Kanan Tamneira...
- Details
- Written by Taranieta
“Timon ae natin Ioane, boni ngkoe ae ko tangirai riki ibuakoia uakai?”
“Eng te Uea, ko atai ba I tangiriko.”
“Kaamarakeia au tibu ataei.”
E kaekaki Betero iroun Iesu ao e kaokioka ana titiraki Iesu n te aro are e a karika rawawatan nanon Betero, ibukina ba e aki ataa bukin kaokiokan ana titiraki Iesu. Ma n tokin te karaki ao e kangai Iesu, “ Ko na irai.”
Maitira riki rawawatan nanon Iesu ngke e kaokioka ana titiraki, ba kan kaotaan Betero, n Nanona e taonaki n rawawata ae korakora ngkana e nang kaakeaki iroun Betero ao Ngaia, E aki kona n kaakea naba Betero teutana.
Titebo Betero ma ngaira ni kabane, ao E kaekaira ngkai ao n tainako Iesu ni wetea arara, ba banaan Ana tangira ae kororaoi ibukira.
E kaokioka ana titiraki nakoira ae e kangai, “boni ngkoe ae ko tangirai riki ibuakoia uakai?” ao n tuangira naba ba ti na kawakinia, Ana tibu ataei, aika tarira ao manera, inanon nakoara n toba inanon ara utu, ara botaki ma te Ekaretia
E a kaman nori bong aika imaira Iesu ao e rawawata nanona n tainako n norakira ba ti kaakea. Ma e ngae ngke E rawawata nanona ngkana ti b’aka, ao E bon tanrikaki ma te tangira ae kororaoi n taua baira ni kateirakeira, ao ni kangai naba nakoira “Ko na irai.”
- Details
- Written by Taranieta
Ngke ti bungiaki ao iai arara are e a tia ni kataua Iesu ba ti na aranaki iai..
E rangi ni kakawaki arau ao aram, ba ngaia ae E weteiko iai Iesu ao E reitiko iai ngkoe ma Ngaia. E taku ana taeka, “A ongo banau au tiibu. I kinaia ao a irirai”. (Ioane 10:27).
E weteira Iesu n oin arara n tainako. Arara ae e weteira iai Iesu, ti bon tabanin ni bane inanona ao ti tabu inanona, ibukina ba E kona ni kabongana ni weteira iai Iesu. E reitira Iesu ma Ngaia ae moan te Tabu ao ti namakina iai te kororaoi ao te m’aneaua raoi ni weteakira n tainako, ngkana ti tou man kaeka.
Ti na kawakina tabun arara ae e weweteira iai Iesu. Arara aikai bon arara ni Babetito aika a tabu, ke arara ake tia tia n anganaki aika mairoun te Uea ba tiaki mai iroun teuare e buakaka.
Ti na uotira ngkai ma tarira ao manera ni kabane, nakon Iesu, n arara aika ti kinaki iai, ao ni bubutia Iesu ba e na karaoiroira ao man katabuira ni kabane, ao man bubutia te Tamnei ae e Raoiroi n Ana Toa aio, Ana karea aika ti na ongo iai banaan Iesu ma Ana wewete n tainako, inanon maiura aio n arara aika mairoun te Atua, ao ba e na kainaomataira man arara aika tiaki mai iroun te Atua.
- Details
- Written by Taranieta
“N na manga nori ngkami , ao ana kabaia nanomi, ao akea temanna ae e na anaa kabaiami mai iroumi”
Aikai ana taeka Iesu nakoia ana abotoro ao nakoira ni kabane.
N tainako ae ti kaitiaka kawain Iesu inanora ni manga rairannano ni koaua ao ti kaitibo ni kaiokaki ma Iesu, ao tia kona n namakina kabaian nanora mairoun Iesu ae e koburake inanora.
Iai naba taai aika ti kaonrakeaki n te kimareirei n Ana kakabaia te Atua aika a roko nakoira n aro aika a kamimi. A tiku kabaian nanora aikai inanora n tainako ao a bon aki kona ni bua, ao a riki ba korakorara.
Maten Iesu ibukin ara bure, tokanikaina iaon te mate ni mangautina, bon ngaia aron teimatoan kabaiara. A ranga n tainako nakoira ngkai, ana kakabaia Iesu, man koburaken Atinibanna.
