Kanan Tamneira...
- Details
- Written by Beneteta
Kam na mauri tariu ao maneu n te Kaabong Tabu aio n ana tangira te Uea,
A bati baai aika ti kauringaki iai n te bong ae e rangi n tabu aio. N te moan wareboki ao ti kauringaki aron aia tai ni kamaeuaki natin Iteraera man ana tautaeka Barao i Aikubita. Ti kauringaki kamaeuakia n raraan te tiibu te teei ngke a kabiri bouan aia auti iai ao e tarariaoia nako Ana Anera te Atua man aki tiringi natia mane ake karimoa.
Ma n te kauoua ni wareboki ao ti kauringaki moan katean te Eukari are bon Rabatan ma Raraan Iesu are e riki ni koaua ba kanara n ua matera. Ko raba Iesu n am tangira ae moan te kororaoi. Ko aki kan kitanira ma ko kan tiku irarikira n ua tokin aonnaba. Anganira am karatia ae e tau ibukira ba ti na nora kakawakin kawaran te Eukari ni maeura. Anganira te onimaki ae matoa man nene ba ti na onimakina raoi ae ko bon mena n te Eukari.
Ioane n te evangkerio ao e manga kamatoa riki aron ana tangira Iesu nakoira ngke e tuangira ba e tangirira ni kabane Iesu. E kaboa mwin ana bure te tia kamanea n te tangira man kariaia ba e na mate n te kaibangaki. E karinanoa arona Iesu nakoia ana reirei ngke e teboka waeia man taku ba e ngae ngke bon te Uea ngaia ao te Tia Reirei e bon riai naba ba e na teboki waeia ba e kan anganira te katoto ae tamaroa. E tangirira ba ti na kakaraoa aei nakoia raora ba ti aonga ni kaota aron butimaeaia raora ma karineaia n taai nako. Ba e kangai Iesu 'ngkana ko butimaea teuare I kanakoa ao ko bon butimaeai naba.
Iesu ti kan bubutimaiko nakon maeura ba ko aonga n tangira riroura. Ti kan tangiria raora ni kabane man aki tiatiana aron ara tangira n arom ae ko aki. Ma Iesu, ae ti kan tangiria riki iaon baai ni kabane bon ngkoe.
Katauira Iesu ba ti na rin raoi inanon am Batio are e moanaki n te bong aio. Ti kan iriko ni marakim Iesu n ingabong, te Kanimabong Tabu ike ko nang uota iai am Kaibangaki nakon te Kawario.
Iesu kabarai ara bure ao nanoangaira ba ti aonga ni kamaeuaki n am tangira ae moan te kororaoi. Ti a butiko Iesu.
- Details
- Written by Beneteta
Tariu ao maneu inanon Kristo Iesu, kam na mauri n ana tangira te Uea.
Te iango bon ana makuri te kaburoro n baaire man katautau ibukin te aro teuana ma teuana. E iango Iuta ibukin ana katautau n kainanoan te mane. E iangoa te aro ae e na karekea ana mane iai ao e otinako ba kamaneakin Iesu. Iai iango aika a raoiroi ao iai iango aika a buakaka.
Iai am iango ae e raoiroi n te tai aei ae ko a tia ni babaire iaona ke ae ko kona ni katautau iai ibukin kamanean Iesu ba e na riki ba raom ke raoia raoraom ni koaua?
E taku te taeka ba iai raoiroin te iango ngkana ti kabongana raoi. ti a kataia n iango ma ngkai ba ti na kamanea Iesu ba e na riki ba raoraoia raoraora tabemaang.
Ti na tataro:
Kabara au bure Iesu ba ngkai N nang bon kamaneko moa ba ko na riki ba raraoia raraou ake n te o n karabuti i Tabonkabauea.
Iesu, n te o n karabuti ikekei ao iai te rorobuaka matoa ae e taku ba e a bon rangi ni bora ni kan nora tabon baim ni koroboki. E titiraki n te taina man taku: e rabakau ni korea arana Iesu? ao I taku, ai kamira te titiraki aei! E rabakau, I kaeka nakoina ao e manga taku; ko kona n uota tabonbaina nakoiu n te taina?Ma I a manga taku "ao tera ae ko na anganai ngkana I karaoa aei nakoim?" E kaeka n te tai aei ma te bana ae matoa man taku " N na anganiko am koom te baibu."
Iesu, taiaoka tiaina iaon au beba aio ba I a bubutiko. Korea aram raoi mai iaan am tiaina taiaoka.
Ngke e tia n tiaina au beba Iesu ao man korea arana ae e kangai "Iesu Kristo" ao I nako n angan te rorobuaka aio. Mai ikai ao e riki ba te tia neboa Iesu ni maeuna inanon te karabuti ao e kunea te kukurei. Ko raba Iesu ngkai ko a riki ba raoraoia kain te karabuti i Tabonkabauea.
Tariu ao maneu au kantaninga ba kam na kona ni manga tiba ami iango ni kamanea Iesu n te aro ae e neboaki iai arana.
Te Uea iroumi n tain te wiki ae tabu aio.
- Details
- Written by Beneteta
Antai taekana are e taekinna Itaia ni makorona 42, kibuna 1-7?
E taekinaki ana tabonibai Iawe are e a tia n rineaki. E kukurei nanon Iawe irouna ao e karuoa tamneina iaona ba e aonga n uota te eti nakoia botanaomata. E na kakaonimaki n taekina te eti ao a kantaninga ana reirei kain abamakoro nako.
