Kanan Tamneira...
- Details
- Written by Taranieta
N te wiki aio ao I miakina te kainrawetamnei ae e karaoaki rabatana n te tirewa ao e taraa n ae e a tia n kakabonganaki ba e a moanna n ura are mai iaona. Te kamimi n te kainrawetamnei aio ba tiaki aekakin kainrawetamnei ake rimoa ba bon tein aika a otomatiki n tai aikai, ma e taraa n rangi ni matoatoa ao e na kona ni kabonganaaki inanon iraua ma iraua riki te ririki.
I nanon au maroro ma te Uea iaon te banna aio ao I nora iai aron baanan te botanaomata ake a tia n raweaki ao ni kawakinaki n ana areb’am (album) te Atua i karawa ake a riki ba ara rekooti (record).
I nora riki aron tamneiu ake a tia n reke n ana kainrawetamnei te Atua ao iai tabeua ake I bon aki kan uring ao I bubutia te Atua ba e na nanoangai ni kamaunai, ao E na aki uring Ngaia, ao E na kamaunai naba man au iango! Ba I onimaki ba bon ti Ngaia ae E tautaeka iaoia ao ti Ngaia ae E m'aka ni kamaunai ao E kona.
Iai naba ake a bon aki bati ni kakamataku ba I tarabuaka iai ao I bubutia naba te Atua ba e na nanoangai ni katararaoai mai iai.
Iai naba aika a I taku ba a taraa raoi riki ao I a kan ururingi riki.
Ni katoa tekan, I ataia ba e raweaki tamneiu , ao a kawakinaki n au arebwam iroun Iesu.
N na bubutia Iesu ma ngkami, tariu ao maneu, n te tai aio ba E na nanoangaira ni kamaunai tamneira ake E matauninga iai, ao ti bon aki kan uringi naba, man ara arebam, n rarana ae moan te Tabu, ba kanoan ara karemo.
Ti na butia naba ba E na anganira te nano ae e na karekei tamneira aika a moani baan te tamaroa n tainako ni uaan ara karemo.
- Details
- Written by Taranieta
Akea kaburen ana babaire te Atua ao akea ae e kona ni kauntaekaia ba e bure.
Ngkai te Atua bon te Koaua ao E karaoi Ana babaire inanon te Eti. Are nanona ba ngkana ti rineia ba ti na karaoa te bure, ao E karaoa te Eti te Atua n anganira boon ara makuri, ni bon etina ao ni koauan boon muin ara makuri.
Ai arona naba ngkana ti nakoina ma nanora aika a raraoi, ao E anganira naba boon ara bubuti nakon etin ao koauan nanora Nakoina.
N tain te karemo aio ao bon ara tai ni karikirakea kororaoin te Koaua iroura. Bon akea aron rekena ba ti iroun Iesu ngkai Iesu, ti bon ataia, ba bon te Koaua ao te kawai.
Ti na keiaki ni katotongnga ngkai, n raonaki iroun Tinara Nei Maria, ni karikirakea kororaoin te koaua iroura, are e na onikira nakon te maiu ae e tabu imatan te Atua.
N tain te onikaki n tainako, inanon te karemo aio ao ti a butia te Atua, ba ngkana e onika te bane ni m’akan te Tamnei ae e Raoiroi nakon rab’atan ao raran Natina ae Iesu ni koaua, ao tia butia ba E na onikira naba n te tekan anne, ba ti na onikaki n ti teuana ma Iesu, n rabatara ao tamneira, ao E na kakororaoa riki te koaua inanora, ba ngkana e a rin Iesu inanora ni mimitongina, n tain te komunio, ao tina kona ni botaki ni Koaua ma Ngaia.
Ti a butia Iesu, n ara tai anne ba E na nanoangaira n anganira te kantaninga ae e matoatoa, ba ti na tokanikai ni bane, n roko irarikina n tokin ara borau iaon te aba, ba E na anganira te teimatoa ao te rikirake n te tamaroa ao te raoiroi, ao te korakora ma te nanom’aka ni karaoi tabera, ni kororaoin aron karaoakia n tainako. Ti onimaki ba E ongo ara tataro ni bane, Tamara ae te Atua. Ko raba te Atua.