Ibukin kororaoin Ana tangira Iesu ba tina namakina ni koaua kabaian nanora mairouna, ao e anganira Te Tamnei ae e Raoiroi ba e na kakororaoa namakinan te kabaia anne. E reitira te Tamnei ae e Raoiroi ma Iesu ao Tamara te Atua, Ngaia inanora ao ngaira Inanona, ao a kakabaiaki nanora.
Ti a reitaki ma Atuara n te tai aio, ni uring Ana kakabaia nakoira n tai aika a nako ni karokoa ngkai, ao ni kakatituaraoia man neboneboia ngkai E rineia ba e na maeka inanora n aki kona n anaaki mairoura, inanon taian kakabaia aika e anganganiira. Ko raba te Atua. I neboiko te Uea.
- Details
- Written by Taranieta
N teuana te wareboki n te wiki aio ao e taekinaki ba E tararake Iesu nako karawa ao E tataro nakon te Atua te Tama.
“Katabuia ni makan te koaua; te koaua bon am taeka.” (Ioane 17:17)
Ti bon katabuaki ni m'akan te koaua ae Iesu n te aro ba ti kona ni maiu, n ikeike ao ni karaoi ara makuri ni makan te koaua ae bon Ana taeka te Atua, ae bon Iesu.
E taku Iesu nakon Birato, ‘I bungiaki, ao I roko I aon te aba, ba N na kaotiota te koaua. Te aomata nako ae man te koaua ao e ongo banau’. E taku Birato nakoina, ‘Tera te koaua?’. (Ioane 18:37-38)
Babainakin ao maiuakinan te koaua e bon karekea te kamaiuaki nakoia tarira ao manera man maiura ae kokoaua.
Maiuakinan kaitaran te koaua, are te kewe, e bon kabuaa maiura ae katabuaki iroun te Atua ao e kairira nakon te kabuanibai ao te mate ao ti kairia iai tarira ao manera nakon te kabuanibai.
Ti na aki bara n nano ni maiuna te koaua, ibukin are bon kamaiuakira moa ao manga kamaiuakia tarira ao manera nako, ba iai te kantaninga n tainako, ba man maiura ae e katabuaki n te koaua, ao a na kona n rairi nanoia ao n reke naba te koaua, te Atua, irouia tarira ao manera nako.
- Details
- Written by Taranieta
"Kaitiaka kawaiu".
Aio bon te b’ana ae e rangi n tangiraoi are bon banan te Atua nakoira ba tina kaitiaka kawaina n tainako.
Inanon maiura ni katoa bong ao nanora, are bon Ana nnen aroka te Atua ni maroro ma ngaira, e mangaongao, ao tamneira a bon aki rau, man baika a otabaninira. Ti tangiria n eutaki nako n tainako mai aonteaba ba ti kan maeka ni katoa bong ma Iesu i nanora, ma Ana Raoi, Ana Tangira ao Ana Kimarerei.
E taetae ni katoa miniti b’anaan te Atua ni kangai, ‘kaitiaka kawaiu”.
Ngkana ti ongo banaan te Atua ae tangiraoi aio n tainako, man ira nanona, ao e na reke iroura te nano ae e itiaki n akea kanoana ba ai bon ti kabin nanora n tiku ke te ‘nanorinano’. Tera arora ni kaitiaka kawain te Atua? Kabaroan bai aika inanora i waen Iesu n te Eukari bon teuana te kawai ae e rangi ni bebete ma ni korakora uaana.
Bon iai reitan ana rongorongo te Atua aio. Ngkana e a itiaki kawaina ao ti tiku ma te kantaningaa ao te kariariaa rokona ma uotana ake E na roko nakoira ma ngaai.
N ara tai ni komunio ao n ara tai n tataro, n ara utu ao ara botaki, are ti kabaroi Nakoina iai kanoan nanora ma ara iango, ao E a roko ni maeka Iesu ni kanoaa nanora ao n raonira, ma Ana raoi ao Ana tangira ao Ana kimareirei.
Tiaki ti aikai uotana…. e roko te Teniman n Temanna inanora, e roko Tinara Nei Maria i nanora, kaini karawa, ao bai ni kabane aika a nako mai iroun te Atua….ba bon ti teuana Iesu ma bai aikai ni kabane.
Tia kaitiaka kawain te Atua n aanga nako aika ti anganaki iroun te Ekaretia, ni katoa bong ba tina kaeka b’anaan te Atua, ma nanona ae E kan roko ma uotana nakoira , Ana kimareirei ma Ana baintangira, n tainako....i main te Tabati ae imaira, are e na manga roko Iesu ma uotana te Tia Ibuobuoki, te Tamnei ae e Raoiroi.