Kanan Tamneira...
- Details
- Written by Beneteta
Iesu ae ko maeu n am taeka, ko na mauri mai iroura ngaira aika a mamara ara onimaki ba ti kainanoa buokara mai iroum n taai nako. Ko raba n am taeka n te bong aio are ko tuangira iai 'ba ko riai n nako mai iroura ba ngkana ko aki nako ao e aki kona n roko iroura te Tia Buobuoki are ko na bon kaokia nakoira. N am taeka aio Iesu ao e bon rotira te maroa ba ti rawa ba ko na kitanira. Ti ataia ae ngkana akea ngkoe irarikira ao ti na bon aki mwengaraoi, ti na bon maku. Anganira Iesu te ninikoria ni kona ni kariaia buam mai irarikira. Anganira te kona n onimakiniko ao n ingainga nakon kakoroan nanon am taeka ae ngkana ko nako ao ko na kaoka te Tia Buobuoki. Kauka nanora Iesu man anganira te uki n nano n tauraoi imwain te Tia Buobuoki aei ba ti aonga ni kona ni kainaomata inanora ba e na tautaeka iai man karaoa are e taku inanora ba ti aonga n namakina te kamaeuaki ao te kukurei inanon ana makuri ma ana buoka.
Te Tia Buobuoki aio Iesu bon ngaia are e a tia n kainaomatako man te mate ao e kainaomata naba Bauro ma Tira man te karabuti. Katauira Iesu ba ti na kainaomataki naba irouna man kabaeara nako; man ara bure nako are a na bon tukira mai iroum ao mai iroun Tamam. Katauira Iesu ba ti na kona ni kabureira ni koaua nakon te Tia Buobuoki aio ba ti aonga ni kainaomataki man taben nanora ni bain aonteaba. Ke e reireinira te Tia Buobuoki aio ba ti na mataiakina bain te maeu ae e na roko ti aonga ni kona ni karekea nnera irarikim n ara tabo are ko a tia n katauraoia ibukira.
N ara reitaki ma Tinam Nei Maria n ana namakaina aio ao ti butia ba e bia tataro ibukira man butia te Tia Buobuoki aio are bon ngaia raona ni koaua ba e bia riki ba raoraora ni koaua inanon maeura ba ti aonga ni kona n itangitangiri nikoaua ma raora ni kabane n te maeu aei. N ana buoka ma ana tataro Tinam ao ti na bon kona n butimaea raoi te Tia Buobuoki aio n arona ngke e butimaia n rokona irouna n tain te Kaotitaeka. Ti bia bane ni kauringaki ana kibu n taeka Tinam nakoina n te tai ni kaoti aio are e kangai "ke E karaoaki ae nanom ma tiaki nanou". Ao e bia riki ba ara kaeka n te bong aio ao n te Toa ae imwaira - te Pentekota kauringan ruon te Tia Buobuoki, Te Tamnei ae Raoiroi.
Ana tangira te Teniman n Temanna nakoimi ao ami utu ma raoraomi! Alleluia!
- Details
- Written by Beneteta
Ko raba Iesu n am tua ae ko anganira n te bong aio n te Evangkerio mairoun Ioane 15:9-17.
'Kam na itangitangiri'. N tabetai moan te kanganga ae ti na tangiria aomata ake ti riribaia. Ma ai kamira Iesu ba e tuangira ba ti na riai n itangitangiri. Te tangira are e tibaia ma te Atua te Tama ao are e kammakuraki inanora iroun te Atua te Tamnei ae Raoiroi bon ngaia ae e kan anganira ba ti na tibaia ma raora nako. N ana makuri te Tamnei ae Raoiroi ao ti kona n tangiria raora ake ti riribaia. Te tangira ae e tuangira Iesu ba e na anganira bon ana tangira te Atua ma ngaia are ti bia bane ni kauki nanora man butimaia ma te uki n nano ba ti aonga ni kona n tangira n ai arona ae akea tian ma bureburean ana tangira. E aki kakaonoti ana tangira ba e tangiria ma ake a kamanea nakoia ana kairiribai. Ti noria n aron ana tangira nakon Iuta are e kamanea ibukin tenibui te maibi n tirewa. Ti noria n aron tangiraia tautia ake a batiboia, nake a buriti buaina man bawareia. Ai nanora ana tangira Iesu.
