Kanan Tamneira...
- Details
- Written by Beneteta
Kam na mauri tariu ao maneu n ana tangira te Uea,
N te Tutia i Teaoraereke n te bakantaai aei ao e karaoaki te Toa ae Waeraken Iesu nako Karawa. E karaoa te Tutia Tamara ae karineaki Fr. Koru. A bon bati ake a roko ni kaea te Tutia ba e bon rokoroko i buki te koraki man kan bane n toki te koraki irarikin te aubunga n ran tabu. Ti karaba te Uea n maeun ma kakamamakurin Tamneina n ana tangira inanoia aomata ao riki inanoia kain te charismatic mai Betio nako Bikenibeu.
Ti karaba naba te Uea n ana tangira ibukin ungan nanoia taan makuria umana ae te Cathedral i Teaoraereke ba e a kan bane n nim aia taira (tiles) ni karokoa ae e buta nanon te umantabu. E a kebo ni karokoa n nen te ran tabu aio ba e moanaki mai i moa. Ti a taia ba ngkana e tia ae te make aio ao e na manga nakon are iteran te umantabu ake uoua ake a memena iai kaara ao are e kaitara.E raba te Uea!
N tain ana kaotioti te Tama Koru ao e katereterea kakawakin taian kaubaira ibukin te maeu ae e na roko. Oin waeraken Iesu ba e na katauraoa ara tabo i Karawa ao e na kanakoa te Tia Buobuoki. E rangi n teke nanou n ana taeka ae e kangai tai tabe ni katikiraoa mwengam iaon te aba aei ba bon akea manena ae ti na bon bane ni mate...tabeakina riki mwengam are i Karawa ba abara ni koaua bon Karawa.
Iai kukurein nanou n ongo ae bon abara ni koaua Karawa. I uringi au wareware n ana koroboki Santa Teretia n Iesu te teei ma Santo Padre Pio are a ingainga nanoia ni kan kaea te aba are Karawa. A kaota mataiakinan te kan roko ikekei ma te aki maaka te mate. I a tia n iaiangoa te mate ma makun nanou ni kan reita nako au iango ibukina ba are I bon makua man rawa ni mate.
E raba te Uea n ana kaotioti te Tama ba e amanga kaunga nanou ni kan kekeiaki man katikiraoa mwengau are i Karawa ao riki man katauraoai ni butimaea te mate ba ngaia e bon aki kakamaku. Ti a tataro inanon te wiiki ae e boou aio ba ti aonga n anganaki te tauraoi ni butimaea ana wewete te Atua ba bon weteara nakon abara are i Karawa. Irarikin ara tataro ibukin aei ao ti a bubuti riki ibukin katauraoara imwain rokon te Tamnei ae Raoiroi. A bia raoiroi nanora ni kabane imwain butimwaean te Tamnei ae Raoiroi ba e aonga ni maeka ni koaua inanora.
Kam na tekeraoi ibukin ami katauraoi imwain te Pentekota n te Tabati ae imwaira.
- Details
- Written by Beneteta
Ana tokanikai Iesu ae e taekinaki bon taekan manga utina man te mate ao waerakena nako Karawa ni manga okira te tabo are e roko mai iai. Te tabo aio ae bon Karawa bon ana tabo Tamana.
E tuangira Iesu n ana evangkerio Ioane ba ti na bubutia Tamana n arana ni baai nako ake ti kainnanoi ao e kamatoa ba ngkana ti karaoa aio ao ti na bon anganaki. Ti noria ikai ba Iesu e bon kamatoa ikai te maeu inanona ao te kariaia ba e na maeu ngaia naba inanora. Ngkana e maeu inanora ao ti bubuti nakon Tamana ti ataia ba bon ngaia ae e taetae inanora. Maroaka ae e kangai ngkana ko bubuti n arana nakon Tamana ao ko na bon anganaki te bai are ko bubuti iai.