- Details
- Written by Taranieta
Te kakauongo nakon ana Taeka te Uea bon kawaira n nakon te ongotaeka iroun Atuara. N au kakauongo nakon ana taeka te Uea mai iroun Itaia 58:1-9 ao ti kauringaki iai arora inanon tain te Karemo.
N ana kauring Itaia ao e titirakinira- te aeka ni Karemo ra ae ko mena inanona ngkai? Ko taubang ibukina ba ko na noraki ni karinanoko? ko taubaang ibukina ba ko tangiria ba ko na noraki n mata ni baki ke ko taubang ba ko na noraki ae ko ira nanon te Ekaretia ao angkoa ko ira nanon te Atua. E reireinira ikai ba ti na aki karika ara Karemo ba te tai ni kaunia man karekea te kiriwe imarenaia raora, e na aki riki ba te tai ni motiki taekaia raora ke te tai ni kakabotau imarenaia uake a raoiroi ma ake a buakaka. Ti na ururingnga ba bon ti te Atua ae e raoiroi.
E bia riki te tai ni Karemo aio ba ara tai n rairi nanora man okira te Uea aoman kanenei iai ara onimaki n Ana Taeka te Uea are ti kunea n taai nako n ana boki ae tabu ae te Baibara. Ti na tataro nakon te Uea ae Atuara ae E on n te tangira ba E bia tatauraoi n ongo banara ngkana ti weweteia ao man akoira n ara tai n rairannano.
Ti na tataro:
Iesu ae natin te Atua, ko na mauri mai iroura n te tai aio. Ko raba n am taeka nakoira n te bong aei. N tain te Karemo aio Iesu ao ti noria ba kanga ti a manga rangi n ti tabe ma ngaira ao n maninga taekaia raora. A babane ara iango iaora ma arora n tain te Karemo aei ba ti ingainga ni kan ienikuria te raoiroi ni maeura ae bon ti ngaira iai.
Ti ienikuria aron raoiroin ara taubaang ma ara karea ma arora n rairannano nakoim ba a aonga ni kamaeuaki tamneira. Ma ngaia ti a maninga ae iai riki raora aika ti riai n tabeakinia moa; iai ara utu, iai ara makoro; iai raora n makuri; iai raora n tatataro; ao iai nikiraia ake ti riai naba n tnagiria. Iesu weteira riki ni banam ae maitorotoro man maraara ba ti aonga n bane n rin inanon te raira n nano ni koaua. Tuangira ba ti na tangiria raora ni kabane ba a na bane ni katanaki ao ni kamaeuaki man; makuri n iowawa; aro ni kakananoanga; te baki ma te kan mooi ao ai aro ma makuri ni kakaokoroaki. Iesu ko tuangira ba makuri n tangira bon te wewete nakon te raira n nano.
Reireinira ba ti na aki kabanei ara tai bon ti ibukira ma katauira Iesu ba ti na riki ba am oota ni kainaomata nakoia raora. Buokira ba n ara taubaang aio ao ti na buokaki iai ibukin karaoiroan arora ae te kan kakaokoroira ma te kan taraaki ba e raka riki arora nakoia tabeman, karika ara taubang aio Iesu ba buokara n aki wiwinanti ao n
aki tataetae n aki akaka ibukia ao nakoia natira, buura ao raora n makuri ma tabeman riki, karika ara taubang aio ba e na kamaunai arora aika a bubuaka aika a na kamemerea aron aia kekeiaki raora nako. Iesu, ngkana ko kataua ba e na tabangaki te tangira ae am tangira nakoira ni kabane ao mai ikai Iesu are ti a kona naba ni bane ni kangai bon ngkoe Atuara ni koaua ao ngaira bon ti irua n am baka n amarake n tain te Karemo aio!
Nanoangaira te Uea, Kabarai ara bure ba ti a bubutiko. Amen.