E kangai naba ana taeka Iesu- bon ngai ae I rineingkami ba kam na nako ni kariki ua. Ti bia kataua Iesu ba e na rineira man kaburei maeura nakoina ma te koaua ba e aonga n tautaeka ni koaua iai man karikira ba taan tiba ana tangira nakoia raora man kamaitia riki taan uota te tangira aio nakoia botan aomata nako ake a na manga uotanako riki te tangira aio man tibaia nako ni kabuta te aonnaba ba e na riki te tangira aio ba te bai n reitira inanon te nanai ae ti teuana ike ti na bane iai n riki ba tarin ao manen Iesu ni koaua ao natin te Atua te Tama ao raoraon te Tamnei ae Raoiroi. Ti na riai ni itangitangiri ni koaua.
Tariu ao maneu, I tiba Ana tangira te Teniman n Temanna nakoimi ba irian au kamauri ao au inga nakoimi inanon te wiki ae e boou aio! Kam na kabaia mai iroun te Atua te Tama, te Atua te Nati ao te Atua te Tamnei ae Raoiroi.
- Details
- Written by Uriam Timiti
E roko i aonteaba otan ana tangira te Atua ae kororaoi nakoira iroun Iesu ao ai tiaki ngaira bain te aonaba aio ma bon tan baiabai I Karawa. Inanon maten Iesu iaon te kaibangaki ao mangautina ao e roko te ota i aonteaba ae kamauna te roo ao mani kainaomataira mani makan te mate nakon te maiu ae kororaoi inanon te Atua. Ti bungiaki nako aontenaba inanon te ota aio ti riki ni koaua ba natin te Atua inanon te Babetito ao aia tokira ni kabane bon te roko n te tabo are E a tia ni katauraoia te Atua ibukira ba kanoan ana Berita n Akoi ibukira ni kabane.
Ai kamimira ao kororiara ana tangira te Atua ba E kan anganira ngaira aikai ni kabane te kabanea n tamaroa are te kabaia ma Ngaia n taai n nako i nanon kororaoin te mimitong. Ao ai kawara ngaira ngkana arona ba ti a kabua ana baintangira te Atua aio nakoira ba ti rineia ba ti na tiku i aonteaba are bon tiaki ara tabo ma rikira ao tokira are baireia te Atua ibukira?
Tariu ao maneu e bon riai ibukira ba ti na maiu ni katototnga Iesu ni kawaina are E tia n toua i aonteaba ao n ataia ba ti na bane n rinanon taian kanganga aika bati. Ba akea te toro ae kakannanto riki nakon te toka ao ti aki kona ni kantaningaia ba e na kaokoro kawaira ma ara Uea ae Iesu. Ma iai tekeraoira ba Iesu E raonira n taai nako ao bon Ngaia te Tia buokira n taai nako iroun Tamneina ae Raoiroi. Ngkai E a tia n rineira Iesu nakon te maiu ae kororaoi ma ngaia ao ti riai n ataia are boni tiaki ngaira man te aonaba aio ao bon tiaki naba ngaira ana bai te riaboro. Ti na karekea te rongorngongo aio ba kairan maiura ao ti na reitira ma tarira ao manera ake a taonaki n te mamara ao te kua ba ti aonga n uaia ni bane roko n tokin kawaira are E a tia ni baireia te Atua ibukira.
- Details
- Written by Uriam Timiti
Ngkana iai te bai ae ti noria ae kororaoi tamaroana ao a bane ni katikaki nanora nako iai ibukina ti mataiakinna tamaroana. Are nanona ba inanon te aomata nako ao iai n taai nako te taka ibukin te tamaroa ma te kororaoi.