Ti bia uringa te rongorongo aei n tain ara kainnano nakon Tamana ba imwain ae ti bubuti n aran Iesu ao ti bia moa kauki nanora man kaoa Iesu ba e na maeu inanora, e na maeka inanora, e na baina nanora, e na karaoa are e taku inanora ba n te aro aei ao ngkana e roko ae ti na kan bubuti buokara ti na koaua raoi ba bon ngaia are e na taetae mai inanora man bubutia Tamana ibukira.
E tang maka te rongorongo aio ao tera ngke e tangi maka naba iroumi ba kam aonga ni kona ni karekea te nanoanga maiiroun Taman Iesu n taai nako ake kam kainnanoa iai buokami mai irouna. Ma tai maninga ni butia n aran Iesu.
Ti a kukurei man neboa te Atua te Tama n ana tokanikai Iesu iaon te mate ao riki ibukin manga okiran Tamana ngkai ti na kaea te Tutia n ingabong riki iaon Kiribati ni kauringa waerakena nako Karawa ike e nako ba e na tekateka i angatain Tamana n tautaeka ma ngaia i Karawa. Ti a boti nanora ni karaba te Atua te Tama man takarua ni kangai: E na neboaki te Tama ao te Nati ao te Tamnei ae Raoiroi ngkai ao n aki toki, Amen.
Kam na tekeraoi n ana tokanikai Iesu!
- Details
- Written by Beneteta
Kam na mauri tariu ao maneu n ana tangira te Uea!
N te bong aio ao bon ana toa Waeraken Iesu nako Karawa. I Tarawa ao e na karaoaki te Toa aio n te Tabati.
Iai te bai ae e kakukurei n kauringan waeraken Iesu nako Karawa ba e ngae ngke ti aki ataia ba aekakira te tabo ae Betania ao iai te neweaba teutana ae ti kona n noria n te Wareboki are e taekinaki iai waeraken Iesu n te tabo aei. E tei Iesu man karaoiroia ana abotoro ao imwina e mwemwe rake.
Au namakin ae I mena inanona ngkai I wareka te Evangkerio are e anaki mai iroun Ruka 24:46-53 ao I noria ba I tiku ni karokoa ae e bua raoi Iesu mai imatau i buakon te nang! ao e taonai te kukurei, te mimi ma te titiraki ba ai aekakira te tabo are e na nako iai ao ai tera aron te butimwai are e a karaoaki n rokona? Ti a tiku teutana man kainababu inanon tabeua te tai ao ti a miakina aron te butimai are e a karaoaki i Karawa ikekei...antai ake a tei man butimaea rokon Iesu?...e mena ia Tamana? e mena ia Tinana?...ao kam uringa Santo Ioteba? e mena ia?... a mena ia Anera?... ao Santo ma Santa tera ae a karaoia?...iai te katoka bau?...antai aika a anga aia taeka ni butimwai?...antai ae e MC?...aekara taraan Karawa? ...ko ongo te anene? antai ana kuaea ae a kaira te butimai? ...aekakira baai ni katamaroa aika a kabonganaki? ue n aekaia nako!...ao te amarake ae e koro arona!...tera oneaia taan ira te botaki ni butimai? ...a uara otan itoi ma namakaina?...e bong ke ngaina taran te tabo?...
Ko raba Iesu n waerakem nako Karawa ba a kariariaiai nanora ni karia rokon te Tamnei ae Raoiroi! Katauira Iesu ba ti na tei iaam ngkai ko waerake nako Karawa n taromauriko ao n neboiko n tamnei!
Karaoiroira naba Iesu n aron are ko karaoiroia am abotoro ao ringi nanora ba ti aonga n tauraoi raoi imwain te Tamnei ae Raoiroi.
Ko raba Iesu, Alleluia!