- Details
- Written by Uriam Timiti
Ko raba Iesu n am taeka ni kaunga nano nakoira ngaira taan bure. A bati mamarara te Uea ao ti aki toki n taonaki n rawawatan bure taiaoka nanoangaira.
Tariu ao Maneu n ana tangira te Uea e tauraoi Atuara ni butimaira n te tai ni Karemo aio ba E a tia n roko Iesu n weteira. Ti nang manga kauringa naba rokona ngke E kakoroa nanon ana tangira Tamana mani mate ibukira. N te Karemo ae ti mananga ma Ngaia iai aei ti bon kauringa ana katauraoi imwain kakoroan nanon ana tangira Tamana ibukira ni kabane.
Itaia 58:9-14 e tuangira ba e tauraoi n ongo ara bubuti Atuara ae Iawe ngkana ti tang nakoina. E kauringira ba ti riai ni kaaki arora ni kawai ao man kaeti arora ake a aki eti ba e aonga n waekoa n ongo banara te Uea. E kauringira naba aron kakawakin te bong ae te Tabati. Karinean te bong ae te Tabati bon teuana mai ibuakon ana Tua te Atua ake tebuina. N ana taeka Itaia ao e taku ba ngkana ti kawakina te bong ae te Tabati ao e na bon karekea kakannatora te Atua ao man kabaibaira n aban ara bakatibu ae Iakoba.
Ti a bubutia Iesu n te tai aio ba E bia buokira man reireinira n toua kawaina ba ti aonga ni kona n nakonako n te kawai ae e eti n tainako. Ana tangira te Uea nakoira ni kabane inanon ara mananga n te Karemo aio. Nanoangaira te Uea ao kabarai ara bure.
- Details
- Written by Uriam Timiti
"Tabekan te kaibangaki irou, e bon rawawata..."bon manewen te anene te korona ae e kakauringai ba uotan te kaibangaki ao irirakin Iesu e bon rawawata.
E ngae n anne ao iai kairan maeura ba ti aonga n ata ae e eti ao ae e kairua ba Ana Tua te Atua ake tebuina.
N te moan wareboki n te bong aio ao e taekina ae e kangai- ngkana ko kawakina ana Tua te Atua ao E na kakabaiako (Tetaronika 30:15-20). E bia ingainga nanora ni kan katonga ana kakabaia te Atua ae e taekinaki aio. E bia ukeuke nako nanou man kakai anga aika a na katauai ba N na kona ni kawakini ana Tua ma te taratara raoi ao te maaku ba e na kangai nanou n taai nako; ngkana I aki karaoa ae nanon ana tua te Atua ao ae E na bon aki kona n reke irou te kakabaiaaki aei. E bia taka nanora ni kan kaonrakeaki n te kakabaia aio ma te uki n nano ba ti aonga ni butimaia raoi ma te kariaria.
E reitaki n te ewangkerio iroun Santo Ruka ngke e kauringira ana taeka Iesu tabeua aika a kangai:
Ngkana ko kan rimwiu ao tabeka am kaibangaki. E reitia man taku- uringnga ba ane e kakea maeuan ibukiu ao e na bon kamaeuaki. Ma ngaia are ti a bane n rimwin Iesu inanon ara bong ni karemo aikai ao ti a tabeki ara kaibangaki man butia ba E na buokira n ana karatia. Ti a tuangnga ae akea ara kona ngkana e aki raonira ma ti ataia ae ti na riai n itiaki man te bure moa ba ti aonga ni kona n kaonrakeaki n ana karatia are bon ngaia buokara.
Ti a tataro: Iesu, ti kan ririmuim ma e tinebu ara kaibangaki ao n tabetai ti a kua. N tabetai Iesu a tinebu ara kaibangaki ba a taonaki n ara bure aika a bati. Bon taan bure ngaira ti aki kona n kororaoi ngkana kanga ti nang moanna n itiaki ao ti a manga kaririaki naba man moana touan kawai aika a uotira nako man am Tua ake tebuina. Ko aki kan nanoangaira taiaoka, ko noora nanora nikan iririko Iesu. Nanoangaira ao kabarai ara bure ba ti a bon bubutiko.