Bon aio ngkanne nanon are e taekinna Iesu nakoira n te bong aio ba tiaki ngaira ae ti rineia ma bon ngaia ae rineira. Bon aio naba te aro ae ti kona iai ni kabararabara aron ao anuan te Atua. Bon ti te kororaoi ao bon akea te bai ae E kainnanoia mai iroura ba e na raka iai ke n kororaoi riki iai arona. Bon te aro ni kororaoi iroun te Atua ae ngaia ae ti katikaki iai nakoina. Bon nanon te Atua ba a na bane ni kororaoi naba baii ni kabane ibukira ao i nanora ba ti aonga ni katotonga. Aio are ti waaki inanona inanon ara borau n te maiu aio ao are na koro bukina ngkana ti a roko irarikina i Karawa.
Ao tera te aro ae ti kona ni karikirakea iai te kororaoi anne inanora ni maiura aio? Akea riki ba bon ti te tangira n akean ana tangira te Atua ibukira. Te tangira n Atua aio bon te kona ni manga tangiria tarira ma manera n aki kantaningaia ba a na karaka arora. Bon aio te aeka n tangira are tuangira Iesu ba ti na riai n tangiriia iai raora. Ngkana ti karaoa aio ao e na ranga ana karatia te Atua nakoira n airon te ranga n ran man te koburake n ran ba e aonga ni banin n reke iroura te kimareirei ao te kabaia. Bon nanon naba te Atua ba E na karanga ana kamaiu ma ana karatia nakoia aomata ni kabane. Rangan ao rokon ana tangira ma ana karatia te Atua nakoira bon te kona ni kaonrakeaki n n te Tamnei ae Raoiroi ao uana are te kabouaki ao te kakorakoraki n tatakaruaea te Rongorongo ae Raoiroi nako tabon aonaba ni kabane. Raoiroin ao kakamakurin kororaoin ana Tangira te Atua inanora boni ngaia are na katiakiia aomata nakon te Atua. Bon aio te rongorongo ae kakawaki ibukira inanon ara katauraoi ni butimaea te Bentekota ae Bou inanon wiki aika a na roko.
- Details
- Written by Uriam Timiti
Ai rabara te Atua n ana Tnagira nakoira ni kabane are e kaotaki inanon ao iroun Natina ae Iesu are boni Ngaia te Tibu te Tei are kamaunai bure n aonaba ni kabane. E anganira kororaoin baai ni kabane ao te maiu ae onrake n te maiu te Atua ba ti aonga n riki ba naati ngaira Irouna ao taani baibai inanon te kabaia ao te mimitong i Karawa. Inanon ana Berita n Akoi te Tama ao ti aki manga riki ba toro ngaira ma ai bon raon ni koaua Natina ae Iesu are E a tia kaoti bai ni kabane ake mairoun te Tama.
Ma tera arora ni kateimatoa te maiu inanon ana tangira Iesu ba ti aonga ni kabaia ma Ngaia n aki toki i Karawa? Eng, E anganira Iesu te tua ae kakannato ba ti na riai ni baina te itangitangiri, ke ti na riai n tangiria raora ni kabane. I taku ba ti aki te rongorongo ae bou aio nakoira ma n angin te tai ao bon aio kabakara teuana ae ti na riai n noria ngkana ti na ira ni koaua nanon te Atua. N angin te tai ao ti taku ba ai bon akea ara kanganga ma te Uea ba ti kakawaria n te tutia ao ti kakaraoa tabera n ara tataro n utu ke a ara botaki aika kakaokoro. Ma e uara aron ara tangira nakoia raora, kain ara botaki ke kain ara makoro? Ngkana arona ba iai ara kairiribai n te tai aio ao ngkanne kanga ai bon aoria ngaira ngkanne te koraki ake ngkana a tataro n ti tatara oin te kai are te Atua ma a aki tatararake n noria tariia ma maneia ake a toka i aon taian maanga.
Tariu ao maneu ti na butia te te Atua ana karatia ba ti na kona ni kaota iroura uan te maiu inanon ana Tangira te Uea are bon te itangitangira ao n ibuokanibai ma tarira ao manera ni kabane ao ai moarara riki bon te kona ni kabarai aia bure raora ao n tangiriia ara kairiribai.