- Details
- Written by Beneteta
E teimatoa Iesu n anganira te kukurei inanon maeura. Tiaki nanona ao e aki tangiria ba ti na karawawataki ni maeura aio. Ma inanon te maeu aei ao ti na bon riai n kaitibo ma te rawawata ibukina ba ti aki kororaoi. Bon taan bure ngaira.
E kukurei Atuara ngkana ti aki toki ni kawaria man butia ana nanoanga ibukin kabaran ara bure. E koaua ae e tangiria Atuara ba ti na kukurei n taai nako. A na tangira ae moan te kororaoi ae ngaia ae e kaitiakira man ara bure ba e kariaia ba e na mate natina ae te riki temanna ibukin kamaeuara.
Nanon aonteaba ba ti na tabeaianga, ti na nanokawaki, ti na aki rau, ti na aki kukurei ma ai rabara nanon Atuara ae e tangiria ba ti na kukurei ao man kabaia n aki toki. E anganira ana taeka ae e na kaboa mwin nanokawakira iaon te aba aio n te kukurei ma te kabaia. E kangai- kam nanokawaki ngkai ma N na manga nori ngkami ao a na kabaia nanomi, ao akea temanna ae e na ana kabaiami mairoumi.
A bia rotaki nanora n te kukurei n ana taeka Atuara aio. E bia rauaki nanora n ana taeka aikai ao e bia kariaria nanora man kantaninga te kabaia aio ba ti ataia ni koaua ae ngkana e reke iroura ao bon akea ae e kona ni manga anaia.
Ko raba Atuara n am taeka ae moan te kamaeu nano aio ao ti neboiko man katituaraoiko n am bai n tangira ae bon te kabaia n aki toki irarikim ngkai ao n aki toki, Amen.
- Details
- Written by Beneteta
Te Kamauri nakoimi tariu ao maneu inanon Kristo n te bong aio!
Ti karaba ana taeka te Atua n te wareboki n te bong aio are e anaki man aia Makuri Abotoro 17 ao 18. Bon taekan ana makuri Bauro n te tabo ae Atenti. Bon taan taromauria te Atua kain te tabo aio ao a karaoia ma te kakaonimaki. Ma iai kaokoron aia onimaki ma ara onimaki n te tai aio. Iaon aia bao ni karea ao e koreaki ae kangai " Nakon te Atua ae e aki ataki".
Ngke e roko Bauro ao e kangai nakoia kain Atenti: I roko ba N na tuangi ngkami ae te Atua ae kam taku ba kam aki ataia e bon maeu n koaua. Bon ngaia ae e kariki bai ni kabane iaon te aba aei. Ngaia are ibukina ba e kariki bai nako ao e bon tautaeka iaona ni kabane. Bai nako aikai bon bain aonte aba n ikotaki ma aomata naba. E tuangia Bauro ba maeun te aomata e tautaekanna te Atua ae e maeu aio. Ti noria ikai ba bon te Atua ngaia ae e maka.
E angania aomata te maiu, te ikeike ao bai ni kabane. E bati n tangiria ana botanaomata ao e aki rinorino man kakaonoti ana tangira.
E kauringira riki Bauro ba ti riai n rairi nanora man kitana te tai n nanoro are e a tia n nako ba ti a mena ngkai n te tai n rabakau man wanawana. Ibukina ba ti a rabakau man wanawana e a reke iroura te onimaki ae onimakinan te Atua ba e bon maeu, e maka ao e tautaeka iaon maeura ma kanoana nako.
Ti bia bane n riki ba kanga Tionitio ma Tamariti man raona Bauro n riki ba taan onimaki ni koaua.
Ti na tataro ba e na bon kateimatoaira te Tamnei ae Raoiroi inanon te onimaki ba ti aonga ni kona ni butimai raoi ana karea man kainaomata ni koaua i nanora ba e aonga ni kona ni kaoti baai nakoira ake e uoti mai iroun te Tama ao te Nati, ba ngaiia Atuara, ae te Teniman n Temanna. Amen.