Kanan Tamneira...
- Details
- Written by Uriam Timiti
N te moan wareboki n te bong aio ao ti ongo ana taeka te Uea iroun Ieremia are kangai; "e na reke kain are e onimakina te aomata ao e ukera korakorana man te iriko ao e tan nako mairoun te Uea". Ba e na riki ba kanga te kai i buakonikai ae e tei n te tabo ae mauteretere ao e na rai baana ao e na aki kona ni karikiua. Te aomata are onimakina te Atua kanga aiaron te kai ae tei i etan te karanga are e na maiureirei ibukina ba e kaan ma te ran ao wakana a buti nako ni karekea te maiu man te ran.
Ti nora aron koauan te rongorongo aio ni karakin Rataro ao te kaubai. Ba tera ae riki nakon te kaubai are e onimakina korakorana man kaubain aonteaba? Eng e bon anganaki te maraki ao te kainnano ae aki toki i moone. E bon kananoanga te kaubai ba e aki kan onimakina te Atua inanon maiuna ao e taku ba e kabanetai te onimakinan ao karaoan nanon te Uea. Irarikina ao e kawa te kaubai aio ba e aki reke ana tai n raira nanona ao e a toki naba muina. Te bai ae moan te kananokawaki riki ba ngke e a roko i mone ao a tiba ure matana ao e uringaba man tang ni kananoanga nakon Aberam ni bubutia ba e na kamaitoroa newena n te ran.
Ngaira aika ti maiu i aonteaba bon iai tibangara ae kakawaki man te karaki aio ba ti na kakoaua ae iai te kabaia ae totoki i Karawa ao iai naba te maraki ao te tang ae aki toki i moone imuin te mate. Ti bia reke ba ana koraki te kaubai ngaira are e uringia ngke e rinaon te maraki i moone man bubutia Aberaam ba e na kanakoaki temanna nakoia n tuangiia ba a na rairi nanoia ba aonga n aki roko n te tabo ni kamaraki i moone.
Ti na tauraoai ni butimai taian kainnano n te maiu aio ao ti na bane n onimakina te Uea ba ti Ngaia ae kona n anganira kororaoin te kabaia ma te kukurei. Ti na butia te Uea ba e na anganira te wanawana n rinea kawain te maiu ao te kabaia ao n aki tinetineaki ni kaubain te aonaba aio ake a na kairira nakon te mate. Ngkana ti ongo banan te Uea n te bong aio ao ti bia aki kamatoai nanora ma ti na rairi nanora ngkai naba ba muina ti kauiaki.
- Details
- Written by Uriam Timiti
Aikai bon ana taeka Iesu nakoia ana reirei are kaota iai te bai ae nang riki nakoina. A taku taan rabakau n te Nu Tetamenti ba e kona n tibaki maiun Iesu imarenan tabo aika uoua, ba Kariraia ao Ierutarem. E reirei Iesu ao E kabuta te Rongorongo ae Raoiroi i Kariraia. Ngke e aroko te tai ae E kaotia Iesu ba a nang nako Ierutarem.
Tariu ao maneu tera ae ti kona ni karekea n te nako Ierutarem? Eng bon katotongan Iesu are e rinanon te maraki ni karokoa ae tine iaon ana kaibangaki ba e aonga n reke te kamaiuaki nakon aonaba. E weteira Iesu ba ti na katonga te mangko are E a tia n nimma are nanona ba akea riki te kawai ae ti na kamaiuaki iai ba ti n tabekan te Kaibangaki. Ti na bane ni kauki nanora inanon tain te karemo aio ba ti na bane n ira Iesu nako Ierutarem ike ti na rinanon iai te maraki ma taian rawawata ao ti na mate ma Iesu nakon nanora ao ni mangauti ma Ngaia inanon Bakate.
Ngkana iai taian kataki aika ti kaitibo ma ngaai inanon raonakin Iesu i Ierutarem ao ngkana iai aika a kataia ni kabakaira ao ti na riai ni katotonga Iesu n ana tataro are kangai, "Tamau, I katuka tamneiu inanon baim". Are nanona ba ti na tauraoi ni katikui arora ni kabane inanon ana kakawakin te Atua. Bon te Atua ae na anganira te korakora n uoti taian rawawata ao bon te Atua naba ae na kawakinira mairouia aiara ao riki teuare buakaka are bon ti teuana ana kantaninga ba e na iangoia ba ti na raure nako ma te Atua ao ti na mate n aki totoki.
- Details
- Written by Uriam Timiti
N reitan tibangara inanon te karemo ao ti a kauringaki n te bong aio ba ti na riai ni baina te nanoanga. Ngkana ti kan karekea te maiu ao ti na riai n ata raoi nanon ana taeka Iesu aikai ba ti kairoroaki iai. Te nanoanga bon ngaia teuana mai ibuakon taian aro ni maiu aika raoiroi aika ti na riai ni maiuakin ibukin karekean te maiu ae akea tokina. N te tibatiba teuana are I karekea mairoun Akorita Teebanako are e rang teke nanou iai bon te rongorongo ae kangai ba "ti na riai n karemo ke n taubang man te kairiribai ao ni kanuaira n te tangira ma te nanoanga " ao manga teuana riki ae kangai, "ti na riai naba ni karemo ke n taubang man motikan taekaia raora ao ti na barua ke ni kanuaira n te tataro ibukia ara kairiribai".