I karaba teAtua ae Iawe ae bon Tamara ba e kaota nanora n te evangkerio are e atunaki n kabiran Iesu i Betania. Bon Maria are e kabira Iesu n ana ba are moan te boiarara ao man kinaaki bobuakana iroun Iuta are e kamanea Iesu nakon te mate. I uringa ana tibatiba temanna iaon te bai ae te mane ba e taku ba ti arana te mane n arana aei ibukina ba bon te bai ae e kamamane. E taekinaki ba ngaia ae e mane iai Iuta man matai nanona n reken te mane irouna ao n tokina e kukurei ni kamanea Iesu.
Ma te bai ae ti na karabaraba riki iai bon kakawakin te tai are i Betania ngke e kabiraki waen Iesu n te ba aei ba e taku Iesu ba e karaoa aei Maria ba katauraoana imain matena. E ataia ae e a kan te tai ibukina ba e nang mate ba e a tia ni kataua mai inanona ae e na riai ni mate ibukira.
Ai tikiraoira tiban Maria aio ba e kaota nanora iai ba Iesu bon ana tabonibai Iawe ngaia ae moan te ongotaeka. E kariaia ba e na mate ibukira ao e tuangira ngke e kabiraki n te tai aio ba eng aio te katauraoi ibukina imain matena. Ai kawara n ana taeka aio!
Iesu ae bon ngkoe te Tabonibai ae e ongotaeka, e kabiriko Maria ba katauraoam imwain matem. Iuta e bon aki ota n am iango ma am tangira. Ma engae n anne ao kanga ti bon mataiakina naba aron te makoro ake a katauaki ba a na karaoi nakoim e ngae ngke e kamaneko Iuta man karaoa ae e aki tau nakoim. Ko kauki matara riki iai ba a bon bati ara tai ake ti a tia n riki ba Iuta naba iai. Ti tataro man butiko Iesu n te tai aio katauira ba ti na rianna ma ngkoe. Kauti nanora n aron are ko kauta Rataro man te mate ba ti aonga n iriko inanon am batio ae moan te tabu ni kaea te manga uti i Ierutarem iroun Iawe ae Atuara. Amen.
- Details
- Written by Beneteta
Iesu, n te bong ae te Kauabong ao ko kaotia ba ko nang kamaneaki. E taku Ioane ba ko kangai "I tuangingkami ae bon te koaua: e na kamaneai temanan mai ibuakomi." Ti bakaraki n te nanokawaki ngkai ko atonga aio Iesu ao ti kan kabara ana bure Iuta e ngae ngke e a tia n nako te tai are e mena iai ma ti ataia naba ba bon iai riki Iuta aika a bati ibuakora. Boni ngaira ni kabane. Kabarai ara bure Iesu ao nanoangaira ba ti a butiko.
N tabetai Iesu ao ti bon kan manga katotonga naba Betero are e ninikoria ngkai man kangai 'ba ko na nakea? ao eaera ngkai ti aki kona n iriko? Kai I a tauraoi ni mate ibukim' ma ko bon ata mwina ae ti na manga bon biu man taenikai ngkana e a roko n korakorana te kataaki.
Iesu, bon ngkoe muiokon te maeu ma te korakora, ti reitiko n wikin te batio aio man butiko am karatia ae e tau ibukira ba ti aonga n matoa n ara moti n nano are ti na kona n raoniko iai inanon reitakira ma Tinam ae Nei Maria n te miterio ni maraki man airi ma ngkoe nakon te Kawario. Kakorakoraira Iesu ba ti tangiriko.
- Details
- Written by Uriam Timiti
Tera te Wiki ae Tabu ae tera nanona ibukira n tatabemanira? Aio bon te wiki are imain te Bakate ao kabanean wikin te karemo. E moanaki te Wiki ae Tabu man Toan te Banni ao e na toki n te Kaonobong Tabu, te bong are imain te Bakate. Bon iai bong aika kakawaki inanon te wiki aio ba te Kaabong Tabu, te bong are E kana iai te Riao Iesu ma ana Abotoro ao E katea iai te Takaramentu ae te Eukari ao te tai naba are moanaki iai marakin Iesu i Ketemane. Imuina ai bon te Kanimabong Tabu, te bong are e rinanon bation te maraki Iesu ni karokoa ae E a tauraki iaon te kaibangaki ao ni mate. N te Kanonobng Tabu are tokin te Wiki ae tabu ao e a reitaki nako te aki mamatam ao te Benetenia ni karokoa te tairiki are e a moanaki iai kauringan mangautin Iesu man te mate.
Are nanona ba te Wiki ae Tabu bon te taai are ti raona iai Iesu inanon marakina ao matena ao n uaia ni katonga ma Ngaia te mangauti man te mate. Bon aio ngkanne te wiki are ti rinanon iai miterion kamaiuakira iroun te Atua iroun Natina ae Iesu are e kaboira n Rarana ae moan te Tabu ba ti aonga ni kona ni karekea te maiu ae mimitong inanon mangautina.
Ti na bane ni butimaea Iesu n te bong aio ngkai e rin i Ierutarem ba e nang rinanon te maraki ao te mate ibukira. Ti na uaia n reitaki ma te koraki ni kauea Iesu ae Natin te Atua ao n anenea neboakina ni kangai, "E tabu, Etabu, E tabu te Uea ae te Atua Tabaota. A on karawa ma aonaba ni mimitongina, Hosanna i etan karawa, E na karoairoaki Teuare E roko n aran te Uea, Hosanna i etani Karawa. Ti na kaota kakoauani Iesu ae bon te Atua n raonna inanon te wiki aio ba ti aonga ni karekea te kamaiuaki inanon mimitongin mangautina.