Kanan Tamneira...
- Details
- Written by Taranieta
Ai aron te tim n ran ngaira are e tim nako nukan te neinei n ran ke te marawa ae e ababaki, mai inanon bain Iesu.
Aio arora ngkana inanon ana kanaanako Iesu ba ti na karaoa Ana makuri ni kairiiri, ni kawakin tibu, ni katei ara utu, inanon ara botaki, ara kaawa ke ara community, ake e katukuira inukaia Iesu.
N aiaron te tim n ran ao ti nora iai kakawakin arora ni karaoa ana makuri Iesu ni kabuta Ana Tangira ni kamaiuia ake tia manga kawakiniia. N aiaron Iesu ao te maiu ao te tangira ma te korakora are iroura, a na teimatoa ba a na itiiti nako mai iroura ao a na rotiia moa ake I rarikira, ao ni manga rotiia ake irarikia ake irarikira, ni karokoa ae ana rotaki te botanaomata ae e banin (te ‘ripple effect’).
Karaoan raoi nanon te kanaanako mairoun Iesu bon kateimatoan arora ngke e katimra Iesu. E na koburake ao ni b’anaonao n otinako mai iroura n tainako, te korakora ao te tangira, e na buti namakinakin te kimareirei ao te maiu, ibukina ba e maiu Iesu inanora. Maiun Iesu inanora bon man rikiraken ma korakoran ao teimatoan te maiu n tataro ma te onimaki iroura.
Ngkana ti raroa ma Iesu ba ti katoka te maiu n tataro ke ni kauarerekea, ao e na noraki ao n namakinaki ba e a uarereke ke e a bua te kakamakuri n te ran. Ti riki n te tai anne ba te tim n ran ae e inako ni mauna inanon te nei n ran are akea te maiu iai.
Ti butia Iesu korakorara iroun te Tamnei ae e Raoiroi ba n Ana kanaanako ni kabane Iesu nakoira ni karaoi nakoara ni kariiri aika a boou, ao E na kateimatoaira n tainako n te maiu n tataro Nakoina ao te onimaki Irouna ae e koaua, ba e na aki toki te maiu are E anganira ba tina tib’aia n tainako inanon nakoara ni kawakin tiibu ma Ngaia.
- Details
- Written by Beneteta
Ko raba te Atua ae Tamara ibukin te bong aio. Ko raba ngkai ko kariaia ba ti na rin inanona ao ni manga nora aron am babaire ibukin maeura inanon te bong aei. Ti a manga karabako riki n am tangira ae moan te bati ibukira riki n nanom n tama ike ko aki toki ni maneira iai ba bon natim ngaira ni koaua. Ti nora rababan te tangira aio ba ko anganira natim ae Iesu Kristo ba E na mate ibukira. Bon natim are ti a tia n rawa irouna. Bon bouan te maninganinga are ti rawa irouna e ngae ngke e a tia ni mate ibukira.
E kaoti arora riki Betero ni miina ike e rinorinoiai nanora man rawa n butimaai am baintangira nakoira te Uea. Ti bairei man tiana aron butimaean am baintangira nakoira ba ti kangai aikai aika N na anaia ao aikai aika N na katikui. Ti aki toki ni kakotiko te Uea ibukina ba e memere ara iango man aki korakora ara tangira ma ae moan te tabara riki bon nanora ni karabaraba. Te Atua ae ko onrake n te tangira man kan kawaea nakoira n taai nako ti boti nanora n te Tabati aio man anganiko ara karabaraba ibukin baai nako ake ko a tia n anganira, baai aika ko anganira ngkai n te bonga aio, n te tai ae ti mena inanona ngkai, ao ibukin baai aika ko na anganira n te tai ae e na roko. Te Uea ti kauataoa riki ara kaitau ibukin natinakira iroum. Aio te bai ae ti riai n aki toki ni karabako iai. Ko na neboaki ni maeura ikai iaon te aba ao ikanne i Karawa n te tai ae e na roko, Amen.
- Details
- Written by Beneteta
Ti karaba te Atua ngkai bon ngaia ae E a tia ni katikira nakon natina ae Iesu are bon te amarake mai Karawa. Aio te rongorongo ae e raoiroi ae ti riai ni kabuta nakoa nako aonaba ni bane. E a tia n ririaki teuare Biribo ibukin uouotakin te rongorongo ae e raoiroi ao e ababaki kawaina man raroa nako ma e kukurei iai n aki ngurengure. E kamaeuaki iai te I Tiobia.
N te kauring iroun Santo Ioane ao ti tuangaki ba ti na riai n onimakina Iesu ba bon ngaia te maeu ni koaua are e a tia ni kanakomaiaki iroun Tamana are i Karawa. Bon te amarake are ti na kanna man karekea ba kanan tamneira n karokoa tokin maeura. E bon taetae man kangai, "Boni ngai te amarake ae e maeu ae e ruo mai Karawa. Ngkana iai ae e kana te amarake aei, ao e na maeu n aki toki."
Ti bia mataennanoa te amarake aei man baruia n tainako. Ti bia katang nanora ngkana a amarake iai raora ao ngaira ti aki. Ti bia bubuti katauakakira n ana baire ma ana karatia te Atua ba ti aonga ni kamaeuaki naba. Bon nanon te Atua ma natina ae Iesu ba a na bane ni kamaeuaki botanaomata nako. E bon rawawata nanon Iesu ngkana iai aika a na tiku n aki kamaeuaki ba e noria iai ae akea bonganan matena iaon te Kaibangaki iai. E rawawata iai nanona.