Tariu ao maneu e koaua ba mai buakon mamarara ae ti ataia ao bon aikai aika a toki n okioki- te kairiribai ao te rawa ni kabarai aia bure raora, ao ai te tauraoi ni kabuakakaia ke ni motikii taekaia raora. Ti na riai ni butia te Atua ba E na kabarai ara bure man ara bure ni kairibai ao ni motikii taekaia raora. N aron te taeka ni moan kaukan te karemo are kangai, " Bon aio te tai (ae ngkai) ae moan te angaraoi, bon ana tai ni kamaiura te Uea", ao ti riai ni motikia ba ngkana iai ae ti ataia ba ti riribaia ao e bia reke te tai aio ba ti na tangiriia ao n nanoangaiia n airon ae tuangira Iesu n te bong aio. Irarikin anne ao ngkana ti karaua ni iangoa aron te bai ae te kairiribai ao ti na kunea ba raona n taai nako bon te motiki taeka. Ma E kauringira naba Iesu n te bong aio ba ti na aki motikii taekaia raora ba ti aonga naba n aki motikaki taekara iroun te Atua. Ba n aron are ti motikii iai taekaia raora ao anne are e na bon motikaki naba iai taekara iroun te Atua. Ba te aomata ae motikitaeka bon te aomata ae taku ba akea ana bure ao te tia kewe. Ba akea ae kororaoi ma bon ti te Atua.
Tariu ao maneu ti na keiakina te motinnano aio inanon ara karemo aio ba ti aonga ni namakina te mate n nanora ao ni kona ni katonga te mangauti ma Iesu inanon Bakate.
- Details
- Written by Uriam Timiti
Ti ongora n te bong aio mairoun Itaia ana kauring te Atua nakoia kain Totom ao Komora ba a na riai ni katikiia ao ni kararoai mai matan te Atua aia makuri aika bubuaka mani kammaira. E tangiria Iesu ba ti na ataia n taai nako aron ana tangira ma ana nanoanga ibukira ba ti na bane ni kamaeuaki. E kangai Iesu, "Manga kaeti baai ni kabane ao rairi nanomi;... e ngae ngke kam barekareka n ami bure ao I kona ni kamainainai ngkami n aiaron te tinoo... Ba ngkana kam ongo n au taeka ao kam na kamarakeaki n raoiroin aonteba ma ngkana kam rawa n ongo ao kam na mate n te kabaang" Are nanona ba E aki kona n ae a na akea te bai ae na karaoia te Uea nakon ae teimatoa ni maiu inanon te bure ao buakaka ao e rawa n ongo ana taeka te Atua. Nte taramo ao ti tuangaki ba ti na aki ti taekin ana tua te Atua ao ana berita n akoi ni matanriara ma ti na riai ni maiuakinna ao ni kaotia n ara makuri.
E buokira St Padre Pio n te bong aio n ana reirei ae kangai ba ti na teimatoa ni karaoi makuri n nanorinano ao n tangira nakon te Atua ao nakoia aomata. Ba E taetate te Atua ba E na karanga ana kakabaia nakon te aomata are teimatoa ni maiuakina te nanorinano. Ao ngkana E anganiko taian maraki te Uea ba ko aonga ni kona n nora raoi aron uarereken am konabai ao mamaram ao ko riai n tai nako ni katoka iaom te nanorinano ao te aki barannano. Ba ngkana ko baka inanon te mamara ao atonga te tataro n taenikai ao ni kantaninga nakon te Atua are E na manga kaonrakeko n ana karatia ba ko na tokanikai.
Ti na manga bane ni kauki nanora nakon ana wewete te Uea nakon te rairannano are na riai ni boto iaon te nanorinano ao te ongotaeka nakon te Atua.
- Details
- Written by Taranieta
N te ingabong aio ao kanoan te wareboki n te Tutia bon taekan ana rairannano Niniwe man ana rongorongo te Atua are e nikiria Iona irouia kain Niniwe.
A bakaraki kain Niniwe n ana karaoiroi ma ana kakabaia te Atua ba a rairannano ni koaua man aia bure, aomata ao maan ake a aki mamatam ma ni moi.
E taku ana taeka ara Tama n te Tutia n te ingabong aio ibukia kain Niniwe, “Ao e bakaria ana karaoiroi te Atua n aiaron timtimuin te aoi n te karangaina.”
Ti ataia ao ti kakoaua ba iai baika a bakaraki iai kain Ninwe aika a rangi n tamaroa mai iroun te Atua ao ti na taraa aron b’aron te timtim n aoi aio iaoia kain Niniwe ba tera kanoaia, ni matan ara onimaki.
Aiaron naba aron baron ana karatia ma ana karaoiroi te Atua iaora, a b’aka naba n aiaron timtimuin te aoi n te karangaina iaora, ma n angin te tai ao tiaki nori ni matan ara onimaki, ibukina ba tiaki katamnei inanora, e ngae ngke ti ataia ba E kakaonimaki te Atua.
N ara tai n tataro, n ara Tantani ao n ara Tutia n te karemo aio, ao ti na kaurei raoi matan ara onimaki ao ni katamneii aron baike e kab’aroi iaora te Atua n tai aika a nako, ao ngkai ti tataro, ngkai ti kakoauai ba a riki. Tina kona n norii ni matan ara onimaki rangan ana tangira ma ana karatia ao kakab’aia ake E tabe ni karaangai iaora ma uake ti tataro ibukia. Ti na kona n nora iai aron tamaroan tamneira ngkana e bakarira ana Karatia te Atua ao ti a teke n otan Iesu, n aiaron tamaroan timtimuin te aoi ngkana e a teke n otan tai n te inabong.
Ibukin banna ma tamnei ake E anganira te Atua ba ti na norii ni matan ara onimaki, ao ti a anganna ara katituaraoi. I katituaraoiko te Uea.