atua te Tama iroun Natina ae Iesu Kristo. Tera bai aika kakawaki inanon ruon te Tamnei ae Raoiroi? Teuana ba ti nang riai ni kona ni kaitibo ma Iesu inanora ao rinanoia tarira ao manera. Imuin mangautin Iesu ao e kakaoti Iesu nakoia Abotoro are nanona ba e tianaki aron kaitiboia ma Iesu ni kaotina n Rabatana. Ma ngke e waerake Iesu ao e a botaki aonaba ma Karawa ao ti a kona n namakina aron kororaoin te katiteuanaki ma Tamara are i Karawa.
Inanon maten Iesu iaon te kaibangaki ao ti bane n anganaki ni kabane te natinanki iroun te Tama. Ma inanon ruon te Tamnei ae Raoiroi ao ti kakoaua ba E ruo kanga aiaron te taian newe iaoia Abotoro ni kabane ma kain te ruu are a mena iai. Te bai ae kakawaki ikai tariu ma maneu ba ruon te Tamnei ae Raoiroi tiaki nakoia aomata ni bane ma bon ti nakoia ake a tauraoi nanoia ni butimaia. Are nanona ba bon ara bai ni kabane te Tmnaei ae Raoiroi ma e na ruo iaora ti ngkana tauraoi ni butimaia. Te Tamnei ae Raoiroi boni Ngaia ae na anganira te kona ni kina raoi te Atua n te kikina are bon man te nano ao tiaki man ara taratara n aomata.
Ngaira ni kabane ake ti a tia n tauraoi ni butimaea te Tamnei ae Raoiroi ti bon riai n namakina te kabouaki ngkai n ara waaki ma ara kekeiaki inanon ara botaki ni charismatic ao n irira Iesu. Ti riai ni kaonrakeaki n te ang teuana ae bou ao te ninikoria ma te korakora ni karokoa te Rongorongo ae Raoiroi nako tokin aonaba.
- Details
- Written by Taranieta
Te tai aio are e a anganira Iesu te king ae te Tamnei ae e Raoiroi, are e na kauki ruun interan maiura aika a tuai man uki mai imaina, ke tao kingin ara kaa, ba ti nang kona ni kabutia ao n inaomata ni mananga ao ni karoko n tabo aika ti kan nako iai.
Ti a kauki nanora nakon te Tamnei ae e Raoiroi n te tai aio ao man butia, n arora aikai, aika a mamara, aika a namakina aron tokin ara konabai n tainako, ba e na kaonrakeira ao ni maeka inanora, ao ni karokoira nakon arora aika ti na matoatoa iai n aki m’ainging inanon karaoan nanon ara Uea ae Iesu n tainako, man ana ibuobuoki, aika ana karea nakoira.
Tia bubutiko te Uea.
- Details
- Written by Taranieta
Au Uea ae Iesu, I kakoaua ba ko tangirai, ngai ae te tia bure.
Kabarai au bure ni kabane n au tai ni maiu.
Nakomai ni maeka n tamneiu ba Ko na Uea iai, ao ngai N na ongotaeka iroum.
Butimaea maiu ae I anganiko n te bong aei ao kairirai iroun te Tamnei ae e Raoiroi inanon tamneiu.
Anganai te aeka ni Maiu ae e onrake n te Maiu. Anganai Tamneim ae Tamnein te Tangira ba N na neneboiko ni katoa bong n au tai ni maiu.
Anganai naba ana karea nako te Tamnei ae e Raoiroi, aika e kainnanoi Am Ekaretia n tai aikai,
Ko raba te Uea
I taromauriko ma n neboiko Ngkoe ae ko maeka inanou n aki toki.
- Details
- Written by Taranieta
“Timon ae natin Ioane, boni ngkoe ae ko tangirai riki ibuakoia uakai?”
“Eng te Uea, ko atai ba I tangiriko.”
“Kaamarakeia au tibu ataei.”
E kaekaki Betero iroun Iesu ao e kaokioka ana titiraki Iesu n te aro are e a karika rawawatan nanon Betero, ibukina ba e aki ataa bukin kaokiokan ana titiraki Iesu. Ma n tokin te karaki ao e kangai Iesu, “ Ko na irai.”
Maitira riki rawawatan nanon Iesu ngke e kaokioka ana titiraki, ba kan kaotaan Betero, n Nanona e taonaki n rawawata ae korakora ngkana e nang kaakeaki iroun Betero ao Ngaia, E aki kona n kaakea naba Betero teutana.
Titebo Betero ma ngaira ni kabane, ao E kaekaira ngkai ao n tainako Iesu ni wetea arara, ba banaan Ana tangira ae kororaoi ibukira.
E kaokioka ana titiraki nakoira ae e kangai, “boni ngkoe ae ko tangirai riki ibuakoia uakai?” ao n tuangira naba ba ti na kawakinia, Ana tibu ataei, aika tarira ao manera, inanon nakoara n toba inanon ara utu, ara botaki ma te Ekaretia
E a kaman nori bong aika imaira Iesu ao e rawawata nanona n tainako n norakira ba ti kaakea. Ma e ngae ngke E rawawata nanona ngkana ti b’aka, ao E bon tanrikaki ma te tangira ae kororaoi n taua baira ni kateirakeira, ao ni kangai naba nakoira “Ko na irai.”