Ti na kakukureia ara Tia Kamaeu man bubuti n taai nako kabwaran ara bure ba ti aonga ni kona n reita te baka n amarake are e baneakinaki ni katoa Tutia. Ti a bubuti ma te nanorinano ba ti na bane ni kona ni kariaiakaki ba ti na manga kona ni botaki inanon te komunio n butimaea te amarake mai Karawa are e na kamaeuira n te maeu ae akea tokina.
Iesu nanoangaira ao kabarai ara bure ao ko bia katauira ba ti na kona ni manga kaitibo ma ngkoe inanon te takaramentu ae te Komunio ba ti aong ni bane ni kona ni kangai: O Iesu ngkai ko a roko i nanou ao an karaoa are ko taku ba I aonga n kawakiniko raoi i nanou. Bainaorakai Iesu ba aorakiu nako ma buakakau O Iesu inanou karaoiroa nanou ao kaitiakia. katamaroa ba e na riki ba n nem ae e tamaroa. Nanoangai Iesu ao buokai. Amen.
- Details
- Written by Beneteta
I kukurei n tiba au reitaki ma koraki ake a roko ni kaea te Tutia n tauni mate ibukin Fr John Bonato n te Kanimabong 27 n Eberi. E karaoaki n te umantabu i Teaoraereke man kairaki te Tutia irouia ara Tama aika a karineaki; Fr Koru Tito ao Fr Ruatamki Ambo. A bati ake a roko ao angina bon ataein mangan te reirei are e rietata, USP, Teaoraereke ni ikotaki ma uake a kaina ngkoa te reirei ae e rietata are te USP i Biti. E baroakinaki te Tutia aio ibukin reitan te nanokawaki ao te kukurei ni maten ao mangautin Iesu are e a reitia iai ma ara Tama naba ae e karineaki Fr John Bonato.
N te kauring are e anga te Tama Koru ao e kauringira aron kakawakin onimakinan ao kakoauan te manga uti ma te maeu are imwin te maeu aio. Ngke e tiba te Evangkerio te Tama Ruatamaki ao e kamatoa aron te onimaki aei are bon ngaia ae e aana ara onimaki ni Katorika ba ti na riai ni miiakina aron te maeu are moan te kamimi are bon te maeu imwin te maeu aei. E kakoaua ba te Tama John Bonato e a mena inanona ngkai man miakina aron kamaeun te maeu are imwin te maeu aei.
A rangi n raraoi tibatiba ake a taekinaki ibukin maeun te Tama Bonato ba a katea aron maeun te Tama aio nakoira ba katoto ake ti riai n mataiakin ao man uaiakin inanon maeura ae ngkai ba e aonga ni kaira kawaira nakon te maeu are imwin te manga uti. Aron te Tama Bonato are e rangi n ringa maeu ba arona ni tangira man matennanoa kamaeuan tamneira. I aki toki n ururinga aron ana titiraki ni katoa tai ae I kaitibo ma ngaia inanon ririakiu n te o n reirei n te USP i Biti ae e kangai " A uara natim?". Aron te Tama ni kan ataia ba a uara kain au utu e aki toki n anganai te kauringaki ba N na taraia raoi kain au utu ba a koringiaki n te kamaeuaki are atakin ao tangiran te Uea ae te Atua.
Ko raba te Tama n am tangira ibukia ataein te reirei ni kabane n te USP ma ai moara riki am tangira nakoira ngaira ataein Kiribati ni kabane. Ara tataro ao ara katituaraoi nakon te Atua ibukin maeum are e atia n ringira inanon ara tai ni kinako ao ara bubuti ba e bia anganiko n nem ae moan te tamaroa irarikina i Karawa. Ti a bo Fr Bonato.
- Details
- Written by Beneteta
Kam na bane ni mauri n ana tangira te Uea ao riki n te bong aio ae bon ana toa Santo Mareko te Tia Taekina te Evangkerio. E kangai Iesu nakoia ana Reirei, 'nako kabuta te aonnaba mani kaotiota te Rongorongo ae Raoiroi nakoia aomata ni kabaneia'. Ngaira naba iai tibara n te makuri aio.
'Ane e kakoaua man babetitoaki ao e na kamaeiaki. Iai tenua taeka ae e ringaki nanou iai ba ngaia aika a mena n te kibuntaeka aio. Bon kakoaua, babetitoaki ao kamaeuaki. E rangi ni kakawaki ba ti na kakoauaa te Rongorongo ae Raoiroi are ti tuangaki irouia taan kabuta te Evangkerio ma ana reirei te Aro ni Katorika. N ara kakoaua aio ao ti riai ni babetitoaki are ti na karikaki iai ba natin te Atua man reitaki raoi ma Iesu ae natina. Ti a tia ni kauringaki ni koaua n bong aika a nako ba ti na riai ni kakoaua ni koaua Iesu ba bon ngaia ae e kanakoaki iroun te Atua te Tama. Bon Iesu naba ni koaua are e riki ba kanara ni koaua ibukin maeun tamneira. Bon te amarake ngaia ni koaua are e kanakomaiakaki iroun te Tama. Boni ngaia nikoaaua ae e na kamaeuira.
Ti a nakon Iesu ma te nano rinano ao man butia ba e na anganira te onimaki ni koaua ba ngaia ni koaua te Tia Kamaeuira are e na anganira te kakabaiaki ma te kamaeuaki ni koaua n abara are e a tia ni katauraoia i Karawa. Ti bia bane n ingainga ni koaua ibukin kan karekean te aba aio iroura. E na bon raonira n taai nako man taraia ba ti bane n reke iroura te maeka n te mwenga aio n te tai teuana imwin matera.
Kam raba ao I kan kaoka riki ana taeka Santo Mareko n ana evangkerio 16: 15-20 ae e kangai; Ane e kakoaua man babetitoaki ao e na kamaeuaki.
Raomi te Uea ae Iesu Kristo.